LESON 05
Bondye pale avèk nou pa mwayen Bib la
Jewova ban nou Bib la ki se yon bèl kado. Bib la gen 66 liv ladan l. Men, ou gendwa ap mande tèt ou: ‘Ki jan Bib la fè vin egziste? Kiyès ki ekri l?’ Pou nou ka jwenn repons kesyon sa yo, annou fè yon ti pale sou fason Bondye fè nou jwenn Bib la.
1. Si se moun ki ekri Bib la, nan ki sans se Bondye ki Mèt li?
Gen anviwon 40 moun ki te ekri Bib la. Yo te fè sa sou yon peryòd anviwon 1600 ane, soti ane 1513 anvan epòk nou an rive ane 98 epòk nou an. Moun ki te ekri Bib la te diferan anpil youn ak lòt. Gen nan yo ki te konn gade mouton, gen nan yo ki te konn peche pwason e gen nan yo ki te wa. Men, malgre yo te diferan konsa, tout sa k ekri nan Bib la pa depaman youn ak lòt. Kòman sa fè posib? Se paske se nan Bondye sa ki ekri nan Bib la soti. (Li 1 Tesalonisyen 2:13.) Moun ki te ekri Bib la pa t ekri pawòl pa yo. Okontrè, yo “te pale pawòl ki soti nan Bondye, pandan lespri sen t ap gide yo” a. (2 Pyè 1:21.) Bondye te sèvi avèk lespri sen l pou l enspire yo, oswa pouse yo ekri panse pa l. — 2 Timote 3:16.
2. Kiyès ki gen posiblite gen yon bib?
“Moun tout nasyon, tout tribi, tout lang ak tout pèp” ka jwenn bon nouvèl ki nan Bib la. (Li Revelasyon 14:6.) Bondye te fè yon fason pou Bib la disponib nan plis lang pase tout liv nèt. Prèske tout moun ka gen yon bib. Kèlkeswa kote yon moun ap viv e kèlkeswa lang li pale, li ka gen yon bib.
3. Ki jan Jewova te pwoteje Bib la?
Yo te ekri Bib la sou yon seri bagay ki pa dire lontan, tankou po bèt ak papiris. Men, gen yon seri mesye ki te renmen Bib la ki te pran san yo pou yo kopye Bib la plizyè fwa. Menm lè gen yon seri moun ki te gen pouvwa oswa ki te gen enfliyans ki te eseye elimine Bib la, gen lòt moun ki te menm riske lavi yo pou yo pwoteje l. Jewova pa kite anyen ni okenn moun anpeche l pale avèk nou. Men sa Bib la di: “Pawòl Bondye nou an la pou toutan.” — Ezayi 40:8.
FOUYE PLIS
Aprann plis sou fason Bondye te enspire yon seri mesye pou yo ekri Bib la, sou fason L te pwoteje l, ak fason li fè lèzòm kapab jwenn li.
4. Bib la fè konnen kiyès ki Mèt li
Gade VIDEYO a. Li 2 Timote 3:16, epi reponn kesyon ki vin apre yo.
-
Si se moun ki te ekri Bib la, poukisa yo di se Pawòl Bondye li ye?
-
Èske li nòmal pou nou kwè Bondye te kapab fè yon seri moun jwenn panse l pou yo ekri yo?
Se vre yon sekretè gendwa ekri yon lèt, men, pawòl ki ladan l lan se nan moun ki t ap dikte l la yo soti. Menm jan an tou, se moun ki te ekri Bib la, men sa ki ladan l yo se nan Bondye yo soti.
5. Bib la toujou la malgre yo te eseye detwi l
Si se Bondye ki Mèt Bib la, se nòmal pou L pwoteje l. Pandan tout listwa, gen yon seri mesye ki gen pouvwa oswa ki gen enfliyans ki te eseye detwi Bib la. Gen chèf relijye ki te eseye anpeche moun konn sa k ladan l. Men, gen anpil moun ki te riske lavi yo pou yo pwoteje Bib la, malgre opozisyon e menm lè yo te eseye touye yo. W ap aprann konn youn nan moun sa yo lè w gade VIDEYO a, e lè w reponn kesyon ki vin apre yo.
-
Lè w vin konnen tout efò moun fè pou yo pwoteje Bib la, èske sa pa fè w anvi li l?
Li Sòm 119:97, epi reponn kesyon sa a:
-
Sa k fè anpil moun riske lavi yo pou yo tradui Bib la e pou yo fè lòt moun jwenn li?
6. Yon liv pou tout kalite moun
Pami tout liv ki te janm egziste, Bib la se liv yo plis tradui e yo plis distribye. Li Travay 10:34, 35, epi reponn kesyon sa yo:
-
Poukisa Bondye vle pou yo tradui Pawòl li a anpil konsa, e pou yo distribye l anpil konsa?
-
Dapre sa nou aprann nan leson sa a, ki sa w pi renmen konsènan Bib la?
Prèske
tout moun
sou tè a
gen posiblite pou yo jwenn Bib la nan yon lang yo ka konprann.
Li disponib nan plis pase
3 000
lang
swa ann antye,
swa an pati.
Yo panse yo pwodui anviwon
5 000 000 000 Bib,
sa vle di plis lontan pase kèlkeswa lòt liv la.
GEN MOUN KI DI: “Bib la se jis yon liv moun te ekri sa gen lontan.”
-
Ki sa w panse?
-
Ki prèv ou genyen Bib la se Pawòl Bondye?
SA W TE APRANN
Bib la se Pawòl Bondye. Bondye fè yon fason pou l disponib pou tout moun nèt.
Revizyon
-
Ki sa sa vle di Bondye te enspire moun pou yo ekri Bib la?
-
Ki sa k plis touche w anrapò ak fason Bondye pwoteje Bib la, fason yo tradui l ak fason yo distribye l?
-
Ki jan w santi w lè w konnen Bondye fè tout sa pou l kominike avè w?
APRANN PLIS
Li kèk atik ki pale sou istwa Bib la, soti lè yo t ap ekri l nan premye maniskri yo, rive nan tradiksyon yo fè jodi a.
Gade ki jan Bib la te chape nan twa gwo okazyon kote yo te vle detwi l nèt.
“Labib — Yon liv ki chape anba anpil danje” (Toudegad no 4 2016)
Gade risk moun te pran pou yo tradui Bib la.
Se pa ni de ni twa fwa yo te kopye Bib la e yo te tradui l. Ki jan nou ka sèten sa ki nan Bib la jodi a se sa ki te ladan l depi okòmansman?
Lòt sijè ki enteresan
KESYON MOUN POZE SOUVAN
Ki sa etid Labib Temwen Jewova yo ofri a ye?
Temwen Jewova yo ofri yon pwogram etid Labib gratis ki pèmèt yon etidyan patisipe nan etid la. Pwogram sa a pèmèt ou itilize nenpòt tradiksyon Labib. Ou kapab envite nenpòt fanmi oswa zanmi patisipe nan etid la.
