1. Ki chanjman ki vin fèt pandan plizyè dizèn ane ki sot pase yo?

PANDAN plizyè milye ane, pifò moun sou tè a te sanble fè pati yon relijyon. Men, depi plizyè dizèn ane gen yon gwo chanjman ki vin fèt. Vin gen plis moun chak jou ki pa nan yon relijyon. Anfèt, nan kèk peyi, pifò moun nan popilasyon an di yo pa nan yon relijyon *. — Mat. 24:12.

2. Ki sa petèt ki lakòz tout kantite moun sa yo pa enterese nan relijyon?

² Poukisa vin gen plis moun ki fè konnen yo pa enterese nan relijyon *? Gen kèk ladan yo se plezi oswa tètchaje ki fè yo aji konsa (Lik 8:14). Gen lòt ki vin ate. Gen lòt ankò ki kwè nan Bondye, men yo panse relijyon pa alamòd ankò, li pa itil anyen e li pa ann amoni ak lasyans e ak fason lojik moun panse. Yo ka konn tande zanmi, pwofesè oswa moun anpil moun konnen nan medya yo k ap di se nan evolisyon lavi soti. Men, yo pa fasil tande rezònman lojik k ap pouse yo kwè nan Bondye. Gen lòt menm, chèf relijye yo ba yo degoutans paske yo ava dèyè lajan ak pouvwa. Nan kèk peyi, gouvènman yo mete yon seri lwa ki pa pèmèt moun adore Bondye lib e libè.

3. Ki objektif atik sa a?

³ Jezi te ban nou lòd pou nou “fè disip pami moun tout nasyon”. (Mat. 28:19.) Ki jan nou ka ede moun ki pa enterese nan relijyon aprann renmen Bondye e vin disip Kris?  Nou bezwen rekonèt fason yon moun reyaji devan mesaj nou an ka depann de kote l te grandi. Pa egzanp, yon moun ki soti ann Ewòp ka pa reyaji menm jan ak yon moun ki soti ann Azi. Sa k fè sa? Ann Ewòp, anpil moun konn kèk bagay sou Bib la e yo konn tande se Bondye ki kreye tout bagay. Men, ann Azi, pifò moun pa prèske konn anyen nan Bib la, e yo ka pa kwè nan yon Kreyatè. Objektif atik sa a se ede nou touche kè tout moun nou rankontre nan travay predikasyon an, kèlkeswa kwayans yo oswa kote yo soti.

4. Poukisa nou dwe toujou pozitif?

⁴ Se pou n pozitif. Chak ane, gen moun ki pa t enterese nan relijyon ki vin Temwen Jewova. Anpil nan yo te deja gen bon prensip moral e yo te gen degoutans pou ipokrizi ki gen nan relijyon yo. Gen lòt ki pa t gen bon prensip moral, e anpil nan yo te gen yon seri vis yo te bezwen kite. Grasa èd Jewova, nou ka gen asirans n ap jwenn moun ki “nan bon dispozisyon pou yo resevwa lavi ki pap janm fini an”. — Tra. 13:48; 1 Tim. 2:3, 4.

5. Byen souvan, ki sa k ka fè moun yo byen reyaji devan mesaj nou an?

⁵ Se pou n janti e se pou n veye sa n ap di. Souvan, sa ki fè moun yo byen reyaji devan mesaj nou an se pa sa nou di, men se fason nou di l. Yo renmen lè nou janti, lè n veye sa n ap di, e lè nou montre nou enterese nan yo toutbon. Nou pa fòse yo tande sa n gen pou n di a. Okontrè, nou eseye konprann rezon ki fè se konsa yo wè relijyon. Pa egzanp, nou aprann gen kèk moun ki pa renmen pale sou relijyon ak yon moun yo pa konnen. Gen lòt ki panse se malelve oswa li dwòl pou yon moun mande yo sa yo panse sou Bondye. Gen lòt ankò ki jennen pou moun wè yo ap li Labib, sitou ak Temwen Jewova. Kèlkeswa sitiyasyon an, nou eseye konprann santiman yo. — 2 Tim. 2:24, nòt.

