Chèche sa ki bon nan tout moun
Chèche sa ki bon nan tout moun
“ Sonje m, o Bondye m nan, pou sa ki bon. ” — NEYEMYA 13:31.
1. Ki jan Jewova aji avèk bonte ak tout moun ?
APRE plizyè jou syèl la sonm e li kouvri ak nyaj, lè solèy briye, sa pote yon chanjman tout moun t ap tann. Moral moun yo remonte, e yo santi yo kontan. Menm jan an tou, apre anpil tan kote solèy la cho, tan an sèk, lè lapli vin tonbe, li te mèt yon gwo lapli, sa rafrechi e sa bay soulajman. Tan an se yon bèl kado Jewova, Kreyatè nou ki renmen nou an, mete nan atmosfè tè a. Jezi te atire atansyon sou bonte Jewova lè l t ap anseye. Men sa l te di : “ Kontinye renmen ènmi nou yo e priye pou moun k ap pèsekite nou yo, se konsa n ap kapab montre nou se pitit Papa nou ki nan syèl la, li menm ki fè solèy li a leve sou moun ki mechan ak sou moun ki bon, e ki fè lapli tonbe sou moun ki jis ak sou moun ki enjis. ” (Matye 5:43-45). Wi, Jewova aji avèk bonte ak tout moun. Sèvitè l yo ta dwe fè efò pou imite l lè yo chèche sa ki bon nan lòt moun.
2. a) Sou ki baz Jewova aji avèk bonte ? b) Ki sa Jewova note anrapò ak fason nou reyaji devan bonte l ?
2 Sou ki baz Jewova aji avèk bonte ? Depi lè Adan te tonbe nan peche, Jewova pa sispann chèche sa ki bon nan lòm (Sòm 130:3, 4). Pwogram li se pou l pèmèt moun ki obeyisan yo rejwenn lavi nan Paradi a (Efezyen 1:9, 10). Favè li nou pa merite a ban nou espwa n ap delivre anba peche ak enpèfeksyon pa mwayen Semans li te pwomèt la (Jenèz 3:15 ; Women 5:12, 15). Si nou aksepte ranson an, sa ap ban nou posiblite pou nou retounen pafè ankò. Kounye a, Jewova ap obsève nou chak pou l wè, pa egzanp, ki jan nou reyaji devan jenewozite l (1 Jan 3:16). Li note kèlkeswa sa nou fè ki demontre apresyasyon nou pou bonte l. Apot Pòl te ekri : “ Bondye pa enjis pou l ta bliye travay nou ak lanmou nou demontre pou non l. ” — Ebre 6:10.
3. Ki kesyon li ta bon pou nou konsidere ?
3 Alò, kòman nou ka imite Jewova nan chèche sa ki bon nan lòt moun ? Annou konsidere repons kesyon sa a nan kat domèn nan lavi nou : 1) nan ministè nou, 2) nan fanmi nou, 3) nan kongregasyon an e 4) nan relasyon nou ak lòt moun.
Lè n ap preche e lè n ap fè disip
4. Kòman patisipasyon nou nan predikasyon se yon fason pou nou montre n ap chèche sa ki bon nan lòt moun ?
4 “ Jaden an se monn nan ”, se sa Jezi te esplike pou l te reponn kesyon disip li yo te poze l konsènan ki sa parabòl ble ak move zèb la vle di. Nou menm ki disip Kris jodi a, nou rekonèt verite sa a lè nou nan predikasyon (Matye 13:36-38 ; 28:19, 20). Ministè nou an gen ladan l deklarasyon lafwa nou an piblik. Lefètke kounye a yo byen konnen Temwen Jewova yo pou predikasyon kay an kay ak predikasyon nan lari yo fè, sa pwouve nou dilijan nan chèche tout moun ki diy pou mesaj Wayòm nan. Anfèt, men enstriksyon Jezi te bay : “ Nan nenpòt vil oswa bouk nou antre, chèche moun ki diy anndan l. ” — Matye 10:11 ; Travay 17:17 ; 20:20.
5, 6. Poukisa n ap pèsevere nan vizite moun yo lakay yo souvan ?
