Èske w ap kenbe entegrite w ?

“ M’ap kenbe [entegrite m] jouk mwen rann dènye souf mwen. ” — JÒB 27:5.

1, 2. Ki efò nou dwe fè, e ki kesyon nou pral egzamine ?

IMAJINE w ap egzamine plan yon kay ou pral fè. Fason yo byen mete chak pyès yo sou plan an enpresyone w. Lè w ap panse sou divès fason kay la pral itil ou menm ak fanmi w, sa fè w plezi. Men, èske w pa dakò plan sa a ak tout ide ou genyen yo pap vrèman itil toutotan ou pa bati kay la toutbonvre, toutotan w pa bwote al ret ladan l epi apre sa ou kontinye fè antretyen ladan l ?

² Menm jan an tou, nou ka byen konnen entegrite se yon kalite ki trèzenpòtan e k ap itil ni nou menm ni moun pa nou. Men, konnen kalite sa a enpòtan pap vrèman itil nou si nou pa fè efò pou nou vin genyen l lakay nou epi pou nou kenbe l. Nan monn n ap viv jodi a, souvan, konstriksyon koute anpil kòb (Lik 14:28, 29). Konsa tou, pou nou vin entèg, sa mande tan ak efò. Men, sa vo lapèn. Kounye a, annou egzamine twa kesyon : Kòman nou ka fè pou n vin moun ki gen entegrite ? Ki jan nou ka kenbe entegrite nou antanke kretyen ? Ki sa nou ka fè si sa ta rive nou pèdi entegrite nou ?

Ki jan nou kapab vin gen entegrite ?

3, 4. a) Ki fason Jewova ede nou vin entèg ? b) Jan Jezi te montre sa nan lavi l, ki jan nou ka vin entèg ?

³ Nan atik ki te vin anvan an, nou te remake Jewova onore nou lè l ban nou privilèj pou nou deside si nou vle vin yon moun ki entèg. Men, erezman li pa lage nou poukont nou nan domèn sa a. Li montre nou ki sa pou nou fè pou nou rive gen kalite sa a ki enpòtan e li ban nou lespri sen l avèk jenewozite pou ede nou aplike ansèyman l yo (Lik 11:13). E li menm bay moun k ap fè efò pou yo mache nan entegrite yo pwoteksyon nan domèn espirityèl. — Pwo. 2:7.

⁴ Ki jan Jewova anseye nou pou nou kenbe entegrite nou ? Toudabò, li fè sa pa mwayen Jezi, Pitit li a, lè li te voye l vin sou tè a. Pandan tout lavi Jezi li te obeyi Papa l yon fason ki pafè. Li te “ vin obeyisan jis li mouri ”. (Fil. 2:8, NW.) Nan tout sa l te fè, Li te obeyi Papa l ki nan syèl la, menm lè sa te trè difisil pou li. Li te di : “ Se pa volonte m’ ki pou fèt, se volonte pa ou. ” ​(Lik 22:42). Nou chak ta dwe poze tèt nou kesyon sa a : ‘ Èske mwen dispoze obeyi menm jan an ? ’ N ap rive kenbe entegrite nou  lè nou kontinye obeyi Bondye e lè nou fè sa avèk bon mobil. Ann konsidere kèk aspè nan lavi a kote obeyisans vrèman enpòtan.

5, 6. a) Ki jan David te montre li enpòtan pou nou kenbe entegrite nou menm lè pa gen lòt moun k ap gade nou ? b) Anrapò ak entegrite, ki pwoblèm kretyen yo rankontre jodi a lè yo poukont yo ?

⁵ Nou dwe obeyi Jewova menm lè sanble nou poukont nou. Salmis David te remake enpòtans entegrite genyen nan plizyè okazyon kote sanble li te poukont li. (Li Sòm 101:2.) Antanke wa, David te antoure ak moun prèske toutan. Pa gen dout, souvan li te gen plizyè santèn moun, e menm plizyè milye moun, ap gade l. (Konpare ak Sòm 26:12.) Nan moman sa yo, li te enpòtan pou l te kenbe entegrite l antanke wa, paske li te dwe bay pèp li a yon bon egzanp (Det. 17:18, 19). Men, David te aprann li te dwe mache nan entegrite menm lè l te poukont li ‘ anndan lakay li ’. E nou menm ?

