Ou ka gen lajwa malgre gen bagay ki fè w desi

KI MOUN ki pa janm santi yo desi ? Menm Jewova Dye, Papa nou ki nan syèl la, konnen doulè yon moun ka genyen lè l desi. Pa egzanp, li te delivre Izrayelit yo nan esklavaj anba men Ejipsyen yo e li te beni yo anpil. Sepandan, Bib la di : “ Se tout tan yo te konn ap mete Bondye aleprèv, yo te konn atriste Sen Izrayèl la. ” ​(Sòm 78:41). Malgre sa, Jewova toujou rete “ Bondye ki gen kè kontan an ”. — 1 Timote 1:11.

Anfèt, gen anpil bagay ki ka lakòz yon moun desi. Men, ki jan nou kapab anpeche bagay sa yo fè nou pèdi lajwa nou ? Ki sa Jewova ka aprann nou nan fason li te jere kèk sitiyasyon ki te fè l desi ?

Bagay ki ka fè nou santi nou desi

Pawòl Bondye a di : “ Tan ak evènman enprevi ” ka rive nou tout (Eklezyas 9:11). Yon krim, yon aksidan oswa yon maladi nou pa t atann ka fè nou soufri anpil e yo ka fè nou santi nou desi anpil. Labib di tou : “ Yon bagay w ap tann ou pa jwenn li nan moman w ap tann li an fè kè a malad. ” ​(Pwovèb 13:12). Lè n ap tann pou nou jwenn yon bon bagay, sa ranpli nou ak lajwa, men, si nou pran lontan pou nou jwenn li, nou kapab tèlman santi nou desi, nou vin deprime. Duncan * se yon bon egzanp. Li te toujou gen dezi pou l vin misyonè e pou l rete misyonè, men, apre anpil ane nan sèvis sa a, li menm ak madanm li te oblije retounen lakay yo. Men sa l te di : “ Se premye fwa nan lavi m mwen te santi m dekouraje konsa. ” “ Mwen pa t gen okenn objektif. Anyen pa t gen enpòtans pou mwen ankò. ” Lè yon moun desi, sa ka fè l soufri e soufrans sa a kapab dire lontan, jan sa ye nan ka Claire. Men sa l di : “ Mwen te gen sèt mwa depi m ansent lè m te pèdi bebe a. Plizyè ane gentan pase, men, jis kounye a, lè m wè yon tigason ap bay yon diskou sou estrad la, mwen konn di tèt mwen : ‘ Se laj sa a pitit gason m nan t ap genyen kounye a. ’ ”

Lè se yon moun ki fè nou desi, sa ka fè nou soufri tou. Pa egzanp, mennaj nou ka kite nou,  konjwen nou ka kite nou, yon pitit nou ka vin rebèl, yon zanmi ka trayi nou oswa li ka pa gen rekonesans pou sa nou fè pou li. Lefètke n ap viv nan mitan moun enpafè e n ap viv nan yon epòk ki difisil, gen anpil bagay ki ka rive ki ka fè nou desi.

Echèk nou sibi ka fè nou desi. Pa egzanp, si nou pa pase nan yon egzamen, nou pa jwenn yon travay nou t ap chèche oswa nou pa reyisi fè yon moun nou gen santiman pou li renmen nou oubyen nou pa reyisi jwenn amitye yon moun, nou kapab santi nou pa vo anyen. Nou kapab santi nou desi tou lè yon moun pa nou sispann fè pwogrè nan laverite. Men sa yon sè ki rele Mary di : “ Pitit fi m nan sanble t ap fè pwogrè pou l vin yon kretyèn ki zele. Mwen te panse m se yon bon egzanp pou li. Men, lè li te vire do bay Jewova e li te sispann viv selon prensip fanmi nou an, mwen te santi m echwe nèt. Okenn nan lòt bagay mwen te akonpli nan lòt domèn nan lavi m pa t kapab konpanse pou sa. Mwen te santi m tèlman dekouraje ! ”

Ki sa ki ka ede nou sipòte santiman nou genyen lè nou desi ? Pou nou ka jwenn repons lan, annou egzamine egzanp Jewova bay nan fason li jere sitiyasyon ki fè l desi.

