Nega momo Iuda taudia be ta ia mase neganai, unai dina ai idia guria haraga. Unai idia karaia ena badina be rua. Ginigunana: Middle East be siahu gabuna dainai, mase tauanina ia bodaga haraga. Iharuana: Unai negai idia noho taudia idia laloa mase guria haraga lasi karana be mase tauna bona ena famili matauraia lasi karana.

Taunimanima foa idia mase bona ta ta be ia mase dinana ai idia guria ena sivarai be Evanelia Bukadia bona Kara bukana ai idia noho. (Mataio 27:57-60; Kara 5:5-10; 7:60–8:2) Lagani handred gunanai, Iakobo bona ena famili be idia loaloa lalonai, ena adavana lalokauna Rahela ia mase. Iakobo ese Rahela ena tauanina ia abia lao lasi edia famili edia guria gabunai idia guria totona, to “dala badinai idia guria . . . Betelehema” dekenai.​—Genese 35:19, 20, 27-29.

Baibel ena sivarai ese idia hahedinaraia, Iuda taudia ese mase tauanina idia hegaegaelaia namonamo, idia guria totona. Famili bona turadia ese mase tauanina idia huria, bonana namo muramurana amo idia dahua, bona dabua amo idia kumia. (Ioane 19:39, 40; Kara 9:36-41) Neiba bona ma haida idia mai bona mai taitai ida idia hereva bona mase tauna ena famili idia hagoadaia.​—Mareko 5:38, 39.

Israela ena tano momo ai Iuda famili momo ese mase taudia be kohua (cave) o idia geia nadi matuna ai idia atoa. Unai bamona idia karaia neganai, edia bese kwaradia idia tohotohoa. Aberahamo, Sara, Isako, Iakobo, bona ma haida be Makapela (Heberona kahirakahira) ena nadi matuna dekenai idia guria.​—⁠Genese 23:19; 25:8, 9; 49:29-31; 50:13.

Iesu be nadi ai idia geia matuna lalonai idia guria. (Mareko 15:46) Unai bamona guria gabuna ena vareai gabuna be maragi. Unai guria gabuna lalonai, nadi idia geia bona maua (shelf) bamona idia karaia, bena mase tauanina idia atoa. Mase tauna ena hidio ia ore murinai, ena turia be idia gogoa bona nadi maua ta ladana, ossuary lalonai idia udaia​—unai be Iesu ena negai idia noho taudia edia kastom. Unai amo, guria gabunai speis ia noho gabeai ta ia mase neganai, famili ese unuseniai idia atoa.

Mose ena Taravatu hegeregerena Sabati be laga-ani dinana dainai, unai dina ai Iuda taudia be mase tauanina idia guria lasi. Iesu ia mase bena hora toi murinai be Sabati dinana dainai, Arimatea tauna Iosepa bona ma haida ese Iesu ena tauanina idia hegaegaelaia namonamo lasi bena idia guria. (Luka 23:50-56) Unai dainai, Sabati murinai, Iesu ena turana haida be guria gabuna idia lao badina idia ura Iesu ena tauanina idia hegaegaelaia namonamo.​—Mareko 16:1; Luka 24:1.