1. Ki sa Jewova vle nou fè?

 YOUN nan moman ki bay yon mari ak madanm plis kè kontan se lè yo vin gen yon tibebe. Sepandan, menm lè paran yo renmen tibebe yo genyen an, yo pa t ap renmen pou l toujou ret yon tibebe. Anfèt, yo t ap enkyete anpil si tibebe yo a pa ta devlope. Menm jan an tou, Jewova kontan lè nou kòmanse aprann konn Jezi, men Li ta renmen nou fè plis (1 Kor. 3:1). Se sa k fè li mande nou pou n “vin granmoun” antanke kretyen. — 1 Kor. 14:20.

2. Ki sa nou pral wè nan atik sa a?

² Ki sa vin granmoun antanke kretyen vle di? Ki sa nou bezwen fè pou n vin gen matirite antanke kretyen? Ki jan gwo manje nan domèn espirityèl ka ede n vin gen pi bon relasyon ak Jewova? E poukisa nou pa ta dwe gen twòp konfyans nan tèt nou? Nan atik sa a, nou pral jwenn repons kesyon sa yo.

KI SA VIN YON KRETYEN KI GEN MATIRITE VLE DI?

3. Ki sa vin gen matirite antanke kretyen vle di?

³ Nan Bib la, mo grèk lè yo tradui l yo mete “granmoun” pou li a kapab vle di tou “gen matirite”, “pafè”, ak “konplè” a. (1 Kor. 2:6.) Donk, menm jan yon tibebe kontinye grandi jiskaske l vin gran, nou menm tou nou bezwen kontinye grandi nan relasyon nou genyen ak Jewova a, konsa n ap vin gen matirite antanke kretyen. Nòmalman, menm  lè nou rive nan nivo sa a nou pa dwe janm sispann fè pwogrè (1 Tim. 4:15). Nou tout, menm jèn yo, kapab vin gen matirite antanke kretyen. Men, ki sa k montre yon kretyen vin gen matirite?

4. Ki jan nou ka konnen si yon kretyen gen matirite?

⁴ Yon kretyen ki gen matirite se yon moun ki fè tout sa Bondye mande. Li pa annik fè sa li menm li vle fè. Natirèlman, lefètke li enpafè l ap fè erè. Men, chak jou li fè tout sa l kapab pou l panse e pou l aji ann amoni ak volonte Bondye. Li abiye ak nouvo pèsonalite a, e li kontinye ap fè efò pou panse l toujou ann amoni ak panse Bondye (Efe. 4:​22-24). Li fè efò pou l pran bon desizyon ki baze sou lwa ak prensip Jewova yo, konsa li pa bezwen yon lis règ byen long pou fè l konnen sa pou l fè. Lè l pran yon desizyon, li fè efò pou l fè sa l deside fè a. — 1 Kor. 9:​26, 27.

5. Ki sa k ka rive yon kretyen ki pa gen matirite? (Efezyen 4:​14, 15).

⁵ Yon lòt bò, yon kretyen ki pa fè efò pou l gen matirite ka pran nan “trik” ak nan “riz” byen fasil. Li ka kwè moun k ap gaye rimè ak istwa ki pa vre nan medya yo e li ka kite aposta twonpe l b. (Li Efezyen 4:​14, 15.) Li ka vin jalou lòt moun, li ka ap fè kont ak yo oswa li ka fache byen fasil. E byen souvan, li ka fè move bagay lè l jwenn tantasyon. — 1 Kor. 3:3.

