Jèn ki fè kè Jewova kontan

Atik sa yo prepare espesyalman pou jèn ki nan òganizasyon Jewova a. Se poutèt sa, nou ankouraje tout jèn pou yo etidye sijè sa yo avèk anpil swen e pou yo fè kòmantè alèz lè y ap egzamine yo nan kongregasyon an.

“ Montre ou saj, pitit gason m, e fè kè m kontan, dekwa pou m kapab reponn moun k ap pwovoke m nan. ” — Pwovèb 27:11.

1, 2. a) Èske yon senp atirans ou genyen pou bagay ki nan monn nan vle di ou pa ne pou w kretyen (Women 7:21) ? b) Ki sa egzanp Azaf la aprann ou (gade kare ki nan paj 6 la) ?

IMAJINE ou nan yon magazen w ap achte rad. Pandan w ap gade pasipala, ou remake yon rad ki atire w. Lè w gade koulè a ak modèl la, fò w ta di se pou ou menm li te fèt. Lè w fè yon koudèy sou etikèt ki make pri a, ou twouve se yon piyay. Lè w wè sa, ou gade l pi byen. E sa w wè ou pa ka pale : arebò twal la kòmanse defripe e kouti yo mal fèt. Se vre rad la parèt bèl, men lè w byen gade, ou wè se yon pakoti. Èske w t ap gaspiye lajan w nan yon rad konsa ?

² Ou ta ka konpare sitiyasyon sa a ak sitiyasyon pa w antanke jèn kretyen. Menm jan ak rad sa a, bagay ki nan monn nan kapab atire w anpil lè w fèk gade yo. Pa egzanp, kondisip ou yo gendwa se moun ki toujou nan fèt ki gen anpil anbyans, yo gendwa nan pran dwòg, yo nan bwè, y ap mache renmen adwat agoch e yo nan fè sèks san yo poko marye. Èske, pafwa, ou konn santi jan de vi sa a atire w ? Èske w konn anvi fè yon ti goute nan swadizan libète yo genyen an ? Si sa konn rive w, pa kouri panse se bon w pa bon oswa se ne w pa ne pou w kretyen. Paske, pa bliye, Bib la rekonèt monn nan kapab ekstrèmman atiran, menm pou moun ki vle fè Bondye plezi. — 2 Timote 4:10.

3. a) Poukisa li pa vo lapèn pou yon moun kouri dèyè bagay ki nan monn nan ? b) Ki jan yon kretyèn montre sa pa vo lapèn pou yon moun kouri dèyè vanite ki genyen nan monn nan ?

³ Kounye a, fè yon ti gade pi byen, menm jan ou t ap fè si w ta vle achte yon rad. Poze tèt ou kesyon sa yo : ‘ Avèk ki kalite twal sistèm de choz la fèt ? E kouti a, ki jan l ye ? ’ Dapre sa Labib di, “ se pase monn nan ap pase ”. (1 Jan 2:17.) Donk, ou mèt tande tout sa w tande, depi se plezi ki gen nan monn nan se pou de jou yo la. Mete sou sa, tout konduit ki pa dwat koute chè, yo pa pou piyay. Gen yon jèn sè ki t ap viv yon sitiyasyon ki te fè l “ soufri ” anpil paske, pou nou repete sa l te di, li te “ gaspiye jenès li ”. Men ki deklarasyon li fè : “ Monn nan ka parèt bèl anpil. Li kapab parèt atiran. E li vle fè kwè anyen mal pap rive w si w patisipe nan anbyans ki genyen ladan l. Men, yon moun ta tou wè se pa yon bagay ki posib vre. Monn nan la pou l gaspiye w, e, yon fwa l fin gaspiye w, li voye w  jete. ” * Poukisa pou w gaspiye jenès ou pou yon jan de vi konsa ?

