1. Lè n ap rakonte fason nou vin nan “laverite”, ki jan sa kapab itil nou?

 “KI JAN W te aprann laverite?” Se sèten w deja reponn kesyon sa a plizyè fwa. Se youn nan premye kesyon yon frè oswa yon sè ap poze n lè l ap chèche konnen n pi byen. Nou renmen tande fason frè n ak sè n yo te vin aprann konnen Jewova epi renmen l, e nou kontan fè yo konn enpòtans laverite gen pou nou (Wom. 1:11). Konvèsasyon konsa fè n sonje jan laverite gen anpil valè pou nou. Epitou, nou vin gen plis detèminasyon pou n “kontinye [...] mache nan laverite”, sa vle di, pou n kontinye viv yon fason k ap fè nou jwenn benediksyon ak favè Jewova. — 3 Jan 4.

2. Sou ki sa nou pral pale nan atik sa a?

² Nan atik sa a, nou pral egzamine kèk nan rezon ki fè nou renmen laverite. Apre sa, nou pral wè ki jan nou ka kontinye montre nou renmen kado sa a ki gen anpil valè. Pa gen dout, lè n fè sa n ap vin gen plis rekonesans pou Jewova lefètke li rale nou vin nan laverite (Jan 6:44). Epitou, sa ap fè n pi anvi anseye lòt moun laverite.

3. Ki pi gwo rezon nou genyen pou n renmen laverite?

³ Nou renmen laverite pou plizyè rezon. Pi gwo rezon an, se paske nou renmen Jewova Dye, li menm ki Sous laverite. Grasa Labib, Pawòl li a, nou vin konnen l nonsèlman antanke Sila a ki Toupisan ki fè syèl la ak tè a, men tou, antanke Papa nou ki nan syèl la ki renmen nou e ki pran swen nou avèk tandrès (1 Pyè 5:7). Nou konnen  Bondye nou an se yon Bondye ki gen “mizèrikòd e ki gen kè sansib, ki pa fè kòlè fasil, ki gen anpil lanmou fidèl, ki toujou di laverite”. (Egz. 34:6.) Jewova renmen jistis (Eza. 61:8). Sa fè l mal lè l wè n ap soufri, e li pa ka tann pou l elimine tout soufrans nan moman li fikse a (Jer. 29:11). Se pa ti tann n ap tann bèl moman sa a rive! Pa gen dout, nou renmen Jewova anpil!

4-5. Poukisa apot Pòl te konpare esperans nou genyen an ak yon lank batiman?

⁴ Ki rezon ankò nou genyen pou n renmen laverite? Laverite bon pou nou anpil. Ann pran yon egzanp. Esperans nou genyen pou lavni an se youn nan verite ki nan Bib la. Pou apot Pòl montre valè esperans sa a genyen, men sa l te ekri: “Esperans sa a nou genyen an tankou yon lank batiman pou nanm nou, li sèten e anmenmtan li solid.” ​(Ebre 6:19). Menm jan yon lank batiman fè yon bato ret anplas, esperans nou genyen ki baze sou Bib la ka fè nou rete djanm lè n jwenn eprèv nan lavi a.

⁵ Nan kontèks sa a, Pòl t ap pale konsènan esperans kretyen Bondye chwazi pou al nan syèl yo genyen pou y al viv nan syèl la, yon esperans yo bay anpil valè. Men tou, pawòl sa yo konsène kretyen ki gen esperans pou yo viv pou toutan nan yon paradi sou tè a (Jan 3:16). Vrèmanvre, lè n vin gen esperans pou n gen lavi ki pap janm fini an, sa bay lavi n yon sans.

6-7. Lefètke Yvonne te aprann laverite sou lavni, ki jan sa te ede l?

⁶ Ann pran egzanp yon sè ki rele Yvonne. Li pa t grandi nan laverite, e lè l te piti, li te pè lanmò. Li pa janm bliye yon fraz li te li ki di: “Rive yon lè, tout moun ap mouri.” Men sa l di: “Pawòl sa yo te fè m ret je klè lannuit ap reflechi sou lavni. Mwen te di tèt mwen: ‘Se sèten se pa sa sèlman ki gen nan lavi a. Poukisa m sou tè a?’ Mwen pa t vle mouri!”

