Èske w “ ap ret tann ” ?

“ Ki jan de moun nou dwe ye nan konduit ki sen ak nan aksyon ki montre nou gen atachman pou Bondye, pandan n ap tann e pandan nou toujou gen prezans jou Jewova a nan lespri nou ! ”— 2 PYÈ 3:11, 12.

1, 2. Ki egzanp nou ta ka pran pou n montre sa sa vle di “ ret tann ” jou Jewova a ?

IMAJINE yon fanmi k ap tann kèk moun yo envite vin pran yon repa. Moman pou yo vini an prèt pou rive. Madanm nan okipe, l ap fin fè dènye preparasyon pou repa a. Mari l ak pitit li yo ap ede l pou yo asire yo tout bagay pare. Tout moun sou aktivite. Wi, tout fanmi an ap tann avèk enpasyans pou envite yo rive, e yo espere y ap pran yon bon repa ak zanmi yo.

² Antanke kretyen, n ap tann yon bagay ki pi enpòtan toujou. Ki sa l ye ? Ebyen, nou tout, n ap tann “ jou Jewova a ” ! Jiskaske jou sa a rive, nou bezwen imite pwofèt Mika ki te di : “ Se Jewova m ap tann. M ap ret tann Bondye delivrans mwen an. ” ​(Mika 7:7). Èske sa siyifi nou rete san n pap fè anyen ? Now. Gen anpil travay ki pou fèt.

3. Selon 2 Pyè 3:11, 12, ki atitid kretyen yo dwe genyen ?

³ Apot Pyè ede nou pou nou gen bon atitid etan n ap tann. Men sa l di : “ Ki jan de moun nou dwe ye nan konduit ki sen ak nan aksyon ki montre nou gen atachman pou Bondye, pandan n ap tann e pandan nou toujou gen prezans jou Jewova a nan lespri nou ! ” ​(2 Pyè 3:11, 12). Nou remake fraz la fini avèk yon pwen esklamasyon. Se pa yon kesyon Pyè t ap poze. Nan de lèt enspire li yo, li dekri ki jan de moun kretyen yo dwe ye. Li te ba yo konsèy tou pou yo kontinye gen ‘ konduit ki sen ak aksyon ki montre yo gen atachman pou Bondye ’. Byenke sa te deja fè anviwon 30 an depi Jezi Kris te bay siy ki konsène “ fen sistèm de choz la ”, kretyen yo pa t dwe bese lebra (Matye 24:3). Yo te dwe rete ‘ ap tann epi toujou gen prezans jou Jewova a nan lespri yo ’.

4. Ki sa “ toujou gen prezans jou Jewova a nan lespri nou ” siyifi ?

⁴ Mo grèk ki tradui ekspresyon “ toujou gen nan lespri nou ” an vle di mo pou mo “ akselere ”. Natirèlman, nou pa ka “ akselere ” jou Jewova a. Dayè, ‘ nou pa konnen ni ki jou, ni ki lè ’ Jezi Kris ap vin egzekite jijman sou ènmi Papa l yo (Matye 24:36 ; 25:13). Gen yon ouvraj referans ki fè konnen rasin vèb “ akselere ” a vle di “ ‘ fè l vin vit ’, e donk li gen yon rapò sere ak ‘ vin zele, vin aktif, sousye w de yon bagay ’ ”. Donk, Pyè t ap ankouraje kwayan parèy li yo pou yo montre yo swaf prezans jou Jewova a. Yo t ap ka fè sa lè yo kenbe l toutan nan lespri yo (2 Pyè 3:12). Piske “ gran jou tèrib Jewova a ” sitèlman pre kounye a, nou ta dwe gen menm atitid mantal la. — Yowèl 2:31.

 Tann ak “ konduit ki sen ”

5. Ki jan nou ka montre nou swaf pou nou wè “ jou Jewova a ” ?

⁵ Si nou ta renmen chape toutbon nan jou Jewova a, n ap demontre sa grasa ‘ konduit nou ki sen ak aksyon ki montre nou gen atachman pou Bondye ’. Ekspresyon “ konduit ki sen ” an ka byen fè nou sonje konsèy Pyè te bay la lè l te di : “ Tankou timoun ki obeyisan, sispann konfòme nou selon dezi nou te genyen anvan nan inyorans nou, men, ann akò ak Sen an ki rele nou an, nou menm tou se pou nou vin sen nan tout konduit nou, paske men sa ki ekri : ‘ Nou dwe sen, paske mwen sen. ’ ” — 1 Pyè 1:14-16.

