Ki kote ou ta dwe ye lè lafen an vini?

LÈ JEWOVA ap met fen nan sistèm mechan sa a nan lagè Amagedòn nan, ki sa ki pral rive moun ki dwat yo? Men repons nou jwenn nan Pwovèb 2:21, 22 (NW): “Se moun ki dwat yo ki pral abite sou tè a, e se moun ki entèg yo ki pral rete sou li. Kanta mechan yo, y ap rache yo nan tè a, e trèt yo menm, y ap derasinen yo ladan l.”

Sepandan, ki jan moun ki entèg yo ap fè rete sou tè a? Èske pral gen yon kote y ap kapab jwenn refij? Ki kote moun ki dwat yo ta dwe ye lè lafen an vini? Gen kat istwa Labib rakonte kote gen moun ki te chape vivan. Istwa sa yo pral ede nou reponn kesyon sa yo.

Kote yo te ye te enpòtan

Men sa nou li nan 2 Pyè 2:5-7 konsènan fason Jewova te delivre patriyach Noye ak patriyach Lòt: “Bondye pat fè pa moun nan tan lontan yo. Men, li te delivre Noe, yon nonm ki te mache dwat devan li, ansanm ak sèt lòt moun lè li te voye gwo inondasyon an sou mechan yo. Li te kondannen lavil Sodòm ak lavil Gomò pou yo te disparèt, li fè yo tounen sann, pou sa te sèvi yon egzanp pou tout mechan ki gen pou vini apre yo. Men, li te delivre Lòt, yon nonm dwat ki te pran lapenn lè l te wè move bagay mechan yo t’ap fè.”

Ki jan Noye te rive chape vivan nan delij la? Men sa Bondye te di Noye: “Mwen deside pou m fini ak tout moun, paske se yo ki lakòz toupatou sou latè se mechanste ase. Wi, mwen pral detwi yo nèt ansanm ak tout sa ki sou latè. Fè yon gwo batiman pou ou ak bwa [ki sanble ak] pichpen.” ​(Jen. 6:13, 14). Noye te konstwi lach la jan Jewova te ba l lòd pou l fè l la. Sèt jou anvan dlo delij la te kòmanse tonbe sou tè a, Jewova te ba l lòd pou l rasanble zannimo mete anndan lach la e pou l antre ladan l ak fanmi l. Nan setyèm jou a, Bondye fèmen pòt lach la. E apre sa, “lapli tonbe san rete pandan karant jou karant nwit”. (Jen. 7:1-4, 11, 12, 16.) Bib la di Noye ak fanmi l “te sove nan dlo a”. (1 Pyè 3:20.) Pou yo te ka sove, yo te dwe anndan lach la. Pa t gen okenn lòt kote sou tè a yo te kapab an sekirite. —Jen. 7:19, 20.

Nan ka Lòt, enstriksyon li te resevwa yo te yon ti jan diferan. Te gen de zanj ki te di l li pa t dwe rete kote li te ye a. Yo te di l: “Pran [...] tout bagay ou gen nan lavil [Sodòm], mete kò ou deyò. Nou pral detwi tout bò isit la.” Li menm ak fanmi l te dwe “kouri al nan mòn yo”. —Jen. 19:12, 13, 17.

Evènman Noye ak Lòt te viv yo montre “Bondye konnen ki jan pou l delivre moun k’ap sèvi l yo nan mitan eprèv. Men, li kite mechan yo pou l ka pini yo jou jijman an”. (2 Pyè 2:9.) Nan toule de ka sa yo, delivrans moun yo te depann de kote yo te ye. Noye te oblije antre anndan lach la e Lòt te oblije soti deyò vil Sodòm. Èske se konsa sa toujou ye? Èske Jewova ka sove moun ki dwat kèlkeswa kote yo ye, san yo pa oblije deplase al yon lòt kote? Pou nou jwenn repons kesyon sa yo, annou egzamine de lòt evènman ki te pase kote gen moun Jewova te sove.

Èske kote yon moun ye toujou enpòtan?

