Baibel Henanadai Edia Haere
Dahaka dainai Iesu ita gwauraia Dirava ena Natuna?
Dirava be adavana ta ia abia lasi ena natudia havaraia totona. Ia be mauri gaudia ibounai ia Havaraia Tauna. Ia ese taunimanima be iena kara idia tohotohoa diba dalanai ia havaradia. Unai dainai, ia havaraia tauna ginigunana, Adamu, be Baibel ese ia gwauraia, “Dirava ena natuna.” Unai hegeregerena, Baibel ese Iesu ia gwauraia, “Dirava ena Natuna” badina Dirava ese ia havaraia bona iena kara be Dirava ena kara bamona.—Luka 3:38; Ioane 1:14, 49 duahia.
Edena negai Dirava ese Iesu ia havaraia?
Dirava ese Adamu ia do havaraia lasi neganai, Iesu ia havaraia. Oibe, Dirava ese Iesu ia havaraia bena ia gaukaralaia gau ibounai—aneru danu—ia karaia. Unai dainai, Baibel ia gwau: “Dirava ia havaraia gaudia ibounai amo [Iesu] be ginigunana.”—Kolose 1:15, 16 duahia.
Iesu be Betelehema ai ia do vara lasi neganai, ia be aneru ta guba ai ia noho. Gabeai, Dirava ese Iesu ena mauri be guba amo ia abia oho bena Maria ena bogana lalonai ia atoa, unai amo taunimanima ta bamona ia vara diba.—Luka 1:30-32; Ioane 6:38; 8:23 duahia.
Dahaka dainai Iesu be tanobada ai taunimanima ta bamona ia vara? Iesu be dahaka spesel gaukara ia hagugurua? Unai henanadai edia haere be Baibel ai oi davaria diba, bona unai ese oi do idia durua Dirava bona Iesu ese oi totona idia karaia gaudia do oi lalopararalaia momokani.
