Lè nou rete entèg, nou fè kè Jewova kontan

“ Pitit mwen, aprann gen bon konprann. Fè kè m kontan. Konsa, m’a ka reponn moun k’ap kritike m [nan]. ” — PWO. 27:11.

1, 2. a) Selon liv Jòb la, ki sa Satan te atake ? b) Ki sa ki montre Satan kontinye ap pwovoke Jewova menm apre epòk Jòb la ?

JEWOVA te kite Satan pase entegrite Jòb, yon sèvitè fidèl li, anba eprèv. Se sa k fè Jòb te pèdi bèt li, pitit li ak sante l. Lè Satan te atake entegrite Jòb, se pa sèlman Jòb ki te nan lespri l. Men sa li te di : “ Lavi miyò pase byen ! Yon moun va bay tou sa li genyen pou l pa mouri. ” Atake Satan te atake entegrite Jòb la te soulve yon kesyon ki pa t konsène Jòb sèlman. Kesyon sa a toujou la, byenke Jòb mouri depi byen lontan. — Jòb 2:4.

² Anviwon 600 an apre eprèv Jòb te sibi yo, Bondye te enspire Salomon pou l ekri pawòl nou pral site la yo : “ Pitit mwen, aprann gen bon konprann. Fè kè m kontan. Konsa, m’a ka reponn moun k’ap kritike m [nan]. ” ​(Pwo. 27:11). Sa klè, nan epòk sa a tou, Satan te kontinye ap bay Jewova defi. Anplis, nan yon vizyon apot Jan te fè, li te wè Satan k ap akize sèvitè Bondye yo apre yo te fin mete l deyò nan syèl la yon ti tan apre Wayòm Bondye a te fin etabli an 1914. Jodi a, nou fon nan dènye jou sistèm mechan sa a, e Satan kontinye ap atake entegrite sèvitè Bondye yo. — Rev. 12:10.

3. Ki leson enpòtan nou aprann nan liv Jòb la ?

³ Annou egzamine twa leson enpòtan nou tire nan liv Jòb la. Premyèman, eprèv Jòb te sibi yo montre nou kiyès ki vrè ènmi lèzòm  nan e ki lakòz pèp Bondye a jwenn opozisyon. Ènmi sa a se Satan Ledyab. Dezyèmman, kèlkeswa eprèv nou jwenn, si nou gen yon relasyon sere sere ak Bondye, sa ap ede nou kenbe entegrite nou. Twazyèmman, lè nou jwenn eprèv ki teste entegrite nou, Bondye ap soutni nou menm jan li te soutni Jòb. Nan epòk pa nou an, Jewova soutni nou ak Pawòl li, Labib, ak òganizasyon l lan e ak lespri sen l.

Toujou sonje kiyès ki vrè ènmi nou an

4. Kiyès ki responsab sitiyasyon ki egziste nan monn nan ?

⁴ Anpil moun pa kwè Satan egziste. Se sa k fè, menmsi sitiyasyon ki gen nan monn nan enkyete yo, yo pa rive konprann se Satan Ledyab ki vrèman lakòz sitiyasyon an konsa. Se vre, pifò pwoblèm lòm rankontre yo, se lòm menm ki lakòz yo jwenn pwoblèm sa yo. Premye paran nou yo, Adan ak Èv, te chwazi pran endepandans yo parapò ak Kreyatè a. E depi lè sa a, nan tout jenerasyon ki pase yo rive nan jenerasyon pa nou an, moun yo toujou aji yon fason ki montre yo vrèman pa gen sajès. Sepandan, se Satan ki te twonpe Èv pou l fè l rebele kont Bondye. Se li menm ki etabli monn n ap viv ladan l lan e se avè l li sèvi pou l kontwole moun enpafè ki ladan l yo ki kondane pou yo mouri. Lefètke se Satan ki “ dye sistèm sa a ”, sosyete a sanble ak li. Se sa k fè moun ki ladan l yo ògeye, yo renmen fè diskisyon, yo jalou, yo ava, yo mètdam e yo rebèl (2 Kor. 4:4 NW ; 1 Tim. 2:14 ; 3:6 ; li Jak 3:14, 15). Defo nou sot site yo lakòz gen konfli nan monn nan nan domèn politik ak nan domèn relijye. Yo lakòz gen moun ki rayi moun, gen koripsyon e sosyete a tèt anba. Tout bagay sa yo fè lèzòm soufri anpil.

