Annou imite fidelite Itayi

MEN chante “moun ki pote laviktwa sou bèt sovaj la e sou imaj li a” t ap chante nan syèl la: “Travay ou yo gran, e yo estrawòdinè, Jewova Dye, Toupisan an. Chemen w yo jis e yo vrè, Wa letènite. Kiyès ki pap gen lakrentif pou ou vrèman, Jewova, e kiyès ki pap glorifye non w, paske se ou sèl ki fidèl?” Chante sa a atire atansyon sou fidelite Bondye (Rev. 15:2-4, NW). Jewova vle pou sèvitè l yo imite l nan montre yo gen bèl kalite sa a lakay yo. —Efe. 4:24.

Yon lòt bò, Satan fè tout sa li kapab pou l fè sèvitè Bondye yo ki sou tè a pèdi lanmou Bondye y ap adore a gen pou yo a. Malgre sa, gen anpil nan yo ki rete fidèl devan Jewova, menm lè yo anba gwo eprèv. Nou mèt gen konfyans li bay sa anpil valè! Men asirans li bay: “Senyè a renmen moun ki mache dwat. Li pa lage moun ki kenbe fèm nan sèvis li.” ​(Sòm 37:28). Pou l ede nou kenbe fèm nan sèvis li, sètadi pou nou kenbe fidelite nou, li fè mete istwa yon bann moun ki te kenbe fidelite  yo anndan Bib la. Youn nan moun sa yo se Itayi, yon Gitit.

Li pa t ‘moun peyi a, se kouri li te kouri vin kache’ ladan l

Itayi sanble te fèt Gat, yon vil nan peyi Filisti ki te gen renome. Se la jeyan yo rele Golyat la ansanm ak yon seri lòt gwo ènmi pèp Izrayèl la te soti. Premye fwa Labib pale de Itayi, gèrye sa a ki chaje ak eksperyans, se nan epòk Absalòm te òganize yon rebelyon kont David. Itayi ansanm ak 600 Filisten ki te avèk li yo te pran egzil e yo te vin kache toupre Jerizalèm.

Petèt sitiyasyon Itayi ak mesye ki te avè l yo t ap viv la te fè David sonje epòk lè li menm ak 600 gèrye izrayelit ki te avè l yo t al ann egzil nan tèritwa Filisten yo e yo te antre nan zòn kote Akich, wa vil Gat la, te rete a (1 Sam. 27:2, 3). Ki sa Itayi ansanm ak mesye l yo t apral fè nan sitiyasyon sa a kote Absalòm te revòlte kont David la? Èske yo t apral pran pou Absalòm, èske yo t ap rete net, oswa èske yo t ap pran pou David ak mesye l yo?

Imajine sèn nan: David ap kouri kite Jerizalèm. Li fè yon kanpe yon kote yo rele Bètmerak, ki vle di “kay ki lwen an”. Petèt se dènye kay ki gen nan Jerizalèm nan direksyon mòn Oliv, anvan l travèse vale Kidwòn (2 Sam. 15:17; nòt anba paj, NW). David kanpe la pou l kontwole mesye ki avèk li yo. Nonsèlman Izrayelit ki fidèl ak li yo avè l, men, tout Keretit yo ak tout Peletit yo avè l tou. Anplis, tout Gitit yo avèk li, sètadi Itayi ak 600 gèrye l yo. —2 Sam. 15:18.

Lè David wè sa, avèk anpil konpasyon, li di Itayi: “Poukisa ou prale ak nou tou? Tounen non, monchè. Rete ak lòt wa a [sanble li t ap pale de Absalòm]. Ou pa moun peyi a. Se kouri ou kouri vin kache isit la. Ou pa gen lontan depi ou rive. Poukisa jòdi a pou m fè ou ap mache nan bwa tankou vakabon ansanm avèk nou? Mwen pa menm konnen kote mwen prale. Tounen [...] ansanm ak tout moun menm peyi avè ou yo. Mwen mande Senyè a pou l aji byen avè ou, pou l pa janm lage ou!” —2 Sam. 15:19, 20.