Pwoteksyon ou jwenn kont “ mechan an ”

4, 5. a) Ki sa Jezi te mande Jewova yon ti kras tan anvan l mouri ? b) Poukisa li te apwopriye pou Jezi fè yon rekèt konsa ?

⁴ Piske jèn ki nan òganizasyon Jewova a rann yo kont monn nan pa gen anyen k serye pou l ofri, yo fè tout efò yo pou yo rete fidèl, yo pa fè zanmi avè l (Jak 4:4). Èske se ka pa w ? Si se sa, felisitasyon. Se vre li pa fasil pou nou reziste lè moun ki nan menm laj avèk nou ap fè presyon sou nou, nitou li pa fasil pou nou pa fè menm jan avèk yo. Men, pa bliye : gen yon moun ki ka ede w nan sitiyasyon sa a.

⁵ Yon ti kras tan anvan Jezi mouri, li te priye Jewova pou l “ veye sou ” disip li yo “ akoz mechan an ”. (Jan 17:15.) Jezi te gen tout rezon l pou l fè rekèt sa a. Li te konnen li pa t apral fasil ditou pou disip li yo rete entèg, kèlkeswa laj yo. Poukisa ? Youn nan rezon ki fè sa, se paske, jan Jezi rekonèt sa, disip li yo t ap gen pou yo fè fas ak yon kokenn ènmi, yon ènmi envizib : “ mechan an ”, Satan Ledyab. Selon sa Bib la di, movèzespri sa a “ ap sikile tankou yon lyon k ap gwonde, l ap chèche yon moun pou l devore ”. — 1 Pyè 5:8.

6. Ki jan nou fè konnen Satan pa gen okenn pitye pou jèn ?

⁶ Pandan tout istwa lèzòm, Satan pran yon malen plezi pou l tòtire moun, pou l fè lèzòm sibi soufrans pi atwòs ki te ka egziste. Pa egzanp, sonje tout gwo kalamite Satan te lage sou Jòb ak fanmi l (Jòb 1:13-19 ; 2:7). Petèt ou ka raple w yon seri evènman ki te pase nan lavi w ki gen karakteristik espri vyolan nou jwenn lakay Satan an. Dyab la alawonyay, l ap chèche moun pou l devore, e menm pou timoun li pa gen okenn pitye. Lè premye syèk la te fèk kòmanse, pa egzanp, Ewòd te monte yon konplo pou l te fè touye tout tigason ki te rete Betleyèm, tout tigason ki te gen dezan oswa ki potko gen dezan (Matye 2:16). Ou mèt si se Satan ki te pouse Ewòd aji konsa. E tout sa w tande a, se te pou l te ka detwi ti pitit ki t apral tounen Mesi Bondye te pwomèt la, e ki t apral egzekite jijman Bondye sou Satan (Jenèz 3:15) ! Nou ka wè sa : Satan pa gen okenn konpasyon pou jèn. Tout entansyon l se pou l devore kantite moun li kapab. Si se konsa sa te ye lontan, alewè pou jodi a, kote nou konnen yo te mete l deyò nan syèl la pou l vin sou tè a, e sa fè li gen “ yon gwo  kòlè, piske li konnen kantite tan li rete a kout ”. — Revelasyon 12:9, 12.

7. a) Ki jan Jewova montre pa gen okenn konparezon ant li menm ak Satan ? b) Ki jan Jewova wè kontantman ou ka jwenn nan lavi a ?