5. Ki sa nou ta dwe fè ak kokenn konesans nou genyen an ?

⁵ Antanke sèvitè Jewova, ala yon kokenn konesans nou genyen ! Nou konprann kiyès ki lakòz sitiyasyon an ap degrade konsa nan monn nan. Èske nou pa santi nou pouse pou nou patisipe nan ministè a yon fason pou nou fè moun yo konnen kiyès prensipalman k ap kreye pwoblèm nan monn nan ? Èske nou pa kontan pou nou pran pozisyon pou Jewova, vrè Dye a, e pou nou esplike pwochen nou yo ki jan li pral detwi Satan pou l met fen nan pwoblèm lèzòm yo ?

6, 7. a) Kiyès ki lakòz vrè sèvitè Bondye yo jwenn pèsekisyon ? b) Ki jan nou ka imite egzanp Eliyou ?

⁶ Nonsèlman se Satan ki responsab tout tètchaje ki gen nan monn nan, men se li tou ki fè pèp Bondye a jwenn opozisyon. Li detèmine pou l pase nou anba eprèv. Men sa Jezi Kris te di apot Pyè : “ Simon, Simon, koute : Satan mande pouvwa pou l pase nou tout nan laye, tankou grenn y’ap vannen. ” ​(Lik 22:31).  Menm jan tou, jodi a, nou chak n ap jwenn eprèv yon fason oswa yon lòt poutèt n ap suiv tras Jezi. Apot Pyè te konpare Dyab la ak “ yon lyon ki move, k’ap chache moun pou l devore ”. Apot Pòl li menm te di : “ Tout moun ki vle demontre atachman pou Bondye nan lavi yo ann inyon ak Kris Jezi ap jwenn pèsekisyon. ” — 1 Pyè 5:8 ; 2 Tim. 3:12, NW.

⁷ Lè gen yon malè ki rive yon kretyen parèy nou, ki jan nou ka montre nou pa bliye kiyès ki vrè ènmi nou an ? Olye pou nou evite pran kontak ak frè sa a oswa ak sè sa a, nou dwe aji menm jan ak Eliyou ki te pale ak Jòb tankou yon vrè zanmi. Konsa, n ap met ansanm ak frè nou an oswa ak sè nou an pou nou ede l konbat Satan ki se ènmi nou tout (Pwo. 3:27 ; 1 Tes. 5:25). Objektif nou se ede sèvitè parèy nou an kenbe entegrite l, kèlkeswa efò li bezwen fè, pou l fè kè Jewova kontan.

8. Poukisa Satan pa t reyisi fè Jòb sispann onore Jewova ?

⁸ Premye bagay Jòb te pèdi, se bèt li yo. Bèt sa yo te gen anpil valè pou li, petèt se yo ki te pèmèt li jwenn sa l bezwen pou l viv. Men, li te konn sèvi ak yo tou pou l fè sakrifis pou Jewova. Dabitid, apre Jòb fin pirifye pitit li yo, “ nan maten, anvan bajou kase, li leve, li boule ofrann bay Bondye pou mande padon pou yo chak. Li te toujou fè sa, paske li t’ap di nan kè l : Ou pa janm konnen. Pitit gason m yo ka fè peche, yo ka di sa yo pa t dwe di sou Bondye ”. (Jòb 1:4, 5.) Kidonk, Jòb te konn sakrifye bèt pou Jewova regilyèman. Men, apre eprèv la te kòmanse, Jòb pa t kapab fè sa ankò paske li pa t gen ‘ okenn bagay ki gen valè ’ li te kapab itilize pou l onore Jewova (Pwo. 3:9). Sepandan, li te kapab itilize bouch li pou l onore l, e se sa menm li te fè.

Annou chèche gen yon relasyon sere sere ak Jewova

9. Ki sa nou posede ki gen plis valè ?

⁹ Kit nou rich, kit nou pòv, kit nou jèn, kit nou gen anpil laj sou tèt nou, kit nou an sante, kit sante nou pa bon, nou kapab gen yon relasyon sere sere ak Jewova. Kèlkeswa eprèv nou jwenn nan, si nou gen yon relasyon sere ak Bondye, sa ap ede nou kenbe entegrite nou e sa ap ede nou fè kè Jewova kontan. Gen moun ki potko menm byen konnen laverite, epoutan yo te pran pozisyon pou Jewova avèk kouraj e yo te rive kenbe entegrite yo.

10, 11. a) Ki jan yon sè te reyaji devan eprèv li te jwenn ki te teste entegrite l ? b) Ki kokennchenn repons sè sa a te bay Satan ?