⁶ Men pawòl David te di nou jwenn nan Sòm 101:3 (NW) : “ Mwen pap mete devan je m okenn bagay ki pa itil. ” Jodi a, gen anpil okazyon pou nou mete bagay ki pa itil devan je nou, sitou lè nou poukont nou. Anpil moun ki konn al sou Entènèt gen pwoblèm nan sans sa a. Li fasil pou yo pran nan pyèj gade bagay ki pa pwòp e pou yo menm gade pònografi. Men, lè yon moun aji konsa, èske l demontre li obeyi Bondye ki te enspire David pou l ekri pawòl nou jwenn nan Sòm sa a ? Pònografi se yon bagay ki danjere, paske li eksite move dezi nan nou ki fè nou vle satisfè tèt nou sèlman, li sal konsyans nou, li kraze maryaj nou e li kòwonp kèlkeswa moun k ap gade l la. — Pwo. 4:23 ; 2 Kor. 7:1 ; 1 Tes. 4:3-5.

7. Ki prensip k ap ede nou kenbe entegrite nou lè nou poukont nou ?

⁷ Natirèlman, pa gen okenn sèvitè Jewova ki janm poukont li nèt. Papa nou an ki renmen nou ap veye sou nou. (Li Sòm 11:4.) Se pa ti kontan Jewova dwe kontan lè l wè w reziste devan tantasyon ! Lè w fè sa, se koute ou koute avètisman Jezi te bay la, avètisman nou jwenn nan Matye 5:28 la. Se pou w toujou detèmine pou w pa gade imaj ki ta ka tante w pou w fè sa ki mal. Pa twoke entegrite w ki gen anpil valè pou w gade pònografi oswa pou w li liv pònografi, yon bagay ki vrèman sal !

8, 9. a) Ki defi Dànyèl ak konpayon l yo te jwenn anrapò ak entegrite yo ? b) Ki jan kretyen ki jèn jodi a fè Jewova ak kretyen parèy yo kontan ?

⁸ N ap rive kenbe entegrite nou tou lè nou obeyi Jewova lè nou pami enkwayan. Sonje Dànyèl ak twa konpayon l yo. Yo te mennen yo kòm prizonye nan Babilòn pandan yo te jèn. Nan peyi sa a, kat Ebre sa yo te antoure ak enkwayan petèt ki pa t konn anyen sou Jewova, ki t ap ba yo presyon pou yo manje manje Lwa Bondye a te entèdi yo manje. Li fasil pou ti mesye sa yo te jwenn rezon pou yo fè konpwomi. Anfèt, ni paran yo, ni ansyen yo, ni prèt yo pa  t ap ka wè sa yo t ap fè. Men, kiyès ki t ap konnen ? Jewova. Konsa, yo te pran yon pozisyon fèm e yo te obeyi Jewova malgre presyon yo te jwenn e malgre sa ki te ka rive yo. — Dàn. 1:3-9.

⁹ Toupatou sou tè a, jèn Temwen Jewova yo pran menm pozisyon an : yo kenbe prensip Bondye bay yo fèm e yo refize sede devan move enfliyans kamarad yo chèche gen sou yo. Ou menm jèn, lè w refize pran dwòg, ou refize aji avèk vyolans, ou refize di pawòl sal, ou refize fè imoralite ak lòt move aksyon, ou obeyi Jewova. Lè w fè sa, w ap kenbe entegrite w, w ap jwenn anpil byenfè e w ap fè ni Jewova ni kretyen parèy ou yo kontan. — Sòm 110:3.

10. a) Ki move ide kèk jèn gen sou fònikasyon ki fè yo pèdi entegrite yo ? b) Si nou vle kenbe entegrite nou, ki jan sa ap fè nou aji anrapò ak fònikasyon ki reprezante yon danje ?