6. Ki jan n ka esplike fason yon moun vin gen matirite? (Gade foto a tou.)

⁶ Jan nou sot wè sa pi wo a, Bib la konpare pwogrè yon moun fè pou l vin gen matirite antanke kretyen ak fason yon timoun devlope pou l vin gran. Gen anpil bagay yon timoun pa konnen, donk li bezwen yon granmoun pou pwoteje l e pou gide l. Pa egzanp, yon manman ka mande tipitit fi l pou l kenbe men l pandan y ap travèse lari. Lè tifi a vin pi gran, manman an ka kite l travèse lari poukont li. Men, manman l ap toujou fè l sonje pou l gad anwo gad anba pou l wè si pa gen machin k ap vini anvan l travèse. Lè timoun nan vin gran, li evite danje sa yo poukont li. Menm jan timoun bezwen granmoun ede  yo pou yo evite danje, se konsa tou kretyen ki pa gen matirite yo konn bezwen kretyen ki gen matirite ede yo pou yo evite danje ki ka nui relasyon yo ak Jewova e pou yo pran bon desizyon. Yon lòt bò, lè kretyen ki gen matirite yo gen yon desizyon pou yo pran, yo reflechi sou baz prensip ki nan Bib la pou yo ka konnen sa Jewova panse e pou yo suiv prensip sa yo.

7. Èske kretyen ki gen matirite yo bezwen lòt moun ede yo?

⁷ Èske sa vle di yon kretyen ki gen matirite pap janm bezwen moun ede l? Non. Pafwa kretyen ki gen matirite yo bezwen mande èd tou. Men, yon moun ki pa gen matirite ka vle pou lòt moun di l sa pou l fè oswa pou yo pran yon desizyon li menm li ta dwe pran. Yon lòt bò, yon kretyen ki gen matirite ap chèche èd moun ki gen sajès ak eksperyans, toutpandan li konnen Jewova vle se li menm ki pou “pote pwòp chay pa l”. — Gal. 6:5.

8. Nan ki sans kretyen ki gen matirite yo pa menm?

⁸ Menm jan tout granmoun pa gen menm fizik, se konsa tou tout kretyen ki gen matirite pa gen menm kalite. Pa egzanp, genyen ki ka gen anpil sajès, gen lòt ki ka gen anpil kouraj, gen lòt menm ki ka renmen bay. Konsa tou, gen lòt ki ka renmen mete yo nan plas lòt moun. Mete sou sa, lè de kretyen ki gen matirite ap fè fas ak menm sitiyasyon, yo ka pa wè bagay yo menm jan, alòske fason yo chak wè bagay yo ann amoni ak Bib la. Sa rive souvan lè kretyen yo dwe pran yon desizyon ki gen rapò ak konsyans yo. Lefètke yo konn sa, yo pa jije youn lòt si yo pa pran menm desizyon. Okontrè, yo kontinye ret ini. — Wom. 14:10; 1 Kor. 1:10.

KI SA NOU BEZWEN FÈ POU N VIN GEN MATIRITE ANTANKE KRETYEN?

9. Èske nou ka vin gen matirite nan domèn espirityèl san n pa fè efò? Esplike.

⁹ Yon timoun kontinye grandi tank tan ap pase, e sa fèt tou natirèlman. Men, pa gen moun ki ka vin gen matirite nan domèn espirityèl san l pa fè efò. Pa egzanp, frè ak sè nan vil Korent yo te aksepte bon nouvèl la, yo te batize, yo te resevwa lespri sen, e se apot Pòl menm ki te ba yo fòmasyon (Tra. 18:​8-11). Men, kèk ane apre yo fin batize, anpil nan yo te toujou pa t gen matirite (1 Kor. 3:2). Ki jan n ka veye pou sa pa rive nou?

10. Ki sa nou dwe fè pou nou vin gen matirite? (Jid 20).

¹⁰ Pou nou vin gen matirite, toudabò nou dwe vle gen matirite. Moun ki “ret san [yo] pa konn anyen” yo, sa vle di ki pito ret timoun nan domèn espirityèl, pap rive fè pwogrè (Pwo. 1:22). Nou pa vle sanble ak moun ki fin gran, men ki pè pran responsablite yo e ki vle se paran yo ki pou pran desizyon pou yo. Okontrè, nou vle pran responsablite nou lè n fè efò pou relasyon nou ak Jewova kontinye vin pi solid. (Li Jid 20.) Si w toujou ap fè efò pou w vin gen matirite, priye Jewova pou l ba w “volonte e [pou l ba w] fòs pou [w] aji”. — Flp. 2:13.

