Fason nou ka fè bonjan lanmou an grandi nan nou

“Lanmou se remèd tout pwoblèm lavi a, lanmou se lavi. ” — Pwofite lavi a, Joseph Johnson, 1871 (anglè).

KÒMAN yon moun aprann renmen ? Lè l etidye sikoloji ? Lè l li yon seri liv pou l fòme tèt li poukont li, oswa lè l gade fim damou ? Pa vrèman. Moun aprann renmen toudabò pa mwayen egzanp ak fòmasyon yo jwenn nan men paran yo. Timoun yo ap aprann sa lanmou vle di, si nan yon anviwònman ki gen anpil afeksyon, yo wè paran yo nouri yo, pwoteje yo, kominike avèk yo e si paran yo montre yo enterese nan yo ak tout kè yo. Yo aprann renmen tou, lè paran yo anseye yo pou yo obeyi prensip jis konsènan sa ki byen ak sa ki mal.

Bonjan lanmou an plis pase yon senp afeksyon oswa yon senp santiman. Li aji tout tan nan enterè lòt moun, pou fè sa ki pi bon pou yo, menmsi moun sa yo pa tèlman apresye sa nan moman an. Sa konn rive souvan ak timoun lè y ap ba yo disiplin avèk amou. Egzanp pafè yon pèsonaj ki montre lanmou san enterè se Kreyatè a li menm. Apot Pòl te ekri pawòl sa yo : “ Pitit mwen, pa meprize disiplin Jewova ba w, ni tou pa dekouraje lè l korije w. Paske se moun Jewova renmen li disipline. ” — Ebre 12:5, 6.

Paran, kòman nou ka imite Jewova nan montre lanmou pou fanmi nou ? E nan relasyon nou youn ak lòt antanke mari ak madanm, ki enpòtans egzanp nou bay genyen ?

Anseye lanmou grasa egzanp nou bay

Si w se yon mari, èske w gen estim pou madanm ou, èske w ba l anpil valè ? Èske w trete l avèk onè e avèk respè ? Si w se yon madanm, èske w renmen mari w, èske w soutni l ? Labib di mari ak madanm ta dwe renmen youn lòt e respekte youn lòt (Efezyen 5:28 ; Tit 2:4). Lè yo fè sa, timoun yo wè ak je yo lanmou kretyen k ap aji. Ala yon leson ki efikas e ki gen valè sa kapab ye !

Paran yo tou favorize lanmou anndan kay yo lè yo rete kole ak prensip wo nivo an rapò ak bagay tankou distraksyon, moralite, objektif ak priyorite pou fanmi an. Nan lemonnantye, gen moun ki twouve Bib la se yon gwo èd nan tabli bon prensip konsa pou fanmi yo. Yo se prèv ki montre vrèmanvre Bib la “ se Bondye ki enspire li, e li itil pou anseye, pou reprimande, pou mete bagay yo annòd, pou disipline nan  ladwati ”. (2 Timote 3:16.) An reyalite, lwa moral ak konsèy sou fason pou moun viv ki parèt nan Sèmon sou montay la sèlman, anpil moun konsidere yo pa gen parèy. — Matye, chapit 5 rive nan chapit 7.

Lè tout fanmi an chèche direksyon nan men Bondye e yo aplike prensip li yo, chak moun santi yo pi byen, e li pi fasil pou timoun yo vin fè pwogrè nan lanmou ak nan respè pou paran yo. Yon lòt bò, nan yon kay kote chak moun gen prensip pa yo, prensip ki pa kòrèk oswa kote ki pa gen prensip menm, timoun yo kapab vin enève, yo kapab fache e yo kapab vin rebèl. — Women 2:21 ; Kolosyen 3:21.

E nan ka paran ki poukont yo ? Èske sa se yon gwo andikap ki anpeche yo anseye pitit yo lanmou ? Pa nesesèman. Menm lè pa gen anyen ki ka ranplase bèl ekip yon manman ak yon papa fòme, eksperyans montre bonjan relasyon ki genyen nan yon fanmi, kapab plizoumwen kouvri absans yon paran ki pa la. Si w se yon paran ki poukont ou, fè anpil efò pou w mete prensip ki gen nan Bib la an pratik anndan lakay ou. Wi, liv Pwovèb la di nou : “ Mete konfyans ou nan Jewova ak tout kè w epi pinga w apiye sou pwòp entèlijans ou. Nan tout wout ou, sonje li la, epi li menm l ap fè chemen w yo dwat pou ou. ” Sa gen ladan l tou chemen paran yo. — Pwovèb 3:5, 6 ; Jak 1:5.

Gen anpil jèn debyen ki te elve nan yon anviwònman kote se yon sèl paran ki te la e kounye a y ap sèvi Jewova fidèlman nan plizyè milye kongregasyon Temwen Jewova nan lemonn. Sa parèt klè, paran ki poukont yo kapab jwenn bon rezilta tou nan anseye pitit yo lanmou.

