SARA be daiutu huanai ia gini bona gau ibounai ia itadia. Mani emu lalona ena matana ai Middle East hahinena ta oi itaia, iena matana be mai edia hairai. Lalohekwarahi ta oi itaia, a? Bema oibe, do ia auka lasi unai oi lalopararalaia totona. Badina unai ruma lalonai gau momo idia vara. Lagani momo lalonai ia bona ena lalokau adavana Aberahamo, be iniseniai idia moale hebou. * Inai be edia noho gabuna.

Idia be Uru dekenai idia noho, unai be taga bada hanuana bona unuseniai ima gaukara idia diba momo taudia bona hoihoi taudia idia noho danu. Unai dainai idia be mai edia kohu momo. To Sara ena ruma be ena kohu ia haboua rumana sibona lasi, to ia be mai anina ia dekenai. Iniseniai ia bona ena adavana be lagani momo idia noho, mauri idia moalelaia bona idia lalohisihisilaia hebou. Iniseniai idia be nega momo herea edia lalokau Diravana Iehova idia guriguri henia. Sara be badina momo dainai inai gabu ia ura henia.

Sara be mai ena ura ida do ia lao bona ia manadalaia mauri dalana do ia rakatania. Reana iena mauri lagani be 60 bamona, bona ia diba lasi gabudia dekenai do ia lao bona hekwakwanai amo ia honu maurina do ia noholaia bona ena hanua dekenai do ia giroa lou lasi. Dahaka dainai iena mauri lalonai unai abia hidi ia karaia? Hari iena abidadama dekenai dahaka ita dibaia?

Toana be Sara be Uru dekenai ia tubu daekau. Unai hanua idia hadikaia ore bona hari ia noho kava. To Sara ena nega ai, hoihoi taudia edia bouti be Euperate Sinavai dekenai idia lao mai, dava bada kohudia be gabu daudau amo idia abia mai Uru hanua dekenai. Taunimanima hutuma be Uru ena dala maragidia dekenai idia loaloa, bouti momo be wofu dekenai idia noho, bona maketi gabudiai aniani be momo. Mani oi laloa, Sara be unai bisi bada hanuana dekena ia tubu daekau dainai, taunimanima momo edia ladana ia diba. Bona idia danu be ia idia diba, badina ia be hahine hairaina. Danu, unuseniai ia be mai ena ruma bese badana.

Baibel ese Sara ena abidadama bada sivaraina ia gwauraia, to Uru ai momo ese idia tomadiho henia hua diravana ia abidadama henia lasi, unuseniai unai dirava totona kohoro badana ta idia haginia. To Sara be Dirava momokanina Iehova ia tomadiho henia. To Baibel ia gwau lasi edena dala ai unai bamona abidadama ia abia. Badina iena tamana be kaivakuku ia tomadiho henia, nega sisina lalonai. To Sara be Aberahamo ia adavaia, iena mauri lagani be lagani 10 amo ia bada Sara ena amo. * (Genese 17:17) Gabeai ia idia gwauraia “abidadama taudia ibounai edia tamana.” (Roma 4:11) Idia ese headava goadana idia haginia, idia matauraia heheni, idia herevahereva namonamo, bona mai ura ida idia gaukara hebou hekwakwanai badadia idia hamaoromaoroa totona. To gau badana be inai, idia ruaosi ese Dirava idia lalokau henia.

 Sara ese ena adavana ia lalokau henia bada, bona Uru dekenai edia ruma idia haginia bona edia varavara ida idia noho. To idia be mai edia lalohisihisi gauna ta. Baibel ia gwau: “Sarai be hegeregere lasi natuna ta do ia havaraia.” (Genese 11:30) Unai nega ena kastom dainai, Sara ese natuna ta ia havaraia lasi be lalohisihisi gauna. To Sara be iena Dirava ia badinaia bona ena adavana ia rakatania lasi. Aberahamo ena tadikaka ena natuna, Lota, be natuna bamona ia bona Aberahamo dekenai. Unuseniai idia noho ela bona nega ta gau ibounai idia idau.

