1. Sou ki priyè anpil moun byen konnen nou pral pale la a?

PLIZYÈ milyon moun byen konnen priyè ki rele Nòtrepè a oswa Priyè Seyè a. Jezi te sèvi ak priyè sa a pou l aprann disip li yo fason pou yo priye. Pou ki bagay li te priye? E poukisa priyè sa a enpòtan pou nou jodi a?

2. Ki twa bagay enpòtan Jezi te aprann nou priye pou yo?

² Jezi te di: “Men ki jan nou dwe priye: ‘Papa nou ki nan syèl la, se pou non w vin sen [oswa se pou yo fè non w sen]. Se pou Wayòm ou an vini. Se pou volonte w fèt sou tè a kou nan syèl la.’” ​(Li Matye 6:9-13.) Poukisa Jezi te montre nou priye pou twa bagay sa yo? — Gade nòt 20.

3. Ki sa nou bezwen konnen konsènan Wayòm Bondye a?

³ Nou te aprann non Bondye se Jewova. E nou te pale de objektif Bondye gen pou lèzòm ak pou tè a. Men, ki sa Jezi te vle di lè l te di: “Se pou Wayòm ou an vini”? Nou pral aprann ki sa Wayòm Bondye a ye, ki sa l pral fè e ki jan li pral fè non Bondye vin sen.

4. Ki sa Wayòm Bondye a ye, e kiyès ki Wa ladan l?

⁴ Jewova tabli yon gouvènman nan syèl la e li chwazi Jezi kòm Wa ladan l. Labib rele gouvènman sa a Wayòm Bondye. Jezi se “Wa moun k ap dirije antanke wa e li [se] Seyè moun k ap dirije antanke  seyè”. (1 Timote 6:15.) Jezi kapab fè plis bon bagay pase nenpòt ki dirijan pami lèzòm e li gen plis pouvwa pase tout dirijan yo sou tè a met ansanm.

5. Ki kote gouvènman Bondye a ye detan l ap dirije? Ki sa l pral dirije?

⁵ Karant jou apre Jezi fin resisite, li retounen nan syèl la. Annapre, Jewova mete l Wa nan Wayòm nan (Travay 2:33). Gouvènman Bondye a pral dirije tout tè a detan l nan syèl la (Revelasyon 11:15). Se poutèt sa Labib rele Wayòm Bondye a yon “Wayòm selès”. — 2 Timote 4:18.

6, 7. Ki sa k fè Jezi pi bon pase nenpòt wa sou tè a?

⁶ Labib di Jezi gen plis pouvwa pase nenpòt lòt wa sou tè a paske li se “sèl [moun] ki pa ka mouri”. (1 Timote 6:16.) Tout dirijan sou tè a gen pou yo mouri yon lè, men Jezi pap janm mouri. Tout bon bagay Jezi pral fè pou nou ap dire pou toutan.

⁷ Gen yon pwofesi nan Labib ki fè konnen Jezi ap yon Wa ki gen konpasyon e ki pap nan paspouki. Li di: “Lespri Jewova ap poze sou li, se sa k fè l ap gen sajès, l ap gen anpil entèlijans, l ap bay bon konsèy, l ap gen fòs, l ap gen anpil konesans e l ap gen lakrentif pou Jewova. L ap pran plezi montre li gen lakrentif pou Jewova. Li pap jije moun selon sa je l ba li, ni li pap korije [oswa konseye] moun sèlman sou sa zòrèy li tande. L ap jije malere [oswa moun ki pòv] yo san paspouki.” ​(Ezayi 11:2-4). Èske w pa ta renmen gen yon wa konsa?

8. Kòman nou fè konnen Jezi pa pral dirije poukont li?

⁸ Bondye chwazi kèk moun pou y al dirije ak Jezi  nan gouvènman ki nan syèl la. Pa egzanp, apot Pòl te fè Timote konnen: “Si nou kontinye andire, n ap dirije tou antanke wa ansanm avè l.” ​(2 Timote 2:12). Konbyen moun ki pral dirije antanke wa ak Jezi?

9. Konbyen moun ki pral dirije ansanm ak Jezi? Ki lè Bondye te kòmanse chwazi yo?

⁹ Jan nou te aprann sa a nan chapit 7 la, apot Jan te resevwa yon vizyon kote li te wè Jezi antanke Wa nan syèl la ansanm ak 144 000 lòt wa. Kiyès 144 000 lòt wa yo ye? Dapre sa Jan esplike, yo “gen non [Jezi] ak non Papa l ki ekri sou fwon yo”. Apre sa, li di: “Se moun ki kontinye suiv Ti Mouton an [sètadi Jezi] kèlkeswa kote l ale. Bondye te achte yo pami lèzòm.” ​(Li Revelasyon 14:1, 4.) Tout 144 000 moun yo se kretyen ki fidèl Bondye chwazi “pou yo dirije tè a antanke wa” ansanm ak Jezi. Lè yo mouri, yo resisite pou yo viv nan syèl la (Revelasyon 5:10). Depi nan epòk apot yo, Jewova te kòmanse chwazi kretyen ki fidèl pou fè pati gwoup 144 000 wa yo.