11. Ki jan Jewova ede nou vin gen matirite? (Efezyen 4:​11-13).

¹¹ Jewova pa atann pou nou vin gen matirite poukont nou. Moun ki sèvi antanke bèje ak anseyan nan kongregasyon an jwenn fòmasyon pou yo ede nou pou nou fin “grandi nèt” nan domèn espirityèl “jis nou rive nan nivo Kris ye a, pou nou vin konplè, menm jan avè l”. (Li Efezyen 4:​11-13.) Epitou, Jewova bay lespri sen l  pou ede n vin gen “panse Kris la”. (1 Kor. 2:​14-16.) Mete sou sa, Bondye te fè ekri kat Evanjil yo pou montre nou fason Jezi te panse, fason l te pale ak fason l te aji pandan sèvis li sou tè a. Lè w imite fason Jezi te panse ak fason l te aji, w ap kapab reyalize objektif ou genyen pou w vin gen matirite antanke kretyen.

ENPÒTANS GWO MANJE NAN DOMÈN ESPIRITYÈL GENYEN

12. Ki sa “doktrin de baz nou te aprann sou Kris yo” ye?

¹² Pou n vin gen matirite, nou dwe “kite doktrin de baz nou te aprann sou Kris yo dèyè”, sa vle di ansèyman de baz nou te aprann antanke kretyen yo. Pami ansèyman sa yo, gen repantans, lafwa, batèm ak rezirèksyon (Ebre 6:​1, 2). Ansèyman sa yo se kèk nan ansèyman tout kretyen kwè ladan yo. Se pou rezon sa a, apot Pyè te pale de yo lè l t ap preche foul moun ki te reyini nan fèt Pannkòt la (Tra. 2:​32-35, 38). Nou dwe aksepte ansèyman de baz sa yo pou nou vin yon disip Kris. Pa egzanp, apot Pòl te fè konnen si nou pa kwè nan rezirèksyon, nou pa ka di nou se yon disip Kris (1 Kor. 15:​12-14). Sepandan, pou nou vin gen matirite, nou pa dwe aprann verite de baz yo sèlman.

13. Ki sa n dwe fè pou n jwenn byenfè nan gwo manje Ebre 5:14 pale de li a? (Gade foto a tou.)

¹³ Kontrèman ak doktrin de baz yo, gwo manje gen ladan l nonsèlman lwa Jewova yo, men tou prensip li yo ki ede n konprann fason l panse. Pou nou jwenn byenfè nan kalite manje sa a, nou dwe etidye Pawòl Bondye a, medite sou sa nou aprann, e fè efò pou n byen aplike yo. Lè n fè sa, nou vin konn ki jan pou n pran desizyon k ap fè Jewova plezi c. — Li Ebre 5:14.

14. Ki jan Pòl te ede kretyen nan vil Korent yo vin gen matirite?

¹⁴ Lè kretyen ki pa gen matirite yo nan sitiyasyon pou yo pran yon desizyon ki mande pou yo reflechi sou prensip ki nan Bib la e pou yo aplike yo, souvan yo  twouve sa difisil. Gen moun ki ka santi yo ka fè sa yo vle, depi Bib la pa bay okenn lwa sou sa. Gen lòt ki ka mande pou ba yo yon règ alòske sa pa nesesè. Pa egzanp, sanble kretyen ki te nan vil Korent yo te mande Pòl pou l bay yon règ pou yo konnen si yo ka manje manje moun te ofri bay zidòl. Pòl pa t di yo sa pou yo fè. Okontrè, li te montre yo wòl konsyans lan genyen, e li te fè yo konnen chak moun gen “dwa [pou yo] chwazi”. Li te rezone sou yon seri prensip ki t ap fè konsyans chak moun anpè toutpandan yo pa fè lòt moun bite (1 Kor. 8:​4, 7-9). Konsa, Pòl t ap ede kretyen nan vil Korent yo pou yo vin gen matirite yon fason pou yo sèvi ak kapasite pou yo konprann nan olye yo depann de lòt moun oswa pou y ap mande règ.