6. Ki jan apot Pòl te montre li konn adapte l, e ki jan nou ka imite l?

⁶ Ki sa nou ka fè si yon moun ta parèt pa alèz lè n sèvi ak mo tankou “Bib”, “kreyasyon”, “Bondye” oswa “relijyon”? Nou ka fè menm jan avèk apot Pòl lè nou chanje fason n ap pale ak moun nan. Lè Pòl t ap pale avèk Juif, li te rezone avèk yo sou baz Ekriti yo. Men, lè l t ap pale ak filozòf grèk yo nan Areyopaj la, li pa t fè referans dirèk ak Bib la (Tra. 17:2, 3, 22-31). Ki jan nou ka imite Pòl? Si n rankontre yon moun ki pa dakò ak Bib la, li ka pi bon pou n pa fè referans dirèk ak Bib la lè n ap rezone avè l. Si w santi yon moun ka pa alèz pou lòt moun wè w ap li Bib la avè l, eseye montre l vèsè yo yon fason pou w pa atire atansyon lòt moun, pa egzanp sou yon aparèy elektwonik.

7. Ann amoni ak 1 Korentyen 9:20-23, ki sa nou ka bezwen fè pou nou vin menm jan ak Pòl?

⁷ Chèche konprann moun yo epi koute yo. Nou dwe chèche konprann sa k fè moun nou rankontre yo panse jan yo panse a (Pwo. 20:5). Ann retounen sou egzanp Pòl la. Li te grandi nan mitan Juif. Se sèten, li te chanje metòd lè l t ap preche moun ki pa Juif yo, moun ki prèske pa t konn anyen sou Jewova ak sou Ekriti yo. Nou ka bezwen fè kèk rechèch oubyen pale ak moun ki gen eksperyans nan kongregasyon an yon fason pou n ka mete n nan plas moun nan tèritwa nou an epi chèche konprann yo. — Li 1 Korentyen 9:20-23.

8. Bay youn nan fason nou ka kòmanse konvèsasyon sou Bib la.

⁸ Objektif nou se chèche moun ki byen  “dispoze”. (Mat. 10:11.) Pou n ka efikas, nou dwe ankouraje moun yo di sa yo panse epi pran san nou pou n koute yo. Gen yon frè nan peyi Angletè ki renmen mande moun yo sa yo panse sou fason pou moun gen kè kontan nan maryaj yo, fason pou moun leve timoun ak fason pou moun fè fas ak enjistis. Apre l fin tande sa yo di, li di moun yo: “Ki sa nou panse sou konsèy sa a yo te ekri sa gen prèske 2 000 an?” Apre sa, li montre moun yo vèsè li te byen chwazi nan telefòn li san l pa di yo se Bib la.

9. Ki jan n ka ede moun ki pa renmen pale de Bondye?

⁹ Nou ka touche kè moun ki pa renmen pale de Bondye lè nou pale sou yon bagay ki enpòtan pou yo. Pa egzanp, gen anpil moun ki ret bouch ouvè lè y ap gade lanati. Konsa, nou kapab di yon bagay tankou: “Petèt ou konnen gen yon pakèt bagay syantifik yo envante se kopye yo te kopye sou yon seri bagay ki deja egziste nan lanati. Pa egzanp, moun ki fè mikwo yo etidye fason zòrèy fèt, e moun ki fè kamera yo etidye fason je fèt. Ki sa w panse? Kiyès ki te fè zòrèy ak je?” Apre nou fin byen koute moun nan, nou kapab di: “Lè enjenyè yo etidye fason zòrèy ak je fèt, nou ka ap mande tèt nou nan men kiyès y ap aprann. M te sezi tande yon pawòl yon powèt nan tan lontan te ekri. Li te di: ‘Èske moun ki fè zòrèy la pa ka tande? Èske moun ki fè je a pa ka wè? [...] Se li menm ki bay lèzòm konesans.’ Gen kèk syantifik ki di apeprè menm bagay la.” (Sòm 94:9, 10). Apre sa, nou ka montre moun nan yon videyo sou jw.org^® nan seksyon “Entèvyou ak temwayaj” nan ribrik “Kèk opinyon sou fason lavi te kòmanse”. (Gade anba ribrik PIBLIKASYON > VIDEYO.) Oswa, nou ka ba l bwochi La vie a-t-elle été créée? oswa bwochi Cinq questions à se poser sur l’origine de la vie.

