1, 2. a) Poukisa pwoklamatè k ap preche nan tèritwa kote moun yo pa tèlman enterese yo ankouraje nou? (Gade foto ki nan kòmansman atik la.) b) Ki sa Jezi te di konsènan preche nan “peyi l”? (Gade nòt la.)

SERGIO AK OLINDA se yon mari ak madanm ki pyonye ki gen plis pase 80 an e k ap viv Ozetazini. Sa pa gen lontan, doulè yo gen nan janm yo fè l vin pi difisil pou yo deplase. Aktout sa, jan yo te toujou konn fè depi plizyè dizèn ane, lematen yo mache al yon kote ki gen anpil aktivite nan vil la, yo rive a setè. Y al toupre yon estasyon bis e yo ofri moun k ap pase yo piblikasyon nou yo ki baze sou Bib la. Pifò moun pa okipe yo, men mari ak madanm sa a ret nan plas yo, yo souri bay moun k ap gade yo. Kou l midi, yo mache tou dousman al lakay yo. Demen maten, a setè, yo retounen nan zòn nan. Anfèt, mari ak madanm sa a ki fidèl okipe nan preche mesaj Wayòm nan nan zòn sa a sis jou chak semèn, pandan tout ane a.

² Menm jan ak Sergio ak Olinda, gen anpil frè ak sè ki fidèl nan lemonnantye ki gen plizyè dizèn ane depi y ap preche nan peyi yo nan yon seri tèritwa kote moun yo pa enterese. Si w ap  fè fas ak difikilte sa a, nou felisite w anpil pou andirans ou *. Lefètke w kenbe fèm nan sèvis w ap bay Jewova a, se yon ankourajman sa ye pou anpil moun, menm pou kwayan parèy ou ki gen anpil eksperyans yo. Men sa yon siveyan sikonskripsyon te di: “Lè m ap preche ak frè ak sè fidèl sa yo, m santi egzanp yo ban m fòs.” Gen yon lòt ki te di: “Fidelite yo ankouraje m pèsevere e pou m gen kouraj nan sèvis mwen.” Gen yon lòt ankò ki te di: “Egzanp yo bay touche kè m.”

3. Bay twa kesyon nou pral egzamine, e poukisa?

³ Pou n vin gen plis detèminasyon pou n kontinye travay predikasyon Jezi te konfye nou an jiska lafen, ann egzamine twa kesyon ki vin annapre yo: Poukisa n ka santi n dekouraje pafwa? Ki jan n ka bay fwi? Ki sa k ap ede n kontinye bay fwi avèk andirans?

4. a) Ki efè move reyaksyon pifò Juif te genyen te gen sou Pòl? b) Ki sa k fè Pòl te santi l konsa?

⁴ Si sa rive ou dekouraje lè w ap preche nan tèritwa kote moun yo pa tèlman enterese, konnen sa te rive apot Pòl tou. Pandan sèvis li ki te dire anviwon 30 an, li te ede anpil moun vin disip Kris (Tra. 14:21; 2 Kor. 3:2, 3). Malgre sa, li pa t rive fè anpil Juif vin nan vrè adorasyon an. Okontrè, pifò nan yo te rejte Pòl, e gen kèk moun ki te menm pèsekite l (Tra. 14:19; 17:1, 4, 5, 13). Ki efè move reyaksyon sa a Juif yo te genyen an te gen sou Pòl? Men sa l te admèt aklè: “Se laverite m ap di anrapò ak Kris. [...] Nan kè m, mwen gen yon gwo tristès ak yon lapenn ki pa janm pase.” (Wom. 9:1-3). Ki sa k fè Pòl te santi l konsa? Se paske kè l te nan travay predikasyon an. Li te preche Juif yo paske l te gen bonjan sousi pou yo. Kidonk, sa te fè Pòl lapenn pou l wè yo rejte mizèrikòd Bondye.

5. a) Ki sa k pouse n preche pwochen nou? b) Poukisa sa pa etone n dèske nou santi n dekouraje pafwa?

