DAHAKA ese laki gadara bona henaohenao karana ia manadalaia tauna ena mauri dalana ia haidaua? Iena hereva mani oi duahia.

“Reisi hosidia lau ura henia bada.”​—⁠RICHARD STEWART

IA VARA LAGANINA: 1965

TANO: JAMAICA

GUNA: LAKI GADARA BONA HENAOHENAO TAUNA

EGU MAURI GUNANA: Lau be Jamaica ena hanua badana ta, Kingston ai, lau tubu daekau. Unai be ogogami bona taunimanima momo idia noho hanuana. Moni gaukara davaria be auka, bona taravatu utua karadia be bada. Raskol taudia edia kara dainai taunimanima be mai gari danu idia noho. Kahirakahira dina ta ta ibounai ipidi regedia lau kamonai.

Egu sinana ia gaukara goada, lau, tadina mero bona taihuna ia naria totona. Ia ura edukeisen namona ai abia. Sikuli lau ura lasi, to reisi hosidia lau ura henia bada. Nega haida sikuli lau lao lasi to hosi reisi gabuna dekenai lau lao. Bona nega haida hosi ai lau guia.

Daudau lasi, hosi reisi ai beti moni lau atoa, bona hahine momo ida matabodaga karadia lau karaia. Mariuana lau ania bona lau henaohenao, egu ura hagugurua totona. Egu ipidi be momo, to henaohenao karadia lalonai ta lau hamasea lasi dainai lau moale.

Gabeai, pulisi ese lau idia dogoatao bona lau karaia taravatu utua karadia dainai dibura ruma ai lau idia atoa. Dibura ruma lau rakatania murinai, egu mauri gunana lau badinaia lou, to ia dika momokani, guna bamona lasi. Ena be egu toana be kerere ta do lau karaia lasi, to lau be laloauka, badu haraga, bona dagedage tauna, bona sibona lau laloa bada.

BAIBEL ESE EGU MAURI IA HAIDAUA DALANA: Unai negai egu sinana be Baibel ia stadilaia bona Iehova ena Witnes ta ai ia lao. Lau itaia ena kara ia haidaua bona lau daradara. Egu lalona lau hadaia iena kara ia haidaua ena badina lau tahua totona, unai dainai Witnes taudia ida Baibel ai herevalaia matamaia.

Lau davaria Iehova ena Witnes taudia edia hahediba herevadia be tomadiho ma haida amo idia idau, bona idia herevalaia gaudia ibounai be Baibel amo idia hamomokania. Lau dibaia gauna be idia sibona ese ruma-ta-ruma-ta haroro gaukara idia karaia, Keristani ginigunadia bamona. (Mataio 28:19; Kara 20:20) Edia lalokau heheni karana lau itaia neganai, lau diba unai be tomadiho momokani.​​—⁠Ioane 13:⁠35.

Baibel amo lau dibaia gaudia dainai, lau itaia egu mauri ai gau momo lau haidaua be namo. Lau laloparara Iehova be matabodaga karadia ia inai henia bona bema lau ura ia lau  hamoalea, namona be tauanina hamiroa gaudia ibounai lau dadaraia. (2 Korinto 7:1; Heberu 13:⁠4) Egu lalona ia hamarerea gauna be, lau diba Iehova be mai ena hemami bona egu kara ese ena lalona ia hahisia o hamoalea diba. (Aonega Herevadia 27:11) Unai dainai egu lalona lau hadaia mariuana ania karana lau hadokoa, egu ipidi lau negedia, bona lau hekwarahi egu kara lau hanamoa totona. To matabodaga bona laki gadara hadokoa totona lau hekwarahi bada.

Matamanai, lau ura lasi egu turadia idia diba lau be Iehova ena Witnes taudia ida Baibel lau stadilaia. To Mataio 10:​33 lau duahia murinai, egu lalona lau haidaua, unai siri ai Iesu ia gwau: “Taunimanima vairanai lau ia gwauraia hedinarai lasi tauna, be egu Tamana guba ai ia noho, ena vairanai do lau gwauraia hedinarai lasi.” Unai hereva ese lau ia hagoadaia egu turadia lau hadibaia lau be Witnes taudia ida lau stadi. Idia hoa. Idia abia dae lasi lau ura Keristani tauna ai lau lao. To idia lau hamaoroa, lau ura lasi egu mauri gunana lau badinaia.

NAMO LAU DAVARIA DALANA: Egu sinana ia itaia Baibel ena hakaua herevadia lau badinaia matamaia neganai, ia moale bada. Hari egu kara ia lalohekwarahilaia lasi. Ai ia hatamonaia gauna​—⁠Iehova lalokau henia karana⁠​—⁠​ai herevalaia hebou. Nega haida, egu kara gunadia lau laloa lou, bona lau hoa badina Dirava ena heduru amo egu kara lau haidaua. Hari matabodaga karadia, bona kohu o moni momo tahua karadia lau ura henia lasi.

Bema Baibel ena hereva lau badinaia lasi, reana hari lau be dibura ruma ai lau noho o lau mase vadaeni. To hari lau be mai egu ruma bese namona bona ai moale. Lau moalelaia bada gauna be, egu adavana bona natuna kekeni ida Iehova Dirava ai hesiai henia. Iehova lau tanikiu henia badina lalokau Keristani tadikaka huanai lau noho. Lau moale bada badina Witnes ta be ia hekwarahi lau dekenai Baibel ena hereva momokani ia hadibaia. Bona dala ia noho ma haida dekenai Baibel ena hereva lau hadibaia totona. Iehova Dirava lau tanikiu henia bada badina ena hebogahisi mai lalokauna dainai ia kahirakahira lau lao diba.

[Blurb on page 11]

“Lau diba Iehova be mai ena hemami bona egu kara ese ena lalona ia hahisia o hamoalea diba”

[Picture on page 11]

Egu adavana bona natuna kekeni ida

[Picture on page 11]

Lau itaia egu sinana ena kara ia haidaua