⁷ Pa gen okenn konparezon ant Satan, ki gen yon “ gwo kòlè ” ak Jewova, li menm ki gen “ yon konpasyon ki mache ak tandrès ”. (Lik 1:78.) Modèl lanmou an se Jewova. Pa gen tankou l. An reyalite, bèl kalite sa a tèlman nan Kreyatè nou an, Bib la di : “ Bondye se lanmou. ” ​(1 Jan 4:8). Èske w wè kokenn diferans ki egziste ant dye k ap dirije sistèm sa a ak Bondye ou gen privilèj pou w adore a ? Alòske sa k enterese Satan se pou l jwenn moun pou l devore, Jewova, li menm, “ pa ta renmen pyès moun detwi ”. (2 Pyè 3:9.) Pou li menm, lavi chak moun, e lavi pa w ladan l tou, se bagay ki presye anpil. Lè Jewova mande w nan Pawòl li pou w pa fè pati monn nan, se pa chèche l ap chèche retire kontantman ou ka jwenn nan lavi a, nitou se pa diminye l ap chèche diminye sou libète w (Jan 15:19). Okontrè, si l ap veye sou ou se akoz mechan an. Papa w ki nan syèl la ta renmen ou jwenn yon bagay ki pi bon pase plezi ki genyen nan monn nan, plezi ki la pou de twa jou. Tout dezi li se pou li wè w jwenn “ lavi toutbon an ”, lavi pou toutan nan yon paradi sou tè a (1 Timote 6:17-19). Jewova vle pou w reyisi nan lavi a, e li ankouraje w travay pou w atenn objektif sa a (1 Timote 2:4). Men, se pa sa sèlman. Jewova gen yon envitasyon espesyal li fè w. Ki envitasyon ?

‘ Fè kè m kontan ’

8, 9. a) Ki kado ou kapab bay Jewova ? b) Nan ki sans Satan pwovoke Jewova, jan nou ka wè sa nan ka Jòb ?

⁸ Èske sa deja rive, ou achte yon kado pou yon bon zanmi epi, lè l resevwa l, ou wè kontantman ak apresyasyon parèt sou vizaj li ? Siman ou te fè lontan ap reflechi anvan w te chwazi ki kado pou w ta bay moun sa a. Kounye a, fè yon ti reflechi sou kesyon sa a : Ki kado ou panse ou ka bay Jewova Dye, Kreyatè w la ? Yon moun ka twouve kesyon bay Bondye kado a dwòl. Annefè, ki sa pou Toupisan an ta bezwen nan men yon senp moun ? Ki sa pou w ta ba li li pa deja genyen ? Pwovèb 27:11 reponn : “ Montre ou saj, pitit gason m, e fè kè m kontan dekwa pou m kapab reponn moun k ap pwovoke m nan. ”

⁹ Siman, etid ou fè nan Bib la aprann ou se Satan Ledyab k ap pwovoke Jewova. Dapre sa li deklare, yon moun k ap sèvi Jewova se pwòp enterè l l ap defann, se pa paske li renmen Bondye. Satan pretann depi lèzòm kòmanse jwenn pwoblèm, y ap sispann adore Bondye. Gade, pa egzanp, ki deklarasyon li te fè konsènan Jòb, yon nonm jis : “ Èske ou menm ou pa mete yon lantouray toutotou li, toutotou kay li, toutotou tout bagay li posede ? Sa l fè ak men l, ou beni l, e tout bèt li posede kòmanse ranpli tè a. Men, pou chanje, lonje men w souple epi frape tout sa l genyen pou wè si l pap rete nan figi w li modi w. ” — Jòb 1:10, 11.

10. a) Ki jan nou fè konnen se pa entegrite Jòb sèlman Satan te mete an dout ? b) Nan ki sans kesyon souvrènte a se yon kesyon ki konsène w ?

