Kesyon lektè yo poze

Kòman fè Jezi te kapab di yon fi moun te konnen kòm yon pechè peche l yo padone? —Lik 7:37, 48.

Pandan Jezi t ap manje lakay yon Farizyen yo rele Simon, gen yon fi ki vini ‘li mete kò l bò pye Jezi’. Pandan li t ap kriye, dlo nan je l te tonbe sou pye Jezi, epi li siye pye Jezi ak cheve l. Apre sa, li bo pye l epi li pase yon luil ki santi bon sou yo. Sa yo di nan Evanjil Lik la montre byen klè fi sa a te yon pechè. Tout moun se pechè, men, nan Ekriti yo, yo sèvi ak mo sa a pou yo pale de yon moun ki gen repitasyon moun k ap viv nan peche. Sandout, fi sa a te yon pwostitye. Se yon moun konsa Jezi te di: “Peche ou yo padonnen.” ​(Lik 7:36-38, 48). Ki sa Jezi te vle di lè l te di sa? Piske Jezi potko bay sakrifis ranson an, kòman fè li te kapab padone peche fi a?

Apre fi a te fin mouye pye Jezi ak dlo nan je l, li te siye yo ak cheve l e li te pase luil sou yo, men, anvan Jezi te di fi a li padone l, Jezi te bay yon egzanp pou l fè Simon konprann yon pwen enpòtan. Jezi te konpare peche ak yon gwo dèt yon moun genyen li pa ka peye. Men sa li te di l: “Te genyen de moun ki te dwe yon nonm ki konn prete moun kòb. Youn te dwe senk san denye, lòt la te dwe senkant. Men, yo pa t genyen dekwa pou yo remèt dèt yo. Alò, nonm nan anile dèt la pou yo tou de. Donk, di m kilès nan yo k ap renmen l plis?” Kòm repons, Simon te di: “Mwen ta sipoze se sa li anile plis dèt pou li a.” Apre sa Jezi di l: “Rezònman w lan kòrèk!” ​(Lik 7:41-43, Bib Kreyòl La). Nou tout nou dwe Bondye obeyisans. Lè nou dezobeyi l e nou peche, nou pa ba li sa nou dwe l. Konsa, nou vin gen plis dèt. Sepandan, Jewova tankou yon moun ki prete yon moun kòb e ki dispoze anile dèt moun nan. Se sa k fè Jezi te ankouraje disip li yo pou yo priye Bondye e pou yo mande l: “Padonnen tou sa nou fè ki mal, menm jan nou padonnen moun ki fè nou mal.” ​(Mat. 6:12). Lik 11:4 fè konnen sa nou fè ki mal yo, oswa dèt nou yo, se peche.

Sou ki baz Bondye te padone peche nan tan lontan? Piske Bondye jis, yon moun ki peche kont li, moun sa a merite mouri. Se sa k fè lè Adan te peche, li te mouri. Sepandan, sou Lalwa Bondye te bay pèp Izrayèl la, yon moun ki te peche te kapab jwenn padon lè l sakrifye yon bèt pou Jewova. Men sa apot Pòl te di: ‘Dapre lalwa, san mete prèske tout bagay nan kondisyon pou fè sèvis Bondye. Si san pa koule, nanpwen padon pou peche.’ ​(Ebre 9:22). Juif yo te konnen pa t gen okenn lòt fason pou yon moun ki peche jwenn padon nan men Bondye. Se sa k fè sa pa etonan gen moun ki pa t dakò ak sa Jezi te di fi a. Moun ki t ap manje avèk Jezi yo te di nan kè yo: “Ki moun nonm sa a ye menm pou li padonnen peche?” ​(Lik 7:49). Donk, sou ki baz Jezi te kapab padone fi sa a ki t ap benyen nan peche?

Apre Adan ak Èv te fin peche, nan premye pwofesi ki parèt nan Bib la, Jewova pale de objektif li te genyen pou l fè yon “desandans” vini. Desandans sa a, Satan ak “desandans” pa l la t apral blese l nan talon (Jen. 3:15, NW). Sa te fèt lè ènmi Bondye yo te touye Jezi (Gal. 3:13, 16). San Jezi sèvi kòm ranson pou libere lèzòm anba peche ak lanmò. Piske anyen pa ka anpeche Jewova akonpli objektif li, depi moman li te di pawòl ki ekri nan Jenèz 3:15 yo, pou li menm, li te deja bay ranson an. Sou baz sa a, li te kapab padone moun ki gen lafwa nan pwomès li yo.

Anvan epòk kretyen yo, Jewova te konsidere anpil moun kòm moun ki jis. Pami  moun sa yo te gen Enòk, Noye, Abraram, Rahab ak Jòb. Yo te gen lafwa, se sa k fè yo t ap tann pou Bondye akonpli pwomès li yo. Men sa disip Jak te ekri: “Abraram te kwè nan Bondye. Epi Bondye [te] konsidere sa tankou jistis pou Abraram.” Men sa li te di konsènan Rahab: “Se menm jan an tou pou Rahab, jenès la [...], èske se pa dapre zèv li yo Bondye te jistifye li?” —Jak 2:21-25, Bib Kreyòl La.

Wa David t ap dirije pèp Izrayèl nan tan lontan an e li te fè plizyè peche grav. Sepandan, li te gen yon lafwa solid nan vrè Dye a, e nan chak okazyon sa yo, li te repanti sensèman. Anplis, Ekriti yo di: “Se li menm, Jezikri, Bondye te ofri tankou bèt pou touye. Li bay san li pou tout moun ki mete konfyans yo nan li ka resevwa padon pou peche yo. Bondye te vle moutre nou ki jan li fè moun gras. Nan tan lontan, Bondye te pran pasyans, li te fèmen je l sou peche moun te fè. Men kounyeya, li moutre nou ki jan l’ap fè moun gras, paske li fè nou wè se li menm ki gen rezon, anmenmtan l’ap fè tout moun ki kwè nan Jezi yo gras.” ​(Wom. 3:25, 26). Sou baz sakrifis Jezi te gen pou bay alavni an, Jewova te kapab padone peche David te fè yo san li pa t pase prensip jis li yo anba pye.

Li klè, fi ki te pase luil sou pye Jezi a te nan menm sitiyasyon an. Li t ap viv yon vi imoral, men li te repanti. Li te konprann li te nesesè pou yon moun delivre l anba esklavaj peche, e aksyon li te fè yo montre li te vrèman gen rekonesans pou moun Jewova t apral itilize pou delivre l la. Byenke sakrifis la potko fèt, lefètke li t ap fèt san mank, moun ki te nan sitiyasyon fi sa a te kapab jwenn padon pou peche yo grasa sakrifis sa a. Se sa k fè Jezi te di fi a: “Peche ou yo padonnen.”

Jan pasaj sa a montre sa byen klè, Jezi pa t repouse moun k ap viv nan peche. Li te aji byen ak yo. Anplis, Jewova dispoze padone peche moun ki repanti yo. Se pa ti asirans sa ban nou, e se pa ti ankourajan sa ankourajan pou nou antanke enpafè!

[Foto nan paj 7]

Yo te konsidere yo kòm moun ki jis.