1-2. Ki benediksyon yon moun jwenn apre l fin batize?

 NOU kontan lè n batize e nou vin fè pati fanmi Jewova a. Moun ki gen privilèj sa a ap dakò ak pawòl David, youn nan moun ki te ekri sòm yo, ki te di: “Byennere moun [Jewova] chwazi a, moun [li] fè pwoche kote [l] pou l ka abite nan lakou [L] yo.” — Sòm 65:4.

² Se pa nenpòt moun Jewova envite vin fè pati fanmi l. Jan nou te wè sa nan atik anvan an, li chwazi rale moun ki montre yo vle gen yon relasyon sere avè l (Jak 4:8). Lè w vwe Jewova lavi w epi w batize, ou vin pi pwòch avè l yon fason espesyal. Ou kapab sèten apre w fin batize l ap “vide benediksyon sou [ou] jiskaske [ou] pa manke anyen”. — Mal. 3:10; Jer. 17:​7, 8.

3. Ki gwo responsablite kretyen ki vwe Jewova lavi yo e ki batize genyen? (Eklezyas 5:​4, 5).

³ Nòmalman batèm se jis yon kòmansman. Apre w fin franchi etap sa a w ap vle fè tout sa w kapab pou w respekte ve w te fè a, menm lè w jwenn tantasyon oswa lafwa w pase anba eprèv. (Li Eklezyas 5:​4, 5.) Antanke yon disip Jezi, ou pral fè tout sa w kapab pou w suiv egzanp li ak kòmandman l yo (Mat. 28:​19, 20; 1 Pyè 2:21). Atik sa a ap ede w fè sa.

 “KONTINYE SUIV” JEZI MENM LÈ W JWENN EPRÈV AK TANTASYON

4. Nan ki sans disip Jezi yo ap pote yon “poto soufrans”? (Lik 9:23).

⁴ Pa panse w pap gen pwoblèm nan lavi w apre w fin batize. Anfèt, Jezi te montre byen klè disip li yo t ap gen pou yo pote yon “poto soufrans”. An reyalite, yo t ap gen pou yo fè sa “jou apre jou”. (Li Lik 9:23.) Èske Jezi te vle di disip li yo t ap toujou ap soufri? Se pa sa ditou. Li te jis vle montre nonsèlman y ap jwenn benediksyon, men, y ap jwenn pwoblèm tou. Kèk nan pwoblèm sa yo ka menm fè yo soufri. — 2 Tim. 3:12.

5. Ki benediksyon Jezi te pwomèt moun ki fè sakrifis yo?

⁵ Petèt, ou deja jwenn opozisyon nan fanmi w oswa petèt ou te fè sakrifis pou w kite yon seri avantaj materyèl pou w met Wayòm nan an premye (Mat. 6:33). Si w te fè sa, ou mèt gen asirans Jewova wè tout sa w fè pou li (Ebre 6:10). Pa gen dout, ou wè pawòl Jezi te di yo se laverite. Men sa l te di: “Pa gen pèsonn ki kite kay, oswa frè, oswa sè, oswa manman, oswa papa, oswa pitit, oswa jaden poutèt mwen e poutèt bon nouvèl la, ki pap jwenn depi kounye a 100 fwa plis kay, frè, sè, manman, pitit, jaden, ansanm ak pèsekisyon, e ki pap jwenn lavi ki pap janm fini an nan sistèm k ap vini an.” (Mak 10:​29, 30). Benediksyon w jwenn yo pi plis lontan pase nenpòt sakrifis ou te fè. — Sòm 37:4.