6. Ki sa nou dwe fè pou nou vin sen ?

⁶ Pou yon moun sen, fòk li rete pwòp nan domèn fizik, mantal, moral ak espirityèl. Èske n ap prepare nou pou “ jou Jewova a ” lè nou rete sen antanke moun ki pote non Jewova ? Li pa fasil jodi a pou nou rete pwòp konsa, paske prensip moral monn nan pa sispann bese (1 Korentyen 7:31 ; 2 Timote 3:13). Èske nou remake diferans ki gen ant prensip moral pa nou ak prensip moral monn nan ap vin pi plis ? Si nou pa remake sa, nou gen rezon pou nou enkyete. Èske l posib pou prensip pèsonèl nou yo ap bese tikras pa tikras, menmsi yo pi wo pase pa monn nan ? Si se konsa, nou bezwen pran bonjan dispozisyon pou nou korije sitiyasyon an pou nou ka fè Bondye plezi.

7, 8. a) Ki jan nou ta ka bliye enpòtans pou nou gen “ konduit ki sen ” ? b) Ki koreksyon ki kapab nesesè pou nou pote ?

⁷ Avèk pònografi ki vin parèt sou Entènèt, e akoz moun gen posiblite jwenn li san lòt moun pa konnen, yon moun ki pa t konn gen kontak ak bagay imoral sa yo gendwa vin twouve l devan sa yon medsen rele “ yon dividal chwa nan domèn seksyèl ”. Si nou ta al fouye nan sit Entènèt sal sa yo, asireman se vag nou t ap vag sou lòd Labib ban nou pou nou “ pa touche anyen ki pa pwòp ”. (Izayi 52:11.) Èske vrèmanvre nou t ap montre nou “ toujou gen prezans jou Jewova a nan lespri nou ” ? Oswa èske se pa repouse nou t ap repouse jou sa a nan lespri nou, etan n ap di tèt nou menmsi nou sal lespri nou ak bagay ki deprave, n ap toujou gen tan pou nou pwòpte tèt nou ? Si nou gen pwoblèm nan sans sa a, li ijan anpil pou nou sipliye Jewova pou l ‘ fè je nou pase san yo pa rete sou bagay ki pa vo anyen, e pou l fè nou rete vivan nan chemen l lan ’ ! — Sòm 119:37.

⁸ Pifò Temwen Jewova yo, jèn kou granmoun, rete kole sou prensip moral wo nivo Bondye yo, e yo evite tantasyon imoral ki gen nan monn sa a. Yo konsyan gen ijans nan tan n ap viv la e yo sonje avètisman Pyè te bay kote li fè konnen “ jou Jewova a ap vini tankou yon vòlè ”, sa fè yo kontinye gen “ konduit ki sen ”. (2 Pyè 3:10.) Aksyon yo pwouve ‘ y ap tann e yo toujou gen prezans jou Jewova a nan lespri yo. ’ *

Tann ak “ aksyon ki montre nou gen atachman pou Bondye ”

9. Ki sa atachman pou Bondye ta dwe pouse nou fè ?

⁹ Si nou vle kenbe jou Jewova a nan lespri nou, li enpòtan anpil pou nou akonpli “ aksyon ki montre nou gen atachman pou  Bondye ”. Aksyon sa yo gen ladan yo lareverans pou Bondye ki pouse nou fè sa k fè l plezi. Se yon atachman fidèl ak Jewova ki dèyè aksyon sa yo. Se volonte l pou “ tout kalite moun sove, e pou yo rive jwenn yon konesans egzak sou laverite ”. (1 Timote 2:4.) Bondye “ pa ta renmen pyès moun detwi, men li ta renmen pou tout moun rive repanti ”. (2 Pyè 3:9.) Donk, nan ka sa a, èske atachman nou genyen pou Bondye pa ta dwe pouse nou pou nou ogmante efò n ap fè pou nou ede moun yo konnen Jewova, pou nou ede yo imite l ? — Efezyen 5:1.