5 Lè n ale kay moun yo, alòske yo pa t envite nou, n ap obsève ki jan yo reyaji devan mesaj la. Kèk fwa, nou jwenn yon moun nan yon kay ki dispoze koute nou, alòske yon lòt moun nan menm kay la reponn byen fò : “ Nou pa enterese ”, e vizit la tou fini la. Sa fè nou mal lè yon moun ki opoze oswa ki pa enterese enfliyanse reyaksyon yon lòt moun. Alò, se ki sa nou ka fè pou nou pèsevere nan chèche sa ki bon nan tout moun ?
6 Pwochèn fwa n ap vizite kay sa a pandan n ap preche nan zòn nan, nou ka gen posiblite pale dirèkteman ak moun ki te koupe dènye konvèsasyon an. Sa ki ka ede nou prepare nou se si nou sonje sa k te pase nan okazyon sa a. Moun sa a ki opoze a kapab aji avèk bon entansyon, li panse li te dwe bloke moun ki te sou tande mesaj Wayòm nan pou fè l pa koute. Petèt, se fo enfòmasyon sou entansyon nou ki te enfliyanse l. Men, sa pa dwe anpeche nou pèsevere nan preche bon nouvèl Wayòm nan nan kay sa a. Sa pa dwe anpeche nou eseye korije avèk tak move entèpretasyon moun nan te fè a. Nou enterese pou nou ede tout moun vin gen yon konesans egzak sou Bondye. Petèt lè sa a, Jewova ap atire moun nan sou li. — Jan 6:44 ; 1 Timote 2:4.
7. Lè n ap abòde yon moun, ki sa ki ka ede nou pou nou pozitif ?
7 Enstriksyon Jezi te bay disip li yo konsène opozisyon nan fanmi tou. Èske li pa t di : “ Mwen vin met divizyon : yon gason ap kont papa l, yon pitit fi ap kont manman l, yon jèn madanm ap kont bèlmè l ” ? Jezi te ajoute : “ Ènmi yon moun se pral pwòp moun lakay li. ” (Matye 10:35, 36). Toutfwa, sikonstans ak atitid moun yo konn chanje. Anpil sitiyasyon konn enfliyanse reyaksyon moun yo parapò ak predikasyon nou an, tankou si yo vin malad toudenkou, si yo gen yon fanmi yo ki mouri, si yo te viktim nan yon dezas, si yo te sibi yon chòk, san konte lòt sitiyasyon ankò. Si nou gen yon pwennvi negatif kòmsi moun n ap preche yo ap toujou pa koute nou, èske nou vrèman ap chèche sa ki bon nan yo ? Poukisa nou pa byen kontan revizite yo lakay yo nan yon lòt okazyon ? Nou kapab byen jwenn yon reyaksyon diferan. Pafwa, se pa sèlman sa nou di a ki konn fè moun nan ban nou yon pi bon repons, men se jan nou di l la. Si anvan nou kòmanse preche nou priye Jewova ak tout kè nou, sa ap ede nou pou nou pozitif e sa ap ede nou pou nou prezante mesaj la yon fason ki atiran. — Kolosyen 4:6 ; 1 Tesalonisyen 5:17.
8. Ki rezilta sa ka bay lè kretyen yo chèche sa ki bon nan fanmi yo ki pa kwayan ?
8 Nan kèk kongregasyon, gen plizyè moun ki nan menm fanmi k ap sèvi Jewova. Pèseverans yon manm nan fanmi an ki pi gran e ki antann li byen ak fanmi an e ak moun li marye avèk li a konn kapte admirasyon ak respè sa k pi jèn yo, e sa konn ouvri wout pou jèn yo chanje kè yo. Gen anpil madan marye ki koute konsèy apot Pyè a, e sa ede yo ramne mari yo “ san pawòl ”. — 1 Pyè 3:1, 2.
Nan fanmi nou
9, 10. Kòman ni Jakòb ni Jozèf te chèche sa ki bon nan fanmi yo ?
9 Relasyon sere ki soude manm yon fanmi se yon lòt domèn kote nou ka chèche sa ki bon nan lòt moun. Ann konsidere yon leson nou jwenn nan fason Jakòb te trete pitit li yo. Nan Jenèz chapit 37 vèsè 3 e 4, Labib montre Jakòb te renmen Jozèf yon fason espesyal. Frè Jozèf yo te fè jalouzi, opwen yo te menm fè konplo pou yo touye l. Sepandan, gade atitid Jakòb ak Jozèf te vin genyen pita nan lavi yo. Yo toule de te chèche sa ki bon nan fanmi yo.
