“Kiyès ki vrèman esklav fidèl ki prevwayan an?”
“Kiyès ki vrèman esklav fidèl ki prevwayan an Mèt li etabli sou domestik li yo?” — MAT. 24:45.
1, 2. Ki gwoup moun Jezi ap itilize pou ban nou manje jodi a, e poukisa li enpòtan anpil pou n idantifye gwoup moun sa a?
MEN sa yon sè te di nan yon lèt li te ekri frè yo k ap travay nan syèj mondyal la pou l montre jan l apresye piblikasyon yo: “Frè m yo, mwen pa ka konte konbyen fwa nou fè m jwenn yon seri atik ki gen egzakteman sa m bezwen an nan moman mwen te plis bezwen l lan.” Èske w konn santi w menm jan ak sè sa a? Anpil nan nou konn santi n konsa. Èske sa ta dwe fè n sezi? Non.
2 Lefètke nou jwenn manje espirityèl la nan bon moman, sa montre Jezi, ki se Chèf kongregasyon an, kenbe pwomès li fè pou l ban nou manje a. Ki gwoup moun li itilize pou l fè sa? Lè Jezi t ap bay siy ki t ap siy prezans li an, li te di li t apral sèvi ak “esklav fidèl ki prevwayan an” pou l bay domestik li yo “manje nan bon moman” *. (Li Matye 24:45-47.) Se ak esklav fidèl sa a Jezi ap sèvi pou l bay vrè disip li yo manje nan tan lafen an. Li enpòtan anpil pou n idantifye esklav fidèl la paske sante espirityèl nou ansanm ak relasyon nou ak Bondye depann de ti gwoup moun sa a. — Mat. 4:4; Jan 17:3.
3. Ki sa nou te konn di nan piblikasyon nou yo konsènan parabòl esklav fidèl la?
3 Kidonk, ki jan nou ta dwe konprann parabòl Jezi te bay konsènan esklav fidèl la? Anvan sa, men ki sa nou te konn di nan piblikasyon nou yo: Jezi te etabli esklav fidèl la sou domestik li yo nan Pannkòt ane 33 epòk nou an. Depi lè sa a, esklav la reprezante tout kretyen Bondye chwazi pou al nan syèl k ap viv sou tè a antanke gwoup nan yon menm epòk. Domestik yo se chak kretyen Bondye chwazi pou al nan syèl la. An 1919, Jezi te met esklav fidèl la “responsab tout byen l yo” ki se tout enterè Wayòm nan gen sou tè a. Sepandan, apre n fin fè bonjan etid sou pawòl Jezi te di konsènan esklav fidèl ki prevwayan an, epi n medite sou sa nan lapriyè, nou vin rann nou kont nou dwe fè kèk ajisteman nan fason nou te konprann pawòl sa yo (Pwo. 4:18). Ann egzamine parabòl la, epi ann wè ki rapò li gen avè n kit nou gen esperans pou n al viv nan syèl kit nou gen esperans pou n viv sou tè a.
KI LÈ PAWÒL JEZI TE DI KONSÈNAN ESKLAV FIDÈL LA T AP REYALIZE?
4-6. Poukisa nou kapab di se apre 1914 parabòl Jezi te bay konsènan esklav fidèl la te kòmanse akonpli?
4 Lè n egzamine kontèks pawòl Jezi te di konsènan esklav fidèl ki prevwayan an, nou rann nou kont se pa t ap nan Pannkòt ane 33 epòk nou an pawòl sa yo t ap kòmanse akonpli, men, se t ap nan tan lafen an. Ann wè kòman Ekriti yo montre sa.
5 Parabòl esklav fidèl la fè pati pwofesi Jezi te bay konsènan “siy k ap siy prezans [li] e k ap siy fen sistèm nan”. (Mat. 24:3.) Premye pati pwofesi sa a nou jwenn nan Matye 24:4-22 a gen de akonplisman. Premye a te fèt soti ane 33 epòk nou an pou rive ane 70 epòk nou an, e dezyèm nan ap akonpli yon fason ki pi laj jounen jodi a. Èske sa vle di pawòl Jezi te di konsènan esklav fidèl la t ap gen de akonplisman tou? Non.
