Ezekyèl 8:1-18
8 Nan sizyèm ane a, nan sizyèm mwa a, nan senkyèm jou nan mwa a, pandan m te chita lakay mwen, pandan ansyen ki nan Jida yo te chita devan m, pisans Jewova, Seyè ki Souvren an, te desann sou mwen.
2 Pandan m t ap gade, mwen te wè fòm yon moun ki sanble ak dife. Soti nan sa m te wè ki te sanble ak senti l la desann, kò l te tankou dife+. Soti nan senti l monte, li te klere tankou lò blan*+.
3 Apre sa, li lonje yon bagay ki te sanble ak yon men epi li pran m nan cheve. Epi, nan yon vizyon Bondye ban mwen, gen yon fòs ki transpòte m ant tè a ak syèl la ki mennen m Jerizalèm. Li mennen m nan antre pòtay ki pa anndan an+ ki bay nan direksyon nò a, kote zidòl ki lakòz jalouzi a te ye a+.
4 Epi, gade! Glwa Bondye Izrayèl la te la+, tankou sa m te wè nan vale a+.
5 Apre sa, li di m: “Pitit lòm, tanpri, leve je w gade nan direksyon nò.” Vrèmanvre, mwen leve je m pou m gade nan direksyon nò. Lè m gade, nan direksyon nò parapò ak pòtay lotèl la, mwen wè zidòl ki lakòz jalouzi a nan antre a.
6 Apre sa, li di m: “Pitit lòm, èske w wè vye bagay ki bay degoutans Izrayelit yo ap fè isit la+, yon seri bagay ki fè m kanpe lwen tanp mwen an+? Men, ou gen pou w wè lòt bagay ki bay degoutans ki pi mal toujou.”
7 Apre sa, li mennen m bò kot antre lakou a. Lè m gade, mwen wè yon twou nan mi an.
8 Li di m: “Pitit lòm, tanpri, fè twou nan mi an pi gwo.” Vrèmanvre, mwen fè twou nan mi an pi gwo epi mwen wè yon kote pou m antre.
9 Li di m: “Antre pou w wè tout vye bagay ki bay degoutans y ap fè isit la.”
10 Vrèmanvre, mwen antre, mwen gade e mwen wè tout kalite imaj bèt ki rale sou vant ak bèt ki bay degoutans+ ansanm ak tout zidòl moun Izrayèl yo te fè yo, yon seri zidòl ki bay degoutans*+. Imaj sa yo te grave toupatou nan mi an.
11 Epitou, te gen 70 ansyen nan mitan pèp Izrayèl la ki te kanpe devan yo. Jayazànya, pitit gason Chafan+, te la tou nan mitan yo. Yo chak te gen ansanswa yo nan men yo e te gen yon gwo lafimen lansan santi bon ki t ap monte+.
12 Li di m: “Pitit lòm, èske w wè ki sa ansyen ki nan mitan pèp Izrayèl la ap fè nan fènwa? Èske w wè sa yo chak ap fè nan chanm ki pi anndan yo, kote yo mete zidòl yo genyen yo? Paske, yo di: ‘Jewova pa wè nou. Jewova abandone peyi a+.’”
13 Apre sa, li di m: “Ou gen pou w wè lòt bagay ki bay degoutans y ap fè ki pi mal toujou.”
14 Apre sa, li mennen m nan antre pòtay kay Jewova a ki nan nò a. Lè m rive la mwen wè yon seri medam k ap kriye pou dye yo rele Tamouz la.
15 Apre sa, li di m: “O pitit lòm, ou wè sa? Ou gen pou w wè lòt bagay ki pi mal toujou+.”
16 Apre sa, li mennen m nan lakou kay Jewova a+, lakou ki anndan an. Lè m rive la, nan antre tanp Jewova a, ant pati ki devan kay la ak lotèl la, mwen wè anviwon 25 gason ki bay tanp Jewova a do. Figi yo te bay nan direksyon lès. Yo t ap pwostène devan solèy la nan direksyon lès+.
17 Li di m: “Pitit lòm, ou wè sa? Lè moun Jida yo ap fè bagay sa yo ki bay degoutans, lè y ap fè vyolans+ nan tout peyi a e yo kontinye ap fè m fache, èske sa se yon bagay ki piti? Ou wè ki jan y ap lonje branch bwa a* devan nen m.
18 Se sa k fè m ap lage kòlè m sou yo. Mwen pap gen pitye pou yo, ni mwen pap gen konpasyon pou yo+. Menmsi yo rele byen fò nan zòrèy mwen, mwen pap koute yo+.”
Nòt anba paj
^ Se yon melanj lò ak ajan ki klere anpil.
^ Mo ebre yo itilize la a gen rapò petèt ak “poupou”, e yo itilize l pou bagay yo meprize.
^ Sanble se yon branch bwa yo te konn itilize lè y ap adore zidòl.
