Ezekyèl 35:1-15
-
Pwofesi kont mòn Seyi yo (1-15)
35 Jewova pale avè m yon lòt fwa ankò, li di m:
2 “Pitit lòm, vire figi w nan direksyon zòn ki gen mòn nan Seyi a+ epi pwofetize kont li+.
3 Se pou w di l: ‘Men sa Jewova, Seyè ki Souvren an, di: “O ou menm zòn ki gen mòn nan Seyi a, mwen kont ou. M ap lonje men m pou m frape w e pou m fè w vin tankou yon dezè ki pa gen moun ladan l+.
4 M ap fè vil ou yo tounen yon pil dekonm. W ap vin tankou yon dezè ki pa gen moun ladan l+. Lè sa a, w ap konnen mwen se Jewova.
5 Paske, ou te kontinye montre w rayi moun Izrayèl yo+, e w te fè yo tonbe anba kout epe nan jou malè a te rive yo a, lè yo te resevwa dènye pinisyon an+.”’
6 “‘Se sa k fè, menm jan li klè mwen vivan, mwen fè sèman,’ se sa Jewova, Seyè ki Souvren an, di, ‘m ap fè yo fè san w koule. Lanmò ap pousuiv ou+. Kòm ou te montre w rayi moun ou te touye yo, lanmò ap pousuiv ou+.
7 M ap fè zòn ki gen mòn nan Seyi a vin tankou yon dezè ki pa gen moun ladan l+ e m ap elimine tout moun k ap pase nan zòn sa a, kit y ap pase ale, kit y ap pase tounen.
8 M ap plen mòn ou yo ak kadav moun yo touye. Kadav moun yo touye anba kout epe yo ap tonbe sou mòn ou yo, nan vale w yo e nan tout kouran dlo w yo.
9 M ap fè w rete vid pou toutan e pèsonn pap abite nan vil ou yo+. Lè sa a, w ap konnen mwen se Jewova.’
10 “Kòm ou te di: ‘De nasyon sa yo ak de peyi sa yo ap vin byen pa m, m ap pran yo toule de kòm byen pa m+’, menm lè mwen menm, Jewova, mwen te la nan mitan yo,
11 ‘enben, menm jan li klè mwen vivan, mwen fè sèman, m ap aji avè w menm jan w te aji avèk yo a, lè w te montre jan w te an kòlè kont yo e w te jalou sò yo paske w te rayi yo+. Lè m pini w, m ap fè yo konnen m.’ Se sa Jewova, Seyè ki Souvren an, di.
12 ‘Lè sa a, w ap konnen, mwen menm, Jewova, mwen te tande tout pawòl derespektan ou t ap di konsènan mòn Izrayèl yo. Ou te di: “Yo vin tankou yon dezè e yo lage yo nan men nou pou nou devore yo*.”
13 Nou te pale kont mwen avèk awogans e nou te di yon bann pawòl sou mwen+. Mwen te tande tout sa nou te di yo.’
14 “Men sa Jewova, Seyè ki Souvren an, di: ‘Tout tè a ap kontan lè m fè w vin tankou yon dezè ki pa gen moun ladan l.
15 Menm jan w te rejwi lè eritaj moun Izrayèl yo te vin vid tankou yon dezè a, se konsa m ap rejwi lè m fini avè w+. W ap vin yon kote ki vid, o ou menm zòn ki gen mòn nan Seyi a, wi ou menm Edòm+. Lè sa a, tout moun ap konnen mwen se Jewova.’”
Nòt anba paj
^ Oswa: “nan men nou kòm manje pou nou manje”.