6 Apati pawòl nou jwenn nan Matye 24:29 la, Jezi te konsantre l sitou sou yon seri evènman ki t ap gen pou rive nan epòk nou an. (Li Matye 24:30, 42, 44.) Anrapò ak sa k t ap gen pou rive pandan gwo tribilasyon an, Jezi te di moun yo “pral wè Pitit lòm nan k ap vini sou nyaj nan syèl la”. Annapre, li te ankouraje moun ki t ap vivan pandan dènye jou yo pou yo montre yo pridan lè l te di yo: “Nou pa konnen ki jou Seyè nou an ap vini”, epi “se nan yon lè nou pa panse Pitit lòm nan ap vini” *. Se apre Jezi fin di pawòl sa yo, sa vle di apre l fin pale konsènan evènman ki gen pou rive nan dènye jou yo, li te bay parabòl konsènan esklav fidèl la. Kidonk, nou kapab di se apre dènye jou yo fin kòmanse an 1914, pawòl Jezi te di konsènan esklav fidèl la te kòmanse akonpli. Rezònman nou fè a gen sans. Sa k fè sa?
7. Ki kesyon enpòtan ki te vin soulve lè sezon rekòt la te kòmanse, e poukisa?
7 Fè yon ti reflechi sou kesyon sa a: “Kiyès ki vrèman esklav fidèl ki prevwayan an?” Nan premye syèk la, pa t gen okenn rezon pou yon moun poze kesyon sa a. Jan nou te wè sa nan atik ki vin anvan an, apot yo te ka fè mirak e yo te ka menm bay lòt moun don, sa ki te montre Jewova te avèk yo (Tra. 5:12). Donk, poukisa pou yon moun ta mande ki moun Kris te nome toutbon pou pran latèt? Sepandan, an 1914, bagay yo te diferan anpil. Sezon rekòt la te kòmanse nan ane sa a, e lè a te resi rive pou yo separe move zèb yo ak ble a (Mat. 13:36-43). Etandone sezon rekòt la te kòmanse, te gen yon kesyon enpòtan ki te vin soulve: Piske anpil swadizan kretyen t ap mache di yo se vrè disip Jezi, ki jan yo t ap fè idantifye ble a, anpalan de kretyen Bondye chwazi pou al nan syèl la? Parabòl esklav fidèl la te reponn kesyon sa a. Se disip Kris yo Bondye chwazi pou al nan syèl la ki t apral pi byen manje nan domèn espirityèl.
KIYÈS KI ESKLAV FIDÈL KI PREVWAYAN AN?
8. Ki sa k fè l toutafè nòmal pou se kretyen Bondye chwazi pou al nan syèl la ki fòme esklav fidèl la?
8 Se kretyen Bondye chwazi pou al nan syèl ki dwe fòme esklav fidèl la. Yo rele moun sa yo “yon klas prèt k ap sèvi kòm wa”, e misyon yo se “‘fè konnen kalite estrawòdinè’ sila a ki te rele [yo] sot nan fènwa a pou [yo] vin nan bèl limyè l la”. (1 Pyè 2:9.) Li toutafè nòmal pou moun ki fè pati “klas prèt k ap sèvi kòm wa” a patisipe dirèkteman nan anseye kwayan parèy yo verite a. — Mal. 2:7; Rev. 12:17.
9. Èske se tout kretyen Bondye chwazi pou al nan syèl la ki fòme esklav fidèl la? Esplike.
9 Èske se tout kretyen Bondye chwazi pou al nan syèl la ki sou tè a ki fòme klas esklav fidèl la? Non. Rezon an se paske se pa tout kretyen Bondye chwazi pou al nan syèl la ki patisipe nan bay kwayan parèy yo ki sou tout kò tè a manje espirityèl la. Pami moun ki fè pati klas ble a, gen frè Bondye chwazi pou al nan syèl la, k ap sèvi kòm asistan ministeryèl oswa kòm ansyen nan kongregasyon kote yo ye. Yo anseye nan predikasyon kay an kay ak nan kongregasyon yo, e yo montre yo fidèl nan fason yo soutni desizyon syèj mondyal la pran yo. Men, yo pa patisipe nan bay fanmi entènasyonal nou fòme antanke frè a manje nan domèn espirityèl. Mete sou sa, pami kretyen Bondye chwazi pou al nan syèl la, gen kèk sè ki gen imilite ki pap janm eseye jwe wòl anseyan nan kongregasyon an. — 1 Kor. 11:3; 14:34.