¹⁰ Nou dwe obeyi prensip Bondye yo tou nan relasyon nou genyen ak moun ki pa menm sèks avèk nou. Nou konnen Pawòl Bondye a kondane fònikasyon. Men, sa ka rive fasilman nou te dispoze obeyi Bondye, men kounye a, nou vin gen yon atitid kote nou pa wè nesesite pou nou obeyi l ankò. Pa egzanp, gen kèk jèn ki konn fè sèks nan bouch oswa nan dèyè oswa youn karese pati seksyèl lòt, paske yo panse lè yo fè bagay sa yo yo pa antre nan “ relasyon seksyèl ”. Jèn sa yo bliye, oubyen yo fè kòmsi yo pa konnen, mo Bib la mete pou fònikasyon an gen tout pratik sa yo ladan l *. Tout pratik sa yo se move konduit, e yo ka lakòz yon moun eskominye. Men, sa k pi mal la, sèke yo bliye li trèzenpòtan pou yo kenbe entegrite. Lefètke n ap fè tout efò nou pou nou kenbe entegrite nou, sa fè nou pa chèche eskiz pou nou fè sa k mal. Nou pa dwe ap reflechi pou n wè jis ki bò nou ka rive nan yon move konduit san nou pa fè yon peche ki ta ka fè nou jwenn pinisyon. Se pa sèlman disiplin n ap jwenn pou yon move aksyon ki ta dwe pi enpòtan pou nou. Sa k ta dwe pi enpòtan pou nou se chèche fè sa k ap fè Jewova plezi, evite fè sa k ap fè l lapenn. Olye nou chèche wè jis ki bò nou ka rive nan yon move konduit san nou pa fè yon peche, okontrè, nou rete byen lwen peche e nou “ kouri pou fònikasyon ”. (1 Kor. 6:18, NW.) Konsa, nou montre nou se moun ki gen entegrite toutbon.

Ki jan nou kapab kenbe entegrite nou ?

11. Sa k fè chak aksyon nou fè pou demontre obeyisans nou gen enpòtans ? Bay yon egzanp.

¹¹ Nou vin entèg lè nou gen obeyisans, donk, nou kenbe entegrite nou lè nou kontinye gen obeyisans. Yon sèl aksyon nou fè pou demontre obeyisans nou kapab parèt san enpòtans, li kapab parèt yon ti bagay toupiti. Men, avèk letan, se aksyon sa yo ki mete youn sou lòt k ap ranfòse abitid nou genyen kòm moun ki entèg. Ann pran yon egzanp : Yon sèl blòk ka parèt san enpòtans, men si nou byen ranje yon pakèt blòk ansanm, nou ka bati yon bèl kay avèk yo. Donk, lè nou kontinye fè plis aksyon pou demontre obeyisans nou, nou kenbe entegrite nou. — Lik 16:10.

12. Ki jan David kite yon egzanp pou nou nan fason l te kenbe entegrite l lè l t ap fè fas ak move tretman ansanm ak enjistis ?

 ¹² Entegrite nou parèt pi klè toujou lè n ap andire sitiyasyon difisil, move tretman oswa enjistis. Ann egzamine egzanp David nou jwenn nan Bib la. Lè David te yon jèn gason, li te andire pèsekisyon nan men wa Sayil, yon wa ki te sipoze reprezante otorite Jewova. Men, wa Sayil te pèdi favè Jewova e li te vin gen yon gwo jalouzi nan kè l poutèt David te gen favè Bondye. Poutan, Sayil te kontinye dirije pandan yon tan e li te sèvi ak lame Izrayèl la pou l pousuiv David. Jewova te pèmèt enjistis sa a kontinye pandan plizyè ane. Èske David te fache kont Bondye ? Èske l te panse pa t gen okenn rezon pou l kontinye andire ? Okontrè, li te kontinye gen yon gwo respè pou pozisyon Sayil antanke moun Bondye nome. Se sa k fè li te refize tire revanj menm lè l te jwenn okazyon pou sa. — 1 Sam. 24:2-7.

13. Ki jan nou ka kenbe entegrite nou si yon moun fè nou yon bagay ki mal ?

¹³ Ala yon egzanp pisan David kite pou nou jodi a ! Nou fè pati yon kongregasyon entènasyonal ki gen yon bann moun enpafè ladan l. Nenpòt nan yo ka fè nou yon bagay ki fè nou mal oswa nenpòt nan yo ka vin enfidèl. Natirèlman, nou beni lefètke n ap viv nan yon epòk kote pèp Jewova a antanke gwoup pap janm vin kòwonpi (Iza. 54:17). Poutan, ki jan n ap reyaji lè youn ladan yo fè yon bagay nou pa t ap atann oswa youn nan yo blese santiman nou ? Si nou ta kite nou gen rankin pou moun sa a k ap adore Bondye ansanm avèk nou, sa ka tounen yon pwazon nan kè nou k ap mete entegrite nou devan Bondye an danje. Konduit lòt moun pa ta dwe janm fè nou fache kont Bondye, ni sa pa ta dwe fè nou sispann fidèl (Sòm 119:165). Lè nou andire, menm devan pwoblèm, sa ap ede nou kenbe entegrite nou.