Anvan Jewova te ravaje peyi Ejip nèt ak dizyèm flewo li te lage sou li nan epòk Moyiz la, li te bay Izrayelit yo lòd pou yo pase san bèt yo te touye pou fèt Pak la sou lento ak  chanbrann pòt kay yo. Poukisa? Se te yon fason pou lè Jewova ta ‘pase nan peyi Lejip pou touye moun peyi Lejip yo, li ta kapab wè san an sou chanbrann yo ak sou lento a, li ta kapab pase [pa anlè] pòt la. Konsa, li ta kapab anpeche yo antre lakay yo pou touye yo’. Nan menm nuit sa a, Jewova te “touye tout premye pitit gason moun peyi Lejip yo, depi premye pitit gason farawon an ki chita sou fotèy la, jouk premye pitit gason prizonye ki te nan kacho. Tout premye pitit bèt yo tou te mouri.” Premye pitit ki te pami Izrayelit yo te chape san yo pa t oblije deplase al yon lòt kote. —Egz. 12:22, 23, 29.

Kounye a, ann egzamine yon evènman Rahab, yon pwostitye nan vil Jeriko, te viv. Izrayelit yo te rive nan moman kote Bondye t apral kòmanse ba yo Latè pwomiz. Lè Rahab te vin konprann Izrayèl t ap kraze Jeriko, li te di de espyon yo moun nan vil la te pè anpil paske yo konnen Izrayelit yo ap pwoche pre vil la. Li te kache de espyon yo e li te mande yo pou yo jire y ap epaye li menm ak fanmi l lè yo pran vil la. Espyon yo te bay Rahab lòd pou l rasanble fanmi l lakay li ki te sou miray vil la. Si yo ta kite kay la, yo t ap tou peri ansanm ak moun vil la (Joz. 2:8-13, 15, 18, 19). Sepandan, annapre, Jewova te di Jozye “miray ranpa lavil la pral tonbe plat atè”. (Joz. 6:5.) Kidonk, kote espyon yo te mande Rahab ak fanmi l rete pou yo an sekirite a te vin sanble an danje. Ki jan Rahab ak fanmi l t apral fè sove menm?

Lè lè a te rive pou Izrayelit yo pran Jeriko, yo te fè yon gwo rèl e yo te soufle kòn yo. Men sa Jozye 6:20 di: “Tande pèp [Izrayèl] la te tande son kòn belye yo, yo pouse yon sèl gwo rèl, epi miray ranpa lavil la tonbe plat atè.” Nan moman sa a, pa t gen okenn moun ki te kapab anpeche miray la tonbe. Sepandan, pati nan miray la kote kay Rahab te ye a pa t tonbe. Se te yon mirak. Apre sa, Jozye di de espyon yo: “Ale lakay jennès la. Fè l sòti ak tout fanmi li, jan nou te pwomèt li a.” ​(Joz. 6:22). Tout moun ki te lakay Rahab yo te sove.

Ki sa ki pi enpòtan?

Ki sa nou kapab aprann nan delivrans Noye, Lòt, Izrayelit ki te nan epòk Moyiz yo ak Rahab? Ki jan istwa delivrans sa yo ede nou konprann ki kote nou ta dwe ye lè fen sistèm mechan sa a rive?

Se vre, Noye te sove paske li te nan lach la. Men, sa k fè li te ladan l? Èske se pa paske li te gen lafwa nan Bondye e li te obeyisan? Labib di “Noe [te] fè tout sa Bondye te ba li lòd fè a. [...] Se sa menm li te fè”. (Jen. 6:22; Ebre 11:7.) E nou menm? Èske nou fè tout sa Bondye mande nou fè? Noye te yon nonm ki “t ap  preche jistis” tou (2 Pyè 2:5, Bib Kreyòl La). Menm jan ak li, èske nou zele nan travay predikasyon an, menmsi pa gen anpil moun nan tèritwa nou ki koute nou lè n ap preche?