Fason tout moun ka travay pou lanmou grandi nan yo

Labib te predi nan “ dènye jou yo ” t apral gen yon lese ale nan “ afeksyon natirèl ”, sa vle di, yon lese ale nan atachman natirèl jeneralman moun nan yon fanmi genyen youn pou lòt (2 Timote 3:1, 3). Toutfwa, menm moun ki te kapab grandi nan yon anbyans kote pa t gen afeksyon kapab aprann gen lanmou. Kòman ? Lè yo aprann nan men Jewova, ki se bonjan Sous lanmou an e ki demontre lanmou ak afeksyon pou tout moun ki vin jwenn li ak tout kè yo (1 Jan 4:7, 8). Men sa yon salmis te di : “ Si sa ta rive pou papa m ak manman m kite m, Jewova li menm t ap ranmase m. ” — Sòm 27:10.

Jewova montre lanmou li pou nou plizyè fason diferan. Sa gen ladan l konsèy li bay antanke papa, pa mwayen Labib, èd lespri sen an, ansanm ak bonjan sipò nou jwenn nan fratènite ki genyen pami kretyen yo (Sòm 119:97-105 ; Lik 11:13 ; Ebre 10:24, 25). Ann konsidere ki jan twa dispozisyon sa yo kapab ede nou pou nou pwogrese nan lanmou pou Bondye ak pou pwochen nou.

Konsèy enspire yon Papa bay

Pou nou gen lyen sere ak yon moun, nou dwe aprann konnen moun sa a byen. Jewova envite nou pou nou pwoche bò kote l lè li fè nou konnen anndan Bib la kiyès li ye. Sepandan, li Bib la pa ase. Nou dwe mete sa li anseye nou yo an pratik e wè ki avantaj sa bay (Sòm 19:7-10). Men sa Izayi 48:17 di : “ Mwen menm Jewova, mwen se Bondye w, Sila k ap anseye w pou byen w lan, Sila k ap fè w mache sou wout ou dwe mache a. ” Wi, Jewova, li menm menm ki lanmou an, li enstwi nou pou byen nou, men se pa paske li vle retire nan libète nou ak yon bann règ initil.

 Yon konesans egzak sou Bib la ap ede nou tou pou nou pwogrese nan lanmou pou moun parèy nou. Rezon an se paske verite ki nan Bib la aprann nou pwennvi Bondye sou moun e li montre nou prensip ki kapab gide fason n ap boule youn ak lòt. Avèk enfòmasyon konsa, nou gen yon baz solid pou nou demontre lanmou pou pwochen nou. Men sa apot Pòl te di : “ Men sa mwen kontinye ap mande nan priyè mwen, se pou lanmou nou ogmante plis toujou avèk konesans egzak e avèk yon disènman total. ”— Filipyen 1:9.

Pou nou montre kòman “ konesans egzak ” la kapab dirije lanmou kòmsadwa, ann konsidere verite fondamantal nou jwenn nan Travay 10:34, 35. Men sa l di : “ Bondye pa gen patipri, men, nan tout nasyon, yon moun ki gen krentif pou li e ki pratike sa ki jis, li pran plezi nan li. ” Si Bondye pa jije moun akoz nasyonalite yo oswa ras yo, men pito pou sa yo fè ki dwat ak pou krent yo genyen pou li, èske nou pa ta dwe wè moun parèy nou menm jan an ? — Travay 17:26, 27 ; 1 Jan 4:7-11, 20, 21.

Lanmou : yon fwi lespri Bondye

Menm jan yon lapli ki tonbe nan bon moman sou yon plantasyon kapab pèmèt gen yon bon rekòt, se konsa lespri Bondye kapab pwodui nan moun ki konn koute yon seri kalite Labib dekri tankou “ fwi lespri a ”. (Galat 5:22, 23.) Kalite ki pi remakab nan fwi sa a se lanmou (1 Korentyen 13:13). Men, kòman nou kapab resevwa lespri Bondye ? Yon mwayen enpòtan se lapriyè. Si nou priye pou nou jwenn lespri Bondye, l ap ban nou li (Lik 11:9-13). Èske nou “ kontinye ” priye pou nou jwenn lespri sen ? Si nou fè sa, lè sa a, bèl fwi lespri sen an, ki gen lanmou ladan l, ap kapab vin parèt pi klè nan lavi nou.

