1. Ki asirans nou genyen, e poukisa?

 LÈ N wè tout pwoblèm ki gen nan monn nan jodi a, èske n twouve l difisil pou n kwè bagay yo ap vin pi bon yon jou? Pa tèlman gen lanmou nan fanmi yo ankò. Moun yo nan monn nan vin pi vyolan, yo vin pi egoyis, e yo vin pi agresif. Anpil moun twouve l difisil pou yo fè moun ki gen otorite konfyans. Men, sitiyasyon sa yo kapab ban nou espwa. Sa k fè sa? Paske moun yo ap aji egzakteman jan yon pwofesi estrawòdinè ki pale konsènan “dènye jou yo” te anonse sa (2 Tim. 3:1-5). Lefètke pwofesi sa a ap reyalize, sa montre aklè Kris Jezi kòmanse dirije antanke Wa nan Wayòm Bondye a, e pa gen yon moun ki sensè ki kapab di li pa wè pwofesi sa a ap reyalize. Men, sa se sèlman youn nan pakèt pwofesi ki gen rapò ak Wayòm nan. Lè n egzamine lòt pwofesi ki reyalize nan ane ki sot pase la yo, lafwa n ap vin pi solid.

2. Ki sa nou pral egzamine nan atik sa a, e poukisa? (Fè yon ti pale sou foto ki sou paj kouvèti a.)

² Nan atik sa a, nou pral egzamine: 1) yon pwofesi ki ede n konprann ki lè Wayòm nan te kòmanse dirije, 2) yon seri pwofesi ki ede n konprann Jezi ap dirije antanke Wa nan Wayòm Bondye a, menmsi nou pa wè l,  e 3) yon seri pwofesi ki fè konnen ki jan ènmi Wayòm Bondye a genyen yo pral detwi. Nou pral wè ki jan pwofesi sa yo kore youn lòt, tankou pyès nan yon jwèt pasyans, pou ede n pi byen konprann sa k pral rive talè konsa selon kalandriye Jewova a.

3. Ki asirans pwofesi nou jwenn nan Dànyèl 7:13, 14 la ban nou konsènan Wa nan Wayòm Bondye a?

³ Pwofesi nou jwenn nan Dànyèl 7:13, 14 la ban nou asirans Kris Jezi ap yon Chèf san parèy nan Wayòm Bondye a. Moun nan tout nasyon pral kontan “sèvi l” e pap janm gen lòt dirijan apre l. Gen yon lòt pwofesi nan liv Dànyèl la ki anonse Jezi t ap kòmanse dirije nan Wayòm li an nan fen yon peryòd Labib rele sèt tan. Èske l posib pou n konnen ki lè sa t ap fèt?

4. Esplike ki jan Dànyèl 4:10-17 ede n wè nan ki ane Kris t ap gen pou l vin Wa? (Gade nòt la tou.)

⁴ Li Dànyèl 4:10-17. “Sèt tan” yo reprezante yon peryòd ki dire 2 520 an. Peryòd sa a te kòmanse nan ane 607 anvan epòk nou an lè Babilónyen yo te retire dènye wa ki te sou twòn Jewova a nan Jerizalèm. Li te fini nan ane 1914 epòk nou an, lè Jewova te met Jezi, “moun ki gen dwa legal la”, Wa nan Wayòm Bondye a. * — Eze. 21:25-27.

5. Bay youn nan fason pwofesi konsènan “sèt tan” yo kapab itil nou.

⁵ Ki jan pwofesi sa a kapab itil nou? Lè nou konprann pwofesi konsènan “sèt tan” yo sa ban nou asirans Jewova ap reyalize pwomès li yo nan moman yo dwe reyalize a. Menm jan li te fikse yon tan pou Wayòm li an tabli, li pral veye tou pou tout lòt pwofesi yo reyalize nan moman li deside a. Vrèmanvre, jou Jewova a “pap anreta”! — Aba. 2:3.

6. a) Ki prèv ki montre Kris ap dirije nan syèl la, menm lè moun pa wè l? b) Ki jan sa parèt aklè nan pwofesi ki nan Revelasyon 6:2-8 la?

⁶ Prèske nan fen sèvis Jezi sou tè a, li te anonse yon seri evènman ki t ap gen pou rive nan monn nan ki t ap ede disip li yo konnen li kòmanse dirije nan syèl la. Pami bagay li te anonse yo, li te pale de lagè, gwo grangou ak tranblemanntè. Li te fè konnen tou t ap gen epidemi oswa maladi “nan yon zòn apre yon lòt”, e pandemi COVID-19 la se youn ladan yo. Evènman sa yo fè pati sa Bib la rele “siy” prezans Kris la (Mat. 24:3, 7; Lik 21:7, 10, 11). Plis pase 60 an apre lanmò Jezi e apre l fin retounen nan syèl la, li te bay apot Jan plis asirans evènman sa yo t ap gen pou yo rive. (Li Revelasyon 6:2-8.) Tout evènman sa yo ap reyalize depi lè Jezi vin Wa an 1914.