⁵ Menm jan ak Pòl, nou preche moun yo paske n gen bonjan sousi pou yo (Mat. 22:39; 1 Kor. 11:1). Poukisa? Eksperyans nou fè montre gen anpil benediksyon k ap tann moun ki pran desizyon pou yo sèvi Jewova. Lè n reflechi ak moun ki nan tèritwa nou yo, nou di tèt nou: ‘Si sèlman nou te kapab ede yo wè sa y ap pèdi!’ Se sa k fè nou kontinye ankouraje yo pou yo aprann konnen laverite konsènan Jewova ak objektif li genyen pou limanite. An reyalite, nou di moun n ap preche yo: ‘Nou pote yon bèl kado pou nou. Tanpri, aksepte l.’ Donk, lè moun yo refize aksepte kado sa a, sa pa etone n dèske n gendwa santi n gen “[lapenn] nan kè” nou. Santiman sa yo pa montre nou manke lafwa, men yo montre kè nou nan travay predikasyon an. Se sa k fè, malgre moman dekourajman sa yo, nou kontinye andire. Elena, yon sè ki gen plis pase 25 an depi l pyonye, pale pou anpil nan nou lè l di: “M twouve travay predikasyon an difisil. Malgre sa, pa gen okenn lòt travay m t ap prefere fè.”

6. Ki kesyon nou pral egzamine, e ki fason n pral fè sa?

⁶ Poukisa n ka sèten kèlkeswa kote n ap preche nou ka reyisi nan travay predikasyon an? Pou n reponn kesyon enpòtan sa a, ann egzamine de nan egzanp Jezi te bay kote l te montre enpòtans pou n “bay fwi”. (Mat. 13:23.) Premye egzanp lan gen rapò ak yon pye rezen.

7. a) Kiyès “kiltivatè a”, “pye rezen an” ak “branch yo” reprezante? b) Repons ki kesyon nou ta renmen jwenn?

 ⁷ Li Jan 15:1-5, 8. Remake sa Jezi te di apot li yo: “Papa m jwenn glwa lè nou kontinye bay anpil fwi e lè nou montre nou se disip mwen.” Jezi te fè konnen Jewova se “kiltivatè a”, li menm li se “bon pye rezen” an, e disip li yo se “branch yo” *. Kounye a, ki fwi disip Kris yo dwe bay? Nan egzanp sa a, Jezi pa t di aklè ki sa fwi a ye, men l te bay yon detay enpòtan ki ede n jwenn repons lan.

8. a) Nan egzanp sa a, poukisa fwi a pa ka fè referans ak nouvo disip yo? b) Ki sa sa Jewova mande nou yo montre?

⁸ Men sa Jezi te di pandan li t ap pale de Papa l: “Li retire kèlkeswa branch nan mwen ki pa bay fwi.” Sa vle di, se sèlman si nou bay fwi Jewova ap konsidere nou antanke sèvitè l (Mat. 13:23; 21:43). Se sa k fè, nan egzanp sa a, fwi chak kretyen dwe bay la pa ka fè referans ak nouvo disip nou gendwa gen privilèj pou n fè yo (Mat. 28:19). Si se ta sa, Temwen fidèl ki pa rive fè disip akoz y ap preche nan yon tèritwa kote moun yo pa enterese t ap tankou branch ki pa bay fwi nan egzanp Jezi a. Sepandan, nou pa ka panse yon bagay konsa! Poukisa? Se paske n pa ka fòse pèsonn vin disip. Sa t ap kontrè ak fason Jewova aji ak lanmou si l ta diskalifye sèvitè l yo paske yo pa rive fè yon bagay yo pa kapab fè. Kèlkeswa sa Jewova mande n se bagay ki toujou posib pou n fè. — Det. 30:11-14.

9. a) Ki aktivite lè n patisipe ladan l nou bay fwi? b) Ki egzanp nou pral egzamine, e poukisa?

⁹ Kounye a, ki fwi nou dwe bay la? Sa klè, fwi a dwe fè referans ak yon aktivite nou chak ka patisipe ladan l. Ki aktivite prensipalman ki fè n “bay fwi”? Se lè n preche bon nouvèl Wayòm Bondye a * (Mat. 24:14). Egzanp Jezi te bay konsènan moun k ap simen an apiye repons sa a. Ann egzamine dezyèm egzanp sa a.

10. a) Nan egzanp sa a, ki sa semans lan ak tè a reprezante? b) Ki sa yon grap ble bay?