10 Lè Jozèf t ap sèvi kòm administratè an chèf estòk manje pandan gwo grangou ki te frape Ejip la, li te byen akeyi frè l yo. Byenke Jozèf pa t revele tousuit kiyès li ye, li te fè kont manèv li pou l byen pran swen yo, e pou yo te jwenn manje pou yo pote bay papa yo ki te fin granmoun. Malgre Jozèf te viktim lahèn mesye yo, li te aji nan enterè yo (Jenèz 41:53–42:8 ; 45:23). Menm jan an tou, Jakòb te pwononse benediksyon pwofetik sou tout pitit li yo etan l t ap tann lanmò l sou kabann li. Byenke move zak yo te fè te lakòz yo pèdi kèk privilèj, yo tout te resevwa yon eritaj nan peyi a (Jenèz 49:3-28). Ala yon bèl prèv lanmou ki dirab Jakòb te demontre la a !
11, 12. a) Ki egzanp pwofetik ki souliye enpòtans pou nou chèche sa ki bon nan fanmi nou ? b) Ki leson nou tire nan egzanp papa ki nan parabòl pitit gason gaspiyè Jezi te bay la ?
11 Pasyans Jewova ki parèt nan fason li te trete Izrayèl, nasyon san fwa a, bay plis limyè sou fason li chèche sa ki bon nan pèp li. Jewova sèvi ak sitiyasyon fanmi pwofèt Ocheya pou l montre lanmou Li, yon lanmou ki dirab. Gomè, madanm Ocheya, te komèt adiltè plizyè fwa. Malgre sa, men enstriksyon Jewova te bay Ocheya : “ Ale yon lòt fwa ankò, renmen yon dam yon konpayon renmen e k ap fè adiltè, menm jan Jewova renmen pitit Izrayèl yo, alòske yo tounen fas yo bay lòt dye e yo renmen gato rezen. ” (Ocheya 3:1). Poukisa Jewova te bay enstriksyon sa yo ? Jewova konnen, pami nasyon an ki devye kite chemen Li an, gen moun ki t ap byen reyaji devan pasyans li. Men sa Ocheya deklare : “ Apre sa, pitit Izrayèl yo pral retounen e san mank, yo pral chèche Jewova Bondye yo a ak David wa yo a, e y ap parèt tou ap tranble devan Jewova e devan bonte l, nan dènye jou yo. ” (Ocheya 3:5). Pa gen dout, sa a se yon bèl egzanp nou dwe reflechi sou li lè nou rankontre pwoblèm nan fanmi nou. Lè nou kontinye ap chèche sa ki bon nan lòt manm fanmi nou, omwen n ava ba yo yon bèl egzanp pasyans.
12 Parabòl pitit gason gaspiyè Jezi te bay la pote plis limyè toujou sou jan nou ka chèche sa ki bon anrapò ak pwòp fanmi nou. Pitit ki pi jèn nan te retounen lakay li apre l te fin kite vi debòch li t ap mennen an. Papa a te trete l ak mizerikòd. Lè pitit gason ki pi gran an, ki pa t janm kite fanmi an, te tonbe plenyen, ki jan papa a te reyaji ? Papa a di pitit gason ki pi gran an : “ Pitit mwen, ou toujou avèk mwen, e tout sa ki pou mwen se pou ou. ” Se pa t malonèt papa a te fè l, men se senpleman asire li te asire pitit li li renmen l. Li kontinye pou l di l : “ Se nòmal pou nou kontan e pou nou rejwi, paske frè w la ki la a li te mouri e li vin reviv, li te pèdi e yo jwenn li. ” Nou ka kontinye chèche sa ki bon nan lòt moun menm jan an tou. — Lik 15:11-32.
Nan kongregasyon an
13, 14. Bay yon mwayen nou ka pratike lwa wa a, lwa sou lanmou an nan kongregasyon an.
