Moun ki ede moun ki nan bezwen ap jwenn benediksyon
Anpil moun k ap viv toupatou nan monn nan bezwen manje ak kote pou yo rete. Gen ladan yo ki sèlman bezwen yon espwa pou demen. Kòman efò nou fè pou n ede kèk ladan yo ap fè yo jwenn favè Bondye ak benediksyon l?
KI SA PAWÒL BONDYE A DI?
“Moun ki fè moun ki malere favè se Jewova li prete, e Bondye ap rekonpanse l pou sa l fè a.” — PWOVÈB 19:17.
KI SA SA VLE DI EDE MOUN KI NAN BEZWEN?
Jezi te rakonte yon istwa konsènan yon mesye vòlè te atake e yo te kite l twaka mò (Lik 10:29-37). Gen yon etranje ki te kanpe sou wout li pou l pran swen mesye a ki te blese grav. Li te fè sa, malgre li pa t soti nan menm ras ak mesye a.
Mesye sa a ki te gen pitye a pa t sèlman bay mesye ki te blese a yon premye swen ak èd materyèl, men li te konsole l e li te fè l jwenn soulajman.
Ki sa nou aprann nan istwa sa a? Jezi te vle montre nou dwe ede moun ki nan bezwen, kèlkeswa fason nou kapab la (Pwovèb 14:31). Pawòl Bondye a anseye Bondye pral met fen nan povrete ak soufrans talè konsa. Men, nou ka ap mande: Ki jan e kilè Bondye pral fè sa? Atik ki vin apre a pral pale sou yon seri benediksyon Kreyatè w la ki renmen w pral fè w jwenn.
