Jozye 20:1-9
-
Vil pou moun pran refij yo (1-9)
20 Apre sa, Jewova di Jozye:
2 “Men sa pou w di Izrayelit yo: ‘Chwazi yon seri vil pou moun al pran refij+, jan m te di Moyiz pou l di w la,
3 yon fason pou moun ki touye yon moun* san l pa t gen entansyon fè sa oswa san l pa t fè espre* ka kouri al ladan yo. Epi, vil sa yo ap sèvi kòm refij pou moun k ap tire revanj pou san moun yo touye a pa touye nou+.
4 Moun ki touye moun nan dwe kouri al nan youn nan vil sa yo+, li dwe kanpe devan pòtay vil la+ e li dwe rakonte ansyen ki nan vil sa a sa k te pase a. Apre sa, ansyen yo dwe kite l antre nan vil la, y ap ba li yon kote pou l rete e l ap abite bò kote yo.
5 Si moun k ap tire revanj pou san moun yo touye a vin dèyè moun ki touye moun nan, yo pa dwe lage l bay moun k ap tire revanj pou san moun yo touye a, paske se pa espre li te fè* li te touye moun nan e li pa t rayi moun nan anvan sa+.
6 Li dwe rete nan vil sa a jiskaske yo jije l devan pèp la+ e jiskaske moun k ap sèvi antanke gran prèt+ nan moman sa a mouri. Lè sa a, moun ki te touye moun nan ka retounen al viv nan vil li te kouri kite a e li ka retounen lakay li nan vil kote l soti a+.’”
7 Se sa k fè, yo te fè Kedès+ ki nan Galile, nan zòn ki gen mòn nan tèritwa Neftali a, vin yon vil sakre*, ansanm ak Sichèm+, nan zòn ki gen mòn nan Efrayim yo, ak Kiriyataba+, sètadi Ebwon, nan zòn ki gen mòn nan Jida yo.
8 Yo te chwazi Bezè+, ki nan lès Jeriko, nan zòn Rivyè Jouden an, nan dezè ki nan platon nan tèritwa tribi Ribenn nan, Ramòt+ ki nan vil Galaad, nan tèritwa tribi Gad la, ak Golan+ ki nan Bazan, nan tèritwa tribi Manase a+.
9 Se vil sa yo yo te bay pou tout Izrayelit yo ak tout moun ki te abite kòm etranje pami Izrayelit yo al pran refij, yon fason pou nenpòt moun ki ta touye yon moun* san l pa gen entansyon fè sa ka kouri al ladan yo+ pou moun k ap tire revanj pou san moun yo touye a pa touye moun ki touye moun nan san yo pa jije l devan pèp la+.
Nòt anba paj
^ Oswa: “ki frape yon nanm”.
^ Oswa: “san l pa konnen”.
^ Oswa: “se san l pa konnen”.
^ Oswa: “yon vil yo mete apa”.
^ Oswa: “nanm”.