13 Antanke kretyen, nou gen objektif pou nou pratike lwa wa a, lwa sou lanmou an (Jak 2:1-9). Se vre, nou ka aksepte manm kongregasyon an ki pa gen menm posiblite materyèl avèk nou. Men, èske nou fè “ distenksyon klas ” ki baze sou ras, sou kilti oubyen menm sou relijyon moun yo te ye anvan ? Si se ta sa, ki sa nou ka fè pou nou suiv konsèy Jak la ?
14 Si nou byen akeyi tout moun ki vin asiste reyinyon, sa ap montre nou gen ospitalite. Lè nou pran inisyativ pou nou abòde moun ki vin nan Sal Wayòm nan pou premye fwa, sa kapab efase lakay moun yo nenpòt timidite, nenpòt ti jèn oswa pwoblèm konsyans yo te ka genyen. Vrèmanvre, plizyè moun ki vin nan reyinyon pou premye fwa konn fè remak sa a : “ Tout moun te trè amikal. W a di tout moun te deja konnen m. Mwen te santi m lakay mwen. ”
15. Kòman yo kapab ede jèn nan kongregasyon yo pou yo montre enterè pou moun ki pi gran pase yo ?
15 Nan kèk kongregasyon, kèk jèn kapab petèt rasanble ansanm anndan Sal Wayòm nan oswa deyò lè reyinyon yo fini, yo evite vinn bò kote moun ki pi gran yo. Ki bagay pozitif nou ta ka fè pou venk tandans sa a ? Yon premye etap, nòmalman, se pou paran yo fòme timoun yo depi lakay, lè yo prepare yo pou reyinyon yo (Pwovèb 22:6). Yo ka bay timoun yo responsablite pou yo mete divès piblikasyon tou pre, konsa tout moun ap kapab gen sa yo bezwen pou y al nan reyinyon. Se paran yo ki pi byen plase pou ankouraje pitit yo pataje kèk panse ak moun ki pi gran yo e ak moun ki enfim yo nan Sal Wayòm nan. Lè timoun yo gen kèk bagay itil pou yo di moun sa yo sa kapab ba yo yon santiman satisfaksyon.
16, 17. Kòman granmoun yo kapab chèche sa ki bon nan jèn yo nan kongregasyon an ?
16 Frè ak sè ki pi gran yo dwe enterese nan jèn ki nan kongregasyon an (Filipyen 2:4). Yo ka pran inisyativ pou pale ak jèn yo yon fason ki ankourajan. An jeneral, pandan reyinyon yo, gen bon pwen enteresan yo konn devlope. Nou ka mande jèn yo si yo te renmen reyinyon an e si yo gen kèk pwen yo te apresye espesyalman e yo ka aplike. Etandone jèn yo fè pati kongregasyon an, nou ta dwe montre yo nou apresye jan yo te suiv reyinyon yo avèk atansyon e nou ta dwe felisite yo pou kòmantè yo te fè oswa pou patisipasyon yo nan pwogram nan. Fason jèn yo aji ak moun ki pi aje yo nan kongregasyon an, plis fason yo okipe yo de ti travay lakay yo ap montre y ap kapab okipe yo menm jan an de pi gwo responsablite k ap tann yo pi devan nan lavi a. — Lik 16:10.
17 Lè kèk jèn aksepte responsablite, yo vin pwogrese opwen kalite espirityèl yo vin fè yo anmezi pou yo resevwa asiyasyon ki pi enpòtan. Lè yo gen yon bagay pou yo fè, sa kapab ede yo pou yo repouse konduit ensanse (2 Timote 2:22). Asiyasyon sa yo kapab ‘ teste yo dekwa pou yo wè kapasite yo ’ kòm frè ki ka rive sèvi kòm asistan ministeryèl (1 Timote 3:10). Patisipasyon yo nan reyinyon yo ak zèl yo nan predikasyon mete sou fason yo enterese ak tout moun nan kongregasyon an ap pèmèt ansyen yo wè kapasite yo lè y ap konsidere yo pou ba yo plis responsablite.