7. Poukisa lè Jezi te vin Wa sa te vin lakòz malè pou tè a?

⁷ Poukisa monn nan te vin pi mal lè Jezi te vin Wa? Revelasyon 6:2 bay yon enfòmasyon enpòtan. Li fè konnen premye bagay Jezi te fè lè l te fèk vin Wa se te yon gè. Ak kiyès li te fè gè sa a? Li te fè lagè ak Dyab la ak demon l yo. Selon Revelasyon chapit 12, Satan te pèdi batay la, e yo te pimpe li menm ak demon l yo sou tè a. Piske Satan te an kòlè anpil,  li te kòmanse pase kòlè l sou lèzòm, e sa vin lakòz “malè pou tè a”. — Rev. 12:7-12.

8. Lè n wè pwofesi Bib la te anonse konsènan Wayòm nan ap reyalize, ki jan sa kapab itil nou?

⁸ Ki jan pwofesi sa yo ka itil nou? Evènman k ap pase nan monn nan ak gwo chanjman ki gen nan konpòtman moun yo t ap ede n konprann Jezi vin Wa. Se sa k fè, lè n wè moun yo egoyis e y ap aji ak mechanste, nou pap fache pou sa, okontrè, n ap sonje fason y ap aji yo montre pwofesi ki nan Bib la ap reyalize. Wayòm nan ap dirije (Sòm 37:1)! E nou ka atann ap vin gen plis pwoblèm nan monn nan tank Amagedon ap pwoche (Mak 13:8; 2 Tim. 3:13). Nou gen rekonesans dèske Papa nou ki nan syèl la ki renmen nou ede n konprann rezon ki fè gen tout pwoblèm sa yo nan monn nan.

9. Ki jan pwofesi ki nan Dànyèl 2:28, 31-35 dekri dènye pisans mondyal la, e ki lè li te vin egziste?

⁹ Li Dànyèl 2:28, 31-35. Nou wè pwofesi sa a ap reyalize jodi a. Rèv Nebikadneza a montre sa k t ap gen pou rive “nan dènye jou yo” lè Kris kòmanse dirije. Pami ènmi Jezi yo ki sou tè a, t ap gen dènye pisans mondyal Bib la te anonse a, li menm “pye [...] ki te fèt ak fè ak ajil” la reprezante. Pisans mondyal sa a deja ap dirije. Li te vin egziste pandan Premye Gè mondyal la, lè Grann Bretay ak Etazini te fè yon alyans espesyal youn ak lòt, anpalan de alyans anglo-ameriken an. Estati ki te nan rèv Nebikadneza te fè a te anonse tou omwen de bagay konsènan pisans mondyal sa a ki t ap fè l pa menm ak lòt wayòm ki te la anvan yo.

10. a) Ki jan pwofesi Dànyèl la byen dekri Pisans mondyal anglo-ameriken an? b) Ki danje nou dwe evite? (Gade kare ki gen tit “ Veye kò n ak ajil la!”.)

 ¹⁰ Premyèman, kontrèman ak pisans mondyal yo te pale de yo anvan nan vizyon an, se pa yon metal solid tankou lò oswa ajan ki reprezante alyans anglo-ameriken an, men se yon melanj fè ak ajil. Ajil la reprezante “desandan lèzòm yo” oswa moun nan pèp la (Dàn. 2:43, nòt). Jan nou ka wè sa byen klè jodi a, enfliyans moun nan pèp la genyen nan eleksyon, kanpay y ap fè pou revandike dwa yo antanke sitwayen, gwo manifestasyon k ap fèt, ak sendika yo fè l difisil pou pisans mondyal sa a fè sa l vle.

11. Lefètke Pisans mondyal anglo-ameriken an vin egziste, ki jan sa fè n gen plis asirans n ap viv nan tan lafen an?

¹¹ Dezyèmman, Pisans mondyal anglo-ameriken an, pye kokennchenn estati a reprezante a, se dènye pisans mondyal Bib la te anonse. Pap gen okenn lòt pisans politik k ap vin apre l. Okontrè, l ap detwi byen vit nan Amagedon lè Wayòm Bondye a kraze l ansanm ak tout lòt gouvènman lèzòm yo. * — Rev. 16:13, 14, 16; 19:19, 20.

12. Bay yon lòt prèv nou jwenn nan pwofesi Dànyèl la ki ankouraje n e ki ban nou espwa.

¹² Ki jan pwofesi sa a kapab itil nou? Pwofesi Dànyèl la bay plis prèv n ap viv nan tan lafen an. Sa gen plis pase 2 500 an, pwofèt Dànyèl te anonse apre Babilòn t ap gen kat lòt pisans mondyal ki t ap gen gwo enfliyans sou pèp Bondye a. Anplis de sa, li te montre se Pisans mondyal anglo-ameriken an ki t ap dènye pisans lan. Sa konsole nou e sa fè n gen espwa talè konsa Wayòm Bondye a pral elimine tout gouvènman lèzòm yo nèt e se li ki pral dirije tout tè a. — Dàn. 2:44.

