Iesu Amo Ta Dibamu Ğaudia

Taunimanima Edia Vaira Negana

Iesu ese guba maurina e gwauhamatalaia, a?

Oibe! Iesu na mase amo e toreisi lou, bena e dae ela guba, Tamana ida baine noho totona. To, ia do se mase neganai, ia ese ena aposetolo gwauta-taosi e hamaorodia: “Tamagu ena ruma ai noho gabudia na momo herea. . . . Badina be lau na ba laomu, gabu ta baina abia heğaeğae umui emui.” (Ioane 14:2) * To, guba helarona bae abia taudia na gagadoi. Iesu na ena hahediba taudia e hereva henidia neganai, una na e hahedinaraia, eto: “Seri maraği e, basio gari; badina be Tamamui na basileia ihenimui moalena e moalemu.”​—Luka 12:32.

“Seri maraği” taudia edia ğaukara guba ai be dahaka?

Dirava na e uramu una orea marağina na guba gavamanina lalonai Iesu ida bae lohia. Edena dalai una ta dibamu? Iesu na mase amo e toreisi lou murinai, aposetolo Ioane e hamaoroa, abidadama taudia haida na “pavapava” ai baela bena “tanobada” bae lohiaia. (Apokalupo 1:1; 5:9, 10) Una na sivarai namona. Taunimanima na e ura dikadikamu gavamani namona ta baine gini. Iesu ese baine lohiaia gavamanina be dahaka baine kara? Iesu eto: “Umui o ğavagumu taumui ese ğau ihamatamatadia negana ai, Taunimanima Natuna ena terona diaridiarina ai baine helai kau negana ai, terono gwauta-rua ai ba helai.” (Mataio 19:28) Iesu bona ia e ğavaiamu taudia bae lohia neganai, “ğau ihamatamatadia”  ğaukarana bae karaia, anina na guna Adamu bona Heva do se kara dika neganai, tanobada ai e moalelaiava ğaudia bae matamata lou.

Iesu ese taunimanima oredia be dahaka helaro e henidia?

Dirava ese taunimanima e karadia tanobada ai bae noho helaoreana, to Iesu e karaia guba ai baine noho helaoreana. (Salamo 115:16) Una dainai, Iesu eto: “Umui na henu amo, lau na atai amo.” (Ioane 8:23) Iesu na e hahedinaraia, vaira negai taunimanima na hahenamo momo bae moalelai. Nega ta ai, ia eto: “Manada taudia be nanamo, badina be idia ese tanobada bae abia.” (Mataio 5:5) Ia na salamo e torea tauna ena hereva e gwauraia lou, eto: “A manau taudia ese tano bae abia; maino ena harihari-bada idia ese bae moalelaia. Kara maoromaoro taudia ese tano bae abia, bae noholaia hanaihanai.”​—Salamo 37:11, 29.

Una dainai, dia guba baela “seri maraği” taudia mo mauri hanaihanai bae abia. To Iesu na tanobada heğeğemadai taunimanima milioni momo ese bae abia helarona e herevalaia danu. Eto: “Dirava ese tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.”​—Ioane 3:16.

Dirava ese taunimanima e davarimu hisihisidia be ede baine haoredia toma?

Iesu na taunimanima baine durudia daladia rua e herevalai, eto: “Harihari ina tanobada na e hahemaoro heniamu; harihari ina tanobada lohiana bae lulua lasi.” (Ioane 12:31) Ginigunana binai: Dirava asie badinaiamu taudia bona hisihisi e havaramu taudia na Dirava ese baine hahemaoro henidia bona baine haoredia. Iharuana binai: Dirava ese Satani baine lulua lasi neganai, taunimanima na basine koidia lou.

To, gunaguna Dirava bona Iesu asie dibadia bona asie abidadama henidia bena e mase taudia be ede bae heto? Iesu ese ia badinai e tauadae kara dika tauna na ini e hamaoroa toma: “Oi na lau ida Paradaiso ai baita noho.” (Luka 23:43, NW) Iesu ese mase amo una kara dika tauna​—taunimanima milioni momo danu​—na tanobada paradaisona ai baine hatorea isi lou neganai, ia na Dirava baine dibaia matama. Una negai, ia na manau bona kara maoromaoro taudia ida tanobada ai mauri hanaihanai bae abia.​—Kara 24:15.

Hereva ma haida ba diba totona, Dirava be E Uramu Dahaka Baita Kara? * buklet kahana 5 ba itaia.

[Futnout]

[Foto rau 23 ai]

“Kara maoromaoro taudia ese tano bae abia, bae noholaia hanaihanai.”​—Salamo 37:29