¹⁰ Ann pran egzanp yon sè nan peyi Larisi ki te rele Valentina Garnovskaya. Li se youn pami anpil Temwen Jewova nan peyi sa a ki te kenbe entegrite yo menm jan ak Jòb malgre yo te jwenn gwo eprèv. An 1945, lè li te gen 20 an, gen yon frè ki te preche l. Frè a te retounen vizite l an de fwa pou l pale avè l konsènan Labib, men apre sa, Valentina pa janm  wè l ankò. Poutan, Valentina te kòmanse preche vwazen l yo. Se sa k fè yo te arete l e yo te kondane l pou l pase uit an nan prizon. Lè yo lage l an 1953, li rekòmanse travay predikasyon li t ap fè a. Yo arete l ankò, e fwa sa a yo mete l nan prizon pou dizan. Apre li fin pase plizyè ane nan yon prizon, yo voye l nan yon lòt prizon kote te gen kèk sè ki te gen yon Bib. Yon jou, gen youn nan sè yo ki montre l Bib la. Se pa ti kontan Valentina te kontan ! Sèl Bib li te wè anvan sa, se Bib li te wè nan men frè ki te preche l an 1945 lan.

¹¹ Yo te lage Valentina an 1967, e finalman li te batize, byenke li te deja vwe lavi l bay Jewova depi byen lontan. Li te itilize libète l pou l preche avèk zèl jis nan ane 1969. Nan ane sa a, yo te arete l ankò. Fwa sa a, yo te kondane l pou l pase twazan nan prizon. Malgre sa, li te kontinye preche. Anvan l mouri nan ane 2001, li te ede 44 moun vin nan laverite. Li te pase 21 an nan prizon. Li te dispoze sakrifye tout sa l genyen, menm libète l, pou l te ka kenbe entegrite l. Nan fen lavi l, Valentina te di : “ Mwen pa t janm gen pwòp kay pa m. Tout sa m te posede te ka antre nan yon sèl malèt, men, kè m te kontan e mwen te jwenn satisfaksyon nan sèvis Jewova. ” Satan pretann lèzòm pap kenbe entegrite yo lè yo jwenn eprèv, men, èske Valentina pa t ba li yon kokennchenn repons (Jòb 1:9-11) ? Se sèten Valentina te fè kè Jewova kontan e Jewova ap tann lè a rive pou l resisite l ansanm ak tout lòt sèvitè l ki mouri, men ki te kenbe fidelite yo. — Jòb 14:15.

12. Ki wòl lanmou jwe nan relasyon nou ak Jewova ?

¹² Amitye nou genyen avèk Jewova baze sou lanmou nou gen pou li. Nou admire kalite li yo e nou fè sa nou kapab pou nou viv ann amoni ak objektif li. Kontrèman ak sa Satan te di a, nou renmen Jewova ak tout kè nou e san kondisyon. Lanmou sa a ban nou fòs pou nou kenbe entegrite nou lè nou jwenn eprèv. Jewova, bò kote pa l, “ pran defans moun ki kenbe fèm nan sèvis li ”. — Pwo. 2:8 ; Sòm 97:10.

13. Ki jan Jewova wè sa nou fè pou li ?

¹³ Lanmou nou gen pou Jewova ede nou onore non l, menmsi nou santi nou limite nan sa nou ka fè. Li wè mobil nou e li pa jije nou si nou pa rive fè tout sa nou ta renmen fè nan sèvis li. Sa ki enpòtan pou li se pa sèlman sa nou fè nan sèvis li, men tou, se rezon ki pouse nou fè yo. Malgre Jòb t ap soufri e li te andire anpil bagay, li te pale ak moun ki t ap akize l yo konsènan lanmou li te gen pou chemen Jewova yo. (Li Jòb 10:12 ; 28:28.) Nan dènye chapit liv Jòb la, Bondye montre li te an kòlè kont Elifaz, Bildad ak Tsofa paske yo pa t di laverite. Anmenmtan, li te montre li te kontan ak Jòb. Nou kapab wè sa paske an plizyè fwa li pale de Jòb kòm “ sèvitè m lan ” e paske li te ba l enstriksyon pou l ede mesye sa yo jwenn favè l (Jòb 42:7-9). Nou menm tou, se pou nou toujou aji yon fason k ap fè nou gen favè Jewova.

Jewova ede sèvitè fidèl li yo

14. Ki jan Jewova te ede Jòb korije panse l ?

¹⁴ Jòb te kenbe entegrite l malgre li te enpafè. Pafwa, li te gen yon move pwennvi paske li te anba gwo presyon. Pa egzanp, li te di Jewova : “ Mwen rele nan pye ou, Bondye ! Ou pa reponn mwen. [...] Ou sòti pou pèsekite m ak tout fòs ou. ” Anplis, li t ap chèche jistifye  tèt li twòp. Men sa l te di : “ Ou konnen m pa antò ” e “ mwen konnen mwen pa fè ankenn moun mechanste. Mwen lapriyè Bondye ak tout kè m ”. (Jòb 10:7 ; 16:17 ; 30:20, 21.) Malgre sa, Jewova te ede Jòb avèk bonte. Li te poze l yon seri kesyon ki te fè l sispann reflechi sou tèt li. Kesyon sa yo te ede l wè pi byen toujou nan ki pwen Bondye gran e nan ki pwen lòm piti. Jòb te aksepte sa e li te korije panse l. — Li Jòb 40:8 ; 42:2, 6.

