“ Pwoche bò kote Bondye e l ap pwoche bò kote nou ”

Anvan sa, apre sa : Li te jwenn fòs pou l chanje

SANDRA se yon dam k ap viv nan peyi Meksik. Li te dekri tèt li kòm yon moun ki t ap bay move egzanp nan fanmi l. Adolesans li te gache akoz yo te rejte l e akoz li te manke jwenn afeksyon. Men deklarasyon l fè : “ Nan adolesans mwen mwen te toujou santi m raz e mwen te gen anpil dout sou rezon ki fè m ap viv e sou lavi a an jeneral. ”

Pandan l te nan segondè, Sandra te kòmanse bwè diven papa l te gen nan kay la. Rive yon lè, li te kòmanse achte pwòp tafya pa l e l te vin tounen yon tafyatè. Li te di : “ Mwen pa t gen okenn anvi viv ”. Etandone Sandra te dezespere, li te lage kò l nan dwòg. Li di : “ Sèl bagay ki te ede m bliye pwoblèm mwen yo, se sa m te konn gen nan bous mwen : yon boutèy, kèk konprime oswa enpe mariwana. ”

Apre Sandra fin etidye medsin, li rantre pi fon nan bwè tafya. Li te eseye touye tèt li. Men li pa t reyisi.

Sandra t ap chèche èd espirityèl ak sipò afektif nan plizyè relijyon diferan, men, se te pou granmesi. Piske l te fin pèdi espwa e li te dekouraje, li te toujou ap mande Bondye : “ Kote w ye ? Poukisa w pa ede m ? ” Nan moman santiman diyite li te gen lakay li te rive nan nivo ki pi ba a, yon Temwen Jewova vin pale avè l. Sa te pouse l fè yon etid biblik. Sandra te touche anpil lè l te aprann “ Jewova toupre moun ki santi yo kraze nan kè yo ”. — Sòm 34:18.

Moun ki t ap etidye Labib ak Sandra a te ede l konprann Jewova Dye konnen nou fèb akoz peche ak enpèfeksyon nou eritye nan Adan. Sandra te vin reyalize Bondye konprann nou pa kapab aplike prensip dwat li yo san fay (Sòm 51:5 ; Women 3:23 ; 5:12, 18). Li te kontan aprann Jewova pa rete sou feblès nou yo, e li pap atann li pou nou fè plis pase sa n kapab. Men sa salmis la te mande : “ Si se te fot ou t ap chèche, o Ya, o Jewova, kiyès ki t ap ka kanpe ? ” — Sòm 130:3.

Yon verite enpòtan nan Bib la ki te touche kè Sandra se te sakrifis ranson Jezi Kris la. Pa mwayen ranson an, Jewova montre l gen mizèrikòd pou moun ki obeyisan yo etan l konsidere yo kòm moun ki jis malgre yo enpafè (1 Jan 2:2 ; 4:9, 10). Wi, nou kapab jwenn “ padon pou fot nou yo ” e kòm konsekans, sa ap ede nou rejte nenpòt santiman ki ta ka fè nou kwè nou pa vo anyen. — Efezyen 1:7.

Sandra te tire leson ki enpòtan nan egzanp apot Pòl kite. Apot Pòl te rekonesan anpil pou bonte Bondye dèske l te padone l nèt pou erè l te konn fè anvan yo e dèske l te soutni l nan gwo lit li t ap mennen pou l venk feblès ki t ap reparèt detanzantan lakay li (Women 7:15-25 ; 1 Korentyen 15:9, 10). Pòl te korije fason li te konn viv, li te ‘ boure kò l ak kou e li te mennen l tankou yon esklav ’ yon fason pou l rete nan chemen Bondye apwouve a  (1 Korentyen 9:27). Li pa t kite tandans pou l fè peche mennen l tankou yon esklav.

Feblès Sandra yo te peze lou sou li, men li te toujou ap lite kont yo. Li te priye Jewova ak tout kè l pou l ede l venk yo e li te chèche mizerikòd li (Sòm 55:22 ; Jak 4:8). Etandone Sandra santi Bondye enterese pèsonèlman nan li, li te kapab chanje fason l te konn ap viv. Li di : “ Mwen kontan anseye lòt moun Bib la a plen tan. ” Sandra te gen privilèj ede sè li ki pi gran pase l ak sè l ki pi piti pase l vin konnen Jewova. Pandan l ap ‘ fè sa ki byen ’, li sèvi tou ak konpetans medikal li genyen kòm volontè nan kongrè Temwen Jewova yo. — Galat 6:10.

Ki sa ki pase ak vye vis Sandra te genyen yo ? Avèk asirans, men sa l di : “ Tèt mwen klè. Mwen pa ni bwè, ni fimen ni m pa pran dwòg ankò. Mwen pa bezwen bagay sa yo. Mwen jwenn sa m t ap chèche a. ”

[Antrefilè nan paj 9]

“ Mwen jwenn sa m t ap chèche a. ”

[Kare nan paj 9]

Prensip biblik yo bay bon rezilta

Men kèk prensip biblik ki ede anpil moun libere anba vye vis yo te genyen :

“ Annou pirifye tèt nou anba tout salte lachè ak lespri, lè nou rive vin konplè nèt nan sentete, nan lakrent pou Bondye. ” ​(2 Korentyen 7:1). Bondye beni moun ki pirifye tèt yo anba salte, e ki rejte pratik ki sal yo.

“ Krenn Jewova siyifi rayi sa ki mal. ” ​(Pwovèb 8:13). Lakrent ak respè pou Bondye ede yon moun pou li kite move abitid, tankou pran dwòg. Non sèlman sa fè Jewova plezi, men tou, moun ki chanje a pwoteje kont yon seri maladi tèrib.

“ Soumèt devan gouvènman yo ak otorite yo, e [...] obeyi yo kòm chèf. ” ​(Tit 3:1). Gen anpil kote, si yon moun posede oswa itilize yon seri dwòg, li vyole lalwa. Vrè kretyen yo pa ni posede ni itilize dwòg ki ilegal.