Pa twonpe tèt nou ak fo rezònman

APRE Èv te fin manje fwi pyebwa Bondye te di pa manje ladan l lan, Bondye mande l: “Poukisa ou fè sa?” Èv reponn: “Se sèpan an wi ki pran tèt mwen ki fè m manje l.” ​(Jen. 3:13). Apre Satan, sèpan magouyè a, te fè Èv dezobeyi Bondye, yo te vin rele l “premye sèpan an [...] k ap twonpe lemonnantye”. — Rev. 12:9.

Istwa sa a nou jwenn nan liv Jenèz la pale de Satan kòm yon moun ki rize, yon moun k ap gaye manti pou l ka twonpe moun ki nayif. Li te rive twonpe Èv. Men, nou pa dwe panse se sèl Satan ki ka twonpe nou. Labib di nou tou pou n fè atansyon pou nou pa “twonpe tèt nou ak fo rezònman”. — Jak 1:22.

Nou ka panse li t ap difisil anpil pou nou twonpe tèt nou oswa sa pa ka rive nou. Men, se pa san rezon Bondye ban nou avètisman sa a. Kidonk, l ap bon pou nou egzamine kòman nou ka twonpe tèt nou e ki kalite fo rezònman ki ka fè nou twonpe tèt nou. Men yon egzanp ki sot nan Bib la ki ka ede nou.

Moun ki te twonpe tèt yo

Ozanviwon ane 537 anvan epòk nou an, Siris Legran, wa peyi Pès, te pase yon lwa pou Juif ki te egzile nan Babilòn yo tounen Jerizalèm e pou yo rebati tanp lan (Ezra 1:1, 2). Nan ane apre a, pèp la te poze fondasyon pou yon nouvo tanp, ann amoni ak objektif Jewova. Moun ki te tounen yo te kontan e yo te louwe Jewova paske li te beni premye etap gwo pwojè sa a (Ezra 3:8, 10, 11). Men, sa pa t pran lontan pou te gen moun ki opoze ak pwojè rekonstriksyon an, e pèp la te vin dekouraje (Ezra 4:4). Anviwon 15 an apre pèp la te fin tounen, otorite peyi Pès yo te entèdi tout travay konstriksyon nan Jerizalèm. Pou reprezantan otorite peyi Pès yo ki te nan zòn nan te ka fè respekte entèdiksyon an, yo vini Jerizalèm e ‘yo fòse Juif yo sispann travay la avèk zam nan men yo’. — Ezra 4:21-24.

Gwo pwoblèm sa a te vin lakòz Juif yo twonpe tèt yo ak fo rezònman. Yo te panse “se poko lè pou yo bati kay Senyè a”. (Aga. 1:2.) Yo te kwè Bondye potko vle yo bati tanp lan. Olye yo te chèche yon fason pou yo fè volonte l, yo te abandone travay sakre sa a Bondye te ba yo fè a e sa k te vin enterese yo se fè kay pa yo vin pi bèl. Ak rezon, Agayi, pwofèt Bondye a, te mande yo: “Ki jan nou fè pa wont rete nan gwo kay nou byen alèz, epi nou kite kay Bondye a [tanp lan] tou kraze?” — Aga. 1:4.

Èske w pran yon leson nan egzanp sa a? Si nou panse lè pou Bondye reyalize objektif li a poko ap rive, sa ka fè nou neglije aktivite espirityèl nou yo e sa ka fè nou konsantre plis sou aktivite pèsonèl nou. Ann pran yon egzanp: Imajine ou gen pou w resevwa kèk moun lakay ou. Pandan w ap tann yo vini, sa ka fè w adwat agoch ap fè tout travay ki gen pou fèt nan kay la pou w prepare pou yo. Men, antretan, yo voye di w y ap pran yon ti tan pou yo rive. Èske w t ap kanpe sou preparasyon ou t ap fè pou w resevwa yo a?

