Nonb 16:1-50
16 Annapre, Kore+, pitit gason Izeya+ ki pitit Keyat+, pitit Levi+, met tèt ansanm ak Datan ak Abiram, pitit gason Elyab+ yo, ak On, pitit gason Pelèt la, ki sot nan tribi Ribenn+,
2 pou yo revòlte kont Moyiz, ansanm ak 250 Izrayelit ki chèf pami pèp la, moun yo chwazi nan mitan pèp la e ki gen gwo renome.
3 Konsa, yo rasanble kont+ Moyiz ak Arawon, yo di yo: “Nou bouke avèk nou! Tout pèp la nèt se moun ki sen yo ye+, e Jewova nan mitan yo+. Poukisa menm n ap pran pòz chèf nou sou pèp Jewova a?”
4 Lè Moyiz tande sa, menm kote a, li lage kò l fas atè.
5 Epi, li di Kore ak tout patizan l yo: “Demen maten, Jewova ap fè konnen kiyès ki pou li+, kiyès ki sen e ki moun ki dwe pwoche bò kote l+. Kèlkeswa moun li chwazi a+, se li k ap pwoche bò kote l.
6 Men sa pou n fè: Ou menm Kore ak tout patizan w yo+, pran veso pou boule lansan yo+,
7 demen, mete dife ladan yo epi mete lansan sou yo devan Jewova, e moun Jewova ap chwazi a+, se li menm ki sen. Nou fè twòp atò, nou menm pitit gason Levi yo+!”
8 Apre sa, Moyiz di Kore: “Tanpri, koute m, nou menm pitit gason Levi yo.
9 Èske sa pa di nou anyen lefètke Bondye Izrayèl la mete nou apa nan mitan pèp Izrayèl la+, li pèmèt nou pwoche bò kote l pou nou fè sèvis nan tabènak* Jewova a e pou nou kanpe devan pèp la pou nou fè sèvis pou yo+?
10 Èske sa pa di nou anyen lefètke li rale nou vin jwenn li ak tout frè nou yo, pitit gason Levi yo? Èske nou ta dwe ap chèche fè dappiyanp sou travay prèt yo ap fè a tou+?
11 Se poutèt sa, nou menm ak tout patizan nou yo ki met tèt nou ansanm yo, nou kont Jewova. Men, kiyès Arawon ye ki fè n ap plenyen kont li+?”
12 Annapre, Moyiz voye rele Datan ak Abiram+, pitit gason Elyab yo, men yo di: “Nou pap vini!
13 Èske se pa anyen sa ye pou w fè nou kite yon peyi kote lèt ak siwo myèl ap koule pou w vin touye nou nan dezè a+? Kounye a, èske w vle pou se ou menm ankò ki sèl chèf sou nou*?
14 An reyalite, ou pa mennen nou nan okenn peyi kote lèt ak siwo myèl ap koule+ e ou pa ban nou okenn tè ak okenn jaden rezen kòm byen. Èske se pete w vle pete je mesye sa yo? Nou pap vini!”
15 Konsa, Moyiz vin fache anpil e li di Jewova: “Pinga w vire gade ofrann manje angren y ap fè yo. Menm yon bourik mwen pa pran nan men yo, e mwen pa fè yo youn mechanste+.”
16 Epi, Moyiz di Kore: “Demen, ou menm ak tout patizan w yo, vin devan Jewova, ou menm avèk yo ansanm ak Arawon.
17 Chak moun dwe pran veso li genyen pou l boule lansan an, l ap mete lansan ladan l, e chak moun ap prezante veso li genyen pou l boule lansan an devan Jewova. Mesye ki avè w yo ap gen 250 veso nan men yo pou yo boule lansan, y ap vin ansanm avè w ak Arawon. Chak moun ap gen veso pa l pou l boule lansan.”
18 Konsa, yo chak pran veso pa yo pou yo boule lansan, yo mete dife ladan yo e yo mete lansan sou yo, epi yo kanpe nan antre tant reyinyon an ansanm ak Moyiz ak Arawon.
19 Lè Kore fin rasanble patizan l yo+ kont Moyiz ak Arawon nan antre tant reyinyon an, glwa Jewova parèt devan tout pèp la+.
20 Jewova di Moyiz ak Arawon:
21 “Retire kò nou nan mitan gwoup moun sa yo pou m ka disparèt yo nan yon ti moman+.”
22 Lè sa a, yo lage kò yo fas atè e yo di: “O Bondye, ou menm ki bay tout moun lavi*+, èske w ap kite peche yon sèl moun fè w vin fache kont tout pèp la+?”
23 Epi, Jewova di Moyiz:
24 “Pale ak pèp la, di yo: ‘Retire kò nou toutotou tant Kore, Datan ak Abiram yo+!’”
25 Lè sa a, Moyiz leve l al kot Datan ak Abiram, e ansyen+ ki nan pèp Izrayèl la t ale ansanm avè l.
26 Epi, li di pèp la: “Tanpri, retire kò nou bò tant moun mechan sa yo e pa touche anyen ki pou yo, pou n pa detwi akoz tout peche yo fè yo.”