6. Poukisa w ap bezwen kontinye lite kont “dezi lachè” apre w fin batize?

⁶ Apre w fin batize, w ap bezwen kontinye goumen kont “dezi lachè”. (1 Jan 2:16.) Dayè, antanke desandan Adan, w ap toujou fè peche. Pafwa, ou ka santi w menm jan ak apot Pòl. Men sa l te ekri: “Nan fon kè m, mwen vrèman jwenn plezi nan lwa Bondye a, men, nan kò mwen, mwen wè yon lòt lwa k ap fè lagè ak lwa ki nan lespri m nan e k ap mennen m kòm prizonye bay lalwa peche ki nan kò m nan.” (Wom. 7:​22, 23). Tandans ou genyen pou w fè peche a ka fè w santi w dekouraje. Men, lè w panse ak pwomès ou te fè Jewova lè w te vwe l lavi w la, sa ap ba w plis fòs pou w lite kont tantasyon. An reyalite, lè w jwenn tantasyon, ve w te fè a ap ede w. Ki jan?

7. Lè w vwe Jewova lavi w ki jan sa ap ede w ret fidèl avè l?

⁷ Lè w vwe Jewova lavi w, ou nye tèt ou. Sa vle di ou chwazi vire do bay dezi pèsonèl ou ak yon seri objektif ki pa t ap fè Jewova plezi (Mat. 16:24). Donk, lè w jwenn yon eprèv, ou pap bezwen pèdi tan ap mande tèt ou ki sa pou w fè. W ap deja deside sa w ap fè, sa vle di w ap chwazi ret fidèl ak Jewova. W ap toujou pran detèminasyon pou w fè Jewova plezi. Nan sans sa a w ap menm jan ak Jòb. Malgre l te jwenn yon seri eprèv ki te rèd anpil, li te di avèk fòs: “Mwen pap sispann ret fidèl ak Bondye!” — Jòb 27:5.

8. Lè w reflechi sou priyè w te fè pou w vwe Jewova lavi w, ki jan sa ka ede w reziste devan tantasyon?

⁸ Lè w reflechi sou priyè w te fè pou w vwe Jewova lavi w la, w ap jwenn fòs pou w reziste devan nenpòt tantasyon. Pa egzanp, èske w t ap montre yon moun ou konnen ki marye ou enterese avè l? Se sèten ou pa t ap fè sa. Ou te deja pwomèt Jewova ou pa t ap janm fè yon bagay konsa. Donk, si w pa kite move dezi  pran rasin lakay ou, ou pap bezwen fè efò pou w derasinen yo annapre. Ou pa pral nan “chemen mechan yo”. — Pwo. 4:​14, 15.

9. Lè w reflechi sou priyè w te fè lè w t ap vwe Jewova lavi w la, ki jan sa kapab ede w tou pou w kontinye met adorasyon w ap ba li a nan premye plas nan lavi w?

⁹ Ki sa w ap fè si yo ofri w yon travay k ap anpeche w asiste reyinyon regilyèman? W ap deja konn sa pou w fè. Anvan menm yo te ofri w travay la, ou te deja deside ou pap aksepte yon travay konsa. Donk, ou pap aksepte travay la, apre sa pou w ap chèche jwenn yon mwayen pou w kontinye met Jewova an premye. Lè w sonje Jezi te pran detèminasyon pou l fè Papa l plezi, ou menm tou w ap pran detèminasyon byen vit e yon fason ki fèm pou w vire do bay nenpòt bagay ou konnen ki pap fè Bondye ou te vwe lavi w la plezi. — Mat. 4:10; Jan 8:29.

10. Ki jan Jewova ap ede w pou w kontinye suiv Jezi apre w fin batize?

¹⁰ An reyalite, eprèv ak tantasyon ou jwenn ba w okazyon pou w montre ou pran detèminasyon pou w “kontinye suiv” Jezi. Lè w fè sa, ou kapab gen asirans Jewova ap ede w. Labib di: “Bondye fidèl, li pap kite nou tante depase sa nou ka sipòte. Men, lè nou jwenn tantasyon an, l ap ouvri yon chemen tou, dekwa pou nou ka andire l.” — 1 Kor. 10:13.