¹⁰ Selon sa Bib la di, se pa sèlman entegrite Jòb Satan te mete an dout, men se entegrite tout lòt sèvitè Bondye yo. E ou menm ou ladan l tou. Anfèt, anpalan de lèzòm an jeneral, Satan te di Jewova : “ Tout sa yon nonm posede [pa sèlman Jòb, men se tout moun], l ap bay li pou nanm li. ” ​(Jòb 2:4). Se yon pwen enpòtan, pa vre ? Èske ou wè nan ki pwen sa konsène w ? Jan Pwovèb 27:11 montre sa, Jewova di gen yon bagay ou ka fè pou li, ou ka ba l yon baz pou l reponn Satan, k ap pwovoke l. Imajine sa : Souvren Inivèsèl la k ap mande w patisipasyon pa w pou l rezoud pi gwo kesyon ki soulve nan listwa. Ala yon gwo responsablite ! Ala yon bèl privilèj ou genyen an ! Èske ou dispoze bay Jewova sa l mande w la ? Jòb te fè sa (Jòb 2:9, 10). Jezi te fè menm bagay, san konte yon dividal lòt moun nan listwa, e anpil ladan yo se jèn (Filipyen 2:8 ; Revelasyon 6:9). E ou menm tou, ou ka suiv egzanp yo. Toutfwa, gen yon bagay pou w pa bliye : pa gen moun ki net nan kesyon sa a. Se oubyen ou pou Satan nan  pwovokasyon l lan, oubyen ou pou Jewova nan repons li vle bay la. Se konduit ou ki pral demontre nan ki kan ou ye. Ki kan w ap chwazi soutni ?

Jewova gen sousi pou ou !

11, 12. Èske sa fè yon diferans pou Jewova si w chwazi pou w sèvi l oubyen pou w pa sèvi l ? Esplike.

¹¹ Èske w panse sa pa di Jewova anyen lè l wè se tèl chwa ou fè ? Lefètke anpil moun deja rete fidèl devan l, èske sa pa gentan ba l mwayen pou l bay Satan yon repons sou kesyon sa a ? Dapre sa Dyab la fè konnen, pèsonn pap dakò sèvi Jewova paske l renmen l. Se vre, anpil moun gentan wè sa l di a se yon manti, men Jewova vle pou ou menm ou pran pozisyon pou li nan kesyon souvrènte a, paske li sansib pou ou, wi pou ou menm menm. Men ki sa Jezi te di : “ Se pa yon bagay Papa m ki nan syèl la ta renmen, pou youn nan piti sa yo peri. ” — Matye 18:14.

¹² Nou ka wè sa : Jewova enterese nan pozisyon ou pran. E, yon pwen ki trèzenpòtan, kèlkeswa pozisyon w pran an, sa gen yon efè sou li. Bib la pa kite okenn dout sou sa. Li esplike ki jan Jewova santi l lè yon moun poze yon aksyon, kit se an byen kit se an mal. Pa egzanp, lè Izrayelit yo te plede ap fè rebèl, sa te fè Jewova “ lapenn ”. (Sòm 78:40, 41.) Anvan delij ki te fèt nan tan Noye a, yon epòk kote “ mechanste lèzòm te anpil ”, Jewova “ te santi sa fè l mal nan kè l ”. (Jenèz 6:5, 6.) Èske w wè ki sa sa vle di ? Sa vle di si w adopte yon move konduit, ou ka fè Kreyatè a soufri. Natirèlman, sa pa vle di Bondye fèb ni sa pa vle di se yon Bondye ki aji sou emosyon. Okontrè, si sa afekte l, se paske li renmen w e li ta renmen wè byen pou ou. Yon lòt bò, lè w fè sa ki byen, kè Jewova kontan. Sa ki fè kè l kontan, se pa sèlman paske li jwenn yon lòt repons pou l bay Satan, men tou se paske li wè kounye a li ka rekonpanse w. E se yon bagay li anvi fè (Ebre 11:6). Ala yon bon Papa se Jewova Dye !