10. Ki jan n ka kòmanse yon konvèsasyon ak yon moun ki pa renmen pale de Bondye?

¹⁰ Pifò moun ta renmen gen yon pi bon avni. Men, anpil moun pè pou tè a pa detwi oswa pou l pa vin yon kote moun pa ka viv. Gen yon siveyan itineran nan peyi Nòvèj ki di byen souvan moun ki pa renmen pale de Bondye yo konn vle pale sou sa k ap pase nan monn nan. Apre li fin salye moun yo, li konn di: “Ki sa w panse konsènan posiblite pou n vin gen yon pi bon  avni? Èske se politisyen yo, syantifik yo oswa yon lòt moun ki tout espwa nou?” Apre l fin byen koute moun nan, li konn li yon vèsè ki pale sou yon bèl avni oswa l site vèsè a. Gen kèk moun ki konn sezi lè yo wè Bib la pwomèt tè a ap la pou toutan e bon moun yo pral viv sou li nètale. — Sòm 37:29; Ekl. 1:4.

11. Poukisa nou ta dwe eseye divès metòd, e selon Women 1:14-16, ki jan nou ka suiv egzanp Pòl?

¹¹ L ap bon pou nou sèvi ak divès metòd lè n ap pale ak moun yo. Poukisa? Paske tout moun pa menm. Sa k atire yon moun gendwa pa atire yon lòt. Gen kèk moun ki gendwa pa gen pwoblèm pou yo pale de Bondye oswa sou Bib la, tandiske gen lòt ki pi renmen pale sou lòt bagay anvan. Kèlkeswa sitiyasyon an, nou ta dwe pwofite okazyon nou jwenn pou nou pale ak tout kalite moun. (Li Women 1:14-16.) Nòmalman, nou dwe sonje se Jewova ki fè laverite grandi nan kè moun ki renmen sa ki dwat yo. — 1 Kor. 3:6, 7.

12. Ki sa nou ka fè pou n rive pale ak moun ki sot nan peyi ki ann Azi yo ki pa enterese chèche konnen si gen yon Kreyatè ki egziste?

¹² Toupatou sou tè a, pwoklamatè yo rankontre ak moun ki soti ann Azi e ak moun ki soti nan peyi kote gouvènman yo mete yon seri lwa ki pa pèmèt moun adore Bondye lib e libè. Nan plizyè peyi ann Azi, gen anpil moun ki pa janm enterese chèche konnen si gen yon Kreyatè ki egziste. Gen kèk moun ki anvi konnen e ki aksepte yon etid biblik dirèkteman, men gen lòt menm okòmansman ki yon jan pè aprann sa Bib la di paske ansèyman sa yo nouvo pou yo. Ki sa nou ka fè pou n ede yo? Gen kèk pwoklamatè ki gen eksperyans ki rive pale ak moun sa yo lè yo kòmanse yon konvèsasyon ki amikal avèk yo, lè yo montre yo enterese nan yo. Annapre, lè moman an apwopriye, pwoklamatè sa yo konn esplike moun nan jan lavi pa yo te amelyore lè yo te kòmanse aplike yon prensip nan Bib la.

13. Ki sa k ka ede kèk moun pou yo vin enterese nan Bib la? (Gade foto ki sou paj kouvèti a.)

¹³ Premye bagay ki te atire anpil moun se bonjan konsèy ki gen nan Bib la (Ekl. 7:12). Gen yon sè nan Nouyòk ki abitye vizite moun ki pale chinwa ki di: “Mwen eseye montre m enterese nan moun e m koute yo. Si m aprann yo fèk vin abite nan zòn nan, mwen konn mande yo: ‘Èske w kòmanse santi w alèz nan zòn nan? Ou deja jwenn travay? Moun nan zòn nan byen boule avè w?’” Pafwa, sa ouvri pòt pou l fè yon ti pale sou yon bagay Bib la anseye. Lè sa apwopriye, sè a konn di: “Ki sa w panse yon moun dwe fè pou l viv byen ak moun? Èske m mèt montre w yon pwovèb nan Bib la? Men sa l di: ‘Lè yon batay kòmanse, se tankou yon dlo yo lage. Anvan diskisyon pete, wete kò w!’ Èske w panse konsèy sa a ka ede nou viv pi byen ak lòt moun?” (Pwo. 17:14). Lè nou fè konvèsasyon konsa, sa ka ede nou wè ki moun ki ka dakò w retounen vizite l.