Lòt te sove paske li te kite Sodòm. Li te sove paske Bondye te konsidere l kòm yon moun ki jis e paske move bagay moun ki t ap viv nan Sodòm ak Gomò t ap fè yo te ba l pwoblèm anpil. Èske move bagay moun ki pa respekte lalwa yo ap fè jodi a ban nou pwoblèm anpil? Oubyen èske nou tèlman fin abitye ak sa y ap fè yo, sa pa di nou anyen ankò? Èske nou fè tout sa nou kapab pou Bondye “jwenn nou ap viv ak kè poze, san okenn fòt, ni okenn defo”? —2 Pyè 3:14.

Pou Izrayelit yo ki te ann Ejip te sove e pou Rahab ki t ap viv nan vil Jeriko te sove, yo te oblije rete anndan lakay yo. Sa te mande pou yo gen lafwa e pou yo obeyisan (Ebre 11:28, 30, 31). Imajine jan chak fanmi izrayelit te dwe ap gade premye pitit ki te fèt nan fanmi an lè yo te tande “gwo rèl pete” lakay chak fanmi ejipsyen yo (Egz. 12:30). Imajine jan Rahab dwe te sere kò l ansanm ak fanmi l lè li te tande bri miray la k ap tonbe a t ap mache vin jwenn yo. Pou l te aji avèk obeyisans e pou l te rete nan kay la, sa te mande pou l gen lafwa toutbon.

Talè konsa, monn mechan Satan an pral rive nan bout li. Ki jan Jewova pral pwoteje pèp li a nan jou terifyan k ap vini an, sètadi ‘jou li pral fè wè kòlè li a’? Nou poko konnen (Sef. 2:3). Sepandan, kèlkeswa kote nou ye a, kèlkeswa sitiyasyon n ap viv la, nou mèt sèten n ap sove depi nou gen lafwa nan Jewova e nou obeyi l. Antretan, nou bezwen devlope yon bon atitid parapò ak sa Izayi te rele “chanm ki anndan yo” ​(NW) nan pwofesi l la.

“Antre nan chanm ki anndan yo”

Men sa Izayi 26:20 (NW) di: “Ale, pèp mwen an, antre nan chanm ki anndan yo, epi fèmen pòt ou yo dèyè w. Kache pou yon ti moman jiskaske kondanasyon an fin pase.” Pwofesi sa a petèt te jwenn premye akonplisman l nan ane 539 anvan epòk nou an lè Mèd yo ak Pès yo te konkeri Babilòn. Sanble lè Siris te antre Babilòn li te di se pou tout moun rete lakay yo paske li te bay sòlda l yo lòd pou yo touye tout moun yo te jwenn nan lari a.

Nan epòk pa nou an, “chanm ki anndan yo” kapab fè referans ak plis pase 100 000 kongregasyon Temwen Jewova ki sou tout tè a. Kongregasyon yo jwe yon wòl enpòtan nan lavi nou e y ap kontinye jwe wòl sa a pandan “gwo tribilasyon an”. (Rev. 7:14, Bib Kreyòl La.) Sèvitè Bondye yo jwenn lòd pou yo antre nan “chanm ki anndan yo” pou yo kache “jiskaske kondanasyon an fin pase”. Li enpòtan anpil pou nou vin gen yon bon pwennvi sou kongregasyon an, pou nou kenbe pwennvi sa a e pou nou pran detèminasyon fèm pou nou rete kole ak kongregasyon an. Annou suiv konsèy sa a Pòl te bay la: “Se pou nou yonn veye sou lòt pou yonn ka ede lòt gen renmen nan kè nou, pou yonn ka ankouraje lòt nan fè sa ki byen. Pa pran egzanp sou moun ki pran abitid pa vin nan reyinyon nou yo. Okontrè, se pou yonn ankouraje lòt fè sa, kounyeya pi plis pase anvan, paske nou wè jou Senyè a ap pwoche.” —Ebre 10:24, 25.

[Foto nan paj 7]

Ki sa nou ka aprann nan aksyon Jewova te fè pou l delivre kèk moun nan tan lontan?

[Foto nan paj 8]

Ki sa “chanm ki anndan yo” gendwa ye nan epòk pa nou an?