Gwo rekonpans ou ka jwenn depi kounye a

13. Nan ki sans sèvi Jewova pote gwo rekonpans depi kounye a ?

¹³ Gen gwo rekonpans k ap ret tann moun ki chwazi sèvi Jewova. Men, se pa sèlman nan lavni n ap jwenn rekonpans sa yo. Depi kounye a, se pa ni de ni twa jèn ki nan òganizasyon Jewova a, ki gentan jwenn jwa ak satisfaksyon dèske y ap sèvi Bondye, e yo gen tout rezon yo pou sa. Tande ki sa salmis la di : “ Lòd ki soti bò kote Jewova yo dwat, yo bay kè kontan. ” ​(Sòm 19:8). Pa gen pèsonn ki konn sa ki bon pou nou plis pase Jewova. Men ki sa l te di pwofèt Izayi  di : “ Mwen menm Jewova, mwen se Bondye w, Sila k ap anseye w pou byen w lan, Sila k ap fè w mache sou wout ou dwe mache a. A ! si vrèman ou te montre ou atantif toutbon lè w jwenn kòmandman m yo ! Lapè w t ap jwenn nan t ap tankou rivyè k ap koule e jistis ou t ap tankou vag lanmè. ” — Izayi 48:17, 18.

14. Ki jan prensip nou jwenn nan Bib la ka ede w evite tèt chaje fè dèt bay ?

¹⁴ Si w konfòme w ak prensip Bib la, sa ap anpeche w soufri, sa ap ede w evite chagren. Bib la di, pa egzanp, lè yon moun aprann renmen lajan, se kòmsi li te ‘ pike kò l toupatou avèk anpil soufrans ’. (1 Timote 6:9, 10.) Èske w konnen kèk moun ki nan menm laj avè w ki fè eksperyans sa a ? Gen anpil jèn, fi kou gason, ki chaje kò yo ak gwo dèt. Poukisa w konprann ? Pou yo ka achte gwo mak rad ak aparèy dènye kri ! Lè w chaje ak dèt, dèt k ap dire plizyè ane e ki gen gwo enterè sou yo, pou bagay ou pa ka peye vre, se yon fòm esklavaj ki ka fè w soufri règ soufri w. — Pwovèb 22:7.

15. Ki jan prensip biblik yo pwoteje w anba soufrans moun jwenn lè yo fè imoralite seksyèl ?

¹⁵ Yon lòt domèn nou ka egzamine se domèn imoralite seksyèl. Toupatou sou tè a, se pa ni de ni twa jèn tifi ki pa menm marye ki tonbe ansent chak ane. Gen nan yo ki fè pitit yo pa anvi elve, e kote w kite, yo pa menm gen kapasite pou sa ! Genyen tou ki pa wè lòt solisyon : se avòtman pou yo fè. Lè konsa yo peye sa chè, paske se pa ti kale konsyans yo kale yo. Apre sa, gen lòt jèn ki pran yon maladi seksyèl trapan, tankou sida, pa egzanp. Natirèlman, pou yon moun k ap sèvi Jewova, pi gwo konsekans lan, se relasyon l li ka pèdi avèk Jewova * (Galat 5:19-21). Se sa k fè Labib gen rezon di : “ Kouri pou fònikasyon. ” — 1 Korentyen 6:18.

Sèvi ‘ Bondye ki gen kè kontan ’ an

16. a) Ki jan nou fè konnen Jewova vle pou w pwofite jenès ou ? b) Poukisa Jewova bay enstriksyon pou w suiv ?

¹⁶ Bib la dekri Jewova kòm yon ‘ Bondye ki gen kè kontan ’. (1 Timote 1:11.) Li ta renmen ou gen menm kè kontan sa a. Anfèt, se Pawòl li menm ki di : “ Pwofite jenès ou. Toutotan ou jèn, fè tèt ou plezi. ” ​(Eklezyas 11:9, Today’s English Version.) Men, Jewova pa sèlman wè moman prezan an. Li wè ki rezilta konduit yon moun ka vin genyen pi devan, kit se yon bon konduit, kit se yon move konduit. Se pou rezon  sa a li ba w konsèy nou pral li la a : “ Sonje Gran Kreyatè w la pandan ou jèn, anvan jou dezagreyab yo vini, oubyen anvan ane yo rive kote w pral di : ‘ M pa jwenn anyen ki fè m plezi nan yo. ’ ” — Eklezyas 12:1.