Konsantre sou solisyon an

Avèk amou, Jewova Dye te pran swen premye koup la, men, yo pa t montre yo rekonesan pou sa e yo te rebele kont li (Jenèz chapit 2 e 3). Apre sa, Kayen, pitit yo a, te kòmanse devlope yon move etadespri. Li pa t koute avètisman Jewova te ba li e li te touye pwòp frè l (Jenèz 4:1-8). Èske w imajine nan ki pwen Jewova te santi l desi ?

Sa k fè sitiyasyon sa a ki te fè Bondye desi pa t anpeche l toujou gen kè kontan ? Se paske li te gen objektif pou l ranpli tè a ak moun ki pafè e li te kontinye travay pou l akonpli objektif sa a (Jan 5:17). Se nan objektif sa a tou li te bay sakrifis ranson an e li te etabli Wayòm li an (Matye 6:9, 10 ; Women 5:18, 19). Jewova te konsantre sou solisyon an, li pa t konsantre sou pwoblèm nan.

Pawòl Bondye a ankouraje nou pou nou konsantre sou bagay ki pozitif olye nou konsantre sou sa nou panse nou te kapab fè nan yon sitiyasyon oswa sou sa nou panse nou te dwe fè. Men sa li di : “ Tout bagay ki jis, tout bagay ki pwòp, tout bagay ki merite pou yo renmen yo, tout bagay ki gen bon repitasyon, si gen yon bèl kalite e si gen yon bagay ki merite louwanj, kontinye konsidere bagay sa yo. ” — Filipyen 4:8.

Bon pwennvi nou dwe genyen sou bagay ki fè nou desi

Gen bagay ki kapab rive ki chanje lavi nou nèt. Pa egzanp, san nou pa atann, nou ka vin nan chomaj, nou ka pèdi konjwen nou oswa nou ka pèdi kèk privilèj nou te genyen anvan. Nou kapab vin gen pwoblèm sante, nou kapab pèdi kay nou oswa zanmi nou. Ki jan nou ka sipòte chanjman sa yo ?

Gen moun ki santi lè yo etabli kèk priyorite sa ede yo. Men sa Duncan, frè nou te mansyone anvan an, di: “ Lè mwen menm ak madanm mwen nou te rann nou kont nou pa t ap janm ka viv fason nou te konn viv anvan an, sa te demoralize nou. Finalman nou te etabli de priyorite : pran swen manman m, e si sa posib, kontinye nan sèvis aplentan. Lè nou gen desizyon pou nou pran, nou gade pou nou wè ki efè desizyon nou vle pran an ap genyen sou priyorite sa yo. Konsa, li pi fasil pou nou pran desizyon. ”

Anpil nan nou gen tandans egzajere aspè negatif ki genyen nan yon sitiyasyon ki fè nou desi. Pa egzanp, efò nou fè pou nou leve pitit nou, pou nou kalifye pou yon djòb oswa pou nou preche bon nouvèl la nan yon peyi etranje gendwa pa bay rezilta nou t ap atann nan. Sa ka fè nou di tèt nou : ‘ Mwen pa janm fè anyen ki bon ’. Sepandan, menm jan sa k te pase nan kòmansman  limanite ki te fè Bondye desi a pa t pwouve Bondye echwe, se konsa tou, nou pa dwe panse nou pa janm fè anyen ki bon, menmsi nan yon premye tan nou ka santi nou desi poutèt nou pa reyisi malgre tout efò nou fè pou nou akonpli yon bagay. — Detewonòm 32:4, 5.

Li fasil pou nou vin gen gwo rankin nan kè nou lè yon moun fè nou yon bagay ki fè nou desi. Sepandan, Jewova pa aji konsa. Pa egzanp, wa David te fè l desi lè l te fè adiltè e lè l te aranje l pou yo touye mari fi a. Malgre sa, Jewova te wè David te repanti sensèman e li te pèmèt li kontinye sèvi l. Konsa tou, Yewochafat, yon wa fidèl, te mal aji lè li te fè alyans avèk kèk ènmi Bondye. Pwofèt Jewova a te di l : “ Se poutèt sa, Jewova an pèsòn gen endiyasyon kont ou. Toutfwa, yo jwenn bon bagay nan ou. ” ​(2 Kwonik 19:2, 3). Jewova te konnen menm lè Yewochafat te fè yon erè, sa pa t vle di Yewochafat te vire do ba li nèt. Menm jan an tou, si zanmi nou fè erè ki fè nou desi, nou pap pèdi zanmi sa yo si nou evite reyaji yon fason ki egzajere. Zanmi ki fè nou desi yo kapab gen bèl kalite toujou. — Kolosyen 3:13.