10. Kiyès ki esklav fidèl ki prevwayan an?
10 Nan ka sa a, kiyès ki esklav fidèl ki prevwayan an? Lè n konsidere metòd Jezi te itilize pou l bay plizyè moun manje grasa yon ti gwoup moun nan, esklav sa a fòme ak yon ti gwoup frè Bondye chwazi pou al nan syèl k ap patisipe dirèkteman nan prepare ak distribye manje espirityèl la pandan prezans Kris la. Pandan dènye jou yo, ti gwoup frè Bondye chwazi pou al nan syèl la ki konpoze esklav fidèl la te sèvi ansanm nan syèj mondyal la. Pandan plizyè dizèn ane ki sot pase yo, yo te idantifye esklav sa a kòm yon esklav ki sanble tèt koupe ak Kolèj santral Temwen Jewova yo. Sepandan, nou dwe note nan parabòl Jezi a, mo “esklav” la parèt o sengilye, sa ki montre plizyè moun ki t ap fè pati esklav la t ap fòme yon gwoup. Donk, se antanke gwoup Kolèj santral la pran desizyon.
KIYÈS DOMESTIK YO YE?
11, 12. a) Bay de responsablite esklav fidèl ki prevwayan an te resevwa. b) Ki lè Jezi te etabli esklav fidèl la sou domestik li yo, e ki moun li te chwazi?
11 Li enpòtan pou n note nan parabòl Jezi te bay la, esklav fidèl ki prevwayan an t ap resevwa de responsablite. Toudabò, Mèt la t ap etabli l sou domestik yo, e dezyèmman li t ap mete l responsab tout byen l yo. Piske se sèlman nan tan lafen an parabòl la ap akonpli, esklav la t ap jwenn toule de responsablite sa yo apre Jezi fin vini antanke wa ki gen pouvwa an 1914.
12 Ki lè Jezi te etabli esklav fidèl la sou domestik li yo? Pou n reponn kesyon sa a, nou dwe retounen nan ane 1914, ane kote sezon rekòt la te kòmanse a. Jan nou te aprann sa deja, nan epòk sa a, gen plizyè gwoup relijye ki te fè konnen yo se kretyen. Nan ki gwoup Jezi t apral chwazi epi nome esklav fidèl la? Kesyon sa a te jwenn repons apre Jezi ak Papa l te vin enspekte tanp lan, oswa dispozisyon espirityèl Jewova pran pou moun adore l, soti ane 1914 pou rive nan kòmansman ane 1919 * (Mal. 3:1). Yo te kontan pou yo wè gen yon ti gwoup Etidyan Labib ki fidèl ki te montre jan yo renmen Jewova ak Pawòl li a ak tout kè yo. Se vre, yo te dwe fè kèk netwayaj nan mitan yo, men, avèk imilite, yo te byen reyaji pandan ti tan tou kout yo t ap teste yo e yo te rafine yo a (Mal. 3:2-4). Se Etidyan Labib sa yo ki te vrè kretyen ki fè pati klas ble a. Nan ane 1919, yon ane kote moun t ap reveye nan domèn espirityèl, Jezi te chwazi kèk frè Bondye chwazi pou al nan syèl pami Etidyan Labib yo, e ki kapab, pou vin fòme esklav fidèl ki prevwayan an, e l te etabli yo sou domestik li yo.
