TURA namodia be ita laloa bada, bona unai bamona tura namodia be idia vara kava lasi. Bema emu hetura karana be ia dika gwauraia, dahaka do oi karaia? Baibel lalonai idia noho tura namodia haida edia sivarai amo diba ita abia diba, unai taudia edia hetura karana be gabeai ia dika.

Davida—mamoe naria tauna bona king—be mai ena tura namodia momo. Idia ta be Ionatana. (1 Sam. 18:1) To ia be mai ena tura ma haida, hegeregere peroveta tauna Natana. Idia hetura matamaia negana be Baibel ese ia gwauraia lasi. To Davida ese iena lalona ai idia noho gaudia be Natana dekenai ia gwauraia. Davida ia ura Iehova ena ruma do ia haginia. Reana king ia laloa Natana be iena tura namona bona Iehova ena lauma helaga be ia dekenai ia noho dainai, iena lalohadai ia tahua.—2 Sam. 7:2, 3.

To gau ta ese edia hetura karana ia hadikaia. King Davida be Bataseba ida ia heudahanai, bona gabeai Bataseba ena adavana, Uria, ia hamasea. (2 Sam. 11:2-21)  Lagani momo lalonai, Davida be Iehova ia badinaia bona hahemaoro goevana ia badinaia. To gabeai unai kara dika badana ia karaia! Unai king namona dekenai dahaka ia vara? Iena kara ese do ia havaraia dika ia lalohadailaia, a? Ia laloa unai kara be Dirava amo do ia hunia, a?

Natana be dahaka do ia karaia? Do ia naria bona ma ta ese king do ia hereva henia, a? Davida ese Uria ia alaia dalana be ma haida ese idia kamonai danu. Vadaeni, dahaka dainai Natana be unai hekwakwanai lalonai do ia vareai bona unai ese edia hetura karana do ia hadikaia? Danu, bema Natana ia hereva, iena mauri ia haboioa diba. Herevana dahaka, Davida ese Uria ia hamasea vadaeni.

To Natana be Dirava ena gwaukau tauna. Bona ia diba bema Davida ena kerere ia gwauraia hedinarai lasi, edia hetura karana be do ia dika bona iena lalomamina ese ia do ia samania. Iena turana Davida ena kara dainai Iehova be ia moale lasi. Unai dainai Iehova ena lalonamo ia abia totona, king be heduru ia abia be namo. Oibe, Davida be tura korikorina ia ura. Bona Natana be unai ia karaia. Davida durua totona Natana be haheitalai ta ia gwauraia, unai amo ena kudouna ia hamarerea. Natana ese Dirava ena hereva ia gwauraia, to Davida ese iena kerere do ia lalopararalaia dalanai ia gwauraia, unai dainai Davida be kara ia karaia.—2 Sam. 12:1-14.

Bema emu turana ta be kerere badana ta ia karaia, dahaka do oi karaia? Reana do oi laloa iena kerere oi gwauraia hedinarai neganai, emu hetura karana be do ia dika? Eiava oi laloa elda taudia dekenai iena kerere gwauraia hedinarai karana be lalokau lasi karana. Dahaka do oi karaia?

Gianni, matamanai ita herevalaia tauna, ia gwau: “Lau laloparara gau ta ia idau. Maurizio be ia herevahereva namonamo lasi guna bamona. Unai dainai ia lau hereva henia, ena be lau dekenai unai be auka. Sibona lau nanadaia: ‘Ia dekenai dahaka do lau gwau, ia be dahaka ia diba lasi? Reana lau gwauraia herevadia dekenai do ia moale lasi!’ To ai stadilaia gaudia laloa lou karana ese lau ia hagoadaia ia lau hereva henia totona. Heduru lau ura negadiai, Maurizio be unai ia karaia danu. Lau ura lasi emai hetura karaia ia dika, to lau ura ia lau durua badina ia lau laloa bada.”

Maurizio ia gwau: “Gianni be ia kara momokani—bona ia be maoro. Lau diba, lau karaia abia hidi kererena dainai unai ia vara, bona unai be ia bona Iehova edia kerere lasi. Unai dainai elda taudia edia sisiba lau abia dae, bona daudau lasi lau goada lou.”

Nega aukadia ai, Davida ena turadia haida ese ia idia durua. Idia ta be Husai, Baibel ese ia gwauraia “Davida ena turana.” (2 Sam. 16:16; 1 Siv. 27:33) Ia be reana ofesa tauna bona king ena tura namona. Danu, nega haida ia ese king ena hunia oda herevadia ia halasia.

Davida ena natuna Abesaloma be dala kererena ai terona ia abia neganai, Israela taudia momo be ia idia durua, to Husai lasi. Davida ia heau mauri neganai, Husai be ia dekenai ia lao. Davida be ia lalohisihisi bada, badina iena natuna bona ia abidadama henia taudia ese ia idia rakatania. To Husai be Davida ia badinaia, ena be ia diba ia karaia karana dainai iena mauri ia haboioa diba. Husai be ofesa tauna dainai unai ia karaia lasi. To iena kara amo ia hahedinaraia ia be turana namona.—2 Sam. 15:13-17, 32-37; 16:15–17:16.

