Lau maragi neganai, egu famili ida Leipzig, East Germany kahirakahira ai noho, unai be daudau lasi Czech bona Polish edia boda amo. Egu mauri lagani be siks neganai, egu tamana ena gaukara dainai, Brazil dekenai ai lao bena gabeai Ecuador dekenai ai lao.

Lau be 14 neganai, Germany ena bodini sikuli ta dekenai lau idia siaia. Egu tama sina be South America ai idia noho dainai, lau be sibona lau naria. Unai dainai sibona naria karana dekenai lau manada. Egu kara ese haida idia hahisia eiava lasi be lau laloa bada lasi.

Egu mauri lagani be 17 neganai, egu tama sina idia giroa lou Germany. Matamanai idia danu lau noho. To sibona naria karana lau manadalaia dainai, ia auka egu tama sina ida lau noho totona. Lau be 18 neganai, ruma lau rakatania.

Mauri ena badina lau laloparara totona, gau idauidau lau karaia. Noho daladia bona orea idauidau lau stadilaia namonamo murinai, egu lalona lau hadaia, taunimanima ese tanobada idia do hadikaia lasi lalonai, gabu idauidau dekenai lau loaloa be namo.

Germany lau rakatania bona Africa dekenai lau lao totona motabaik ta lau hoia. To daudau lasi murinai, egu motabaik hanamoa totona Europe dekenai lau giroa lou. Unai murinai, lau be Portugal ena kone dekenai lau noho. Egu motabaik lau rakatania bona bouti amo lau loaloa.

Matamata taudia haida ida Atlantic Davarana dekenai ai loaloa. Idia huanai do lau adavaia hahinena ladana Laurie lau hedavari henia. Ai be bouti amo Caribbean motumotu ai lao guna. Bena Puerto Rico dekenai ai noho, to daudau lasi murinai, Europe dekenai ai giroa lou. Ai ura bouti maragina ta be emai ruma ai do ai halaoa. To unai ia vara lasi, badina hua toi murinai, German ena ami lalonai lau idia abia vareai.

Hua 15 lalonai, German ami edia sisima dekenai lau gaukara. Unai negai, lau bona Laurie ai headava bona  emai loaloa ai karaia lou. Ami gaukarana lau do karaia lasi neganai, ai ese bouti ena henuna kahana (hull) ta ai hoia. Ami dekenai lau gaukara noho lalonai, unai bouti ena henuna kahana amo bouti maragina ta ai karaia. Emai palani be unuseni do ai noho bona tanobada ena kahana idauidau dekenai ai loaloa. Unai negai lau be ami gaukara amo lau doko, to bouti ai do haorea lasi lalonai, Iehova ena Witnes taudia be ai idia vadivadi bona Baibel stadi ai hamatamaia.

Matamanai, lau laloa egu mauri lau haidaua ena badina ta be lasi. Lau headava bona kuku ania karana lau hadokoa vadaeni. (Efeso 5:5) Tanobada ena kahana idauidau ai loaloa totona, lau laloa emai mauri be Dirava ena havaraia gaudia itaia totona ai gaukaralaia be mai anina bada.

To momokani, namona be egu kara lau haidaua. Lau be hekokoroku tauna bona sibona lau laloa bada dainai gau idauidau lau karaia bona hagugurua. Egu mauri lalonai lau sibona lau laloa bada.

Nega ta, Iesu ena Ororo Harorona lau duahia. (Mataio, karoa 5-7) Matamanai, Iesu ese ia herevalaia moalena lau laloparara lasi. Hegeregere, ia gwau, idia hitolo bona ranu mase taudia be idia moale. (Mataio 5:6) Edena dala ai ia dabu tauna ia moale diba? Baibel lau stadilaia noho neganai, lau laloparara ita ibounai ita ura hereva momokani ita diba, to namona be mai manau ida unai ura ita hahedinaraia. Iesu ia hereva bamona, “Dirava dibaia totona idia hitolo taudia be idia moale.”​—Mataio 5:3.

Germany ai Baibel stadi ai hamatamaia murinai, lau bona Laurie be France dekenai ai lao bena gabeai Italy dekenai ai lao. Ai lao gabudia dekenai, Iehova ena Witnes taudia ai davaria. Idia huanai lalokau bona maino ia noho karana ese lau ia hagoadaia. Lau itaia Witnes taudia be tanobada hegegemadai idia noho. (Ioane 13:34, 35) Gabeai lau bona Laurie ai bapatiso bona Iehova ena Witnes taudia ai ai lao.

Bapatiso murinai, lau hekwarahi egu kara lau haidaua noho totona. Emai bouti amo Africa ena kone kahana ai lao, bena Atlantic Davarana amo United States dekenai ai lao. Gadobada ai​—egu adavana ida bouti maragina dekenai ai noho bona gabu daudauna ai lao lalonai​—lau laloparara iseda Havaraia Tauna ese lau ia hereaia. Davara dekenai gau ta lau karaia lasi bona nega bada ia noho dainai Baibel lau duahia namonamo. Iesu ena tanobada maurina ena sivarai ese lau ia hagoadaia. Ia be goevadae tauna, bona mai ena diba gau idauidau ia karaia totona, to ia hekokoroku lasi. Sibona ia laloa bada lasi, to ena guba Tamana ena ura ia laloa bada.

Iesu ena kara lau laloa dobu neganai, lau laloparara egu mauri lalonai Dirava ena Basileia lau atoa guna be namo. (Mataio 6:33) United States dekenai ai ginidae neganai, emai lalona ai hadaia unuseniai do ai noho bona Dirava tomadiho henia karadia do ai laloa.

Guna, lau laloa sibona lau naria diba, to lau daradara dahaka abia hidi do lau karaia. To hari, lau ia hakaua diba aonega herevadia lau diba. (Isaia 48:17, 18) Danu, egu mauri be mai ena badina, Dirava lau tomadiho henia bona ma haida lau durua ia idia dibaia totona.

Baibel ena hakaua herevadia ai badinaia dainai, emai headava ia goada. Danu, emai natuna kekeni be Iehova ia diba bona lalokau henia.

Momokani, mauri ai hekwakwanai idauidau ai davaria. To Iehova ena heduru amo, emai lalona ai hadaia ia do ai hesiai henia bona abidadama henia noho.​—Aonega Herevadia 3:5, 6.