Nou kapab konsidere sitiyasyon ki fè nou desi yo kòm eksperyans ki nesesè pou yon moun fè anvan li rive jwenn siksè. Pa egzanp, si nou  komèt yon peche, nou ka pa satisfè ak tèt nou. Sepandan, nou ka rive venk santiman sa a si nou fè sa ki nesesè pou nou fè yo e nou avanse. Lè wa David te vrèman desi ak tèt li, men sa li te ekri : “ Zo mwen t ap depafini nan jemisman m tout lajounen. [...] Peche mwen an, finalman mwen te konfese l ba ou [Jewova], [...] e ou menm, ou te padone fot peche m yo. ” ​(Sòm 32:3-5). Si nou rann nou kont nou pa t fè sa Bondye vle nou fè, nou ta dwe mande l pou l padone nou, nou ta dwe chanje fason nou aji e nou ta dwe detèmine pou nou suiv konsèy li yo plis toujou alavni. — 1 Jan 2:1, 2.

Prepare nou depi kounye a pou sitiyasyon ki ka fè nou desi

Pa gen dout nan sa, nou tout gen pou nou rankontre kèk sitiyasyon alavni k ap fè nou desi. Ki sa nou ka fè pou nou prepare nou pou sa ? Nan sans sa a, Bruno, yon kretyen aje ki te vin desi akoz yon sitiyasyon ki te chanje lavi l nèt, te di yon bagay ki enteresan : “ Nan ka pa m, sa ki te ede m sipòte sitiyasyon ki te fè m desi a, sèke mwen te kontinye fè sa m te konn fè anvan pou m fòtifye espirityalite m. Mwen te aprann rezon ki fè Jewova pèmèt sistèm mechan sa a kontinye egziste. Mwen te pase plizyè ane ap bati yon relasyon sere ak Jewova. Mwen te gen rekonesans pou Bondye poutèt sa. Lefètke m te konnen li avè m, sa te konsole m e sa te ede m andire anba depresyon mwen te fè a. ”

Etan n ap reflechi sou lavni, gen yon bagay nou kapab sèten. Byenke nou ka pa satisfè ak tèt nou oswa lòt moun kapab fè nou desi, Bondye pap janm fè nou desi. Anfèt, Bondye di, non l, Jewova, vle di ‘ l ap vin tounen sa l ap vin tounen ’. (Egzòd 3:14.) Sa fè nou gen asirans l ap vin tounen sa ki nesesè pou l akonpli pwomès li. Li pwomèt ‘ volonte l pral fèt sou tè a kou nan syèl la ’ pa mwayen Wayòm li an. Se sa k fè apot Pòl te di li “ gen konviksyon ni lanmò ni lavi, ni zanj ni gouvènman, [...] ni okenn lòt kreyasyon pap kapab separe nou ak lanmou Bondye ki nan Kris Jezi ”. — Matye 6:10 ; Women 8:38, 39.

Nou kapab gen asirans pwomès Bondye te fè pa mwayen pwofèt Izayi a ap jwenn akonplisman l. Men sa Izayi 65:17 di : “ M ap kreye syèl tounèf ak yon tè tounèf, e moun pap sonje ansyen bagay yo, ni yo pap monte vin nan kè yo. ” Moman an gen pou l vini kote nou pap sonje okenn sitiyasyon ki te fè nou desi. Èske se pa yon bèl esperans ?

[Nòt anba paj]

[Antrefilè nan paj 13]

Nou pa dwe panse nou pa janm fè anyen ki bon tou senpleman paske nou pa satisfè ak tèt nou malgre tout efò nou fè.

[Antrefilè nan paj 14]

Pawòl Bondye a ankouraje nou konsantre sou bagay ki pozitif olye nou konsantre sou jan bagay yo te ka ye.

[Foto nan paj 15]

Malgre enpèfeksyon lèzòm, Bondye gen kè kontan, paske objektif li yo ap reyalize kanmenm.

[Foto nan paj 16]

Lè nou bay bagay espirityèl yo premye plas nan lavi nou, sa ede nou andire sitiyasyon ki fè nou desi.