Aberahamo be mai moale danu Sara dekenai ia mai. Ia dekenai ia vara gauna dainai ia hoa bada. Idia tomadiho henia Diravana be ia Ia hereva henia, danu aneru amo ia dekenai ia hedinarai! Mani emu lalona ena matana amo Sara oi itaia, iena matana hairaina be ena adavana dekenai bona mai moale ida ia henanadai: “Dahaka ia gwau oi dekenai? Mani emu kara lau oi hamaoroa!” Reana Aberahamo ia helai diho guna ia laloa namonamo totona, bena ia dekenai Iehova ena hereva ia gwauraia: “Emu tano bona emu varavara oi rakatania bona oi dekenai do lau hahedinaraia tanona dekenai oi mai.” (Kara 7:2, 3) Unai murinai, Iehova ese idia dekenai ia henia gaukara idia lalohadailaia matamaia. Edia mauri namona do idia rakatania bona gabu idauidau dekenai do idia loaloa! Sara be edena bamona ia kara? Aberahamo be Sara ia laloa. Edia mauri lalonai senisi bada herea do idia karaia dainai, Sara be mai ena ura ida ia do ia durua, eiava?

Sara do ia karaia abia hidi be reana ia idau ita dekenai. Reana do ita laloa, ‘Dirava be lau o egu adavana dekenai unai bamona ia hereva lasi!’ Herevana dahaka, to ita ibounai ese unai bamona abia hidi ita karaia danu, ani? Ita be kohu momo tanobadana lalonai ita noho, unai ese ita ia veria diba kohu eiava mauri namona ita atoa guna totona. To Baibel ese ita ia hagoadaia abia hidi idauna ita karaia totona, anina be iseda hetura karana Dirava ida do ita atoa guna, unai amo Dirava do ita hamoalea to ita sibona lasi. (Mataio 6:33) Sara ia karaia gaudia ita lalohadailaia, reana sibona do ita nanadaia, ‘Egu mauri lalonai dahaka abia hidi do lau karaia?’

Sara ese ena kohu ia atoa hebou neganai, ia laloa dahaka gaudia do ia abia lao bona dahaka gaudia do ia rakatania. Bema kohu ena bada be doniki bona kamelo ese idia huaia diba lasi, vadaeni ia abia lasi, gabu idauidau dekenai ia abia loaloa diba gaudia sibona ia abia. Unai dainai edia kohu momo idia hoihoilaia eiava ma haida dekenai idia henia. Siti maurina ena namo idauidau do idia moalelaia lasi danu, hegeregere maketi gabudia dekenai do ia lao lasi witi, vamu, au huahua, dabua bona ma gau haida hoia totona.

To reana Sara ia hekwarahi bada iena ruma ia rakatania totona. Bema Sara ena ruma be Akioleji taudia ese idia davaria rumadia bamona, toana be mauri namona do ia rakatania. Unai ruma haida be mai edia daiutu momo, ranu lohilohidia idia noho bona ruma lalonai paipa idia atoa vareai. Herevana ia be  ruma ta sibona, to ia be mai ena guhi, haba bona mai ena iduara dainai, idia koua diba. To palai rumana ta ese idia be henaohenao taudia amo ia gimaia diba, a? Eiava laiona, lepadi, bea, bona uda sisia amo ia gimadia danu, a? Guna unai bamona animal be Baibel tanodia dekenai idia noho.

Bona edia ruma bese taudia be edena bamona? Sara be daidia do ia rakatania? Dirava ese ia hagania ‘iena tano bona varavara do ia rakatania,’ reana unai ia lalohekwarahilaia bada. Sara be lalokau bada hahinena, reana ia be mai ena tadikaka bona taihu, edia natudia kekeni bona memero, ena anti bona ankol, idia ia lalokau henia, to do ia lao dainai, idia do ia itaia lou lasi. To Sara ena lalona ia goada, dina ta ta ai ia hegaegae ia lao totona.

Ena be ia auka Sara dekenai, to iena kohu ia atoa hebou bona ia hegaegae idia abia hidi dinana ai ia lao totona. Edia bese kwarana tauna, Tera, be Aberahamo bona Sara ida do ia lao, herevana iena mauri lagani be 200 bamona. (Genese 11:31) Momokani, Sara ese gau momo do ia karaia iena tamana burukana ia naria totona. Idia ese Iehova idia kamonai henia bona “Kaledea taudia edia tano [idia] rakatania” neganai, Lota danu be idia ida ia lao.—Kara 7:4.

