Ezekyèl 10:1-22
10 Pandan mwen t ap gade, mwen te wè yon bagay ki te sanble ak yon wòch safi pa anlè platfòm ki anlè tèt cheriben yo. Bagay sa a mwen te wè a te sanble ak yon twòn+.
2 Lè sa a, li di mesye ki te gen rad len sou li a+: “Antre nan mitan wou yo+, anba cheriben yo, plen toule de men w ak chabon tou limen+ ki nan mitan cheriben yo epi voye yo sou vil la+.” Vrèmanvre, li antre pandan mwen t ap gade.
3 Cheriben yo te kanpe sou bò dwat kay la lè mesye a te antre nan mitan wou yo e gen yon nyaj ki te plen lakou ki anndan an.
4 Glwa Jewova+ te soti kote l te ye pa anlè cheriben yo e l al nan papòt kay la. Tikras pa tikras, nyaj la te plen kay la+. Glwa Jewova te klere nan tout lakou a.
5 Yo te kapab tande bri zèl cheriben yo nan lakou ki deyò a. Bri sa a te tankou son vwa Bondye Toupisan an lè l ap pale+.
6 Apre sa, li di mesye ki te gen rad len sou li a: “Pran dife nan mitan wou yo, nan mitan cheriben yo.” Vrèmanvre, li antre e li kanpe bò kot wou yo.
7 Lè sa a, gen youn nan cheriben yo ki lonje men l nan direksyon dife ki te nan mitan cheriben yo+, li pran kèk nan chabon dife yo epi li mete yo nan men mesye ki te gen rad len sou li a+. Lè sa a, mesye a pran chabon dife yo epi li soti.
8 Anba zèl cheriben yo, mwen te wè yon bagay ki sanble ak men moun+.
9 Pandan m t ap gade, mwen te wè kat wou bò kote cheriben yo. Chak cheriben te gen yon wou bò kote l e wou yo te klere menm jan ak krizolit+.
10 Toule kat wou yo te fèt menm jan. Fason yo te fèt la se te tankou yon wou ki nan mitan yon lòt wou.
11 Lè yo t ap deplase, yo te kapab ale nan toule kat direksyon yo san yo pa t bezwen vire. Paske, yo te konn deplase nan direksyon cheriben yo te met tèt yo san yo pa t bezwen vire.
12 Tout kò yo, do yo, men yo, zèl yo ak wou yo, wou ki te bò kote toule kat cheriben yo, te chaje ak je sou yo+.
13 Kanta pou wou yo, mwen te tande yon vwa ki di yo byen fò: “Nou menm wou yo!”
14 Yo chak* te gen kat figi. Premye figi a se te figi cheriben an, dezyèm figi a se te yon figi moun, twazyèm nan se te yon figi lyon e katriyèm nan se te yon figi èg+.
15 Cheriben yo te konn monte anlè. Se te menm kreyati vivan mwen te wè bò Rivyè Keba a+.
16 Lè cheriben yo t ap deplase, wou yo te konn deplase bò kote yo. Lè cheriben yo te leve zèl yo pou yo monte byen wo anlè tè a, wou yo pa t vire e yo te rete la bò kote yo+.
17 Lè cheriben yo te rete anplas, wou yo te rete anplas tou. Lè cheriben yo te monte anlè, wou yo te monte anlè tou, paske, lespri ki t ap aji nan kreyati vivan yo* te nan wou yo tou.
18 Apre sa, glwa Jewova+ te deplase sot nan papòt kay la e li t al rete sou tèt cheriben yo+.
19 Epi, cheriben yo leve zèl yo, yo monte anlè pandan mwen t ap gade. Wou yo te rete bò kote yo pandan yo t ap deplase a. Yo t al kanpe nan antre pòtay ki alès kay Jewova a e glwa Bondye Izrayèl la te anlè tèt yo+.
20 Se kreyati vivan sa yo* mwen te wè anba twòn Bondye Izrayèl la bò Rivyè Keba a+. Se konsa m te vin konnen se cheriben yo te ye.
21 Yo toule kat te gen kat figi ak kat zèl e yo te gen yon bagay anba zèl yo ki te sanble ak men moun+.
22 Figi yo te tankou figi mwen te wè bò Rivyè Keba a+. Yo chak te ale dwat devan yo+.
Nòt anba paj
^ Sa vle di chak cheriben.
^ Lit.: “lespri kreyati vivan an”.
^ Lit.: “Se kreyati vivan sa a”.
