TRAVAY predikasyon bon nouvèl la se travay ki pi enpòtan k ap fèt sou tè a jodi a. Antanke sèvitè Jewova, se sèten w konsidere travay fè disip la kòm yon gwo privilèj. Sepandan, sandout w ap dakò, pafwa, pwoklamatè yo ansanm ak pyonye yo konn jwenn difikilte pou yo kontinye preche avèk zèl.

Gen kèk pwoklamatè ki twouve l difisil pou yo jwenn yon moun pou yo pale lè y ap preche kay an kay paske pifò moun konn pa lakay yo. Lè yo resi jwenn moun yo lakay yo, moun yo konn swa pa enterese nan mesaj la swa yo konn pale mal. Gen lòt pwoklamatè ki tèlman gen tèritwa pou yo preche kote moun yo enterese nan mesaj la opwen sa konn fè yo pè pou yo pa rive preche tout moun nan tèritwa a. Epi, gen kèk moun nan kongregasyon an ki gen lontan depi y ap preche ki vin dekouraje paske yo te panse lafen an t ap vini deja.

Èske sa ta dwe fè n sezi dèske se tout pèp Jewova a k ap fè fas ak difikilte ki kapab fè yo pèdi zèl yo nan travay predikasyon an? Non. Dayè, èske n panse l t ap fasil pou n rive preche mesaj Bondye a ki kapab sove lavi moun nan monn sa a ki anba pouvwa “Mechan an”, anpalan de Satan Ledyab? — 1 Jan 5:19.

Kèlkeswa difikilte w jwenn ki gen rapò ak travay predikasyon an, ou mèt gen asirans Jewova kapab ede w fè fas avè l. Sepandan, ki sa w ka fè pou w vin pi zele nan travay predikasyon an? Ann egzamine kèk sijesyon.

Chak ane, gen plizyè milye moun ki batize pou yo vin Temwen Jewova. Si w fèk batize, se sèten w ap kontan pwofite eksperyans moun ki gen plis tan pase w depi y ap preche yo. E si w gen plizyè ane depi w se yon pwoklamatè Wayòm nan, èske l pa t ap bon e èske l pa t ap pwofitab pou w ede nouvo sa yo?

 Jezi te konnen disip li yo te bezwen direksyon pou yo te ka jwenn bon rezilta antanke evanjelizatè e l te montre yo kòman travay la dwe fèt (Lik 8:1). Jodi a tou, gen lòt moun ki bezwen fòmasyon pou yo ka jwenn bon rezilta nan travay predikasyon an.

Nou pa ta dwe panse yon nouvo pwoklamatè kapab vin yon bon anseyan senpleman paske l ap patisipe nan travay predikasyon an. Li bezwen yon moun ki janti e ki gen lanmou pou ba l fòmasyon pèsonèlman. Fòmasyon sa a ap gen ladan l montre pwoklamatè ki gen mwens eksperyans la kòman pou l 1) prepare yon prezantasyon epi pratike prezantasyon an, 2) kòmanse yon konvèsasyon ak yon moun ki lakay li oswa ki nan lari, 3) prezante yon piblikasyon, 4) retounen vizite moun ki enterese yo epi 5) kòmanse yon etid. Pa gen dout nan sa, moun y ap bay fòmasyon an ap jwenn bon rezilta si l byen obsève metòd moun k ap ba l fòmasyon an itilize nan travay predikasyon an epi l imite l (Lik 6:40). Se sèten, nouvo pwoklamatè a ap kontan pou l gen yon moun avè l ki kapab koute epi ede l lè sa nesesè. Pwoklamatè ki gen mwens eksperyans yo ap jwenn byenfè tou lè yo felisite yo ak lè yo jwenn bonjan sijesyon. — Ekl. 4:9, 10.

Malgre tout efò w fè pou w gen konvèsasyon ak moun yo, gen de jou se ak moun k ap preche avè w la w ap gen pi bèl konvèsasyon an. Sonje Jezi te voye disip li yo preche “de pa de”. (Lik 10:1.) Konsa, youn te ka ankouraje lòt pandan y ap preche. Kidonk, lè n preche ak kwayan parèy nou yo se yon bèl okazyon nou genyen pou “youn [...] ankouraje lòt”. — Wom. 1:12.

Sou ki bagay konsa nou kapab pale? Èske gen nan nou ki pa gen lontan depi l te fè yon eksperyans ki ankourajan? Èske w te jwenn yon pwen enteresan pandan w t ap fè etid pèsonèl ou oswa nan kad adorasyon an fanmi an? Èske gen yon bagay ou te tande nan yon reyinyon ki te ankouraje w? Pafwa, gendwa se pa ak moun k ap preche avè w la ou abitye preche. Èske w konnen ki jan l te pran laverite? Ki sa k te fè l kwè toutbon òganizasyon an se òganizasyon Jewova? Ki privilèj li te jwenn oswa ki eksperyans li te fè? Petèt, ou kapab pataje avè l eksperyans ou te fè tou. Kèlkeswa rezilta nou jwenn nan tèritwa a, lè n ap preche ak yon moun nou gen posiblite pou “youn kontinye fòtifye lòt”. — 1 Tes. 5:11.

