Sa zwazo yo ka aprann nou

“OBSÈVE zwazo nan syèl la byen. Yo pa ni simen ni rekòlte, ni yo pa ranmase al mete nan magazen. Poutan, Papa nou ki nan syèl la nouri yo. Èske nou pa vo plis pase yo ? ” ​(Matye 6:26). Jezi Kris te di pawòl sa yo nan yon selèb sèmon li te bay sou yon montay tou pre lanmè Galile. Se pa t disip li yo sèlman ki t ap koute l. Yon gwo foul moun ki sot tout kote nan peyi a te prezan, petèt moun sa yo t ap vin disip li. Anpil ladan yo se te moun ki te pòv ki te mennen moun malad pou Jezi geri. — Matye 4:23–5:2; Lik 6:17-20.

Lè Jezi fin geri tout moun malad yo, li te konsantre atansyon l sou bezwen espirityèl moun yo ki pi enpòtan. Pami leson li te anseye, nou jwenn sa yo mansyone pi wo a.

Sa fè lontan depi zwazo nan syèl la egziste. Gen ladan yo se ensèk yo manje, gen lòt se fwi ak grenn yo manje. Si Bondye mete manje ann abondans pou zwazo yo, nou sèten li kapab ede sèvitè l yo pou yo jwenn pen kotidyen. Li kapab fè sa lè l ede yo jwenn travay yon fason pou yo asire lajan manje yo. Oswa li ka pèmèt yo fè bon rekòt nan jaden yo. Nan moman gen pwoblèm ijan, Bondye kapab touche kè bon pwochen ak bon zanmi pou yo pataje moso manje avèk moun ki nan bezwen.

Gen plis bagay toujou nou ka aprann lè nou byen obsève fason zwazo yo ap viv. Bondye kreye zwazo yo ak ensten estrawòdinè pou yo fè nich kote yo ka elve pitit yo. Annou note de kalite nich diferan. Imaj ki agoch la se nich yon iwondèl ki viv nan wòch ann Afrik. Li fè nich li sou yon wòch oswa sou mi yon kay. Li itilize yon gwo wòch ki pandye oswa lamye yon kay kòm plafon pou nich li, tankou jan yo montre sa nan imaj la. Fon nich la fèt ak ti boul labou ki kole ansanm pou ba l fòm yon tas. Yo toule de, mal la ak femèl la, travay di pou yo rasanble ti moso labou e yo ka pran plis pase yon mwa pou yo fin fè nich yo a. Apre sa, yo tapise l ak gazon ansanm ak plim. Yo toule de antann yo pou yo nouri pitit yo. Sa nou wè anba a se nich yon mal zwazo ki konn tise. Zwazo afriken sa a travayan, li sèvi ak ti branch gazon oswa ak branch lòt plant pou l konstwi nich li. Li kapab fin fè yon nich nan yon sèl jou e li kapab tise plis pase 30 nich nan yon sezon !

Ki leson nou aprann ? Si Bondye bay zwazo yo anpil konpetans ak anpil materyo pou yo fè nich, sètènman li kapab ede sèvitè l yo jwenn kote pou yo rete. Sepandan, Jezi te montre gen yon lòt bagay ki nesesè si nou vle Jewova Dye ede nou jwenn sa nou bezwen materyèlman. Jezi te fè pwomès sa a : “ Kidonk, kontinye chèche wayòm nan ak jistis li an premye e y ap ajoute tout lòt bagay sa yo pou nou. ” ​(Matye 6:33). Ou kapab ap mande tèt ou : ‘ Sa sa enplike chèche Wayòm Bondye a an premye ? ’ Temwen Jewova yo ki distribye peryodik sa a ta byen kontan reponn ou kesyon sa a.