15. Ki jan Pòl te ede kretyen ebre yo fè pwogrè?

¹⁵ Nou aprann yon leson enpòtan nan sa Pòl te ekri kretyen ebre yo. Gen nan yo ki pa t kontinye fè pwogrè. An reyalite, yo te vin “retounen bezwen lèt ankò, olye [yo te] bezwen gwo manje”. (Ebre 5:12.) Yo pa t rive aprann verite Jewova t ap anseye yo tikras pa tikras nan kongregasyon an e yo pa t aksepte yo (Pwo. 4:18). Pa egzanp, anpil Juif ki te vin kretyen te kontinye ap ankouraje moun obeyi Lwa Moyiz la, alòske sakrifis Jezi a te gentan retire yo anba Lalwa depi anviwon 30 an (Wom. 10:4; Tit 1:10). Se sèten 30 an ki te pase yo te bay kretyen yo ase tan pou yo konprann yo pa t bezwen suiv Lalwa ankò. Nenpòt moun ki te li lèt Bondye te pouse Pòl ekri kretyen ebre yo te ka wè liv sa a gen gwo manje ladan l. Se egzakteman sa kretyen sa yo te bezwen pou yo vin gen plis lafwa nan nouvo dispozisyon ki te vin genyen pou moun adore Bondye ki pi bon lontan, e sa te ba yo kouraj tou pou yo kontinye preche malgre Juif yo te opoze ak yo. — Ebre 10:​19-23.

VEYE POU W PA TWÒ KWÈ NAN TÈT OU

16. Anplis fè pwogrè pou nou vin gen matirite, ki sa nou dwe fè?

¹⁶ Nou dwe fè efò nonsèlman pou nou vin gen matirite, men tou, pou nou kontinye genyen l. Sa mande pou nou veye pou n pa twò kwè nan tèt nou (1 Kor. 10:12). Nou dwe “kontinye verifye” pou  nou wè si n ap kontinye fè pwogrè. — 2 Kor. 13:5.

17. Ki jan lèt Pòl te ekri kretyen nan vil Kolòs yo montre enpòtans pou n kontinye gen matirite?

¹⁷ Nan lèt Pòl te ekri kretyen nan vil Kolòs yo, yon lòt fwa ankò li te montre nou bezwen kontinye gen matirite. Menm lè kretyen sa yo te vin gen matirite, Pòl te ankouraje yo pou yo veye pou yo pa kite fason monn nan panse twonpe yo (Kol. 2:​6-10). Epafras, sanble ki te byen konnen moun ki nan kongregasyon an, te toujou ap priye “yon fason pou [yo te] ka rete djanm antanke moun ki gen matirite”. (Kol. 4:12.) Ki leson nou ka aprann? Pòl ak Epafras te konprann pou n kontinye gen matirite sa mande pou n fè efò e nou bezwen èd Bondye. Yo te vle kretyen nan vil Kolòs yo kontinye gen matirite oswa kontinye fè pwogrè antanke kretyen malgre difikilte yo te jwenn.

18. Ki sa k ka rive yon kretyen ki gen matirite? (Gade foto a tou.)

¹⁸ Pòl te fè kretyen ebre yo konnen yon kretyen ki gen matirite ka vin pèdi favè Bondye nèt. Kè yon kretyen ka vin tèlman di, sa fè l pa ka repanti ankò e sa fè l pa ka jwenn padon Bondye ankò. Erezman kretyen ebre yo pa t rive nan sitiyasyon sa a (Ebre 6:​4-9). Gen moun jodi a ki vin inaktif oswa ki eskominye, men annapre ki repanti. Lefètke yo te repanti avèk imilite, sa montre yo pa t menm ak moun Pòl t ap pale de yo nan lèt li te ekri a. Nòmalman, lè yo retounen vin jwenn Jewova, y ap bezwen èd li bay (Eze. 34:​15, 16). Ansyen yo ka mande yon frè oswa yon sè ki gen eksperyans pou ede frè ak sè sa yo vin gen bon relasyon ak Jewova ankò.

19. Ki objektif nou bezwen genyen?

¹⁹ Si w ap fè efò pou w vin gen matirite antanke kretyen, ou kapab reyalize objektif ou genyen an! Kontinye manje gwo manje nan domèn espirityèl e fè efò pou panse w vin ann amoni ak panse Jewova. Si w deja vin gen matirite, fè tout sa w kapab pou w kontinye rete djanm antanke kretyen.