Ezekyèl 25:1-17
25 Jewova pale avè m yon lòt fwa ankò, li di m:
2 “Pitit lòm, vire gade desandan Amon yo+, epi pwofetize kont yo+.
3 Men sa pou w di konsènan desandan Amon yo: ‘Tande sa Jewova, Seyè ki Souvren an, di. Men sa Jewova, Seyè ki Souvren an, di: “Kòm lè yo te montre yo pa gen respè pou kote mwen genyen ki sakre a nou te di: ‘Se bon’, nou te di sa tou lè peyi Izrayèl te vin vid la e nou te di sa lè yo te mennen moun Jida yo ann egzil la,
4 m ap lage nou nan men moun ki sot nan Lès yo pou yo pran nou kòm byen pa yo. Y ap mete kan* yo nan mitan nou, y ap monte tant yo nan mitan nou. Y ap manje rekòt nou yo e y ap bwè lèt bèt nou yo.
5 M ap fè Raba+ tounen yon patiray pou chamo, m ap fè peyi desandan Amon yo tounen yon kote pou twoupo bèt repoze, e n ap konnen mwen se Jewova.”’”
6 “Paske, men sa Jewova, Seyè ki Souvren an, di: ‘Lefètke nou te bat men nou+, nou te sote ponpe*, nou* t ap bat plezi sou do peyi Izrayèl ak kè kontan lè nou te wè sa k rive l la+,
7 m ap lonje men m pou m frape nou, pou m lage nou nan men nasyon yo pou yo pran tout sa nou genyen. M ap elimine nou antanke pèp e m ap detwi nou nan peyi yo+. M ap elimine nou, e n ap konnen mwen se Jewova.’
8 “Men sa Jewova, Seyè ki Souvren an, di: ‘Kòm Mowab+ ak Seyi+ te di: “Gade, moun Jida yo menm jan ak tout lòt nasyon yo,”
9 m ap fè ènmi atake vil Mowab genyen ki sou fwontyè l la, sou pant Mòn Mowab la, vil ki fè bote* peyi a, depi Bètjechimòt, Baalmeyon, rive Kiryatayim+.
10 M ap lage ni Mowab, ni desandan Amon yo nan men moun ki nan Lès yo+, y ap vin byen pa yo e nasyon yo pap sonje desandan Amon yo ankò+.
11 M ap pini Mowab+ e y ap konnen mwen se Jewova.’
12 “Men sa Jewova, Seyè ki Souvren an, di: ‘Edòm fè vanjans sou moun Jida yo. Se sa k fè li koupab anpil+.
13 Kidonk, men sa Jewova, Seyè ki Souvren an, di: “Mwen menm tou, m ap lonje men m kont Edòm, m ap elimine ni moun ni bèt e m ap fè l vin vid+. Soti Teman rive Dedan, y ap tonbe anba kout epe+.
14 ‘M ap sèvi ak pèp mwen an, pèp Izrayèl la, pou m tire revanj sou Edòm+. Y ap vide kòlè m ak raj mwen sou Edòm pou m ka fè vanjans sou li+.’ Se sa Jewova, Seyè ki Souvren an, di.”’
15 “Men sa Jewova, Seyè ki Souvren an, di: ‘Moun Filisti yo kontinye rayi pèp mwen an. Y ap mal boule avè l, y ap chèche fè vanjans sou li e y ap chèche detwi l+.
16 Kidonk, men sa Jewova, Seyè ki Souvren an, di: “M ap lonje men m sou moun Filisti yo+, m ap elimine Keretit yo+ e m ap elimine rès moun k ap viv bò lanmè a+.
17 M ap fè gwo vanjans sou yo, m ap ba yo pinisyon ki rèd. Y ap konnen mwen se Jewova lè m fè vanjans sou yo.”’”
Nòt anba paj
^ Oswa: “kan ki gen miray toutotou”.
^ Oswa: “nou te frape pye nou atè”.
^ Oswa: “nanm nou”.
^ Oswa: “ki dekore”.
