ESPAY se yon peyi kote w jwenn divès kalite moun ak peyizaj. Pifò peyi a kouvri ak jaden ble, jaden rezen ak pye oliv. Nan pati sid la, se anviwon 14 kilomèt dlo sèlman ki separe Espay ak kontinan Afrik la.

Anpil moun te soti nan divès peyi pou y al viv nan zòn sa a ki nan sidès Ewòp la. Gen moun ki te sot nan peyi Fenisi, gen lòt ki te sot nan peyi Lagrès, e gen lòt yo menm ki te sot nan vil Kataj. Lè Women yo te rive ann Espay nan twazyèm syèk anvan epòk nou an, yo te rele nouvo tèritwa sa a Ispànya. Peyi a te vin anba okipasyon Vizigòt yo, e annapre, moun Mò yo te okipe l tou, e kilti pèp sa yo toujou la nan peyi a.

Sa pa fè twò lontan, te gen plis pase 68 milyon moun ki te vizite peyi Espay nan yon ane. Pifò moun ki vini yo  vini pou yo pwofite solèy la, bèl plaj yo e pou yo admire bèl bagay atistik ki nan peyi a, bèl istwa yo genyen ak bèl fason kay yo fèt. Manje yo fè ann Espay yo atire anpil touris tou. Pami pla nasyonal yo, nou ka site yon janbon yo fè yon fason espesyal, fwi de mè, bon ti soup, salad ak legim yo sote nan luil doliv oswa yo mete luil doliv sou yo. Toupatou sou tè a, anpil moun konnen yon seri pla espayòl tankou omlèt espayòl, paella ak tapas.

Moun Espay yo se moun ki amikal e ki renmen pale ak moun. Pifò nan yo di yo fè pati Legliz katolik women, men pami moun ki di sa yo pa gen anpil ki al lamès vre. Nan ane ki sot pase yo, gen moun ki sot ann Afrik, ann Azi ak nan peyi Amerik latin pou y al viv ann Espay. Anpil nan yo renmen pale sou kwayans yo e yo renmen pale sou koutim yo gen nan peyi yo. Temwen Jewova yo te gen bèl konvèsasyon avèk yo e yo te jwenn posiblite pou yo ede yo aprann sa Labib anseye sou yon pakèt sijè.

Pandan ane 2015 lan, gen plis pase 10 500 Temwen ki te pote yo volontè pou yo konstwi oswa pou yo fè reparasyon nan 70 nan lokal kote yo konn reyini yo ki rele Sal Wayòm. Meri yo te fè yo jwenn tè pou yo bati kèk nan Sal Wayòm sa yo. Pou Temwen Jewova yo ka ede imigran yo, yo fè reyinyon yo nan plis pase 30 lang, anplis lang espayòl la. Nan ane 2016, gen plis pase 186 000 moun ki te asiste yon reyinyon espesyal Temwen Jewova yo te fè pou yo komemore lanmò Jezi Kris.