“Lohiabada Dirava ese unai tau ia abia, Eden ena uma gabu lalonai ia atoa, do ia geia bona naria totona. Lohiabada Dirava ese unai tau dekenai taravatu ia atoa, ia gwau, ‘Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.’”​—Genese 2:15-17.

Dirava ese Adamu be Eden umana, tanobada paradaisona ai ia atoa, unuseniai animal bona au huahua idauidau idia noho. Adamu be au idauidau edia huahua ia ania diba. To, Iehova Dirava ese au huahua ta ia taravatua, bona Adamu ia hamaoroa unai au ena huahua ia ania neganai do ia mase.

Adamu be unai taravatu ia lalopararalaia, a? Ia be mase ena anina ia diba, badina animal idia mase be ia itaia. Bema Adamu be nega sisina do ia noho bona gabeai do ia mase, Dirava ese unai taravatu ia atoa be anina lasi. To, Adamu ia diba bema Dirava ia badinaia bona au ena huahua ia ania lasi, ia be do ia mauri hanaihanai​—ia be do ia mase lasi.

Haida idia gwau unai au huahua ese mahuta hebou karana ia laulaulaia. To unai be lalohadai kererena, badina Iehova ia ura Adamu bona ena hahine, Heva, ese ‘bese do idia havaraia, do idia momo herea. Tanobada ena gabu ibounai dekenai do idia noho.’ (Genese 1:28) Dirava be au korikorina ia taravatua. Iehova ese unai au ia gwauraia “kara namo bona kara dika hadibaia au,” bona unai ese ia laulaulaia gauna be inai: Dirava be mai ena maoro taunimanima ia hamaoroa dahaka be namo bona dahaka be dika. Bema Adamu be unai au ena huahua ia ania lasi, ia be ena Havaraia Tauna bona gau namodia momo ia henia Diravana ia badinaia bona matauraia.

“Adamu danu dekenai ia gwau henia, ia gwau, . . . ‘Lau taravatua au huahua oi ania vadaeni. Unai bamona oi karaia dainai, . . . do oi varahu, bona do oi gaukara auka, tano ena anina abia totona, ia lao bona tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.’”​—Genese 3:17, 19.

 Adamu be taravatu auna ena huahua ia ania. Unai be gwau-edeede karana​—ia hahedinaraia ia be Iehova ena kara namodia ibounai ia laloa bada lasi. Adamu be unai huahua ia ania amo ia hahedinaraia, ia be Iehova ia dadaraia, bona dika bada do ia vara.

Iehova ia hereva bamona, Adamu be gabeai ia mase. Dirava ese Adamu be “tano ena kahu dekena amo” ia karaia, bona ia hamaoroa “tano dekenai do oi giroa lou.” Unai dainai, Adamu ia mase neganai, ia be guba o gabu ma ta dekenai ia lao lasi, to tano ena kahu dekenai ia giroa lou.​—Genese 2:7; Hadibaia Tauna 9:5, 10.

“Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.”​—Roma 5:12.

Adamu ena gwau-edeede karana​—o kara dika​—ese ena bese taudia dekenai dika ia havaraia. Ia kara dika neganai, ia be lagani 70 o 80 maurina lasi, to mauri hanaihanai ia haboioa. Bona ia be kara dika tauna dainai, ena bese taudia ibounai be goevadae lasi taudia ai idia lao.

Ita be Adamu ena bese taudia bona kara dika be ita dekenai ia hanaia dainai, gabeai do ita mase. Paulo be unai ia gwauraia hedinarai. Ia gwau: “Lau be taunimanima sibona, bona lau be kara dika ena igui hesiai tauna. Lau madi o! Inai tauanina, egu mase do ia havaraia gauna amo daika ese lau ia hamauria diba?” Paulo ia haere: “Iesu Keriso, iseda Lohiabada amo Dirava lau tanikiu henia!”​—Roma 7:14, 24, 25.

“Tamana ese ena Natuna ia siaia mai, inai tanobada ena Hahemauri Tauna ai ia lao totona.”​—1 Ioane 4:14.