17, 18. Ki jan yon jèn sè eksprime jwa l genyen dèske l ap sèvi Jewova, e ki jan ou menm ou kapab jwenn menm jwa sa a ?

¹⁷ Jodi a, gen yon dividal jèn ki jwenn anpil kè kontan nan sèvis y ap bay Jewova. Ann pran Lina, pa egzanp, yon jèn sè ki gen 15 an. Men ki sa l di : “ M ka mache tèt anlè, san m pa wont pèsonn. M pa gen okenn pwoblèm sante, paske m pa fimen e m pa nan dwòg. Mwen jwenn enstriksyon nan kongregasyon an ki gen anpil valè nan je m, e sa ede m reziste anba gwo presyon mwen jwenn nan men Satan. Lè yon moun gade figi m, li pa ka pa wè lajwa make sou li. Pou ki rezon ? Se paske lè m al nan Sal Wayòm nan, mwen rankontre moun ki ankouraje m. E sa ki pi bèl la, sèke m gen yon esperans ki san parèy, esperans pou m viv nètale sou tè a. ”

¹⁸ Menm jan ak Lina, gen anpil jèn kretyen ki nan yon gwo konba pou lafwa, e sa fè yo santi yo gen kè kontan. Menmsi pafwa sa konn difisil pou yo, yo gen yon vrè objektif nan lavi a, yo konnen yo gen yon avni asire k ap tann yo. Pou tout rezon sa yo, kontinye sèvi Bondye, yon Bondye ki ta renmen wè byen pou ou. Fè kè l kontan, e li menm tou l ap fè kè w kontan depi kounye a e pou letènite ! — Sòm 5:11.

[Nòt anba paj]

Èske nou sonje ?

• Ki danje “ mechan an ”, Satan, mete devan w ?

• Ki jan w ka fè kè Jewova kontan ?

• Ki jan Bib la montre Jewova sansib pou ou ?

• Site kèk benediksyon yon moun ka jwenn dèske l ap sèvi Jewova.

[Kesyon]

[Kare/Foto nan paj 6]

Yon nonm dwat ki manke trebiche

Antanke mizisyen, Azaf se te yon Levit ki te jwe yon wòl enpòtan nan tanp ki te egziste nan ansyen nasyon Izrayèl la. Li te menm konpoze kèk kantik yo te konn chante lè yo te konn ap adore. Toutfwa, aktout Azaf te gen gwo privilèj sa yo, li te santi fason moun ki te nan antouraj li yo t ap viv la te atire l anpil, alòske se yon seri moun ki te san atachman pou Bondye. Li te santi se kòmsi moun sa yo te konn vyole lwa Bondye san anyen pa rive yo. Men sa l te deklare : “ Pye m te prèske devye, ti moso pye m te glise. Paske mwen te kòmanse anvye moun k ap vante tèt yo, lè m te konn ap wè jan mechan yo anpè. ” — Sòm 73:2, 3.

Apre sa, Azaf te al nan tanp Bondye a e li te priye sou sa. Li te rekòmanse wè bagay yo jan yon moun ki espirityèl dwe wè yo, e sa te ede l reyalize Jewova rayi sa ki mal. Sa te ede l konprann tou, gen yon lè k ap rive, ni moun ki mechan ni moun ki jis ap rekòlte sa yo te simen (Sòm 73:17-20 ; Galat 6:7, 8). An verite, mechan an kanpe sou yon tè glise. Finalman, yo gen pou yo pran yon sèl so lè Jewova detwi sistèm mechan ki la jodi a. — Revelasyon 21:8.

[Foto nan paj 8]

Jewova ta renmen wè byen pou ou, tandiske objektif Satan se pou l devore w.

[Foto nan paj 9]

Gen yon dividal jèn ki jwenn anpil kè kontan nan sèvis y ap bay Jewova ansanm ak lòt kretyen parèy yo.