1. Manoa ia kamonai ia be tamana ai do ia lao neganai, dahaka ia karaia?

 MANOA ia diba ena adavana be gabani. To dina ta, Iehova ena aneru ese iena adavana ia hamaoroa ia be natuna ta do ia havaraia. Unai be hoa gauna, ani? Manoa ena adavana ese ia dekenai unai sivarai ia gwauraia neganai, Manoa ia moale bada. To Iehova ese idia dekenai ia henia maduna ia laloa danu. Unai nega ai, Israela taudia be kara dika momo idia karaia, unai dainai Manoa bona ena adavana ese edena bamona edia natuna mero do idia hadibaia, Iehova ia hesiai henia totona? Manoa ese Iehova ia noia, ia gwau: “Mani emu kara, hari oi siaia tauna, [aneru] ma do oi siaia mai lou, ia ese ai ma do ia hadibaia. Badina ai ura diba, inai mero ia vara neganai, ia dekenai dahaka do ai karaia.”—Gun. 13:1-8.

 2. Emu natuna oi hadibaia neganai, dahaka oi karaia be namo? (Maua ladana, “ Daika Do Oi Stadi Henia Guna?” herevalaia danu.)

² Bema oi be tama o sina ta, reana Manoa ena hemami oi lalopararalaia. Oi danu be mai emu maduna emu natuna do oi  durua, Iehova ia dibaia bona lalokau henia totona. a (Aon. 1:8) Unai dainai emu Ruma Bese Ena Tomadiho negadiai, emu natuna oi durua Baibel ena hereva momokani ia dibaia totona. To unai sibona lasi, namona be ia ida gau haida oi karaia. (Deuteronomi 6:6-9 duahia.) Vadaeni, edena dala ai emu natuna dekenai hereva momokani oi hadibaia diba? Inai stadi bona gabeai stadi ai, tama sina ese Iesu do idia tohotohoa dalana do ita herevalaia. Oibe, ena be Iesu be tama ta lasi, to ena hahediba taudia dekenai lalokau, manau, bona laloa kehoa ia hahedinaraia. Tama sina ese iena hadibaia dalana amo heduru idia abia diba. Mani unai kara ta ta ita herevalaia.

 3. Edena dala ai Iesu ese ena hahediba taudia dekenai lalokau ia hahedinaraia?

³ Iesu be nega ibounai ena hahediba taudia ia hamaoroa idia ia lalokau henia. (Ioane 15:9 duahia.) Bona nega momo idia ia bamoa. (Mar. 6:31, 32; Ioa. 2:2; 21:12, 13) Iesu be edia hadibaia tauna sibona lasi, to ia be edia turana danu. Unai dainai idia diba momokani Iesu be idia ia lalokau henia. Edena dala ai Iesu ena kara oi tohotohoa diba?

 4. Edena dala ai do oi hahedinaraia emu natuna oi lalokau henia? (Laulau ginigunana herevalaia.)

⁴ Namona be emu natuna oi hamaoroa ia oi lalokau henia, bona oi hahedinaraia ia oi laloa bada. (Aon. 4:3; Tito 2:4) Samuel be Australia dekenai ia noho, ia gwau: “Lau maragi neganai, egu tamana be hanuaboi ibounai lau dekenai Lauegu Baibel Sivarai Bukana ia duahia. Egu henanadai ia haerelaia, lau ia rosia, bona ia kisi henia. To gabeai lau laloparara, egu tamana ia maragi neganai, iena tama sina be unai idia karaia lasi! To ia hekwarahi lau dekenai iena lalokau ia hahedinaraia totona. Unai dainai emai hetura karana be ia goada bona lau  mamia egu tamana be lau ia laloa bada.” Namona be emu natuna oi durua unai ia mamia totona, bona ia oi hamaoroa, “Oi lau lalokau henia.” Ia oi rosia bona kisi henia. Bona ia ida oi herevahereva, aniani, bona gadara.

5, 6. (a) Iesu ese ena hahediba taudia ia lalokau henia dainai, dahaka ia karaia? (b) Edena dala ai matahakani karana ese emu natuna ia durua?

⁵ Iesu ia gwau: “Lau ura henia taudia ibounai lau sisiba henia bona lau matahakani henia.” b (Apok. 3:19) Ena be Iesu ena hahediba taudia be daika ia bada idia hepapahuahulaia loulou, to idia dekenai ia hesiku lasi. Iena sisiba idia badinaia lasi neganai, ia badu lasi. To mai lalokau bona manau ida nega bona gabu maorona ai idia ia hamaoromaoroa.—Mar. 9:33-37.