Pou w ka kontinye preche avèk zèl li enpòtan pou w chèche gen bon abitid pou w etidye epi pou w kenbe abitid sa a. “Esklav fidèl ki prevwayan an” pibliye yon pakèt enfòmasyon ki pale sou anpil sijè (Mat. 24:45). Kidonk, ou gen anpil ak yon pakèt sijè w ka etidye yon fason pou w manje nan domèn espirityèl. Ann konsidere yon bon sijè ou kapab etidye pèsonèlman: Ki sa k fè travay predikasyon Wayòm nan gen anpil enpòtans? W ap jwenn kèk rezon nan kare ki mache ak atik sa a.

Lè w konsidere pwen yo site nan kare a sa kapab ankouraje w kontinye preche avèk zèl. Poukisa w pa fikse objektif pou w chèche jwenn lòt rezon ankò lè w ap fè etid pèsonèl ou? Apre sa, medite sou rezon sa yo ak sou vèsè ki mache ansanm avèk yo. Se sèten, si w fè sa, sa ap ankouraje w kontinye preche avèk zèl.

Òganizasyon Jewova a ban nou sijesyon regilyèman pou ede n vin pi efikas nan travay predikasyon an. Pa egzanp, anplis de preche kay an kay, nou kapab bay temwayaj pa mwayen lèt, pa mwayen telefòn, preche nan lari oswa kote ki gen anpil moun, nou kapab fè enfòmèl epi preche nan tèritwa ki gen biznis. Nou gendwa fè aranjman pou n preche nan tèritwa yo pa preche souvan yo.

Èske w dispoze aksepte sijesyon sa yo? Èske w te eseye sèvi ak kèk nan yo? Gen plizyè moun ki te fè sa e yo te jwenn bon rezilta ki te fè yo kontan anpil. Ann konsidere twa egzanp.

Premye egzanp lan gen rapò ak yon sijesyon yo te bay nan Ministè Wayòm nan sou fason pou n kòmanse etid biblik. Sa te pouse yon sè ki rele April ofri twa kòlèg travay li yon etid. Li te sezi e l  te kontan anpil lè toule twa te aksepte etid la e yo te kòmanse asiste reyinyon yo.

Dezyèm egzanp lan gen rapò ak fason pou n ofri peryodik yo. Yo te ankouraje nou pou n chèche jwenn moun ki kapab enterese nan yon seri atik byen presi. Gen yon siveyan sikonskripsyon Ozetazini ki fè konnen, nan yon zòn, li te ofri tout direktè k ap travay nan magazen kote yo vann kawotchou yo yon Réveillez-vous! ki gen yon atik ki pale sou kawotchou. Li menm ak madanm li te pran yon seri sijè ki parèt nan ribrik “Mieux comprendre son médecin” an e yo te bay yo nan plis pase 100 biwo doktè ki nan tèritwa sikonskripsyon yo a. Men sa l di: “Vizit sa yo te ede n anpil lè n ap di kiyès nou ye ak lè n ap prezante piblikasyon yo. Yonfwa nou te fin abitye ak moun yo, nou te gen posiblite pou n fè plis nouvèl vizit.”

Twazyèm egzanp lan gen rapò ak bay temwayaj nan telefòn. Gen yon sè ki rele Judy ki te ekri syèj mondyal la pou l di jan l apresye ankourajman pou n bay temwayaj nan telefòn nan. Li fè konnen manman l ki gen 86 an e ki gen anpil pwoblèm sante patisipe regilyèman nan fòm sèvis sakre sa a e l kontan anpil dèske l ap kondui yon etid Labib nan telefòn ak yon moun ki gen 92 an.

Sijesyon yo bay nan piblikasyon nou yo sou fason pou n bay temwayaj la bay bon rezilta. Sèvi avè yo! Yo ka ede w kontinye gen kè kontan nan travay predikasyon an epi yo ka ede w kontinye preche avèk zèl.

Se pa sitou kantite piblikasyon nou bay, kantite etid nou kondui oswa kantite moun nou ede vin sèvi Jewova ki fè n ka di nou reyisi nan travay predikasyon an. Dayè, konbyen moun ankò Noye te ede vin sèvi Jewova apa fanmi l? Sepandan, pa gen dout li te yon bon predikatè. Sa k pi enpòtan an se sèvi Jewova fidèlman. — 1 Kor. 4:2.

Gen anpil pwoklamatè Wayòm nan ki twouve l nesesè pou yo fikse objektif ki rezonab yon fason pou yo vin pi chofe nan travay predikasyon an. Ki sa kèk nan objektif sa yo kapab ye? N ap jwenn kèk ide nan kare ki mache ak atik sa a.

Chèche jwenn fason pou w jwenn byenfè ak bon rezilta nan sèvis w ap bay Jewova a grasa èd l ap ba ou. Lè w rive atenn objektif ou te fikse yo, w ap kontan dèske w te akonpli yon bagay e w ap gen satisfaksyon dèske w konnen w ap fè tout sa w kapab pou w preche bon nouvèl la.

Vrèmanvre, li kapab difisil pou w preche bon nouvèl la. Sepandan, gen anpil bagay ou kapab fè pou w zele antanke pwoklamatè Wayòm nan. Pwofite okazyon ou menm ak moun k ap preche avè w la jwenn pou youn ankouraje lòt, chèche gen bon abitid pou w etidye epi kenbe abitid sa a, suiv sijesyon esklav fidèl la bay yo epi fikse objektif ki rezonab. Sa k pi enpòtan an, pa janm bliye Bondye ba w yon privilèj san parèy ki se preche bon nouvèl la antanke youn nan Temwen l yo (Iza. 43:10). Se pa ti kè kontan w ap jwenn toutpandan w ap kontinye preche avèk zèl!