Guna idia be Harana dekenai idia lao, ia be kilomita 960 notwest kahana dekenai, unai be Euperate ia lao henia dalana amo. Bona idia be nega sisina Harana dekenai idia noho. Unai negai reana Tera ia gorere, unai dainai edia laolao edia hadokoa. Unuseniai idia noho ela bona Tera ia mase, ena mauri lagani be 205. Bena edia laolao ma ta idia do hamatamaia lasi neganai, Iehova be Aberahamo ia hereva henia lou, ia hamaoroa unai tano do ia rakatania bona Ia, Iehova, ese do ia hahedinaraia tanona dekenai do ia lao. Unai nega ai, Dirava ese ia dekenai gwauhamata ta ia karaia: “Lau be oi dekenai tubuna momo do lau henia.” (Genese 12:2-4) To Harana idia rakatania neganai, Aberahamo ena mauri lagani be 75 bona Sara ena be 65, bona idia be natudia lasi. Edena bamona ia dekenai tubuna momo do idia vara? Ia ese hahine ma ta do ia abia, a? Unai negai, hahine momo adavaia karana be taravatu lasi, unai dainai reana Sara ese unai ia lalohadailaia danu.

Herevana dahaka, to Harana idia rakatania bona idia lao. To unai negai, daidia be idia danu idia lao? Baibel ese ia hahedinaraia, Aberahamo be Harana ia rakatania neganai, idia be mai edia kohu momo, bona ‘Harana dekenai idia abia gaukara memero danu idia abia lao.’ (Genese 12:5) Unai taudia be daidia? Reana idia be edia hesiai taudia. To, toana be Aberahamo bona Sara ese edia abidadama be ma haida dekenai idia herevalaia. Idaunegai hereva edia anina idia gwauraia taudia idia gwau, inai siri ese ia herevalaia taudia be, Aberahamo bona Sara ida Iehova tomadiho henia karana idia abia dae taudia. Bema oibe, Sara ena abidadama goadana dainai, ma haida dekenai iena Dirava bona helaro ia herevalaia neganai, mai lalogoada ida ia hereva. Unai ita lalohadailaia be namo, badina hari inai negai taunimanima ese abidadama bona vaira nega ena helaro idia laloa bada lasi. Baibel amo gau namona ta oi dibaia neganai, ma ta dekenai oi herevalaia diba, a?

Toana be Nisan 14, 1943 B.C.E. ai, Euperate Sinavaina idia hanaia murinai, idia be saut kahana dekenai idia lao, Iehova ese ia gwauhamatalaia tanona dekenai. (Esodo 12:40, 41) Mani emu lalona ena matana amo Sara oi itaia, ia lao henia tanona ena klaimet namona bona gabu hairaina dainai, gabu ia raraia namonamo. Bena More ena au badadia ai, unai be Sekema kahirakahira ai, Iehova be Aberahamo dekenai ia hedinarai lou, ia gwau: “Inai tano be oiemu tubuna dekenai do lau henia.” Inai hereva “tubuna” be mai anina bada Aberahamo dekenai. Unai hereva dainai ia ese Eden umana lalonai ia vara gauna ia laloa, unai negai Iehova ia peroveta ia gwau natuna ta ese Satani do ia hadikaia ore. Iehova be Aberahamo dekenai ia gwauhamata vadaeni bese ta be ia amo do ia vara bona tanobada taudia ibounai dekenai hahenamo do ia mailaia.—Genese 3:15; 12:2, 3, 6, 7.