Men, pa bliye, Agayi ak Zekarya te ede Juif yo konprann Jewova te vle yo rebati tanp lan san pèdi tan. Agayi te ankouraje yo, li te di: “Kouray, nou tout ki rete nan peyi a! [...] Mete men nan travay la.” ​(Aga. 2:4). Yo te dwe gen konfyans lespri Bondye t ap avèk yo epi yo te dwe kontinye travay yo te gen pou  yo fè a (Zek. 4:6, 7). Anrapò ak jou Jewova a, èske lè nou reflechi sou egzanp sa a, sa pa ka ede nou pou nou pa mal konprann bagay yo? — 1 Kor. 10:11.

Ranplase fo rezònman ak bonjan rezònman

Nan dezyèm lèt apot Pyè te ekri a, apot la te pale de yon lè kote Jewova pral fè “yon syèl tounèf ak yon tè tounèf”. (2 Pyè 3:13.) Li te remake gen kèk moun k ap pase moun nan rizib ki te fè konprann Bondye pa t ap janm antre nan zafè lèzòm. Yo te fè kwè pa gen anyen ki t ap gen pou pase, piske selon yo menm “tout bagay [te] rete egzakteman jan yo te ye depi nan kòmansman kreyasyon an”, men yo pa t gen rezon (2 Pyè 3:4). Pyè te vle demanti fo rezònman sa a. Men sa l te ekri: “M ap fè nou sonje kèk bagay pou m ka reveye kapasite nou genyen pou nou byen reflechi.” Li te fè kretyen parèy li yo sonje moun sa yo k ap pase yo nan rizib yo te nan erè. Bondye te deja antre nan zafè lèzòm lè l te fè yon gwo delij vide sou tout tè a ki te detwi prèske tout moun. — 2 Pyè 3:1, 5-7.

Nan ane 520 anvan epòk nou an, Agayi te bay Juif ki te dekouraje e ki te sispann travay yo t ap fè a yon avètisman menm jan an. Li te di yo: “Fikse kè nou sou fason n ap aji.” ​(Aga. 1:5, NW). Pou l te ka reveye kapasite moun k ap sèvi Bondye menm jan avè l yo genyen pou yo reflechi, li te fè yo sonje objektif ak pwomès Bondye pou pèp li a (Aga. 1:8; 2:4, 5). Tousuit apre ankourajman sa a, travay konstriksyon an te rekòmanse, malgre entèdiksyon otorite yo te bay la. Yon lòt fwa, ènmi yo te eseye kanpe travay konstriksyon an, men yo pa t rive fè sa. Otorite yo te vin leve entèdiksyon an, e tanp lan te fin bati senk an apre. — Ezra 6:14, 15; Aga. 1:14, 15.

Fikse kè nou sou fason n ap aji

Èske w panse lè nou gen pwoblèm sa ka fè nou dekouraje menm jan ak Juif nan epòk Agayi yo? Si sa ta rive, li ka difisil pou nou kenbe zèl nou nan travay preche bon nouvèl la. Men, ki sa ki ka lakòz nou dekouraje? Nou ka ap soufri akoz enjistis ki gen nan sistèm nan. Sonje Abakouk ki te di: “Konbe tan ankò pou m pase ap rele ou, ap mande ou sekou anvan pou ou tande m? Konbe tan ankò pou m pase ap rele nan zòrèy ou anvan pou ou vin delivre nou anba moun k’ap maltrete nou yo?” ​(Aba. 1:2). Gen kèk moun ki panse se anreta jou Jewova a anreta, e akoz de sa li posib pou yon kretyen pa santi nesesite pou l aji ann ijans e li ka plis anvi mennen yon vi ki konfòtab. Èske w panse sa ka rive w? Si nou reflechi konsa, n ap twonpe tèt nou. Li esansyèl pou nou suiv konsèy biblik ki di pou nou “fikse kè nou sou fason n ap aji” a e pou nou ‘reveye kapasite nou genyen pou nou byen reflechi’. Nou ka mande tèt nou: ‘Èske m ta dwe sezi si sistèm mechan sa a dire pi lontan pase sa m te panse?’

