GURIGURI karana ese ita ia durua, a? Oibe, Baibel ese ia hahedinaraia guriguri karana ese Dirava ena hesiai taudia ia durua bada. (Luka 22:40; Iamesi 5:13) Momokani, guriguri ese eda hetura karana Dirava ida ia hagoadaia, tauanina dalanai ita ia durua bona hemami ia hanamoa. Edena dala ai?

Inai haheitalai oi laloa, emu natuna ta be harihari gauna ta ia abia. Ia do oi hadibaia unai harihari gauna ia moalelaia sibona, a? Eiava do oi hadibaia tanikiu herevana ia gwauraia? Bema ita laloa bada gauna ta ita gwauraia hedinarai, ita be eda lalohadai ita hahedinaraia bona unai lalohadai ita hagoadaia. Dirava ita hereva henia neganai, unai bamona ita karaia, a? Oibe! Haheitalai haida ita laloa.

Tanikiu guriguridia. Bema gau namodia ita abia dainai iseda Tamana ita tanikiu henia, ita abia hahenamodia ita laloa bada. Unai amo tanikiu karana ita hahedinaraia, ita moale bona lalohadai maorona ita abia.​—Filipi 4:6.

Haheitalai: Iesu be ena Tamana ese ena guriguri ia kamonai bona haerelaia dainai ia tanikiu henia.​—Ioane 11:41.

Dika gwauatao guriguridia. Bema Dirava ita noia eda dika ia gwauatao totona, iseda lalomamina ia hagoadaia, ita helalo-kerehai bona ita karaia kara dikana ita lalopararalaia. Danu, iseda kerere do ita laloa momo lasi.

Haheitalai: Davida be ena guriguri amo ia hahedinaraia ia helalo-kerehai bona ia karaia kerere dainai ia sori.​—Salamo 51.

Heduru bona aonega totona guriguri. Abia hidi maorodia karaia totona Iehova ita noia ita ia durua o aonega ia henia neganai, unai ese ita ia hagoadaia manau karana ita hahedinaraia totona. Guriguri karana ese ita ia hadibaia iseda aonega be mai ena hetoana, danu ita ia durua Iehova ita abidadama henia totona.​—Aonega Herevadia 3:5, 6.

Haheitalai: Solomona be mai manau ida Dirava ena heduru bona aonega ia noia Israela besena ia lohiaia totona.​—1 King Taudia 3:5-12.

Lalometau negadiai guriguri. Lalometau negadiai eda kudouna ai idia noho gaudia ibounai be Dirava dekenai ita gwauraia neganai, eda lalona do ia goada bona sibona dekenai ita tabekau lasi, to Iehova dekenai do ita tabekau.​—Salamo 62:8.

Haheitalai: King Asa be ena inai taudia ese idia tuari henia gwauraia neganai, Iehova ia guriguri henia.​—2 Sivarai 14:11.

Ma haida durua totona guriguri. Unai bamona guriguridia ese ita ia durua sibona laloa bada karana ita dadaraia bona ma haida ita hebogahisi henia.

Haheitalai: Iesu be ena hahediba taudia totona ia guriguri.​—Ioane 17:9-17.

Iehova hanamoa guriguridia. Iehova ena kara namodia dainai Ia ita hanamoa neganai, iseda hemataurai bona tanikiu karana Ia dekenai ita habadaia diba. Unai bamona guriguridia ese ita idia durua iseda Dirava kahirakahira ita lao.

Haheitalai: Davida be Dirava ia karaia gaudia dainai ia hanamoa.​—Salamo 8.

Guriguri karana ena hahenamo ma ta be inai: “Dirava ena maino ese taunimanima edia diba ia hanaia momokani.” (Filipi 4:7) Inai hekwakwanai tanobadana lalonai maino ai ita noho be hahenamo badana ta. Tauanina dalanai ita ia durua danu. (Aonega Herevadia 14:30) To, unai hahenamo be ita sibona eda hekwarahi dainai ita abia, a? Eiava mai anina bada gauna ta dainai ita abia?