13. Ki sa “uityèm wa” ak “dis wa” yo pale de yo nan Revelasyon 17:9-12 yo reprezante, e ki jan pwofesi sa a reyalize?

¹³ Li Revelasyon 17:9-12. Tout dega Premye Gè mondyal la te lakòz yo te pèmèt yon lòt pwofesi nan Bib la ki gen rapò ak dènye jou yo reyalize. Dirijan yo te vle pou vin gen lapè toupatou nan monn nan. Se sa k fè, an janvye 1920, yo te tabli Sosyete Nasyon yo, e ann oktòb 1945, te vin gen Nasyonzini ki te ranplase l. Yo rele òganizasyon sa a “yon uityèm wa”. Men, li pa yon pisans mondyal. Se pisans politik k ap soutni l yo ki fè l gen pouvwa l genyen an. Bib la rele pisans sa yo “dis wa”.

14-15. a) Ki sa Revelasyon 17:3-5 fè konnen konsènan “Gran Babilòn nan”? b) Èske gen anpil moun ki kontinye soutni fo relijyon yo?

¹⁴ Li Revelasyon 17:3-5. Jewova te fè apot Jan wè yon pwostitye, anpalan de “Gran Babilòn nan”, nan yon vizyon. Pwostitye sa a reprezante tout fo relijyon yo nan monn nan. Ki jan vizyon an reyalize? Fo relijyon yo gen lontan depi y ap travay kòtakòt ak pisans politik yo nan monn nan e yo gen lontan depi y ap soutni yo. Men, talè konsa, Jewova pral mete lide l nan kè pisans politik yo pou yo “reyalize volonte l”. Ki sa k pral pase lè sa a? Pisans politik sa yo, anpalan de “dis wa” yo, pral atake fo relijyon yo e y ap detwi yo. — Rev. 17:1, 2, 16, 17.

¹⁵ Ki jan nou fè konnen Gran Babilòn nan pa lwen detwi? Pou n reponn kesyon sa a, l ap bon pou n sonje dlo  gwo Rivyè Efrat la se youn nan bagay ki te pwoteje ansyen vil Babilòn nan. Liv Revelasyon an konpare plizyè milyon moun k ap soutni Gran Babilòn nan ak “dlo” k ap pwoteje l (Rev. 17:15). Men, li fè konnen tou dlo yo t ap gen pou yo “seche”, sa ki montre anpil moun t ap sispann soutni fo relijyon yo nan monn nan (Rev. 16:12). Jodi a, pwofesi sa a ap reyalize paske gen anpil moun ki abandone fo relijyon yo e ki kòmanse chèche solisyon pou pwoblèm yo lòt kote.

16. Lefètke nou konprann pwofesi ki gen rapò ak Nasyonzini ki t ap gen pou l parèt e ak Gwo Babilòn nan ki gen pou l detwi, ki jan sa ka itil nou?

¹⁶ Ki jan pwofesi sa yo ka itil nou? Lefètke Nasyonzini vin egziste e lefètke anpil moun pa kontinye soutni fo relijyon yo, sa montre aklè n ap viv nan dènye jou yo. Byenke anpil moun sispann soutni Gran Babilòn nan, se pa sa ki pral fè fo relijyon yo pa egziste ankò. Jan nou sot wè sa, Jewova pral mete lide l nan kè “dis wa” yo, anpalan de pisans politik k ap soutni Nasyonzini yo, pou  yo “reyalize volonte l”. Nasyon sa yo pral detwi fo relijyon yo bridsoukou e sa pral fè tout moun sou tè a sezi * (Rev. 18:8-10). Destriksyon Gwo Babilòn nan pral souke lemonnantye e sa ka lakòz gwo pwoblèm, men, pèp Bondye a ap gen omwen de rezon pou yo rejwi. Ènmi sa a Jewova Dye genyen depi byen lontan an pral disparèt nèt, e delivrans nou nan monn mechan sa a pap lwen rive! — Lik 21:28.

17-18. a) Ki jan n ka kontinye fè lafwa n vin pi djanm? b) Ki sa n pral wè nan atik ki vin apre a?

¹⁷ Dànyèl te fè konnen “vrè konesans” lan t ap “vin anpil”. E se sa ki fèt vre! Nou vin konprann yon seri pwofesi ki gen rapò ak epòk nou an (Dàn. 12:4, 9, 10). Pwofesi sa yo tèlman reyalize yon fason ki egzak, sa fè n vin gen plis respè pou Jewova ak Pawòl li a (Eza. 46:10; 55:11). Kidonk, ann kontinye fòtifye lafwa nou lè n pran tan pou n etidye Bib la, e lè n ede lòt moun vin gen bon relasyon ak Jewova. Jewova ap pwoteje tout moun ki met tout konfyans yo nan li, e l ap ba yo “lapè nètale”. — Eza. 26:3.

¹⁸ Nan atik ki vin apre a, nou pral pale sou pwofesi ki gen rapò ak kongregasyon yo nan tan lafen an. Jan nou pral wè sa, pwofesi sa yo tou montre aklè n ap viv nan dènye jou yo. Nou pral jwenn plis prèv ki montre Jezi, Wa nou an k ap dirije kounye a, ap gide disip fidèl li yo.