SA W KA FÈ POU W KONTINYE SUIV JEZI

11. Bay youn nan pi bon fason pou w kontinye suiv Jezi. (Gade foto a tou.)

¹¹ Jezi te sèvi Jewova ak tout kè l e li te toujou priye L (Lik 6:12). Youn nan pi bon fason pou w kontinye suiv Jezi apre w fin batize, se lè w kontinye fè  yon seri bagay k ap fè w vin pi pwòch ak Jewova. Labib di: “Kèlkeswa degre nou rive nan pwogrè nou, annou kontinye mache annòd nan menm direksyon an.” (Flp. 3:16). Detanzantan, w ap tande eksperyans frè ak sè ki te deside fè plis nan sèvis Jewova. Petèt, yo te asiste Lekòl pou evanjelizatè Wayòm nan oswa yo te deplase al sèvi kote ki gen plis bezwen. Si w kapab chèche gen yon objektif konsa, li ta bon pou w fè sa. Pèp Jewova a chèche mwayen pou yo fè plis nan sèvis y ap ba li a (Tra. 16:9). E si w pa kapab fè sa pou kounye a? Pa panse w gen mwens valè pase frè ak sè ki kapab yo. Kous kretyen yo ladan l lan se yon kous ki mande andirans (Mat. 10:22). Pa janm bliye ou fè Jewova kontan anpil lè w fè sa w kapab selon sitiyasyon w. Se yon bon fason ou kapab kontinye suiv Jezi apre w fin batize. — Sòm 26:1.

12-13. Ki sa w kapab fè si w wè ou pa chofe nan sèvis Bondye menm jan an ankò? (1 Korentyen 9:​16, 17). (Gade kare ki gen tit “ Rete nan kous la”.)

¹² Ki sa w ta dwe fè si w santi ou pa priye ak tout kè w ankò oswa ou pa pran plezi nan travay predikasyon an jan w te abitye fè sa? Ki sa w ta dwe fè si w ta rann ou kont ou pa renmen li Labib menm jan w te konn fè sa anvan? Si w santi w konsa apre w fin batize, pa kouri panse Jewova retire lespri sen l sou ou. Ou pa pafè, e fason w santi w kapab chanje tanzantan. Si w pa chofe menm jan an ankò, reflechi sou egzanp apot Pòl. Menm lè l te eseye suiv egzanp Jezi, li te konnen pafwa li ka pa santi l twò chofe pou l fè sa. (Li 1 Korentyen 9:​16, 17.) Men sa l te di: “Menm lè mwen fè sa kont volonte m, mwen toujou gen  yon responsablite yo konfye m.” Sa vle di Pòl te detèmine pou l akonpli sèvis li kèlkeswa jan l te ka santi l.

¹³ Menm jan an tou, pa pran desizyon ki baze sèlman sou jan w santi w. Pran detèminasyon pou w fè sa ki dwat kèlkeswa jan w santi w. Si w kontinye fè sa ki dwat, rive yon lè santiman w te genyen yo ka chanje. Kèlkeswa jan sa ye, lè w chèche gen yon bon pwogram nan sèvis Bondye, sa ap ede w pou w kontinye suiv Jezi apre w fin batize. Lè w kontinye fè sa, sa ap ankouraje kwayan parèy ou yo tou. — 1 Tes. 5:11.

“KONTINYE VERIFYE [...] KONTINYE TESTE”

14. Ki sa w bezwen egzamine regilyèman, e poukisa? (2 Korentyen 13:5).

¹⁴ Apre w fin batize, l ap enpòtan tou pou w egzamine tèt ou regilyèman. (Li 2 Korentyen 13:5.) Detanzantan, li bon pou w chèche wè si w priye chak jou, si w li Bib la epi w etidye l, si w asiste reyinyon yo e w patisipe nan travay predikasyon an. Chèche wè fason ou kapab jwenn plis kè kontan nan aktivite sa yo. Pa egzanp, mande tèt ou: ‘Èske m ka esplike lòt moun ansèyman de baz ki nan Bib la? Èske gen mwayen pou m chèche gen plis kè kontan nan sèvis mwen? Lè m ap priye, èske m di Jewova egzakteman sa m gen pou m di, e èske priyè m yo montre mwen konte nèt sou li? Èske m asiste reyinyon yo regilyèman? Ki jan m ka pi konsantre pandan reyinyon yo e ki sa m ka fè pou m patisipe plis?’