Sepandan, gen yon lòt kalite lespri k ap travay kont lespri Bondye. Labib rele l : “ lespri monn nan ”. (1 Korentyen 2:12 ; Efezyen 2:2.) Se yon move enfliyans, e sous li se pa lòt moun se Satan Ledyab, “ chèf monn sa a ”, chèf tout moun ki kanpe lwen Bondye (Jan 12:31). Menm jan van kapab leve pousyè ak fatra, “ lespri monn nan ” leve move anvi nuizib ki detwi lanmou e ki satisfè feblès lachè. — Galat 5:19-21.

Moun yo vin gen vye lespri sa a lè yo ekspoze tèt yo nan materyalis, nan wè tèt yo anvan, nan atitid vyolan ak nan fason kwochi e souvan pouri yo konprann lanmou, jan sa gaye nan monn nan. Si ou vle fè pwogrè nan bonjan lanmou an, ou dwe reziste avèk fòs kont lespri monn nan (Jak 4:7). Sepandan, pinga w kwè nan pwòp fòs ou. Mande Jewova ede w. Lespri li, pi gwo fòs ki gen nan linivè, kapab fòtifye w e li kapab pèmèt ou reyisi. — Sòm 121:2.

Fratènite ki gen pami kretyen yo aprann nou lanmou

Menm jan timoun yo aprann montre lanmou lè yo viv li lakay yo, nou tout, jèn kou granmoun, nou kapab pwogrese nan lanmou lè nou asosye nou ak lòt kretyen yo  (Jan 13:34, 35). Pou byen di, youn nan wòl prensipal kongregasyon an se pou pèmèt genyen yon anbyans kote chak moun kapab ‘ ankouraje yonn lòt gen renmen nan kè nou, pou yonn ka ankouraje lòt nan fè sa ki byen ’. — Ebre 10:24, Bib la.

Moun ki “ depafini e ki gaye ” nan monn san lanmou ki antoure nou an se yo menm espesyalman ki apresye kalite lanmou sa a (Matye 9:36). Eksperyans montre relasyon lanmou yon moun viv pandan l vin gran kapab kouvri anpil move efè yon anfans san lanmou genyen. Se poutèt sa, li enpòtan anpil pou tout kretyen akeyi ak tout kè yo nouvo ki vin asosye ak yo.

“ Lanmou pap janm pase ”

Labib di : “ Lanmou pap janm pase. ” ​(1 Korentyen 13:8). Kòman sa ? Apot Pòl di nou : “ Lanmou pasyan e li bon. Lanmou pa jalou, li pa vante tèt li, li pa gonfle tèt li ak ògèy, li pa aji yon fason ki endesan, li pa chèche pwòp enterè pa li, li pa irite. Li pa okipe bagay mal yo fè. ” ​(1 Korentyen 13:4, 5). Li klè, lanmou sa a se pa yon bagay ki nan imajinasyon nou oswa yon santiman konsa konsa. Okontrè, moun ki demontre lanmou sa a byen konnen desepsyon ak doulè ki gen nan lavi a, men yo pa kite sa detwi lanmou yo genyen pou pwochen yo. Yon lanmou konsa se “ yon chenn san fay ki ini nou ”. — Kolosyen 3:12-14.

Ann konsidere egzanp yon kretyèn nan peyi Kore ki gen 17 an. Lè l te kòmanse sèvi Jewova Dye, fanmi li pa t dakò e li te dwe kite kay la. Sepandan, olye l vin fache, li priye konsènan sitiyasyon an, li kite Pawòl Bondye ak lespri Bondye fòme panse l. Apre sa, li te ekri fanmi l souvan, li te plen lèt li yo ak bonjan afeksyon li santi pou yo. Kòm rezilta, de pi gran frè l yo te kòmanse etidye Labib e kounye a yo se kretyen ki vwe vi yo bay Bondye. Manman l ansanm ak ti frè l la te aksepte laverite tou. Finalman, papa l ki pa t vle tande pale de sa menm, vin chanje atitid. Men sa sè a ekri : “ Nou tout nou marye ak kretyen parèy nou, e fanmi nou gen antou 23 adoratè ki ini. ” Ala yon viktwa lanmou ranpòte !

Èske w vle kite bonjan lanmou an grandi nan ou e èske w vle ede lòt moun fè menm jan an ? Ebyen, chèche direksyon Jewova, li menm ki Sous kalite enpòtan sa a. Wi, bay Pawòl li enpòtans, priye pou w mande lespri sen, reyini regilyèman ansanm ak lòt kretyen yo (Izayi 11:9 ; Matye 5:5). Se pa ti ankourajan pou nou konnen talè konsa tout mechan yo pral disparèt, e se sèlman moun k ap pratike bonjan lanmou an k ap rete ! Vrèman, lanmou se kle kè kontan e se kle lavi. — Sòm 37:10, 11 ; 1 Jan 3:14.

[Foto nan paj 6]

Lapriyè ansanm ak etid Pawòl Bondye a ap ede nou pou nou fè bonjan lanmou an grandi nan nou.