Yon peryòd Bib la te pale de li

Ann pran yon ti tan pou nou egzamine sa Jezi te di konsènan fen sistèm sa a. Nan Evanjil  Mak la, Mak pale de pwofesi Jezi te bay konsènan dènye jou yo e li montre Jezi te repete avètisman pou nou rete je klè a plizyè fwa (Mak 13:33-37). Gen yon avètisman ki sanble ak avètisman sa a nou jwenn nan pwofesi ki bay detay sou Amagedòn nan, gran jou Jewova a (Rev. 16:14-16). Poukisa yo repete avètisman yo? Rapèl sa yo nesesè paske lè moun ap tann yon bagay ki sanble pran plis tan pou l rive pase sa yo te panse, gen posiblite pou moun sa yo pa wè enpòtans pou yo aji ann ijans ankò.

Jezi bay yon egzanp pou montre nesesite pou nou kontinye veye pandan n ap tann fen sistèm nan. Li te pale de yon mèt kay vòlè te kase kay li. Ki jan mèt kay la te ka evite sa? Li t ap ka evite sa si l te rete je klè pandan tout nuit la. Lè Jezi t ap fini ak egzanp lan, li te ban nou yon konsèy: “Se pou nou pare, paske se nan yon lè nou pa panse Pitit lòm nan ap vini.” — Mat. 24:43, 44.

Egzanp sa a montre nesesite pou nou prepare nou pou nou tann, menmsi se pou yon bon ti kou tan. Nou pa ta dwe bay tèt nou twòp pwoblèm lefètke sistèm sa a sanble pran plis tan pou l fini pase sa nou te panse. Nou pa ta dwe twonpe tèt nou ak fo rezònman kòmkwa ‘se poko lè Jewova a’. Panse sa yo ap kraze anvi nou genyen pou nou preche bon nouvèl Wayòm nan. — Wom. 12:11.

Derasinen fo rezònman

Anrapò ak kesyon fo rezònman an, prensip ki nan Galat 6:7 la kapab ede nou: “Pa twonpe tèt nou [...] Kèlkeswa sa yon moun simen, se sa l ap rekòlte tou.” Si nou pa plante anyen sou yon tè, move zèb ap anvayi l byen fasil. Menm jan an tou, si nou pa reveye kapasite nou genyen pou nou byen reflechi, fo rezònman ka pran rasin nan lespri nou. Pa egzanp, nou ka di tèt nou: ‘Jou Jewova a ap vini kanmenm, men se pa kounye a.’ Si nou kòmanse panse konsa, sa ka fè nou vin gen yon konpòtman manfouben anrapò ak aktivite nou antanke kretyen. Avèk letan, nou ka kòmanse neglije aktivite sa yo e jou Jewova a ka vin sou nou san nou pa atann. — 2 Pyè 3:10.

Men, fo rezònman pap pran rasin nan lespri nou si nou toujou verifye pèsonèlman “sa ki volonte Bondye, yon volonte ki bon, ki agreyab e ki pafè”. (Wom. 12:2.) Youn nan pi bon bagay pou nou fè k ap ede nou, se li Pawòl Bondye a regilyèman. Ekriti yo kapab ban nou plis konviksyon Jewova toujou aji nan lè li fikse a. — Aba. 2:3.

Etid Labib, lapriyè, asiste reyinyon yo regilyèman, preche ak aksyon nou fè ki demontre bonte, tout sa ap ede nou ‘kenbe jou Jewova a nan lespri nou’. (2 Pyè 3:11, 12.) Jewova ap remake fidelite nou. Men sa apot Pòl fè nou sonje: “Annou pa sispann fè sa ki byen, paske lè lè a rive, n ap rekòlte, si nou pa kite fatig pote n ale.” — Gal. 6:9.

Kounye a se pa lemoman pou nou kite fo rezònman twonpe nou pou nou panse jou Jewova a poko ap vini. Olye de sa, se lemoman pou nou kenbe fèm nan sèvis nou, paske jou Jewova a toupre.

[Foto nan paj 4]

Agayi ak Zekarya te ankouraje Juif yo pou yo bati tanp lan.

[Foto nan paj 5]

Ki sa k t ap pase si mèt kay la te konnen vòlè a t ap vini?