15-16. Ki sa w aprann nan eksperyans yon frè ki te reziste lè l te jwenn tantasyon?

¹⁵ Li enpòtan tou pou w konnen pwen fèb ou. Gen yon frè ki rele Robert ki rakonte yon eksperyans ki montre enpòtans sa genyen pou yon moun fè sa. Men sa l di: “Lè m te gen anviwon 20 an, mwen te jwenn yo ti djòb. Yon jou apre travay la, gen yon dam ki t ap travay menm kote avè m ki te envite m pou m al lakay li. Li te di nou t ap poukont nou e nou t ap ‘pran plezi nou’. Okòmansman, mwen te ba l kèk pawòl kenbe, men finalman mwen te di l non e m te esplike l poukisa.” Robert te reziste lè l te jwenn tantasyon e li merite felisitasyon. Sepandan annapre, lè l te reflechi sou sa k te pase a li te wè li te ka jere sitiyasyon an pi byen. Men sa l rekonèt: “Mwen pa t montre m fèm menm jan ak Jozèf lè madan Potifa t ap ba l presyon  pou l kouche avè l e m pa t aji vit menm jan avè l (Jen. 39:​7-9). Anfèt, mwen te sezi wè jan l te difisil pou m di non. Sa k te pase a te ede m wè mwen te bezwen ranfòse relasyon m ak Jewova.”

¹⁶ Petèt l ap bon pou w egzamine tèt ou menm jan ak Robert. Menm lè w rive reziste devan tantasyon, mande tèt ou: ‘Konbyen tan sa te pran pou m di non?’ Si w rann ou kont gen kèk bagay ou bezwen amelyore, ou pa bezwen kondane tèt ou. Se pou w kontan dèske kounye a ou konnen ki pwen fèb ou genyen. Priye Jewova sou sa, epi fè yon seri bagay k ap ede w pran plis detèminasyon pou w viv ann amoni ak prensip moral li yo. — Sòm 139:​23, 24.

17. Ki rapò eksperyans Robert la te gen ak non Jewova?

¹⁷ Gen yon lòt bagay nou kapab aprann nan eksperyans Robert te fè a. Men sa l te ajoute: “Apre m te fin refize envitasyon kòlèg travay mwen an te fè m nan, li te di: ‘Ou pase tès la!’ Epi m te mande l ki sa l te vle di. Li te fè m konnen gen yon zanmi l ki te Temwen Jewova ki te di l tout jèn Temwen Jewova yo ap peche an kachèt, e si yo ta jwenn okazyon pou yo fè sa k mal, y ap pwofite. Donk, li te di zanmi l lan li pral teste m pou l wè si se vre. Lè sa a, mwen te kontan paske mwen te onore non Jewova.”

18. Ki sa w detèmine pou w fè apre w fin batize? (Gade kare ki gen tit “ Yon ribrik w ap renmen”.)

¹⁸ Lè w vwe Jewova lavi w epi w batize, ou montre ou vle pou non Jewova vin sen kèlkeswa sa k rive. E ou kapab sèten, Jewova konnen lè w jwenn eprèv e lè w reziste devan tantasyon. L ap beni efò w fè pou w rete fidèl. Ou mèt gen konfyans Jewova kapab sèvi ak lespri sen l pou l ba w fòs pou w fè sa (Lik 11:​11-13). Grasa èd Jewova w ap kapab kontinye suiv Jezi apre w fin batize.