10. Poukisa nou dwe veyatif anrapò ak “ pouvwa richès genyen pou l twonpe moun ” ?

¹⁰ Si n ap chèche Wayòm Bondye a an premye, vi nou ap ranpli ak aksyon ki montre nou gen atachman pou Bondye (Matye 6:33). Sa mande pou nou gen yon pwennvi ekilibre sou bagay materyèl yo. Jezi te bay avètisman sa a : “ Ouvri je nou epi evite tout kalite konvwatiz, paske menm lè yon moun nan abondans, lavi l pa depann de sa l posede. ” ​(Lik 12:15). Menmsi li ka difisil pou nou ta imajine nou menm k ap kite lanmou pou lajan bouche je nou, li bon pou nou note “ enkyetid sistèm de choz sa a ak pouvwa richès genyen pou l twonpe moun ” ka “ toufe pawòl ” Bondye a (Matye 13:22). Li kapab pa fasil pou nou jwenn mwayen pou nou viv. Se sa k fè gen kote nan monn nan, anpil moun panse pou yon moun amelyore lavi l, se deplase pou l deplase al viv nan yon peyi ki pi rich, menmsi l ta kite fanmi l dèyè pandan kèk tan. Menm sèvitè Bondye konn rantre nan lojik sa a. Lè yo janbe al nan yon lòt peyi, yo gendwa vin gen posiblite bay fanmi yo byen materyèl modèn. Toutfwa, nan ki eta espirityèl y ap jwenn manm fanmi yo lè yo retounen lakay ? Si moun lakay pa jwenn bonjan direksyon nan fwaye a, èske y ap gen espirityalite ki nesesè a pou yo chape vivan nan jou Jewova a ?

11. Kòman yon travayè ki te deplase al travay nan yon lòt peyi te montre atachman pou Bondye pi enpòtan pase richès ?

¹¹ Te gen yon travayè ki deplase sot Filipin pou l al travay nan peyi Japon. Temwen Jewova yo te anseye l laverite biblik o Japon. Lè li vin aprann ki responsablite yon chèf fanmi genyen, li vin wè nesesite pou l ede manm fanmi l vin adore Jewova (1 Korentyen 11:3). Madanm li ki t ap viv Filipin pa t vle tande pale ditou de lafwa mari l te fèk genyen an, e li te prefere pou mari l kontinye voye lajan lakay olye pou l ta retounen vin anseye fanmi an kwayans biblik li yo. Sepandan, piske mari a wè gen ijans nan tan n ap viv la e kòm li gen sousi pou manm fanmi l, sa pouse l retounen lakay li. Pasyans ak lanmou li montre nan fason li boule ak manm fanmi l bay bon rezilta. Finalman, fanmi an vin ini nan vrè adorasyon an, e madanm li vin antre nan sèvis a plen tan.

12. Poukisa nou ta dwe bay bagay espirityèl yo premye plas nan lavi nou ?

¹² Nou ka konpare sitiyasyon nou ak sitiyasyon yon seri moun ki nan yon kay k ap pran dife. Èske l ta saj pou n ap kouri adwat agoch pou nou chèche sove byen materyèl nan kay  sa a k ap boule a e ki san lè vide atè ? Olye de sa, nou pa panse li ta pi bon lontan pou nou chèche sove vi moun pito, pa egzanp vi pa nou, vi fanmi nou ak vi lòt moun ki abite nan kay la ? Menm jan an tou, sistèm mechan n ap viv ladan l lan nan wout pou l efondre rapidman, e vi moun yo andanje. Piske nou konn sa, sètènman nou ta dwe bay bagay espirityèl yo premye plas la e avèk zèl, nou ta dwe konsantre nou sou travay predikasyon Wayòm nan k ap sove lavi. — 1 Timote 4:16.

Nou bezwen rete “ san tach ”

13. Nan ki kondisyon nou ta renmen ye lè jou Jewova a rive ?

¹³ Pyè ensiste sou enpòtans pou nou kontinye ret ap tann. Li di : “ Byenneme, piske n ap tann bagay sa yo, fè tout posib nou pou finalman [Bondye] jwenn nou san tach, san defo e nan lapè. ” ​(2 Pyè 3:14). Non sèlman Pyè ban nou konsèy pou nou gen konduit ki sen e pou aksyon nou montre nou gen atachman pou Bondye, men tou, li ensiste sou enpòtans pou finalman, Jewova jwenn nou pirifye grasa san presye Jezi a (Revelasyon 7:9, 14). Sa egzije pou yon moun demontre li gen lafwa nan sakrifis Jezi a e pou l vin yon sèvitè Jewova ki vwe e ki batize.