¹⁰ Li Lik 8:5-8, 11-15. Nan egzanp moun k ap simen an, semans lan se “pawòl Bondye a” oswa mesaj Wayòm nan. Tè a reprezante kè moun nan sans senbolik. Semans ki tonbe nan bon tè a fè rasin, li pouse, epi l grandi, ann di li bay yon grap ble. Apre sa, li “bay fwi 100 fwa lavalè”. Men, ki kalite fwi yon grap ble bay? Èske l bay yon seri ti grap ble? Non, li bay nouvo semans ki ka vin tounen lòt grap annapre. Nan egzanp sa a, yon grenn semans bay san grenn. Nan ki sans nou ka aplike aspè sa a ki nan egzanp lan ak travay predikasyon nou an?

11. a) Nan ki sans nou ka aplike egzanp moun k ap simen an ak travay predikasyon nou an? b) Ki fason nou pwodui nouvo semans Wayòm nan?

¹¹ Pou n fè yon konparezon, ann di sa gen kèk ane depi kèk Temwen oswa paran nou ki kretyen te pataje bon nouvèl Wayòm nan avè n. Yo te wè jan kè n te byen reyaji devan mesaj Wayòm nan ki tankou yon semans, e sa te fè yo kontan. Menm jan semans ki nan egzanp Jezi te bay la te rete nan bon tè a, nou te aksepte mesaj la e nou te ret atache avè l. Kòm rezilta, mesaj Wayòm nan ki tankou yon semans te fè rasin e l te grandi, konsa, li te vin bay yon grap ble, e rive yon lè, li te  pare pou l bay fwi. Epitou, menm jan sa yon grap ble bay se pa nouvo grap, men se nouvo semans, nou menm tou, fwi nou bay la se pa nouvo disip, men se nouvo semans Wayòm nan *. Ki fason nou pwodui nouvo semans Wayòm nan? Chak fwa nou preche mesaj Wayòm nan yon fason oswa yon lòt, nan yon sans, nou miltipliye e nou simaye semans ki te plante nan kè nou an (Lik 6:45; 8:1). Kidonk, egzanp sa a aprann nou depi n kontinye preche mesaj Wayòm nan, nou “bay fwi avèk andirans”.

12. a) Ki leson n ka aprann nan egzanp Jezi te bay konsènan pye rezen an ak moun k ap simen an? b) Ki efè leson sa a gen sou ou?

¹² Ki leson n ka aprann nan egzanp Jezi te bay konsènan pye rezen an ak moun k ap simen an? Yo ede n konprann kapasite n genyen pou n bay fwi a pa depann de reyaksyon moun nan tèritwa nou yo. Okontrè, sa depann de fidelite nou. Pòl te pale de menm verite sa a lè l te di: “Chak [moun] ap resevwa rekonpans pa yo selon travay pa yo.” (1 Kor. 3:8). Rekonpans lan depann de travay la, li pa depann de rezilta travay la. Men sa Matilda ki gen 20 an depi l pyonye fè konnen: “Sa fè kè m kontan lè m aprann Jewova rekonpanse efò nou yo.”

13, 14. Selon Women 10:1, 2, poukisa Pòl pa t vag sou moun ki te mal reyaji devan mesaj Wayòm nan?

¹³ Ki sa k pral ede n kontinye bay fwi avèk andirans? Jan nou ka wè sa, Pòl te santi l dekouraje akoz Juif yo te mal reyaji devan mesaj Wayòm nan. Malgre sa, li pa t vag sou yo. Remake sa l te di ankò nan yon lèt li te ekri kretyen ki t ap viv nan vil Wòm yo konsènan santiman l genyen pou Juif sa yo: “An reyalite, sa m swete nan kè m e sa m mande Bondye pou yo nan siplikasyon m ap fè, se pou yo sove. Paske, men temwayaj m ap bay sou yo: Yo chofe pou yo sèvi Bondye, men se pa  ann amoni ak konesans egzak la.” (Wom. 10:1, 2). Ki rezon Pòl te bay ki fè l te kontinye nan travay predikasyon an?