14. Ki jan moun ki kenbe entegrite yo reyaji lè gen chanjman nan domèn òganizasyon oswa nan kesyon doktrin ?

¹⁴ Nou kapab kenbe entegrite nou tou lè nou evite chèche fot lakay lòt moun oubyen lè nou evite chèche fot nan fason kongregasyon an fonksyone e lè nou pa chèche bagay pou nou kritike yo. Lè nou aji konsa, nou montre nou fidèl ak Jewova. Jodi a, li beni pèp li a plis pase tout lòt epòk. Se premye fwa nan tout listwa adorasyon ki pwòp la rive nan yon nivo konsa (Iza. 2:2-4). Lè gen chanjman nan fason yo te konn esplike yon pasaj nan Bib la oswa nan fason bagay yo fèt, nou ta dwe dispoze aksepte chanjman sa yo. Nou pran plezi wè prèv ki montre limyè espirityèl la toujou ap vin pi plis (Pwo. 4:18). Si nou twouve li difisil pou nou konprann yon chanjman, mande Jewova pou l ede nou konprann li. Annatandan nou konprann li, annou kontinye rete obeyisan e annou kenbe entegrite nou.

Ki sa yon moun ka fè si l pèdi entegrite l ?

15. Kiyès moun sèlman ki ka fè w pèdi entegrite w ?

¹⁵ Èske kesyon sa a pa fè nou reflechi ? Jan  nou te aprann sa nan atik ki vin anvan an, entegrite se yon bagay ki trèzenpòtan. San li, nou pap ka zanmi Jewova e nou pap ka gen okenn espwa ki sèten. Sonje se yon sèl moun nan tout linivè ki ka fè w pèdi entegrite w. Moun sa a se ou menm. Jòb te byen konprann verite sa a. Se sa k fè li te di : “ M’ap kenbe [entegrite m] jouk mwen rann dènye souf mwen. ” ​(Jòb 27:5). Si w gen menm detèminasyon an e si w rete pwòch Jewova, ou pap janm pèdi entegrite w. — Jak 4:8.

16, 17. a) Si yon moun fè yon peche grav, ki sa l pa dwe fè ? b) Ki sa l ta dwe fè ?

¹⁶ Sepandan, gen kèk moun ki pa kenbe entegrite yo. Sa te rive menm pandan apot yo te la toujou. Te gen kèk moun ki te tonbe nan pratike peche grav. Si sa rive w, èske sitiyasyon w sanzespwa ? Pa fòseman. Ki sa w ka fè ? Toudabò, annou egzamine ki sa w pa ta dwe fè. Antanke moun, nou gen tandans kache move aksyon nou fè pou paran nou, pou kretyen parèy nou oswa pou ansyen yo pa konnen. Men, Bib la fè nou sonje : “ Moun ki kouvri transgresyon l pap reyisi, men moun ki konfese yo e ki kite yo, y ap fè l mizèrikòd. ” ​(Pwo. 28:13, NW). Moun k ap chèche kache peche yo fè yon gwo erè, paske pa gen anyen yon moun kapab kache Bondye. (Li Ebre 4:13.) Gen kèk moun ki menm eseye mennen de vi, yo fè kòmsi y ap sèvi Jewova pandan yo toujou kontinye ap pratike peche. Lè yo viv konsa, yo pèdi entegrite yo, paske vi y ap mennen an se yon vi ki totalman opoze ak entegrite. Jewova pa pran plezi nan adorasyon moun k ap kache peche grav yo fè. Okontrè, mòd ipokrizi sa a fè l fache. — Pwo. 21:27 ; Iza. 1:11-16.

