Wi, se Toudegad ki gen atik etid yo!

Nou fè kèk chanjman nan Toudegad ki gen atik etid yo pou l ka parèt pi bèl e pou l ka ede nou pi byen aprann verite ki soti nan Pawòl Bondye a ki gen anpil valè. — Sòm 1:2; 119:97.

Sa gen katran depi nou te kòmanse pibliye de nimewo Toudegad, youn pou piblik la, youn pou nou menm Temwen Jewova yo ansanm ak etidyan nou genyen k ap pwogrese yo.

Men sa yon moun k ap sèvi Jewova depi lontan ekri sou Toudegad ki gen atik etid yo: “Premye Toudegad ki gen atik etid yo te vrèman bèl e l te gen gwo efè sou mwen. Langaj ak enfòmasyon ki ladan l yo pwofon e yo gen gwo efè sou mwen tou. Mèsi anpil pou kado estrawòdinè sa a.” Gen yon lòt frè ki ekri: “Mwen pare pou m pase plizyè èdtan poukont mwen ap etidye Toudegad ki gen atik etid yo ak Bib mwen nan men m!” Sandout se konsa nou santi nou tou.

Kòm nou konnen, y ap pibliye Toudegad depi 1879, e sa rive fèt sèlman grasa lespri sen ansanm ak benediksyon Jewova (Zek. 4:6). Pandan 133 ane sa yo, gen anpil chanjman ki te fèt nan paj kouvèti peryodik sa a. Pandan ane 2012 la, sou paj kouvèti Toudegad ki gen atik etid yo, pral gen yon tablo yon atis fè k ap montre kèk Temwen Jewova k ap preche. Sa ap ede nou sonje travay Jewova ban nou fè a ki se bay yon temwayaj konplè sou Wayòm li an (Tra. 28:23). Nan paj 2 Toudegad la, n ap jwenn foto yo te itilize pou yo fè tablo ki sou paj kouvèti a ansanm ak yon ti esplikasyon sou foto a. Pandan ane a, sa ap ede nou sonje pèp Jewova a ap preche bon nouvèl la “sou tout tè a”. — Mat. 24:14.

Ki lòt chanjman ki fèt nan Toudegad la? Yo mete kare revizyon an nan kòmansman chak atik etid. Sa ap pèmèt nou wè pwen prensipal nou dwe chèche lè n ap li atik la e lè n ap etidye l. Byennantandi, kondiktè etid Toudegad yo ap kontinye poze kesyon revizyon yo nan fen etid la. N ap remake maj yo yon ti jan pi gwo e nimewo paj yo ak nimewo paragraf yo pi byen parèt.

Jan Toudegad pou mwa sa a montre sa, gen yon nouvo ribrik ki rele “Bagay ki nan achiv nou” ki montre bagay enpòtan ki te fèt nan istwa Temwen Jewova yo nan epòk nou an. Gen yon lòt ribrik ki rele “Yo te ofri tèt yo volontèman” k ap parèt detanzantan. Nan ribrik sa a n ap jwenn eksperyans kèk frè ak sè te fè. Eksperyans sa yo pral pale yon fason ki vivan sou satisfaksyon ak kè kontan yo jwenn lefètke y ap sèvi kote ki bezwen plis pwoklamatè Wayòm nan.

Se pou nou pran plezi etidye Pawòl Bondye a grasa peryodik sa a!

Editè yo

[Foto nan paj 3]

1879

[Foto nan paj 3]

1895

[Foto nan paj 3]

1931

[Foto nan paj 3]

1950

[Foto nan paj 3]

1974

[Foto nan paj 3]

2008