 Iehova Dirava ese dala ta ia karaia, kara dika ena metau ita hanaia bona ita mase hanaihanai lasi totona. Edena dala ai? Dirava ese ena lalokau Natuna be tanobada dekenai ia siaia neganai, Iesu be tau goevadaena, Adamu bamona. To, Iesu be “kara dika ta ia karaia lasi.” (1 Petero 2:22) Ia be tau goevadaena dainai, do ia mase lasi to ia mauri hanaihanai diba.

Dagedage taudia ese Iesu idia hamasea neganai, Iehova ese unai ia koua lasi. Dina toi murinai, Iehova ese Iesu be ia hatorea isi lou, ia be aneru ta bamona​—unai amo guba dekenai ia giroa lou. Unuseniai, Iesu ese ena mauri goevadaena be Dirava dekenai ia henia, unai amo Adamu bona Adamu ena bese ese idia haboioa gauna ena davana ia karaia. Iehova ese unai boubou gauna ia abia dae dainai, Iesu idia abidadama henia taudia be mauri hanaihanai idia abia diba.​—Roma 3:23, 24; 1 Ioane 2:2.

Adamu ia haboioa gauna be Iesu ese ia hoia lou. Ia hisihisi ela bona ia mase, unai amo mauri hanaihanai ita abia diba. Baibel ia gwau: “Iesu . . . be hisihisi ia abia bona ia mase. . . . Dirava ena hebogahisi hereadaena dainai, ia be taunimanima ibounai totona ia mase.”​—Heberu 2:9.

Unai ese Iehova ena kara idia hahedinaraia. Iena hahemaoro goeva karana dainai, goevadae lasi taudia be mauri idia abia diba. Lalokau bona hebogahisi Diravana be sibona ena taravatu ia badinaia dainai, ia karaia kara badana be inai: Iena Natuna amo mauri davana ia karaia.​—Roma 5:6-8.

“Keriso be mase amo ia toreisi lou, ia be mase lalonai idia mahuta taudia amo ia toreisi lou tauna ginigunana. Badina tau tamona amo mase ia vara, unai hegeregerena tau tamona amo mase taudia do idia toreisi lou. Adamu amo taunimanima ibounai idia mase noho, unai hegeregerena Keriso amo taunimanima ibounai be mauri do idia abia.”​—1 Korinto 15:20-22.

Iesu be ia mauri bena ia mase, to dahaka ese ia hahedinaraia ia be mase amo ia toreisi lou? Ia toreisi lou murinai, ia be gabu bona nega idauidau ai, taunimanima momo dekenai ia hedinarai. Nega ta ai, ia be taunimanima 500 dekenai ia hedinarai. Aposetolo Paulo be Korinto revareva ai ia gwau, unai taudia haida be idia mauri noho, idia ese idia itaia bona kamonai gauna idia hamomokania diba.​—1 Korinto 15:3-8.

Paulo ia gwau Iesu be mase amo ia toreisi lou “tauna ginigunana,” anina be, haida danu be gabeai do idia toreisi lou. Danu, Iesu ia gwau nega ta do ia mai, idia mase taudia ibounai be “guria gabuna” amo “do idia raka-lasi.”​—Ioane 5:28, 29.

“Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:16.

 Baibel buka ginigunana be mase ia vareai dalana bona Paradaiso ia boio dalana ia herevalaia. To Baibel buka ginigabena be mase do ia ore dalana bona Dirava ese tanobada Paradaisona do ia havaraia dalana ia herevalaia. Unai negai, taunimanima be do idia moale bona mauri hanaihanai. Apokalupo 21:4 ia gwau: “Mase be do ia ore.” Siri 5 ese unai hereva ia hamomokania, ia gwau: “Inai hereva oi torea, badina idia be taunimanima ese idia abia dae diba bona idia be momokani.” Iehova ese ena gwauhamata do ia hagugurua momokani.

Unai hereva oi “abia dae diba bona idia be momokani,” a? Vadaeni, Iesu Keriso oi dibaia bona abidadama henia noho be namo. Unai bamona oi karaia neganai, Iehova do ia moale. Bona ia ese hari oi do ia hanamoa sibona lasi, to nega vairai tanobada Paradaisona ai mauri hanaihanai do oi abia, unuseniai “mase be do ia ore, bona lalohisihisi, taitai, bona hisihisi danu be do idia ore.”