⁶ Emu natuna dekenai lalokau oi hahedinaraia dalana ta be ia oi matahakani henia. Ia dekenai dala maorona bona kererena oi hahedinaraia. To nega haida emu natuna be emu hereva do ia badinaia lasi. (Aon. 22:15) Bema unai ia vara, namona be Iesu oi tohotohoa. Mai lalokau bona manau ida nega bona gabu maorona ai emu natuna oi matahakani henia. Bona oi hesiku lasi ia oi hadibaia bona hamaoromaoroa totona. South Africa dekenai ia noho taihu, Elaine, ia gwau: “Egu tama sina be nega ibounai lau idia matahakani henia. Lau idia hadibaia bema lau gwau-edeede, lau do idia matahakani henia, bona unai idia karaia.” To lau idia matahakani henia neganai, ena badina idia gwauraia danu. Unai idia karaia dainai, lau diba idia be lau idia lalokau henia.”

7, 8. (a) Edena dala ai Iesu ese ena guriguri amo manau karana ia hahedinaraia? (b) Emu guriguri ese edena dala ai emu natuna do ia durua?

⁷ Tanobada ai, Iesu ese ia gwauraia gurigurina be iena hahediba taudia ese idia kamonai eiava gabeai idia dibaia neganai, mani edia hemami oi laloa. Iesu ia gwau: “Abba, Tamagu e, gau ibounai oi karaia diba, mani inai kapusi be lau amo oi kokia. Lauegu ura hegeregerena lasi, to oiemu ura hegeregerena.” c (Mar. 14:36) Iesu ena guriguri amo ia hahedinaraia, ena be ia goevadae, to mai manau ida Dirava amo heduru ia noia. Iena hahediba taudia danu be unai bamona idia karaia be namo.

⁸ Emu natuna be emu guriguri amo dahaka ia dibaia? Oi guriguri neganai, oi ura emu natuna oi hadibaia sibona lasi, to ia oi durua Iehova dekenai ia tabekau totona. Brazil ai ia noho taihu, Ana, ia gwau: “Hekwakwanai negadiai, hegeregere egu tubudia idia gorere neganai, egu tama sina be Iehova idia noia idia do ia durua idia haheauka totona. Bona aonega do ia henia abia hidi maorona idia karaia totona. Herevana hekwakwanai idia davaria, to Iehova dekenai idia tabekau. Unai dainai Iehova tabekau henia karana lau manadalaia.” Emu natuna ida oi guriguri neganai, ia sibona totona oi guriguri lasi. Namona be Iehova oi noia oi do ia durua danu—reana emu bosi oi hadibaia hebouhebou dainai dina haida do oi gaukara lasi, o emu neiba oi haroro henia totona, o dala ma haida ai oi do ia durua. Namona be mai manau ida Dirava dekenai oi tabekau bona emu natuna ese unai do ia tohotohoa.

 9. (a) Iesu ia ura ena hahediba taudia be edena kara do idia hahedinaraia? (b) Ma haida hesiai henia karana amo emu natuna be dahaka do ia dibaia?

 ⁹ Iesu be ena hereva bona kara amo ena hahediba taudia ia hadibaia, mai manau ida ma haida idia hesiai henia totona. (Luka 22:27 duahia.) Iena aposetolo taudia ia hadibaia Iehova idia hesiai henia bona edia tadikaka idia kara henia neganai, sibona edia ura do idia dadaraia. Mai manau ida sibona emu ura oi dadaraia neganai, emu natuna be unai ia itaia. Debbie be sina ta mai ena natudia rua, ia gwau: “Egu adavana be elda dainai ma haida totona ena nega bada ia henia, to lau maumau lasi. Badina lau diba iena heduru ai ura negadiai, ai do ia durua.” (1 Tim. 3:4, 5) Iena adavana Pranas, ia gwau: “Gabeai, emai natudia be hebouhebou bona tiokratik gaukara idauidau idia durua danu. Idia moale, badina tura namodia idia davaria bona idia ura bada tadikaka taihu ida idia noho!” Hari idia be ful-taim hesiai gaukara idia karaia. Bema oi manau bona sibona emu ura oi dadaraia, emu natuna be unai do ia itaia bona do ia ura ma haida ia durua.

10. Hutuma be Iesu itaia totona idia mai neganai, edena dala ai Iesu ese laloa kehoa ia hahedinaraia?

¹⁰ Iesu ese laloa kehoa ia hahedinaraia dainai, taunimanima edia kara ena badina ia lalopararalaia. Oibe, ia be taunimanima edia kudouna ia diba. Hegeregere, nega ta Galilea ai ia idia kamonai henia taudia haida idia ura Iesu murinai idia raka. (Ioa. 6:22-24) To Iesu ia laloparara taunimanima be aniani idia ura, to ia hadibaia gaudia idia laloa bada lasi. (Ioa. 2:25) Unai dainai mai haheauka ida edia lalohadai kererena ia hamaoromaoroa bona edia kara idia hanamoa daladia ia herevalaia.—Ioane 6:25-27 duahia.