10. Poukisa se lanmou Jewova genyen ki fè se Jezi ak 144 000 moun yo li chwazi pou dirije lèzòm?

¹⁰ Jewova tèlman gen sousi pou nou, li pran dispozisyon pou gen moun k ap dirije ansanm ak Jezi. Jezi ap yon bon chèf paske li konprann nou. Li konn sa sa vle di viv antanke moun e li konn sa sa vle di lè yon moun ap soufri. Pòl te di Jezi gen pitye pou nou, li ka “konprann feblès nou” e li “te pase anba eprèv nan tout domèn, menm jan avèk nou”. (Ebre 4:15; 5:8.) Tout 144 000 moun yo konnen tou sa sa vle di viv antanke moun. E yo te lite anba  enpèfeksyon ak maladi. Donk, nou mèt sèten Jezi ak 144 000 moun yo ap konprann nonsèlman jan nou santi nou, men tou, y ap konprann pwoblèm n ap rankontre yo.

11. Poukisa Jezi te aprann disip li yo priye pou volonte Bondye fèt nan syèl la?

¹¹ Jezi te aprann disip li yo priye pou volonte Bondye fèt nan syèl la. Poukisa? Nan chapit 3 a, nou te aprann Satan Ledyab te fè rebelyon kont Jewova. Apre rebelyon Satan an, Jewova te kite Satan ansanm ak zanj ki pa fidèl yo, oswa demon yo, rete nan syèl la pandan yon ti tan. Konsa, se pa yo tout nan syèl la ki t ap fè volonte Bondye. Nan chapit 10 la, nou pral aprann plis bagay sou Satan ak demon yo.

12. Ki de evènman enpòtan yo pale de yo nan Revelasyon 12:10?

¹² Labib fè konnen, tousuit apre Jezi te fin etabli antanke Wa nan Wayòm Bondye a, Jezi t ap gen pou l fè lagè ak Satan. (Li Revelasyon 12:7-10.) Vèsè 10 la pale konsènan de evènman ki enpòtan anpil. Wayòm Bondye a kòmanse dirije avèk Jezi Kris kòm Wa, epi yo pimpe Satan sot nan syèl la vin sou tè a. Jan nou pral aprann sa, evènman sa yo deja rive.

13. Ki sa k te rive nan syèl la apre yo te fin met Satan deyò?

¹³ Labib fè konnen zanj fidèl yo te kontan apre yo te fin mete Satan ak demon l yo deyò nan syèl la. Men sa nou li: “Ou menm syèl, e nou menm ki abite nan syèl la, nou mèt rejwi!” ​(Revelasyon  12:12). Kounye a, gen yon lapè ak yon inite total nan syèl la paske tout kreyati ki nan syèl la ap fè volonte Bondye.

14. Ki sa k rive sou tè a paske yo met Satan deyò nan syèl la?

¹⁴ Men, lavi sou tè a diferan nèt. Gen move bagay ki rive moun “paske Dyab la desann” e li “an kòlè anpil, paske li konnen se yon tikras tan li rete”. (Revelasyon 12:12.) Satan fache anpil. Yo mete l deyò nan syèl la, e li konnen yo pral detwi l talè konsa. Li fè tout sa l kapab pou l lakòz latwoublay ak soufrans sou tout tè a.

15. Ki objektif Bondye gen pou tè a?

¹⁵ Men, objektif Bondye gen pou tè a pa chanje. Li toujou vle pou gen moun pafè k ap viv pou toutan nan Paradi sou tè a (Sòm 37:29). Donk, ki jan Wayòm Bondye a pral fè sa posib?

16, 17. Ki sa Dànyèl 2:44 fè nou konnen konsènan Wayòm Bondye a?

¹⁶ Men sa pwofesi ki nan Dànyèl 2:44 la fè konnen: “Nan jou wa sa yo, Bondye nan syèl la pral tabli yon wayòm ki pap janm kraze. E wayòm sa a pap vin anba men okenn lòt pèp. L ap kraze tout wayòm sa yo, l ap elimine yo, e se li menm sèl k ap rete pou toutan.” Ki sa nou aprann nan pwofesi sa a sou Wayòm Bondye a?

¹⁷ Premyèman, li fè nou konnen Wayòm Bondye a t ap gen pou l kòmanse dirije “nan jou wa sa yo”. Sa vle di t ap toujou gen lòt gouvènman sou tè a lè Wayòm nan kòmanse dirije. Dezyèmman, li fè nou konnen Wayòm Bondye a t ap gen pou l egziste  pou toutan e pa t ap janm gen yon lòt gouvènman pou ranplase l. E twazyèmman, t ap gen lagè ant Wayòm Bondye a ak gouvènman yo ki nan monn sa a. Wayòm Bondye a t ap gen pou l pot laviktwa e li t ap vin sèl gouvènman k ap dirije tè a. Lè sa a, lèzòm ap gen pi bon gouvènman yo te ka genyen an.