⁷ Annapre, lè Yvonne te nan adolesans li, li te vin rankontre kèk Temwen Jewova. Men sa l di: “Mwen te kòmanse kwè mwen kapab gen esperans pou m viv pou toutan nan Paradi a.” Lefètke sè nou an te aprann laverite, ki jan sa te ede l? Men sa l di ankò: “Mwen pa ret je klè lannuit ankò ap reflechi sou lavni oswa lanmò.” Jan nou ka wè sa, Yvonne bay laverite anpil valè, e li vrèman kontan dèske l kapab fè lòt moun konnen esperans li genyen pou lavni an. — 1 Tim. 4:16.

8-9. a) Nan youn nan parabòl Jezi te bay yo, ki jan yon mesye te bay yon trezò li te jwenn anpil valè? b) Ki enpòtans laverite gen pou ou?

⁸ Bon nouvèl konsènan Wayòm Bondye a se youn nan verite ki nan Bib la tou. Jezi te konpare verite konsènan Wayòm nan ak yon trezò yo sere. Selon Matye 13:44, Jezi te di: “Wayòm syèl la tankou yon trezò yo sere nan yon jaden, epi yon mesye jwenn li, li sere l. Li tèlman kontan, l ale li vann tout sa l genyen, e li achte jaden an.” Remake mesye a pa t ap chèche trezò a. Men, lè l te jwenn li, li te fè gwo sakrifis pou l te ka genyen l. Anfèt, li te vann tout sa l te genyen. Poukisa? Paske l te konnen jan trezò sa a gen anpil valè. Trezò sa a te gen plis valè lontan pase nenpòt bagay li te kite.

⁹ Èske se konsa w wè laverite? Se sèten se konsa w wè l! Nou konnen pa gen anyen monn sa a ofri nou ka konpare ak kè kontan nou genyen lefètke n ap sèvi Jewova kounye a ak espwa nou genyen pou n viv pou toutan anba dominasyon  Wayòm nan. Privilèj nou genyen pou n gen yon relasyon sere ak Jewova a merite pou n fè nenpòt sakrifis sa mande. Pa gen anyen ki ban nou plis kè kontan pase lè n “fè l plezi nèt”. — Kol. 1:10.

10-11. Ki sa k te pouse Michael chanje fason l t ap viv?

¹⁰ Anpil nan nou fè gwo sakrifis pou n kapab gen favè Jewova. Gen nan nou ki abandone gwo karyè nan monn nan. Gen lòt ki sispann kouri dèyè richès. Gen lòt menm ki chanje fason yo t ap viv nèt lè yo te vin konnen Jewova. Se sa Michael te fè. Li pa t grandi nan laverite. Lè l te jèn gason li te konn fè karate. Men sa l di: “Mwen te toujou fè efò pou m gen yon bèl fizik, e sa te fè m santi m fyè. Pafwa, mwen te santi pèsonn pa ka bat mwen.” Men, lè Michael te kòmanse etidye Labib, li te vin aprann fason Jewova wè vyolans (Sòm 11:5). Men sa Michael di konsènan mari ak madanm ki t ap etidye Labib avè l yo: “Yo pa t janm mande m kite karate, yo te jis kontinye anseye m verite ki nan Bib la.”

¹¹ Tank Michael t ap aprann konnen Jewova, se tank li te vin renmen l. Sa ki te plis touche l se konpasyon Jewova genyen pou moun k ap adore L yo. Rive yon lè, Michael te rann li kont li te bezwen pran yon desizyon ki t ap chanje lavi l. Men sa l di: “Mwen te konnen li pa t ap fasil ditou pou m kite karate. Men, mwen te konnen tou sa t ap fè Jewova plezi, e m te gen konviksyon sèvi Jewova merite pou m fè nenpòt sakrifis.” Michael te bay laverite li te jwenn nan anpil valè, e sa te pouse l fè gwo chanjman nan lavi l. — Jak 1:25.

12-13. Ki jan verite ki nan Bib la te ede Mayli?

¹² Pou Labib montre enpòtans laverite genyen, li konpare laverite ak yon lanp ki klere nan fènwa (Sòm 119:105; Efe. 5:8). Mayli, ki moun Azèbayidjan, gen anpil rekonesans pou èd li jwenn nan Pawòl Bondye a. Li te grandi nan yon kay kote paran l yo pa t nan menm relijyon. Papa l te Mizilman e manman l te Juif. Men sa l di: “Byenke m pa t janm gen dout sou egzistans Bondye, gen anpil kesyon ki t ap boulvèse lespri m. M te konn ap mande tèt mwen: ‘Poukisa Bondye te kreye lèzòm, e ki sans sa genyen pou yon moun soufri pandan tout vi l e apre sa pou l al soufri nan lanfè pou toutan?’ Piske gen moun ki di kèlkeswa sa k rive se volonte Bondye, m te konn mande tèt mwen: ‘Èske Bondye ap kontwole lèzòm tankou yo se maryonèt, e apre sa li pran plezi gade yo k ap soufri?’”