¹⁴ Premyèman, Pòl te bay rezon ki fè l te kontinye preche Juif yo. Li te fè sa paske se “sa [li te] swete nan kè [l]”. Li te swete nan kè l pou kèk Juif te jwenn delivrans (Wom. 11:13, 14). Dezyèmman, Pòl te pale de “sa [li te] mande Bondye pou yo”. Li te sipliye Bondye nan lapriyè pou l ede Juif yo aksepte mesaj Wayòm nan. Twazyèmman, men sa Pòl te ajoute: “Yo chofe pou yo sèvi Bondye.” Li te wè yon bagay ki bon lakay moun yo. Lè moun ki sensè yo chofe pou yo sèvi Bondye, si yo jwenn bonjan direksyon, y ap ka vin chofe antanke disip Kris, menm jan Pòl te byen konn sa.

15. Ki jan n ka imite Pòl? Bay kèk egzanp.

¹⁵ Ki jan n ka imite Pòl? Premyèman, nou fè tout sa n kapab pou n kontinye chofe pou n jwenn kèlkeswa moun ki gendwa nan “bon dispozisyon pou yo resevwa lavi ki pap janm fini an”. Dezyèmman, nou sipliye Jewova nan lapriyè pou l ouvri kè moun ki sensè yo (Tra. 13:48; 16:14). Men sa Silvana, ki gen prèske 30 an depi l pyonye, di: “Anvan m al nan yon kay nan tèritwa m nan, m priye Jewova, m mande l pou l fè m gen yon atitid ki pozitif.” Anplis de sa, nou priye Bondye pou zanj yo ka dirije nou yon fason pou n ka jwenn moun ki sensè yo (Mat. 10:11-13; Rev. 14:6). Men sa Robert, ki gen plis pase 30 an depi l pyonye, di: “Sa vrèman enteresan lè n travay ansanm ak zanj yo ki konnen sa k ap pase nan lavi moun yo.” Twazyèmman, nou chèche wè sa k bon lakay moun yo. Men sa Carl, yon ansyen ki gen plis pase 50 an depi l batize, fè konnen: “M chèche tout ti siy ki montre yon moun gendwa sensè, petèt yon souri, yon rega ki janti, oswa yon kesyon ki sensè.” Wi, menm jan ak Pòl, nou ka kontinye bay fwi.

16, 17. a) Ki leson nou ka aprann nan enstriksyon nou jwenn nan Eklezyas 11:6 la? b) Bay yon egzanp ki montre fason nou simen ka gen efè sou moun k ap gade n.

¹⁶ Menmsi mesaj Wayòm nan n ap preche a ta sanble pa touche kè moun yo, nou pa dwe souzestime enpak travay simen nou an genyen. (Li Eklezyas 11:6.) Nou rekonèt gen anpil moun ki pa koute n, men k ap gade nou. Yo remake nou gen abiman ki kòrèk, nou gen bon konpòtman e nou gen souri ki sensè sou vizaj nou. Rive yon lè, konduit nou ka ede kèk moun wè move pwennvi yo gen sou nou yo ka pa kòrèk ditou. Sergio ak Olinda, nou te pale de yo nan kòmansman atik la, te remake yon chanjman konsa.

¹⁷ Men sa Sergio fè konnen: “Akoz maladi, nou pa t ale nan zòn nan pandan yon tan. Lè n te tounen, moun ki t ap pase yo te di n: ‘Sa n te genyen? Nou te sonje nou.’” Men sa Olinda ajoute toutpandan l ap souri: “Chofè bis yo te voye men ban nou e gen kèk nan yo, pandan yo chita devan volan yo, ki te di n byen fò: ‘Bon travay!’ Yo te menm mande nou peryodik.” Epitou, mari ak madanm sa a te sezi lè yon mesye te kanpe bò charyo yo a, li te ba yo yon bouke flè, e l te remèsye yo pou travay y ap fè a.

18. Poukisa w detèmine pou w “bay fwi avèk andirans”?

¹⁸ Vrèmanvre, depi n “[pa] bay men [nou] repo” nan travay simen semans Wayòm nan, nou jwe yon wòl enpòtan nan bay “yon temwayaj pou tout nasyon”. (Mat. 24:14.) Mete sou sa, nou gen anpil kè kontan lefètke n konnen nou gen apwobasyon Jewova, paske li renmen tout moun ki “bay fwi avèk andirans”!