To Aberahamo ena ruma bese taudia ese inai tanobada ena metau idauidau idia davaria danu. Hitolo bada be Kanana tanona dekenai ia vara, bona Aberahamo ese ena ruma bese be saut kahanai ia hakaudia lao, unai be Aigupito dekenai. To ia mamia unai gabu dekenai dika do idia davaria. Unai dainai Sara ia hereva henia, ia gwau: “Kamonai, oi be hairai dikadika hahine ta. Aigupito taudia ese oi idia itaia neganai do idia gwau, ‘Ia be Aberamo ena adavana.’ Vadaeni, lau do idia alaia, oi idia abia totona. Mani idia dekenai oi hamaoroa, oi be lauegu taihuna, vadaeni oi dainai dohore lau noho namonamo mai mauri danu.” (Genese 12:10-13) Dahaka dainai Aberahamo ese unai noinoi idauna ia karaia?

Aberahamo be koikoi eiava gari tauna lasi, haida idia gwau bamona. Sara be momokani iena taihuna. Aberahamo be badina namona dainai unai bamona ia karaia. Aberahamo bona Sara idia diba Dirava ena ura be ia ese natuna ta do ia havaraia bona bese ta be Aberahamo amo do ia vara, unai dainai Aberahamo ese edia namo ia laloa bada. Danu, Akioleji taudia idia davaria gaudia ese idia hahedinaraia, vaia Aigupito ai, dagi bada tatau ese tau ta ena hahine idia dogoatao to iena adavana idia alaia mase. Unai dainai Aberahamo be mai aonega ida ia kara, bona Sara ese iena abia hidi ia abia dae.

Daudau lasi murinai, idia vara gaudia ese idia hamomokania, Aberahamo ena lalohadai be momokani, Farao ena lohia taudia haida idia itaia Sara be hairai bada hahinena, ena be ena mauri lagani be bada. Farao dekenai ia idia gwauraia, bona oda ia henia Sara be ia dekenai do idia abia lao! Aberahamo ena lalohekwarahi eiava Sara ia abia gari mamina ita laloa diba lasi. To ia be dibura tauna ta bamona idia kara henia lasi, to idia boiria vadivadi tauna bamona idia kara henia. Reana Farao be palani ia karaia, iena kohu momo amo Sara ena lalona do ia veria bena ia be Aberahamo ida do ia herevahereva Sara be iena hahine ai ia halaoa totona.—Genese 12:14-16.

Mani Sara oi laloa, king ena ruma badana ena windo eiava varenda amo Aigupito ena tano ia itaia. Hari ia be ruma korikorina ta ai ia noho bona ia dekenai aniani namodia idia henia, ena hemami be edena bamona? Uru ai ia noho maurina be idau, to hari taga bada maurina ese ena lalona do ia veria, a? Mani oi laloa, bema ia ese Aberahamo ia rakatania bona Farao ena hahine ai ia lao, Satani do ia moale bada, ani? To Sara be unai bamona ia karaia lasi. Ia ese ena adavana, ena headava, bona ena Dirava ia badinaia momokani. Inai matabodaga tanobadana ai, bema headava taudia ibounai ese unai bamona kara idia hahedinaraia, unai be namo herea! Sara ena haheitalai oi tohotohoa bona emu lalokau taudia bona turadia dekenai unai bamona kara oi hahedinaraia diba, a?

Iehova ese kara ta ia karaia bona unai hahine namona ia gimaia, Ia ese Farao ena ruma taudia dekenai gorere dikana ia henia. Farao ia kamonai Sara be Aberahamo ena adavana neganai, ia ese Sara be ena adavana dekenai ia siaia giroa, bona edia famili ia hamaoroa Aigupito idia rakatania totona. (Genese 12:17-20) Aberahamo ia moale bada ena adavana ia abia lou dainai! Laloatao, ia be guna mai lalokau ida Sara dekenai ia gwau: “Oi be hairai dikadika hahine ta.” To Sara dekenai hairai ma ta ia laloa bada, unai hairai ese ena toana ena hairai ia hereaia. Sara ena kara korikoridia unai, idia be mai hairai bada, bona Iehova ese unai ia laloa bada. (1 Petero 3:1-5) Ita ibounai ese unai bamona hairai ita hahedinaraia diba. Bema Dirava tomadiho henia karadia ita atoa guna to moni bona kohu lasi, bona Dirava amo ita diba gaudia be ma haida dekenai ita herevalaia, bona hahetoho negadiai Dirava ena kara maoromaoro taravatudia ita badinaia, vadaeni ita be Sara ena abidadama ita badinaia unai.