13. Ki moun ki fè pati domestik yo, e poukisa?
13 Kounye a, kiyès domestik yo ye? Yon fason senp, nou ka di yo se moun y ap bay manje yo. Nan kòmansman dènye jou yo, tout moun Bondye chwazi pou al nan syèl la te domestik. Annapre, domestik yo te vin gen ladan yo gwo foul moun ki fè pati lòt mouton yo. Jodi a, pifò moun ki fè pati “yon sèl twoupo” Kris ap dirije a se lòt mouton (Jan 10:16). Toule de gwoup sa yo jwenn menm manje espirityèl esklav fidèl la ap bay nan bon moman an. Ki sa n ka di konsènan manm Kolèj santral la jodi a, yo menm ki fòme esklav fidèl ki prevwayan an? Frè sa yo tou bezwen jwenn manje nan domèn espirityèl. Se sa k fè, avèk imilite, yo rekonèt yo chak se domestik menm jan ak tout rès moun ki se vrè disip Jezi yo.
Kit nou gen esperans pou n al nan syèl kit nou gen esperans pou n viv sou tè a, nou tout se domestik e nou tout bezwen menm manje espirityèl la nan bon moman.
14. a) Ki responsablite esklav fidèl la genyen, e ki sa responsablite sa a gen ladan l? b) Ki avètisman Jezi te bay esklav fidèl ki prevwayan an? (Gade kare ki gen tit “Si esklav sa a ta mechan...”.)
14 Jezi bay esklav fidèl ki prevwayan an yon kokennchenn responsablite. Nan tan biblik yo, yon esklav yo te fè konfyans, oswa yon entandan, se te yon moun yo te konn bay jere kay (Lik 12:42). Kidonk, esklav fidèl ki prevwayan gen responsablite pou l pran swen byen Mèt la ki sou tè a. Sa gen ladan l siveye byen materyèl yo, travay predikasyon an, pwogram asanble yo ak kongrè yo epi pwodui piblikasyon ki baze sou Bib la pou n itilize nan tèritwa yo, nan etid pèsonèl ak nan etid kongregasyon an. Domestik yo depann de tout manje espirityèl esklav la ap bay yo.
KI LÈ MÈT LA AP METE L RESPONSAB TOUT BYEN L YO?
15, 16. Ki lè Jezi ap met esklav fidèl la responsab tout byen l yo?
15 Ki lè Jezi ap bay esklav la dezyèm responsablite a, anpalan de responsab “tout byen l yo”? Men sa Jezi te di: “Esklav sa a byennere si lè Mèt li rive [“vini”; Rbi8-F, nòt], li jwenn se sa l ap fè! Anverite m ap di nou sa: L ap mete l responsab tout byen l yo.” (Mat. 24:46, 47). N ap remake Jezi bay esklav la dezyèm responsablite a apre l fin vini epi l jwenn se sa esklav la “ap fè”, sa vle di l ap bay manje espirityèl la fidèlman. Kidonk, ta dwe gen yon kantite tan ki pase ant moman li t ap bay de responsablite yo. Pou n konn ki fason e ki lè Jezi ap met esklav la responsab tout byen l yo, nou dwe konnen de bagay: Ki lè Jezi ap vini e ki sa ki gen nan byen l yo.
16 Ki lè Jezi ap vini? Nou jwenn repons lan nan kontèks Jezi te di pawòl li yo. Sonje sa, lè vèsè ki vin anvan yo te pale de Jezi antanke moun k ap “vini” an, mo vini an gen rapò ak lè Jezi ap vin pwononse epi egzekite jijman l nan fen sistèm nan *. (Mat. 24:30, 42, 44). Kidonk, jan sa parèt nan parabòl esklav fidèl la, “rive” oswa “vini” Jezi ap vini an ap gen pou l fèt pandan gwo tribilasyon an.
17. Ki sa byen Jezi yo gen ladan l?
17 Ki sa “tout byen [Jezi] yo” gen ladan l? Lè Jezi te di “tout” byen l yo, sa pa t vle di kòmkwa se sou tè a sèlman li gen byen. Anfèt, Jezi gen yon kokennchenn otorite nan syèl la. Men sa l te di: “Mwen resevwa tout pouvwa ni nan syèl la ni sou tè a.” (Mat. 28:18; Efe. 1:20-23). Kounye a, byen Jezi yo gen ladan l Wayòm Mesyanik Bondye ba li depi 1914 la, yon Wayòm li pral dirije ak disip li yo Bondye chwazi pou al nan syèl la. — Rev. 11:15.