15, 16. Ki jan Jewova ede sèvitè l yo jodi a ?

¹⁵ Jodi a tou, avèk bonte, Jewova bay sèvitè l yo bonjan enstriksyon ak bonjan konsèy. Anplis, yo jwenn anpil byenfè. Pa egzanp, Jezi te bay tèt li an sakrifis kòm ranson, e konsa li te poze baz pou lèzòm jwenn padon pou peche yo. Sakrifis sa a pèmèt nou gen yon relasyon sere sere ak Bondye malgre nou enpafè (Jak 4:8 ; 1 Jan 2:1). Lè nou jwenn eprèv, nou priye Bondye pou li ban nou lespri sen l ki se yon èd ki ban nou fòs. Anplis, nou gen Bib la okonplè. Lè nou li l e nou medite sou enfòmasyon ki ladan l yo, sa ede nou prepare nou pou eprèv n ap jwenn k ap teste lafwa nou. Etid nou fè ladan l ede nou konprann kesyon ki gen rapò ak souvrènte inivèsèl la ak kesyon ki gen rapò ak entegrite lòm nan.

¹⁶ Nou jwenn anpil benediksyon tou lefètke nou fè pati yon fanmi espirityèl ki sou tout tè a, ki jwenn manje espirityèl nan men Jewova grasa “ esklav fidèl ki prevwayan an ”. (Mat. 24:45-47, NW.) Nan anviwon 100 000 kongregasyon Temwen Jewova ki gen sou tè a, gen reyinyon ki òganize pou enstwi nou e pou ban nou fòs pou nou ka fè fas ak eprèv nou ka jwenn ki teste lafwa nou. Egzanp Sheila, yon jèn fi ki Temwen Jewova k ap viv ann Almay, montre sa.

17. Bay yon egzanp ki montre li saj pou nou suiv enstriksyon òganizasyon Jewova a ban nou jodi a.

¹⁷ Yon jou, pandan Sheila lekòl, klas li a te vin rete san pwofesè pandan yon ti moman. Nan moman sa a, kamarad li yo te deside fè yon eksperyans avèk yon planchèt Ouija, yon moso planch ki fèt pou pèmèt movèzespri reponn kesyon moun poze. Menm moman an, Sheila kite klas la. Lè l te tande sa k te pase apre sa, li te kontan lefètke li te pran desizyon sa a. Paske, pandan kamarad li yo t ap sèvi ak planchèt la, gen kèk nan yo ki te santi gen demon nan klas la. Se sa k fè yo te panike e yo te chape poul yo. Ki sa k fè Sheila te deside kite klas la byen vit ? Men sa li esplike : “ Sa pa t gen lontan depi yo te fè yon patisipasyon nan Sal Wayòm nan ki te pale sou danje ki gen nan planchèt Ouija yo. Se sa k fè, mwen te konn sa pou m fè. Mwen te vle fè kè Jewova kontan, jan Labib ankouraje nou fè sa nan Pwovèb 27:11 lan. ” Erezman Sheila te nan reyinyon sa a e li te koute avèk atansyon !

18. Ki rezolisyon ou pran pèsonèlman ?

¹⁸ Annou tout pran rezolisyon pou nou suiv enstriksyon òganizasyon Jewova a ban nou. Lè nou asiste reyinyon yo regilyèman, nou li Labib, nou etidye piblikasyon yo ki baze sou Bib la, nou priye e nou frekante kretyen ki gen matirite, n ap jwenn enstriksyon ak èd nou bezwen. Jewova vle pou nou genyen batay n ap mennen pou nou kenbe entegrite nou an e li gen konfyans n ap kontinye kenbe fidelite nou. Ala yon privilèj nou genyen pou nou onore non Jewova, pou nou kenbe entegrite nou e pou nou fè kè l kontan !

Èske nou sonje ?

• Ki sitiyasyon Satan responsab e ki eprèv li fè nou jwenn ?

• Ki sa nou posede ki gen plis valè ?

• Sou ki sa amitye nou ak Jewova baze ?

• Site kèk mwayen Jewova itilize pou l ede nou jodi a.

[Kesyon]

[Foto nan paj 8]

Èske w santi w pouse pou w pataje kokenn konesans ou genyen an ak lòt moun ?

[Foto nan paj 9]

Nou kapab ede adoratè parèy nou yo kenbe entegrite yo.

[Foto nan paj 10]

Valentina te dakò sakrifye tout sa li te genyen pou l te ka kenbe entegrite l.