Annou chèche sa ki bon nan tout moun
18. Ki pyèj nan zafè jijman ki ta bon pou evite, e poukisa ?
18 Pwovèb 24:23 deklare : “ Montre paspouki nan jijman pa bon. ” Sajès ki sot nan syèl la egzije ansyen yo pou yo evite gen paspouki lè y ap jije ka nan kongregasyon an. Men sa Jak deklare : “ Sajès ki soti anlè a se yon sajès tou dabò ki pwòp. Ansuit li pasifik, li rezonab, li dispoze obeyi, li chaje ak mizerikòd ak bon kalite fwi, se yon sajès ki pa nan patipri e ki pa nan ipokrizi. ” (Jak 3:17). Nòmalman, pandan ansyen yo ap chèche sa ki bon nan lòt moun, yo bezwen asire yo pa gen relasyon pèsonèl oswa santiman ki bare jijman yo. Salmis Azaf te ekri pawòl sa yo : “ Bondye pran pozisyon l nan asanble Bondye a, nan mitan dye yo [“ sa yo ki tankou dye ”, l ap pale de jij yo, selon nòt anba paj la] l ap jije : ‘ Konbyen tan n ap fè ap jije ak enjistis e n ap montre nou gen paspouki pou mechan yo ? ’ ” (Sòm 82:1, 2). Nan sans sa a, ansyen yo evite tout tandans pou gen paspouki lè afè a konsène yon zanmi yo oswa yon fanmi yo. Lè yo fè sa, yo prezève inite kongregasyon an e yo pèmèt lespri Jewova koule alèz. — 1 Tesalonisyen 5:23.
19. Ki fason nou ka chèche sa ki bon nan lòt moun ?
19 Nan chèche sa ki bon nan frè ak sè nou yo, nou reflete atitid Pòl te genyen lè l t ap pale ak kongregasyon Tesalonik la. Men sa l te di : “ Anplis de sa, nou gen konfyans nan Seyè a konsènan nou menm, n ap fè e n ap kontinye fè sa nou òdone yo. ” (2 Tesalonisyen 3:4). L ap pi fasil pou nou pase sou fot lòt yo lè nou chèche sa ki bon nan yo. N ap chèche okazyon pou nou felisite frè nou yo. Sètènman, n ap evite pou n pa gen yon espri kritik. Men sa Pòl te ekri : “ Dayè, nan ka sa a, sa y ap chèche lakay entandan yo, yon nonm se pou yo jwenn ou fidèl. ” (1 Korentyen 4:2). Se pa sèlman moun ki gen responsablite nan kongregasyon an nou renmen pou fidelite yo men se tout frè ak sè nou yo. Donk, nou vin pi pre yo, chèn zanmitay la vin pi fò. Nou vin adopte pwennvi Pòl te genyen sou frè nan epòk pa l la. Yo se ‘ konpayon travay nou pou wayòm Bondye a ’ e yo se “ yon èd k ap fòtifye ” nou (Kolosyen 4:11). Konsa, n ap montre nou gen menm atitid ak Jewova.
20. Ki benediksyon k ap tann moun k ap chèche sa ki bon nan tout moun ?
20 Siman n ap di menm pawòl Neyemya te di nan priyè l la : “ Sonje m, o Bondye m nan, pou sa ki bon. ” (Neyemya 13:31). Ala kontan nou kontan dèske Jewova ap chèche sa ki bon nan moun (1 Wa 14:13) ! Nou swete pou nou aji menm jan an nan fason n ap trete lòt moun. Lè nou fè sa, n ap gen espwa jwenn delivrans ak lavi etènèl nan monn nouvo ki tou pre kounye a. — Sòm 130:3-8.
Ki repons nou ta bay ?
• Sou ki baz Jewova aji avèk bonte ak tout moun ?
• Ki jan nou ka chèche sa ki bon nan lòt moun
• nan ministè nou ?
• nan fanmi nou ?
• nan kongregasyon an ?
• nan relasyon nou ak tout moun ?
[Kesyon]
[Foto nan paj 15]
Malgre okòmansman frè Jozèf yo te rayi l, li te chèche sa ki bon nan yo.
[Foto nan paj 16]
Opozisyon pa anpeche nou chèche ede tout moun.
[Foto nan paj 17]
Malgre sa pitit Jakòb yo te fè, pa gen youn nan yo ki pa t jwenn benediksyon nan men l.
[Foto nan paj 18]
Akeyi tout moun ki vin nan reyinyon.