18. Ki jan Labib rele dènye gè ki pral fèt ant Wayòm Bondye a ak gouvènman yo ki nan monn sa a?

¹⁸ Ki jan Wayòm Bondye a pral dirije tè a? Anvan dènye gè yo rele Amagedon an, demon yo pral twonpe “wa ki sou tout tè a, pou rasanble yo pou lagè ki gen pou fèt nan gran jou Bondye a, li menm ki Toupisan an”. Wi, gouvènman lèzòm yo pral fè lagè ak Wayòm Bondye a. — Revelasyon 16:14, 16; gade nòt 10.

19, 20. Poukisa nou bezwen pou Wayòm Bondye a dirije tè a?

¹⁹ Poukisa nou bezwen Wayòm Bondye a? Pou omwen twa rezon. Premyèman, nou tout peche, se sa k fè nou malad e nou mouri. Men, Labib di anba dominasyon Wayòm Bondye a nou pral viv pou toutan. Anfèt, Jan 3:16 di: “Bondye tèlman renmen monn nan, li bay sèl Pitit Gason li fè a pou li, dekwa pou nenpòt moun ki demontre l gen lafwa nan li pa detwi, men pou l gen lavi ki pap janm fini an.”

²⁰ Dezyèm rezon ki fè nou bezwen Wayòm Bondye a se paske nou antoure ak moun ki mechan. Anpil moun ap bay manti, y ap fè magouy e yo imoral. Nou pa ka fè anyen pou nou retire moun sa yo, men, Bondye kapab. Moun ki kontinye fè sa ki mal ap detwi nan Amagedon. (Li Sòm 37:10.) Twazyèm  rezon ki fè nou bezwen Wayòm Bondye a se paske gouvènman lèzòm yo fèb, yo mechan, oswa yo nan koripsyon. Yo pa enterese nan ede moun obeyi Bondye. Labib di: “Moun ap domine sou moun pou fè yo soufri.” — Eklezyas 8:9.

21. Ki jan Wayòm Bondye a pral fè volonte Bondye fèt sou tè a?

²¹ Apre Amagedon, Wayòm Bondye a pral fè volonte Bondye fèt sou tè a. Pa egzanp, l ap retire Satan ak demon l yo (Revelasyon 20:1-3). Apre sa, pap gen moun k ap malad e k ap mouri. Grasa ranson an, tout moun ki fidèl yo pral kapab viv pou toutan nan Paradi a (Revelasyon 22:1-3). Wayòm nan pral fè non Bondye vin sen. Ki sa sa vle di? Sa vle di lè gouvènman Bondye a ap dirije tè a, tout moun pral onore non Jewova. — Gade nòt 21.

22. Ki jan nou fè konnen Jezi pa t vin Wa lè l te sou tè a oswa tousuit apre l fin resisite?

²² Men sa Jezi te aprann disip li yo pou yo mande lè y ap priye: “Se pou Wayòm ou an vini.” Donk, li klè, se alavni gouvènman Bondye a t ap vini. Pou kòmanse, Jewova t ap etabli gouvènman l lan e l t ap  met Jezi Wa ladan l. Èske l te met Jezi Wa menm moman l te retounen nan syèl la? Non, Jezi te dwe tann. Yon ti tan apre Jezi fin resisite, ni Pyè ni Pòl te fè konn sa byen klè lè yo te aplike pwofesi ki nan Sòm 110:1 an pou Jezi. Men sa Jewova di nan pwofesi a: “Chita adwat mwen jiskaske mwen mete ènmi w yo anba pye w tankou yon ti ban.” ​(Travay 2:32-35; Ebre 10:12, 13). Konbyen tan Jezi t ap bezwen ret tann anvan Jewova fè l vin Wa?

23. a) Ki lè Jezi te kòmanse dirije antanke Wa nan gouvènman Bondye a? b) Ki sa nou pral aprann nan chapit ki vin apre a?

²³ Pandan plizyè ane anvan 1914, gen yon gwoup kretyen sensè ki te konprann ane 1914 t ap yon ane enpòtan nan pwofesi ki nan Bib la. Evènman ki pase nan monn nan depi ane 1914 montre yo te gen rezon. Jezi te kòmanse dirije antanke Wa nan ane sa a (Sòm 110:2). Yon ti tan apre sa, yo pimpe Satan sou tè a, e kounye a “se yon tikras tan li rete”. (Revelasyon 12:12.) Nan chapit ki vin apre a, nou pral jwenn plis prèv ki montre n ap viv nan epòk sa a. Nou pral aprann tou talè konsa Wayòm Bondye a pral fè volonte Bondye fèt sou tè a. — Gade nòt 22.