Itayi reponn David yon fason ki montre fidelite li gen pou li. Men sa li di l: “Monwa, mwen fè sèman devan Senyè a ak devan ou, se ou menm m’ap sèvi. Kote ou prale mwen pral avè ou, menm si mwen gen pou m mouri.” ​(2 Sam. 15:21). Petèt sa te fè David sonje pawòl gran grann li, Rit, te di yon lè (Rit 1:16, 17). Sa Itayi te di David la te touche l anpil. Se sa k fè David di l: “Ou mèt pran devan nou”, travèse vale Kidwòn nan. “Se konsa Itayi, moun lavil Gat la, ale avèk wa a, li menm, tout moun li yo ansanm ak tout fanmi yo.” —2 Sam. 15:22.

“Pou moutre nou anpil bagay”

Nan Women 15:4, Labib di: “Tou sa ki te ekri nan Liv la depi nan tan lontan, yo te ekri yo pou moutre nou anpil bagay.” Donk, ki leson nou ka aprann nan egzanp Itayi? Annou wè ki sa ki petèt te pouse l pou l fidèl ak David. Menmsi Itayi te yon etranje e li te yon egzile ki te soti Filisti, li te rekonèt se Jewova ki te Dye vivan an e se David li te chwazi. Li te pase sou pwoblèm ki te gen ant Izrayelit yo ak Filisten yo. Li pa t annik wè David antanke yon moun ki te touye Golyat, chanpyon filisten an, ansanm ak anpil lòt moun ki te fèt nan menm peyi avè l (1 Sam. 18:6, 7). Li te wè David se yon moun ki renmen Jewova, e se sèten li te remake bèl kalite li te genyen yo. David, bò kote pa l, te vin apresye Itayi anpil. Li te menm kite yon tyè nan lame l la “sou lòd Itayi” nan dènye batay li t ap fè ak lame Absalòm nan. —2 Sam. 18:2.

Nou menm tou nou ta dwe fè efò pou nou retire prejije ak rankin nou kapab genyen nan kè nou pou moun ki pa gen menm kilti, ki pa soti nan menm ras oswa menm gwoup etnik ak nou, epi nou bezwen rekonèt kalite yo  genyen. Relasyon ki te vin egziste ant David ak Itayi a montre nou kapab fè sa si nou aprann konnen Jewova e nou aprann renmen l.

Pandan n ap reflechi sou egzanp Itayi a, nou kapab poze tèt nou kesyon sa yo: ‘Èske jan Itayi te atache ak David la, se konsa tou mwen atache ak Gran David la, Kris Jezi? Èske mwen montre mwen fidèl ak li lè m patisipe avèk zèl nan preche bon nouvèl Wayòm nan ak nan travay fè disip la?’ ​(Mat. 24:14; 28:19, 20). ‘Ki sa mwen dispoze fè pou m demontre fidelite m?’

Chèf fanmi yo ap tire pwofi tou si yo medite sou egzanp Itayi. Fidelite l anvè David, wa Bondye te chwazi a, ak desizyon li te pran pou l ale avè l la te gen enfliyans sou mesye ki te avè l yo. Menm jan an tou, desizyon chèf fanmi yo pran an favè vrè adorasyon an gen enfliyans sou fanmi yo. Desizyon sa yo ka menm lakòz fanmi yo rankontre difikilte pandan yon tan. Sepandan, men asirans nou genyen: “Avèk yon moun ki fidèl, [Jewova] ap aji ak fidelite.” —Sòm 18:25, NW.

Apre batay ki te fèt ant lame David ak lame Absalòm nan, Labib pa pale de Itayi ankò. Sepandan, ti pale li fè sou li a, nan yon epòk difisil nan lavi David la, fè nou vrèman konprann ki kalite moun li te ye. Lefètke yo mansyone Itayi nan Bib la, sa montre Jewova wè lè yon moun aji avèk fidelite e li rekonpanse moun ki aji konsa a. —Ebre 6:10.