27 Menm moman an, yo retire kò yo toutotou tant Kore, Datan ak Abiram yo, epi Datan ak Abiram sot deyò, yo kanpe devan tant yo, ansanm ak madanm yo, pitit yo ak pitit pitit yo.
28 Epi, Moyiz di: “Sa k pral pase la a ap fè n konnen se Jewova ki voye m fè tout bagay sa yo, se pa mwen ki deside fè yo.
29 Si moun sa yo mouri jan tout moun mouri e si yo jwenn menm pinisyon ak tout moun, ebyen konnen Jewova pa t voye m+.
30 Men, si Jewova fè yon bagay moun pa abitye wè rive yo, si li fè tè a ouvri bouch li pou l vale yo ak tout sa yo genyen e yo desann tou vivan nan Tonm* nan, n ap konnen toutbonvre mesye sa yo te derespekte Jewova.”
31 Kou l fin di tout pawòl sa yo, tè kote yo te kanpe a fann de bò+.
32 Epi, tè a ouvri bouch li, li vale yo ansanm ak tout moun lakay yo ak tout moun ki te avèk Kore yo+ ansanm ak tout byen yo te genyen.
33 Se konsa, yo menm ak tout moun ki te avèk yo te desann tou vivan nan Tonm* nan. Tè a te kouvri yo e yo te peri nan mitan pèp la+.
34 Tout Izrayelit ki te toutotou yo te kouri lè yo te tande jan yo t ap rele, Izrayelit yo t ap di: “Nou pè pou tè a pa vale nou!”
35 Apre sa, Jewova voye yon dife+ vin boule 250 gason ki t ap ofri lansan yo nèt+.
36 Annapre, Jewova di Moyiz:
37 “Di Eleyaza, pitit gason Arawon, prèt la, pou l pran veso pou boule lansan yo+ nan dife a, paske yo sen. Epitou, di l gaye dife a yon ti jan lwen.
38 Se pou l plati veso pou boule lansan ki te pou mesye ki pèdi lavi yo akoz peche yo te fè yo* pou l kouvri lotèl la+, paske yo te prezante veso yo devan Jewova e yo vin sen. Yo dwe vin yon siy pou Izrayelit yo+.”
39 Se konsa, Eleyaza, prèt la, te pran veso pou boule lansan ki fèt an kuiv moun ki te kankannen yo te prezante yo, li plati yo pou l kouvri lotèl la,
40 jan Jewova te di Moyiz pou l di l la. Se te yon siy pou fè Izrayelit yo sonje yon moun ki pa desandan Arawon* pa gen dwa vin boule lansan devan Jewova+, yon fason pou pèsonn pa vin tankou Kore ak patizan l yo+.
41 Nan demen, tout pèp Izrayèl la te kòmanse ap plenyen kont Moyiz ak Arawon+, yo t ap di: “Se nou de a ki touye pèp Jewova a.”
42 Lè pèp la rasanble kont Moyiz ak Arawon, yo vire fas yo nan direksyon tant reyinyon an. Epi, yo wè nyaj la kouvri l e glwa Jewova te kòmanse parèt+.
43 Moyiz ak Arawon t al devan tant reyinyon an+,
44 epi Jewova di Moyiz:
45 “Nou menm mesye, retire kò nou nan mitan pèp sa a, pou m ka disparèt yo nan yon ti moman+.” Lè sa a, yo lage kò yo fas atè+.
46 Lè sa a, Moyiz di Arawon: “Pran veso ou konn boule lansan an, pran dife sou lotèl la+ met ladan l, mete lansan sou li epi kouri al antre nan mitan pèp la pou yo ka jwenn padon+, paske Jewova fache. Men flewo a kòmanse!”
47 Menm kote a, Arawon pran veso a, jan Moyiz te di l la, li kouri al nan mitan pèp la. Men, flewo a te kòmanse frape pèp la. Se sa k fè li te mete lansan nan veso a e li te kòmanse mande Bondye padon pou pèp la.
48 Li te ret kanpe ant moun ki mouri yo ak moun ki vivan yo, e flewo a te vin sispann.
49 Te gen 14 700 moun ki te mouri nan flewo a, san konte moun ki te mouri akoz Kore yo.
50 Alafen, Arawon te retounen al jwenn Moyiz nan antre tant reyinyon an lè flewo a te sispann.
Nòt anba paj
^ Gade Lis mo yo esplike yo.
^ Oswa: “ki mèt e seyè sou nou”.
^ Lit.: “Bondye lespri ki nan tout kalite chè a”.
^ Oswa: “Cheyòl”. Se tonm ki la pou moun ki mouri ale. Gade Lis mo yo esplike yo.
^ Oswa: “Cheyòl”. Se tonm ki la pou moun ki mouri ale. Gade Lis mo yo esplike yo.
^ Oswa: “pou mesye ki te peche kont pwòp nanm yo”.
^ Lit.: “okenn etranje”.