14. Ki sa rete “ san tach ” siyifi ?

¹⁴ Pyè ankouraje nou pou nou fè tout sa nou kapab pou yo jwenn nou “ san tach ”. Èske n ap kenbe rad nou, anpalan de konduit nou ak pèsonalite nou antanke kretyen, san tach, san monn nan pa sal li ? Lè nou remake yon tach sou rad nou, nou chèche retire tach la tousuit. Si se youn nan rad nou pi renmen yo, nou pran san nou pou n byen netwaye l. Èske se menm jan an nou reyaji si se rad espirityèl nou ki sal akoz kèk defo nou genyen nan pèsonalite nou ak nan konduit nou ?

15. a) Poukisa Izrayelit yo te dwe mete franj nan woulèt rad yo ? b) Sa k fè sèvitè Jewova jodi a yo diferan ?

¹⁵ Izrayelit yo te dwe mete “ franj nan woulèt rad yo ”, e yo te dwe “ mete yon kòdon ble anlè franj rad yo. ” Poukisa ? Se yon fason pou yo te sonje kòmandman Jewova yo, pou yo te obeyi yo e pou yo te ‘ montre yo sen ’ pou Bondye yo a (Nonb 15:38-40). Jodi a, antanke sèvitè Jewova, nou diferan parapò ak monn nan paske n ap mete lwa ak prensip Bondye yo an pratik. Pa egzanp, nou rete pwòp nan domèn moral, nou respekte san an paske l sakre, e nou evite tout kalite idolatri (Travay 15:28, 29). Anpil moun respekte nou pou fèm detèminasyon nou genyen pou nou kenbe tèt nou san tach. — Jak 1:27.

Nou bezwen rete “ san defo ”

16. Ki sa rete “ san defo ” gen ladan l ?

¹⁶ Pyè te di tou yo dwe jwenn nou “ san defo ”. Kòman sa ka posib ? An jeneral, yo ka efase oswa retire yon tach, men yo pa ka fè sa pou yon defo. Yon defo montre gen yon bagay pa anndan ki pa mache, ki pa bon. Men konsèy apot Pòl te bay kretyen Filip yo : “ Kontinye fè tout bagay san nou pa bougonnen, san nou pa fè diskisyon yon fason pou nou ka vin san repwòch e pou nou ka vin  inosan, pou nou vin pitit Bondye ki san tach nan mitan yon jenerasyon moun ki pa dwat, moun ki pouri, nan mitan yon jenerasyon kote n ap klere tankou flanbo nan monn nan. ” ​(Filipyen 2:14, 15). Si nou suiv konsèy sa a, n ap evite bougonnen, n ap evite fè diskisyon e n ap sèvi Bondye ak yon bon mobil. Se lanmou pou Jewova e pou pwochen nou k ap pouse nou preche “ bon nouvèl sa a konsènan wayòm nan ”. (Matye 22:35-40 ; 24:14.) Anplis de sa, n ap kontinye pwoklame bon nouvèl la menmsi moun yo an jeneral pa konprann poukisa nou konsakre tan nou nan fè efò pou nou ede lòt moun aprann konnen Bondye ak Pawòl li Labib.

17. Avèk ki mobil nou ta dwe chèche gen privilèj nan kongregasyon an ?

¹⁷ Piske nou vle rete “ san defo ”, li bon pou nou egzamine mobil nou nan tout objektif n ap pousuiv. Nou kite metòd monn nan k ap aji avèk egoyis, tankou nan fason y ap kouri dèyè richès ak pouvwa. Si n ap chèche gen privilèj nan kongregasyon an, li ta bon pou nou toujou gen bon mobil e pou nou motive grasa lanmou pou Jewova ak pou lòt moun. Sa rekonfòtan pou nou wè yon seri gason espirityèl k ap “ chèche sèvi kòm siveyan ” ak kè kontan e ki vle sèvi Jewova ak konpayon yo avèk imilite antanke esklav (1 Timote 3:1 ; 2 Korentyen 1:24). Vrèmanvre, moun ki kalifye pou yo sèvi kòm ansyen ‘ pran swen twoupo Bondye a [...] ak tout kè yo, pa paske yo renmen pwofi malonèt, men avèk anpresman, ni nonplis antanke moun k ap kòmande moun ki eritaj Bondye yo tankou mèt, men lè yo tounen egzanp pou twoupo a ’. — 1 Pyè 5:1-4.

