POU JÈN
11: Moun ki travay di
SA SA VLE DI
Moun ki renmen travay pap rale kò yo dèyè pou yo pa travay. Okontrè, yo renmen travay di pou yo ka jwenn sa yo bezwen e pou yo ka ede lòt moun, menmsi travay y ap fè a pa enteresan.
REZON KI FÈ SA ENPÒTAN
Kit nou vle kit nou pa vle, nou gen anpil bagay pou n fè nan lavi a. Nan yon monn kote anpil moun pa renmen travay di, se yon bon bagay sa ye lè yon moun renmen travay di. — Eklezyas 3:13.
“Mwen te aprann lè w travay di, ou fyè de tèt ou e w gen yon satisfaksyon pa anndan. Santiman sa a fè m vin aprann renmen travay. Lè w se yon moun ki renmen travay sa ap fè w gen yon bon repitasyon.” — Reyon.
PRENSIP BIBLIK: “Kèlkeswa kalite travay di yon moun fè gen avantaj ladan l.” — Pwovèb 14:23.
SA W KA FÈ
Chèche gen yon bon pwennvi sou travay. Etap ki vin apre yo kapab ede w.
Aprann byen fè travay ou. Kit w ap fè travay nan kay, kit se yon devwa w ap fè, kit se nan travay ou ou ye, bay tout ou menm ladan l. Lè w rive fè yon travay byen, gade ki jan w ka amelyore travay la lè w fè l pi byen e pi vit. Plis ou vin pi maton nan travay ou, se plis w ap renmen travay ou.
PRENSIP BIBLIK: “Èske w konn wè yon moun ki fè travay li byen? Se devan wa l ap kanpe, li pap kanpe devan nenpòt moun.” — Pwovèb 22:29.
Reflechi sou tout avantaj yo. Nan pifò ka, lè w byen fè travay ou sa itil lòt moun. Pa egzanp, lè w travay di pou fè travay ou gen nan kay la se ede w ede rès moun nan kay la.
PRENSIP BIBLIK: “Yon moun pi kontan lè l bay pase lè l resevwa.” — Travay 20:35.
Fè plis pase sa yo mande w. Olye pou fè egzakteman sa yo mande w fè, eseye fè plis. Konsa se ou menm ki kontwole lavi w, ou chwazi fè plis, se pa paske yo mande w fè sa, men paske w vle fè sa. — Matye 5:41.
PRENSIP BIBLIK: “Pa fè bèl aksyon w ap fè a nan fòse, men, [...] fè l ak pwòp volonte w.” — Filemon 14.
Se pou w ekilibre. Moun ki renmen travay la pa parese, men li pa esklav travay nonplis. Li chèche gen ekilib. Se vre li renmen travay di men li kontan pran ti repo tou.
PRENSIP BIBLIK: “Li pi bon pou yon moun pran yon ti repo olye l plede ap travay di e li kontinye ap kouri dèyè van.” — Eklezyas 4:6.
Lòt sijè ki enteresan
TOUDEGAD
Fason pou w renmen travay di
Egzamine kèk fason Bib la ban nou konsèy ki itil k ap ede n gen lajwa ak satisfaksyon nan travay nou.
REVEYE N!
Fason pou w byen sèvi ak tan w
Youn nan fason pou w byen sèvi ak tan w se lè w egzamine lavi w sou de aspè. Ki aspè sa yo?
KESYON JÈN YO KONN POZE
Poukisa m dwe ede lòt moun?
Lè w fè bon bagay pou lòt moun, sa ede w pou pi piti nan de domèn. Ki domèn sa yo?
KESYON JÈN YO KONN POZE
Ki jan m ka sispann voye sa m dwe fè pou pita?
Men kèk konsèy sou fason w ka sispann voye sa w dwe fè pou pita.
