Megan: Namo Shirley. Lau moale badina vanegai Iesu Keriso ena Mase laloatao hebouna dekenai oi mai. * Unai hebou be edena bamona oi laloa?

Shirley: Unai hebou lau moalelaia, to tok ena hereva haida lau lalopararalaia lasi. Lau itaia taunimanima be Krismas ai Iesu ena vara dinana idia moalelaia bona Ista ai toreisi lou dinana idia moalelaia. To, nega ta lau itaia lasi idia ese Iesu ena mase idia laloatao.

Megan: Momokani, tanobada ibounai, taunimanima be Krismas bona Ista idia moalelaia. To, Iehova ena Witnes taudia idia laloa, Iesu ena mase laloatao karana be mai anina bada. Ia namo unai badina haida lau herevalaia?

Shirley: Namo.

Megan: Witnes taudia be Iesu ena mase idia laloatao, badina Iesu ese aposetolo taudia ia hagania unai idia karaia totona. Iesu ena hanuaboi ginigabena ai ia vara gauna mani oi laloa. Reana oi laloatao, unai negai Iesu bona ena aposetolo taudia be dahaka hebou idia karaia?

Shirley: Anibou Ginigabena, a?

Megan: Maoro. Ena ladana ta be, Lohiabada ena Anibou. Unai negai, Iesu ese aposetolo taudia dekenai anibou karaia dalana ia hadibaia. Mani Luka 22:19 oi duahia?

Shirley: Namo. “Danu paraoa ia abia, Dirava ia tanikiu henia, ia makohia bona idia dekenai ia henia, ia gwau: ‘Inai be egu tauanina ia laulaulaia, umui totona do lau henia. Inai bamona do umui karaia noho lau umui laloatao totona.’”

Megan: Tanikiu. Siri dokonai Iesu ia gwau: “Inai bamona do umui karaia noho lau umui laloatao totona.” Iesu ese unai hereva ia do gwauraia lasi neganai, ia hahedinaraia goevagoeva, namona be aposetolo taudia be Iesu ese do ia karaia gauna idia laloatao. Ia gwau, ia be ena hesiai taudia totona ena mauri do ia henia. Iesu ese unai lalohadai be Mataio 20:28 ai ia hahedinaraia danu. Ia gwau: “Taunimanima ena Natuna bamona, ia mai lasi taunimanima ese ia idia hesiai henia totona, to ma haida hesiai henia totona ia mai, bona ena mauri ia henia, taunimanima momo edia mauri davana karaia totona.” Unai badina badana tamona dainai, lagani ta ta ai, Iehova ena Witnes taudia idia hebou, Iesu ena mase idia laloatao totona, unai amo Iesu ena mauri davalaia boubouna idia laloatao. Ia mase dainai, kamonai taudia idia mauri diba.

Shirley: Momo idia gwau, Iesu ia mase dainai, mauri ita abia diba. To unai hereva lau lalopararalaia lasi.

 Megan: Momo be unai bamona idia hereva danu. Iesu ena mauri davalaia boubouna be topik badana ta. To ia be Baibel ena hereva momokanina ta. Sori, emu nega be hegeregere eiava?

Shirley: Ia namo, ita herevahereva diba.

Megan: Okei. Hari lau be mauri davalaia boubouna ena hereva lau duahia, to ita herevalaia namonamo diba.

Shirley: Namo.

Megan: Mauri davalaia boubouna ena anina oi lalopararalaia totona, namona be Adamu bona Heva ese Eden umana ai idia havaraia dika ita lalopararalaia guna. Mani Roma 6:23 ita duahia. Ia namo oi duahia?

Shirley: Namo. Ia gwau: “Kara dika ena davana be mase, to Dirava ese Keriso Iesu iseda Lohiabada amo ia henia harihari gauna be mauri hanaihanai.”

Megan: Tanikiu. Mani unai siri ena anina ita herevalaia. Siri matamana ia gwau: “Kara dika ena davana be mase.” Dirava ese unai taravatu be Adamu bona Heva dekenai ia henia. Ia hamaorodia, kara dika idia karaia neganai, do idia mase. To, matamanai kara dika ta be lasi. Adamu bona Heva be goevadae, bona natudia goevadaedia do idia havaraia. Idia ta do ia mase lasi. Anina be Adamu, Heva, bona edia natudia ibounai be do idia moale ela bona hanaihanai. To unai bamona ia vara lasi, ani?

Shirley: Oibe, badina Adamu bona Heva ese Dirava ia taravatua au huahuana idia ania.

Megan: Maoro. Unai gwau-edeede karana be kara dikana. Sibona edia ura dainai, goevadae lasi taudia ai idia lao. Edia abia hidi karana dainai, idia bona edia natudia be dika idia davaria.

Shirley: Emu hereva anina be dahaka?

Megan: Mani haheitalai ta lau gwauraia. Nega haida beredi o sikoni oi gabua?

Shirley: Oibe! Nega momo unai lau karaia.