¹³ Mayli te kontinye chèche jwenn repons kesyon li t ap poze yo. Rive yon lè, li te aksepte yon etid Labib e li te vin Temwen Jewova. Men sa l di: “Lojik ki gen nan Bib la tèlman klè, sa te fè m vin gen plis kè kontan. Esplikasyon mwen te jwenn nan Pawòl Bondye a, yon seri esplikasyon moun ka fè konfyans, fè m santi m anpè.” Menm jan ak Mayli, nou tout ap fè louwanj pou Jewova, “Sila a ki te rele nou sot nan fènwa a pou nou vin nan bèl limyè l la”. — 1 Pyè 2:9.

14. Ki sa n ka fè pou n vin pi renmen laverite? (Gade kare ki gen tit “ Lòt konparezon”.)

¹⁴ Sa se kèk egzanp sèlman ki montre valè laverite genyen. Se sèten ou kapab panse ak anpil lòt ankò. Lè w ap fè etid pèsonèl ou, sa w panse si w ta chèche jwenn lòt rezon ki fè nou dwe renmen laverite? Tank nou renmen laverite, se tank n ap jwenn fason pou n montre nou renmen l.

15. Bay youn nan fason n ap montre nou renmen laverite.

¹⁵ N ap montre nou renmen laverite lè n etidye Bib la ak piblikasyon ki baze sou Bib la regilyèman. Dayè, kèlkeswa kantite tan nou gen nan laverite, toujou gen anpil bagay pou n aprann. Men sa premye Toudegad la te di: “Laverite tankou yon ti flè tou senp nan yon dezè, e gen yon pakèt manti ki tankou touf move zèb toutotou l ki prèske toufe l. Pou w jwenn li, ou dwe toujou ap chèche l. […] Pou w ka genyen l, ou dwe fè efò pou w keyi l. Pa kontante w ak yon sèl flè verite. […] Kontinye keyi, chèche jwenn plis.” Sa mande anpil efò pou n etidye, men, efò sa yo pap pou granmesi.

16. Ki metòd ou twouve ki ede w lè w ap etidye? (Pwovèb 2:4-6).

¹⁶ Se pa nou tout ki renmen li e ki renmen etidye. Men, Jewova mande nou pou nou “kontinye chèche” pou n ka pi byen konprann laverite. (Li Pwovèb 2:4-6.) Lè n fè efò konsa, nou toujou jwenn byenfè. Corey fè konnen, lè l ap fè etid pèsonèl li nan Bib la, li pa  konsantre sou plizyè vèsè anmenmtan. Men sa l di: “Lè konsa mwen li chak nòt, mwen gade chak referans e mwen fè lòt rechèch ankò. […] Metòd sa a pèmèt mwen aprann anpil bagay!” Kit nou itilize metòd sa a oswa nou itilize yon lòt metòd, nou montre nou bay laverite valè lè n rezève tan pou n etidye l e nou fè efò pou sa. — Sòm 1:1-3.

17. Ki sa viv laverite vle di? (Jak 1:25).

¹⁷ Nòmalman, nou konnen sa pa sifi pou n annik aprann laverite. Pou n pi byen pwofite laverite, nou dwe viv li, sa vle di, nou dwe aplike sa nou aprann yo nan lavi nou. Se sèlman lè n fè sa laverite ap fè n gen kè kontan toutbon. (Li Jak 1:25.) Ki jan nou kapab sèten n ap viv laverite? Gen yon frè ki ankouraje n egzamine lavi n pou n wè si n ap aplike sa n ap aprann yo e pou n chèche wè sa n bezwen amelyore. Men sa apot Pòl fè konnen: “Kèlkeswa degre nou rive nan pwogrè nou, annou kontinye mache annòd nan menm direksyon an.” — Flp. 3:16.

18. Poukisa n fè tout sa n kapab pou n “kontinye […] mache nan laverite”?

¹⁸ Fè yon ti reflechi sou byenfè nou jwenn lè n fè tout sa n kapab pou n “kontinye […] mache nan laverite”! Nonsèlman nou viv pi byen, men tou, nou fè Jewova kontan e n fè frè n ak sè n yo kontan tou (Pwo. 27:11; 3 Jan 4). An reyalite, èske nou ka gen yon pi gwo rezon pou n renmen laverite e pou n viv laverite?