Nou bezwen rete “ nan lapè ”

18. Ki bèl kalite yo konnen Temwen Jewova yo genyen ?

¹⁸ Finalman, Pyè di nou pou yo jwenn nou “ nan lapè ”. Pou nou ka ranpli egzijans sa a, nou bezwen viv an pè avèk Jewova e avèk pwochen nou. Pyè te mete aksan sou enpòtans pou nou gen yon “ lanmou ki fò anpil youn pou lòt ” e pou nou viv an pè ak kretyen parèy nou yo (1 Pyè 2:17 ; 3:10, 11 ; 4:8 ; 2 Pyè 1:5-7). Pou nou kenbe lapè nou an, nou dwe gen lanmou nan mitan nou (Jan 13:34, 35 ; Efezyen 4:1, 2). Lanmou ak lapè nou gen nan mitan nou parèt aklè espesyalman nan kongrè entènasyonal nou òganize yo. Nan yon kongrè ki te fèt nan peyi Kostarika an 1999, te gen yon machann nan ayewopò a ki te vin fache paske Temwen ki te la pou akeyi delege ki t ap vini yo, san yo pa fè espre, yo te bare komès li. Sepandan, nan dezyèm jou a, li remake jan Temwen lokal yo te chofe pandan yo t ap akeyi delege yo nan lanmou ak lapè, alòske yo pa t menm rekonèt yo anvan sa. Nan dènye jou a,  machann nan vin antre nan akeyi moun tou, e li mande pou yo etidye Labib avèk li.

19. Poukisa li enpòtan anpil pou nou pousuiv lapè ak frè ak sè nou yo ?

¹⁹ Senserite nou demontre etan n ap pousuiv lapè avèk frè ak sè nou yo ka byen gen yon efè sou fason n ap tann ak tout kè nou jou Jewova a ak monn nouvo li pwomèt la (Sòm 37:11 ; 2 Pyè 3:13). Sipozon nou wè li difisil pou nou viv an pè ak yon frè oswa ak yon sè. Èske nou ka imajine nou k ap viv an pè nan Paradi a avèk li ? Si yon frè gen yon bagay kont nou, nou ta dwe ‘ fè lapè avè l ’ san pèdi tan (Matye 5:23, 24). Li enpòtan anpil pou nou fè sa si nou vle viv an pè avèk Jewova. — Sòm 35:27 ; 1 Jan 4:20.

20. Ki jan nou ta dwe demontre aklè n “ ap ret tann ” ?

²⁰ Èske pèsonèlman, “ n ap tann e nou toujou gen prezans jou Jewova a nan lespri nou ” ? Nou demontre nou swaf pou nou wè mechanste fini lè nou rete sen nan monn imoral sa a. Anplis de sa, nou demontre n ap tann ak tout fòs jou Jewova a k ap vini an e n ap tann pou nou viv anba dominasyon Wayòm li an lè nou akonpli aksyon ki montre nou gen atachman pou Bondye. E lè nou pousuiv lapè ak frè ak sè nou yo depi kounye a, sa demontre n ap tann pou nou viv nan monn nouvo pezib la. Se fason sa yo nou demontre n “ ap ret tann ” e “ nou toujou gen prezans jou Jewova a nan lespri nou ”.

[Nòt anba paj]

Èske nou sonje ?

• Sa sa vle di kenbe “ prezans jou Jewova a nan lespri nou ” ?

• Ki jan konduit nou demontre “ n ap ret tann ” ?

• Poukisa “ aksyon ki montre nou gen atachman pou Bondye ” yo enpòtan anpil ?

• Ki sa nou dwe fè pou Jewova jwenn nou “ san tach, san defo e nan lapè ” ?

[Kesyon]

[Foto nan paj 11]

Nou demontre n “ ap ret tann ” lè nou gen konduit ki sen.

[Foto nan paj 12]

Travay predikasyon Wayòm nan sove lavi.

[Foto nan paj 14]

Pandan n ap tann jou Jewova a, annou pousuiv lapè ak lòt moun.