Megan: Reana oi be mai emu pani matamata ta, beredi o sikoni gabua totona. To unai pani ia moru bona ia gageva sisina. Gabeai unai pani lalonai beredi o sikoni oi gabua neganai, dahaka do ia vara? Pani lalonai ia noho beredi o sikoni do ia gageva, ani?

Shirley: Oibe.

Megan: Unai hegeregerena, Adamu bona Heva be Dirava idia gwau-edeede henia neganai, idia be kara dika o goevadae lasi taudia ai idia lao, “pani” ia “gageva” bamona. Idia kara dika murinai edia natudia idia havaraia dainai, edia bese taudia be kara dika taudia ai idia lao danu. Baibel ai inai hereva “kara dika” be ta ese ia karaia kerere sibona lasi, to Adamu bona Heva amo ita abia hanai gauna ia herevalaia danu. Ena be kara dika ta ita karaia lasi, to Adamu bona Heva dainai, ita ibounai be goevadae lasi bona metau idauidau ita davaria​—ita gorere bona gabeai ita mase. Roma 6:23 ai ita duahia bamona, kara dika ena davana be mase.

Shirley: Unai be maoro lasi. Dahaka dainai Adamu bona Heva edia kara dika dainai, taunimanima be hanaihanai idia hisihisi?

Megan: Henanadai namona. Dirava ena hahemaoro goevana dainai, nega ia henia Adamu bona Heva be edia kara dika ena davana idia abia bona idia mase. To danu, Ia ese dala ia karaia Adamu bona Heva edia natudia gabeai idia mauri hanaihanai totona. Dirava ese Iesu ena mauri davalaia boubouna amo taunimanima ia hoia. Mani Roma 6:23 ita itaia lou. “Kara dika ena davana be mase,” to siri ma ia gwau, “Dirava ese Keriso Iesu iseda Lohiabada amo ia henia harihari gauna be mauri hanaihanai.” Ita gwau diba, Iesu ena mase sibona ese kara dika bona mase amo ita ia ruhaia. *

Megan: Lau ura inai siri ena point ma ta lau herevalaia.

Shirley: Namo.

Megan: Siri ma ia gwau: “Dirava ese Keriso Iesu iseda Lohiabada amo ia henia harihari gauna be mauri hanaihanai.” Ena be Iesu be ita totona hisihisi ia abia bona ia mase, to dahaka dainai siri ia gwau, mauri davalaia boubouna be ‘Dirava ena harihari gauna,’ to “Iesu ena harihari gauna” lasi? *

Shirley: Lau diba lasi.

Megan: Dirava ese Adamu bona Heva ia karaia bona Eden umana ai ia atodia, bona idia ese Dirava ena taravatu idia utua. Reana Dirava ia moale lasi badina ena natudia idia gwau-edeede. To Iehova ese maoromaoro unai hamaoromaoroa dalana ia gwauraia. * Dirava ia ura guba amo ta do ia siaia, goevadae tauna bamona tanobada dekenai ia noho, bona ena mauri be boubou gauna ta bamona do ia henia. Unai dainai, ita gwau diba, unai mauri davalaia boubouna be Dirava ena harihari gauna. Badina ma ta dainai, ita gwau diba ia be Dirava ena harihari gauna. Iesu idia hamasea neganai, oi laloa Dirava ena hemami be edena bamona?

Shirley: Reana ia lalohisihisi.

Megan: Emu ruma murimuri dekenai toi haida lau itaia. Reana oi be mai emu natudia, a?

Shirley: Rua​—mero ta bona kekeni ta.

Megan: Oi be sinana ta dainai, reana Iesu ena guba Tamana, Iehova Dirava, ena hemami be do oi diba. Iesu ena mase dinana ai, Dirava be guba amo ia itaia ena Natuna lalokauna be dagedage taudia ese idia dogoatao, kirikirilaia, bona dadabaia neganai, oi laloa Dirava ena hemami be edena bamona? Ena Natuna be au ai idia kokoa bona hisihisi bada ia ania ela bona ia mase neganai, oi laloa ena Tamana ena hemami be edena bamona?

Shirley: Momokani, Dirava be ia lalohisihisi bada.

Megan: Oibe, ita diba lasi unai dina ai Dirava ena hemami be edena bamona. To ita diba Ia be mai ena hemami, bona Dirava ese ena natuna dekenai ia vara gauna ia koua lasi ena badina ita diba. Ioane 3:16 be unai ia hahedinaraia. Ia namo oi duahia?

Shirley: Namo. Ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”

Megan: Tanikiu. Siri ena matamana mani oi itaia. Ia gwau: “Dirava ese tanobada ia lalokau henia.” Lalokau dainai Dirava ese ena Natuna be tanobada dekenai ia siaia mai bona ita dainai ia mase. Oibe, mauri davalaia boubouna be Dirava ena lalokau karana badana. Unai dainai, lagani ta ta ai, Iehova ena Witnes taudia ese Iesu ena mase laloatao hebouna idia karaia neganai, unai lalokau karana idia laloa. Inai herevahereva amo gau ta oi dibaia, eiava?

Shirley: Oibe, tanikiu.