Iseda tadikaka taihu huanai ia noho lalotamona bona hetura karana ita itaia  neganai ita moale, ani? Edia kara amo idia hahedinaraia, idia ura oiemu turana ai idia lao, bona oi idia laloa bada.

Tadikaka ladana Federico be unai ia mamia. Iena tura namona Antonio ena heduru dainai, ia davaria hekwakwanai ia haheaukalaia diba. Federico ia gwau: “Antonio be emai kongrigeisen dekenai ia mai murinai, ai be tura namodia ai ai lao. Ai ruaosi be hesiai taudia, bona emai gaukara ai moalelaia. Daudau lasi, ia be elda tauna ai ia lao. Ia be egu turana sibona lasi, to haheitalai namona danu.” Bena Federico be abia hidi kererena ia karaia. Maoromaoro elda taudia edia heduru ia tahua, to unai murinai iena painia gaukara bona hesiai tauna ena maduna ia haboioa. Antonio be dahaka ia karaia?

Federico ia gwau: “Lau itaia Antonio be egu hisihisi ia lalopararalaia. Ia hekwarahi bada lau ia hagoadaia totona. Ia ura bada egu hetura karana Iehova ida lau hagoadaia lou bona lau ia rakatania lasi. Ia be ia hesiku lasi, to lau ia hagoadaia noho.” Antonio ia gwau: “Hanaihanai Federico lau bamoa. Lau ura ia ese iena hemami be lau dekenai do ia gwauraia.” Daudau lasi murinai, Federico be ia goada lou bona gabeai painia gaukara bona hesiai tauna ena maduna ia abia lou. Antonio ma ia gwau: “Ena be hari kongrigeisen idauna dekenai ai noho, to ai be tura namodia.”

Edena bamona do oi mamia, bema hekwakwanai oi rakatania negana ai emu turana ese oi ia rakatania? Do oi lalohisihisi bada, ani? Iena dika do oi gwauatao, a? Emui hetura karana do oi hagoadaia lou, a?

Iesu ena dina ginigabedia ai idia vara gaudia mani oi laloa. Ia be nega daudau lalonai iena abidadama aposetolo taudia ia bamoa, bona unai ese idia ia hatamonaia. Iesu ese idia ia gwauraia iena turadia. (Ioa. 15:15) To ia idia dogoatao neganai dahaka  ia vara? Aposetolo taudia ese ia idia rakatania. Aposetolo ma haida vairanai, Petero ia gwau ia ese iena Biaguna do ia rakatania lasi, to unai hanuaboi ai, Petero ese nega toi Iesu ia gorea!—Mat. 26:31-33, 56, 69-75.

Iesu ia diba iena hahetoho ginigabena be ia sibona ese do ia davaria. To, badina namona dainai ia lalohisihisi. To ia toreisi lou bena dina haida murinai iena aposetolo taudia ida ia herevahereva neganai, ia hahedinaraia lasi ia be ia lalohisihisi. Iesu be ena aposetolo taudia edia kerere ia laloa lasi, ia idia dogoatao hanuaboina ai idia karaia karana danu.

To, Iesu ese Petero bona aposetolo taudia ma haida ia hagoadaia. Ia ese idia ia abidadama henia dainai, idia dekenai do idia karaia mai anina bada gaukarana karaia dalana ia hadibaia. Iesu dekenai aposetolo taudia be ena turadia. Iena lalokau ese idia ia hagoadaia momokani. Bona idia hekwarahi edia Biaguna idia hamoalea noho totona. Oibe, ia ese idia dekenai ia henia gaukarana idia karaia guguru.—Kara 1:8; Kol. 1:23.

Taihu Elvira bona ena turana Giuliana huanai hekwakwanai ta ia vara. Elvira ia gwau: “Lau ia hamaoroa egu kara dainai ia lalohisihisi neganai, lau moale lasi. Iena badu be mai ena badina. To lau hoa badina ia be lau bona egu kara dainai do ia vara gauna ia laloa bada. Lau moale badina ia dekenai lau karaia karana ia laloa lasi, to sibona dekenai lau karaia noho karana ia laloa. Iehova lau tanikiu henia badina lau dekenai tura namona ta ia henia.”

Bema taunimanima rua huanai ia noho hetura karana be kahirakahira ia dika, tura namona be dahaka do ia karaia? Ia be mai manau ida unai hekwakwanai do ia hamaoromaoroa. Unai bamona turana be Natana bona Husai bamona, nega dikadia ai edia turadia idia badinaia noho, bona Iesu bamona danu, ia be mai ura ida dika ia gwauatao. Oi be unai tura namona, a?