18. Ki sa k fè Jezi pral kontan met esklav la responsab tout byen l yo?
18 Sou baz sa nou sot egzamine yo, ki sa nou ka di? Lè Jezi vin fè jijman l lan pandan gwo tribilasyon an, l ap jwenn esklav fidèl la k ap bay domestik yo manje espirityèl la avèk fidelite. Lè sa a, Jezi pral kontan ba yo dezyèm responsablite a, sa vle di li pral mete yo responsab tout byen l yo. Moun ki fè pati esklav fidèl la pral jwenn responsablite sa a lè yo resevwa rekonpans yo nan syèl la kote yo pral dirije ak Kris.
19. Èske esklav fidèl la ap resevwa yon pi gwo rekonpans pase rès moun Bondye chwazi pou al nan syèl la? Esplike.
19 Èske esklav fidèl la ap resevwa yon pi gwo rekonpans pase rès moun Bondye chwazi pou al nan syèl la? Non. Yo te gendwa pwomèt yon ti gwoup moun yon rekonpans epi annapre gen lòt moun ki vin benefisye rekonpans sa a tou. Pa egzanp, ann wè sa Jezi te di 11 apot fidèl li yo jou swa anvan l mouri a. (Li Lik 22:28-30.) Jezi te pwomèt ti gwoup gason sa a yo t ap jwenn yon bèl rekonpans pou fidelite yo. Yo t ap jwenn pouvwa pou yo dirije antanke wa ansanm ak Jezi. Sepandan, plizyè ane annapre, li te fè konnen se tout 144 000 moun yo ki pral chita sou twòn pou dirije ansanm avè l (Rev. 1:1; 3:21). Menm jan an tou, jan sa parèt nan Matye 24:47 la, li te pwomèt l ap met yon ti gwoup gason, anpalan de frè l yo Bondye chwazi pou al nan syèl ki fòme esklav fidèl la, responsab tout byen l yo. An reyalite, se tout 144 000 moun yo ki pral pataje kokennchenn pouvwa sa a ansanm avè l nan syèl la. — Rev. 20:4, 6.
Tout 144 000 moun yo pral pataje kokennchenn pouvwa Jezi a ansanm avè l nan syèl la. (Gade paragraf 19.)
20. Pou ki rezon Jezi te nome esklav fidèl la, e ki detèminasyon w pran?
20 Pa mwayen esklav fidèl ki prevwayan an, Jezi ap suiv menm metòd li te etabli nan premye syèk la, sa vle di, l ap sèvi ak yon ti gwoup moun pou l bay anpil moun manje. Jezi te nome esklav fidèl sa a yon fason pou l asire l vrè disip li yo, kit se sa Bondye chwazi pou al nan syèl kit se sa ki fè pati lòt mouton yo, ap toujou jwenn kantite manje espirityèl yo bezwen pandan dènye jou yo nan bon moman. Ann pran detèminasyon pou n montre nou rekonesan pou sa, lè n montre nou fidèl nan fason n ap soutni frè Bondye chwazi pou al nan syèl la ki fòme esklav fidèl ki prevwayan an. — Ebre 13:7, 17.
^ § 2 Paragraf 2: [1] Yon lòt lè anvan sa, Jezi te bay yon parabòl menm jan an kote l te rele “esklav” la “entandan” epi “domestik” yo “gwoup sèvitè l”. — Lik 12:42-44.
^ § 6 Paragraf 6: [2] “Vini” Kris ap vini an (mo grèk er′kho·mai) diferan ak “prezans” li (pa·rou·si′a). Prezans envizib Jezi a kòmanse anvan l vin egzekite jijman l.
^ § 12 Paragraf 12: [3] Gade atik ki gen tit “Gade! mwen avèk nou toulejou” ki nan Toudegad sa a nan paj 10-12, paragraf 5-8.
^ § 16 Paragraf 16: [4] Gade atik ki gen tit “Di nou non: ki lè bagay sa yo ap fèt?” ki nan Toudegad sa a nan paj 7-8, paragraf 14-18.
