Èske w panse bagay yo ap vin pi bon alavni? Menm lè n ap fè fas avèk gwo pwoblèm jodi a, anpil moun chèche rete pozitif. Men, èske n vrèman gen rezon pou n panse bagay yo ap vin pi bon? Wi! Bib la ban nou bonjan espwa pou lavni.

•  Ki espwa Bib la bay?

•  Èske espwa Bib la bay la twò bèl pou l ta yon reyalite?

•  Ki jan pwomès sa yo pral reyalize?

•  Ki lè pwomès sa yo ap reyalize?

•  Ki jan espwa Bib la bay kapab ede nou jodi a?

 Bib la fè konnen lèzòm t ap gen pou yo fè fas ak gwo pwoblèm. Men, Bib la di pwoblèm sa yo pa t ap dire pou toutan. Ann egzamine kèk nan pwoblèm sa yo:

•   Pwoblèm: Moun ki pa gen kote pou yo rete

   Men sa Bib la di: “Y ap bati kay e y ap abite ladan yo.” — Ezayi 65:21.

   Sa sa vle di pou lavni: Chak moun ap gen pwòp kay yo.

•   Pwoblèm: Pa gen travay e gen povrete

   Men sa Bib la di: “Moun mwen chwazi yo ap byen jwi travay yo fè ak men yo.” — Ezayi 65:22.

   Sa sa vle di pou lavni: Tout moun ap gen yon travay ki bay kè kontan ak satisfaksyon.

•   Pwoblèm: Enjistis

   Men sa Bib la di: “Gen prens ki pral dirije yon fason ki dwat.” — Ezayi 32:1.

   Sa sa vle di pou lavni: Pap gen patipri. Tout moun ap egal kèlkeswa ras yo, sitiyasyon ekonomik yo oswa ran sosyal yo.

•   Pwoblèm: Malnitrisyon ak rate manje

   Men sa Bib la di: “Tè a gen pou l chaje ak manje angren, tout tèt mòn yo pral chaje ak manje.” — Sòm 72:16.

   Sa sa vle di pou lavni: Tout moun ap gen bonjan manje an kantite. Pa gen moun k ap grangou oswa k ap soufri akoz yo pa jwenn manje ki bon pou sante yo.

•   Pwoblèm: Krim ak vyolans

   Men sa Bib la di: “Chak moun ap chita anba pye rezen yo ak pye fig frans yo, e pa gen pèsonn k ap vin fè yo pè.” — Miche 4:4.

   Sa sa vle di pou lavni: Tout moun ap santi yo an sekirite paske mechan yo pap la ankò, epitou “moun ki jis yo gen pou yo posede tè a”. — Sòm 37:10, 29.

•   Pwoblèm: Lagè

   Men sa Bib la di: “Nasyon yo pap pran epe pou yo atake youn lòt ankò, e yo pap aprann fè lagè ankò.” — Ezayi 2:4.

   Sa sa vle di pou lavni: Ap gen lapè toupatou sou tè a (Sòm 72:7). Pa gen moun k ap nan lapenn akoz moun pa yo ki mouri nan lagè e pap gen moun k ap chèche refij akoz lagè.

•   Pwoblèm: Maladi

   Men sa Bib la di: “Pa gen yon moun nan peyi a k ap di: ‘Mwen malad.’” — Ezayi 33:24.

   Sa sa vle di pou lavni: Pap gen moun k ap soufri akoz yon andikap oswa akoz maladi (Ezayi 35:5, 6). Bib la menm fè konnen “pap gen lanmò ankò”. — Revelasyon 21:4.

•   Pwoblèm: Lèzòm ap detwi tè a

   Men sa Bib la di: “Dezè a ak tè ki sèch la ap kontan anpil, e plèn ki nan dezè a ap kontan, l ap gen anpil flè tankou pye safran.” — Ezayi 35:1.

   Sa sa vle di pou lavni: Tout tè a ap vin yon bèl paradi pou lèzòm viv, jan Bondye te prevwa a depi okòmansman. — Jenèz 2:15; Ezayi 45:18.

 Nou konprann si se konsa w ta santi w. Men, nou ankouraje w pi byen egzamine sa Labib di anrapò ak lavni. Poukisa? Paske pwomès nou jwenn nan Bib la diferan ak pwomès moun fè e ak sa yo panse ki pral rive alavni. Pwomès nou jwenn nan Bib la se Bondye ki fè yo. Ann wè kèk rezon ki fè sa se yon gwo diferans:

•   Nou kapab fè Bondye konfyans. Bib la fè konnen Bondye “pa ka bay manti”. (Tit 1:2.) Epitou, se sèlman Bondye ki gen kapasite pou l anonse bagay ki poko rive yo (Ezayi 46:10). Gen anpil prèv nan Bib la ki montre sa Bondye di k ap rive yo toujou reyalize. Pou plis enfòmasyon, gade videyo Ki jan nou ka sèten sa ki nan Bib la se laverite?

•   Bondye gen pouvwa pou l rezoud pwoblèm nou yo. Bib la fè konnen Bondye gen pouvwa pou l “fè sa l vle”. (Sòm 135:5, 6.) Sa vle di, pa gen anyen ki ka anpeche Bondye reyalize pwomès li yo. Epitou, Bondye vle ede n paske li renmen nou. — Jan 3:16.

 Nòmalman, ou ka ap mande tèt ou: ‘Si Bondye vle ede n e l gen pouvwa pou l fè sa, sa k fè n toujou gen tout pwoblèm sa yo?’ Pou w jwenn repons kesyon sa a, gade videyo Poukisa Bondye pèmèt soufrans?

 Bondye pral sèvi ak Wayòm li an, yon gouvènman ki nan syèl la, pou l reyalize pwomès li yo. Se Jezi Kris li mete kòm Wa nan Wayòm sa a, e Bondye ba l otorite pou l pran swen tè a ak moun k ap viv sou li. Lè Jezi te sou tè a, li te geri moun ki malad, li te bay moun ki grangou manje, li te gen kontwòl sou fòs lanati yo e li te menm resisite moun mouri (Mak 4:39; 6:41-44; Lik 4:40; Jan 11:43, 44). Donk, li te montre sa l pral fè antanke Wa nan Wayòm Bondye a.

 Pou w aprann plis sou byenfè ou ka jwenn grasa Wayòm Bondye a, gade videyo Ki sa Wayòm Bondye a ye?

 Talè konsa! Ki jan n fè konn sa? Bib la te anonse kèk evènman pou montre lè Wayòm Bondye a t apral kòmanse dirije tè a (Lik 21:10, 11). Nou wè evènman sa yo jodi a.

 Pou w aprann plis toujou, gade atik “Ki lè Wayòm Bondye a pral dirije tè a?”

 Youn nan moun ki te patisipe nan ekri Bib la te konpare espwa nou jwenn nan Labib ak “yon lank batiman pou nanm nou”. (Ebre 6:19.) Menm jan yon lank batiman ede yon bato ret kanpe lè gen tanpèt, se konsa tou Bib la ede n andire anba pwoblèm nou rankontre nan sistèm sa a jodi a. Esperans nou an kapab ede n rete kalm, li kapab ede n wè pi klè e li ka menm ede n nan domèn fizik. — 1 Tesalonisyen 5:8.