¹⁷ Lè yon kretyen fè yon peche grav, gen enstriksyon biblik byen klè ki montre sa pou l fè. Se moman pou l chèche èd ansyen yo. Jewova mete ansyen yo la pou yo ede frè ak sè ki malad nan domèn espirityèl yo jwenn gerizon. (Li Jak 5:14.) Menmsi w panse y ap disipline w, pa kite sa anpeche w chèche rejwenn sante w nan domèn espirityèl. Èske yon moun ki saj ap prefere kite yon pwoblèm sante grav fini ak li olye pou l pran yon piki oswa pou l fè yon operasyon paske l pè pou l pa soufri ? — Ebre 12:11.

18, 19. a) Ki jan egzanp David montre yon moun ka jwenn entegrite l ankò ? b) Ki detèminasyon w genyen anrapò ak entegrite w ?

¹⁸ Èske gen espwa pou moun ki peche a geri nèt ? Èske yon moun ki pèdi entegrite l ka jwenn li ankò ? Annou egzamine egzanp David ankò. Li te tonbe nan peche grav. Li te gade madanm yon lòt gason avèk konvwatiz, li te fè adiltè avèk dam nan e li te fè yon fason pou yo touye mari a ki te inosan. Li difisil pou nou imajine David kòm yon moun ki te kenbe entegrite l nan moman sa a. Poutan, èske sitiyasyon an te sanzespwa ? David te bezwen bonjan disiplin, e li te jwenn li. Piske li te repanti sensèman, Jewova te fè l mizèrikòd. David te tire leson nan disiplin sa a e li te retounen jwenn entegrite l ankò paske l te obeyi Bondye e l te kontinye fè sa nan kèlkeswa sitiyasyon li te ye a. Lavi David se yon egzanp ki ede nou konprann sa nou li nan Pwovèb 24:16 la : “ Moun k’ap mache dwat yo te mèt tonbe sèt fwa. Pa pè, y’ap toujou leve ankò. ” Ki jan Jewova te konsidere David apre sa ? Annou konsidere sa l te di Salomon sou David apre David te fin mouri. (Li 1 Wa 9:4.) Bondye te sonje David kòm yon moun ki gen entegrite. Vrèmanvre, Jewova kapab efase peche yon moun fè, menm yon peche ki grav. — Iza. 1:18.

¹⁹ Wi, lè w obeyi Bondye paske w renmen l, w ap vin gen entegrite. Kontinye andire avèk fidelite, e si w ta fè yon peche grav, demontre w repanti sensèman. Ala yon bèl bagay se lè yon moun gen entegrite ! Se pou nou chak gen menm detèminasyon ak David. Li te di : “ Kanta pou mwen, m ap mache nan entegrite m. ” — Sòm 26:11.

[Nòt anba paj]

Ki repons nou ta bay ?

• Ki jan w ka vin gen entegrite ?

• Ki fason w ka kenbe entegrite w ?

• Si yon moun pèdi entegrite l, ki jan l ka jwenn li ankò ?

[Kesyon]

[Kare nan paj 8]

‘ SE TE YON BÈL AKSYON ’

Pawòl sa yo se yon dam ki te gen senk mwa ansent ki te di yo. Li t ap pale konsènan yon bèl aksyon yon lòt dam ki gen entegrite te fè, yon dam li pa t menm konnen. Dam ansent sa a t al nan yon ti restoran, men kèk èdtan apre l te fin kite kote sa a, li te rann li kont li te kite bous li la. Bous la te gen 2 000 dola ameriken ladan l. An jeneral, li pa konn gen tout kòb sa a sou li. Men sa l di apre sa nan yon jounal : “ Sa te ban m pwoblèm anpil. ” Men, gen yon jèn dam ki te jwenn bous la e menm moman, li te kòmanse ap chèche mèt li. Piske l pa t jwenn mèt bous la, li t al remèt li nan yon komisarya. E finalman, lapolis te jwenn fi ansent lan. Avèk rekonesans, men sa fi sa a te di : “ Se te vrèman, vrèman yon bèl aksyon. ” Poukisa jèn dam nan te fè tout efò sa yo pou l chèche mèt kòb la ? Jounal la te fè konnen antanke Temwen Jewova, jèn dam nan te di li te “ aji avèk entegrite akoz relijyon li te leve ladan l lan ”.

[Foto nan paj 9]

Jèn yo ka kenbe entegrite yo lè yo anba eprèv.

[Foto nan paj 10]

Pandan yon tan, David te pèdi entegrite l, men li te vin jwenn li ankò.