14. Ki jan yon frè nan Ekstrèm Oryan konn ede moun ki di yo pa kwè nan Bondye?

¹⁴ Ki sa nou ka di moun ki di nou yo pa kwè nan Bondye? Gen yon frè ki gen lontan depi l ap preche moun nan Ekstrèm Oryan ki pa enterese nan relijyon ki di: “Byen souvan, lè yon moun isit la di ‘Mwen pa kwè nan Bondye’, li vle di li pa kwè nan zafè adore dye pifò moun nan zòn nan adore yo. An jeneral, mwen fè moun nan konnen mwen dakò pifò dye yo  se moun ki fè yo e yo pa reyèl. Byen souvan, mwen li Jeremi 16:20 ki di: ‘Èske dye moun yo fè yo se dye yo ye toutbonvre?’ Apre sa, mwen konn mande yo: ‘Ki jan nou ka konnen si dye yo se dye toutbon oswa si se moun ki fè yo?’ Mwen koute yo avèk atansyon, epi mwen li Ezayi 41:23 ki di: ‘Di nou ki sa k pral rive nan tan k ap vini yo pou nou ka konnen se dye nou ye.’ Apre sa, mwen montre yo yon kote Jewova te fè konnen sa k pral rive alavni.”

15. Ki sa egzanp yon frè ki ann Azi delès ka aprann nou?

¹⁵ Men ki metòd yon frè ki ann Azi delès itilize lè l ap fè nouvèl vizit. Men sa l di: “Mwen montre yo egzanp ki fè konnen jan sa ki nan Bib la itil, jan yon seri pwofesi akonpli, ak lwa ki kontwole linivè. Apre sa, mwen montre yo ki jan tout bagay sa yo pwouve gen yon Kreyatè ki vivan e ki gen anpil sajès. Lè yon moun dakò li posib pou Bondye egziste, mwen kòmanse montre l sa Bib la di sou Jewova.”

16. Selon Ebre 11:6, poukisa etidyan yo bezwen gen lafwa nan Bondye ak nan Bib la, e ki jan nou ka ede yo vin genyen l?

¹⁶ Lè n ap kondui etid Labib ak yon moun ki pa t enterese nan relijyon, nou dwe kontinye ede l kwè Bondye egziste toutbon. (Li Ebre 11:6.) Mete sou sa, nou dwe ede l kwè nan Bib la. Sa ka mande pou nou anseye l kèk verite plizyè fwa. Nou ka bezwen ede l wè prèv ki montre Bib la se Pawòl Bondye nan chak etid. Sa ka mande pou nou fè yon ti pale avè l tou kout sou jan pwofesi yo reyalize, sou fason Bib la egzak lè l ap pale sou bagay syantifik ak listwa, ak fason Bib la ka ede nou nan lavi a.

17. Ki efè lanmou nou ka gen sou moun yo?

¹⁷ Nou ka ede moun yo vin disip Kris lè nou montre nou renmen yo, kit yo enterese nan relijyon kit yo pa enterese nan relijyon (1 Kor. 13:1). Tank n ap anseye yo, objektif nou se montre yo Bondye renmen yo e li vle yo renmen l. Chak ane, gen plizyè milye moun ki pa t vrèman enterese nan relijyon okòmansman, oubyen ki pa t enterese ditou, ki vin batize paske yo vin aprann renmen Bondye. Donk, se pou nou pozitif e se pou nou montre nou renmen tout kalite moun e nou enterese nan yo. Koute yo. Eseye konprann yo. Pa mwayen egzanp nou, montre yo kòman pou yo vin disip Kris.