11. (a) Edena dala ai laloa kehoa do oi hahedinaraia? (b) Emu natuna ese haroro gaukara ia moalelaia totona, dahaka do oi karaia?

¹¹ Herevana oi be emu natuna ena kudouna oi diba lasi, to laloa kehoa oi hahedinaraia neganai, emu natuna ena hemami haroro  gaukara dekenai do oi diba. Hegeregere, haroro negadiai tama sina momo be edia natudia dekenai nega idia henia idia laga-ani, ranu idia inua o idia aniani totona. To oi sibona oi nanadaia: ‘Egu natuna be haroro gaukara ia moalelaia, o laga-ani negana sibona ia moalelaia?’ Bema emu natuna be haroro gaukara ia moalelaia lasi, namona be ia ida tahua gaudia haida oi atoa. Eiava umui haroro lalonai gaukara ta oi henia.

12. (a) Iesu be ena hahediba taudia dekenai dahaka sisiba ia henia? (b) Dahaka dainai Iesu ese unai sisiba ia henia?

¹² Iesu be laloa kehoa ia hahedinaraia dainai, kara dika ena badina ia lalopararalaia, unai dainai ena hahediba taudia ia hadibaia do idia naria namonamo. Hegeregere, ena be ena hahediba taudia idia diba matabodaga karadia be kerere. To Iesu ese ia hadibadia, ia gwau: “Bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni. Bema emu matana idibana be oi ia hahekwakwanaia noho, oi kokia bona oi negea.” (Mat. 5:27-29) Roma ena lohia henunai idia noho Keristani taudia dekenai unai sisiba be nega maorona ai ia henia. Badina histori torea tauna ta ia gwau, Roma taudia edia drama momo lalonai, “mahuta hebou laulaudia idia hahedinaraia bona hereva mirodia idia gwauraia.” Unai dainai Iesu be mai lalokau ida ena hahediba taudia ia hadibaia kara goeva do idia badinaia noho!

13, 14. Edena dala ai emu natuna be kara mirodia amo oi gimaia diba?

¹³ Laloa kehoa ese oi do ia durua, emu natuna be kara mirodia amo oi gimaia totona. Hari, natudia idia do maragi neganai, ponografi bona laulau dikadia ma haida idia itaia. Unai dainai, Keristani tama sina ese ena natuna dekenai matabodaga laulau itaia karana ena dika ia herevalaia be namo. To unai sibona lasi, gau ma haida ia karaia diba. Oi sibona oi nanadaia: ‘Dahaka ese egu natuna ena lalona ia veria diba ponografi laulau ia itaia totona? Ponografi itaia karana ena dika ia diba, a? Bema ia ura ponografi ia itaia, do ia gari lasi lau ida unai ia herevalaia totona, a?’ Ena be emu natuna be ia maragi, to ia oi hamaoroa: “Bema Intanet dekenai laulau dikana ta ia hedinarai bona oi ura oi itaia, mani lau oi hadibaia. Namo lasi oi hemarai. Lau ura oi lau durua.”

¹⁴ Laloa kehoa ese oi do ia durua emu moale karadia oi abia hidi namonamo totona. Matamanai ita herevalaia tadikaka, Pranas, ia gwau: “Ita ese gau momo ita karaia bona herevalaia diba, to emu natudia ese oi karaia karana do idia itaia bona tohotohoa.” Unai dainai namona be miusiki, muvi o buka oi abia hidi namonamo, bona emu natuna ese unai do ia badinaia.—Roma 2:21-24.

15, 16. (a) Dahaka dainai oi abia dae momokani Iehova ese oi do ia durua noho? (b) Stadi gabena ai dahaka do ita herevalaia?

¹⁵ Manoa be heduru totona Dirava ia noia neganai, dahaka ia vara? “Dirava ese Manoa ena noinoi ia kamonai.” (Gun. 13:9) Tama sina e, Iehova be emu noinoi do ia kamonai danu. Ia ese umui do ia durua emu natuna umui hadibaia totona. Bona lalokau, manau, bona laloa kehoa do umui hahedinaraia.

¹⁶ Emu natuna ia maragi neganai, Iehova ese oi ia durua. Unai hegeregerena emu natuna ia bada neganai, oi do ia durua noho. Stadi gabena ai, do ita itaia edena bamona tama sina ese edia natuna dekenai lalokau, manau, bona laloa kehoa do idia hahedinaraia.