Ki sa lafwa ye?

KI JAN W t ap defini mo lafwa a? Gen moun ki fè konprann lafwa se lè yon moun kwè nan sa yo anseye l san l pa poze kesyon. Yon lè, gen yon ekriven ameriken ki te rele Henry Mencken, yon jounalis ki te gen anpil enfliyans, ki te pale de lafwa kòm “yon kwayans ki pa lojik yon moun genyen nan yon bagay ki enposib”.

Sepandan, Labib pa di lafwa se lè yon moun kwè sa yo anseye l san l pa poze kesyon oswa se yon kwayans yon moun genyen ki pa lojik. Men sa Pawòl Bondye a di: “Lafwa se tann yon moun ap tann avèk asirans bagay li espere, se prèv klè li genyen sou yon seri bagay ki reyèl, menmsi li pa wè yo.” —Ebre 11:1, NW.

Piske moun yo gen opinyon ki diferan konsa sou lafwa, annou egzamine repons kesyon sa yo:

• Nan ki sans definisyon Bib la bay la diferan ak sa anpil moun panse lè y ap pale de lafwa?

• Poukisa li trèzenpòtan pou nou chèche gen kalite lafwa Bib la pale de li a?

• Ki jan w kapab bati lafwa w pou l solid?

Yon papye ki bay garanti, ak yon prèv solid

Nan epòk yo t ap ekri liv Ebre a, mo grèk lè yo tradui l yo mete “tann yon moun ap tann avèk asirans” pou li a se yon mo moun te konn itilize souvan. Mo sa a parèt nan dokiman moun te konn itilize nan zafè komès e li bay garanti yon moun gen pou l posede yon bagay. Se poutèt sa, gen yon ouvraj referans ki di yo ta ka tradui Ebre 11:1 an konsa: “Lafwa se yon papye ki bay garanti konsènan bagay yon moun espere.”

Èske sa rive w deja pou w achte yon bagay nan yon konpayi ki gen bon repitasyon epi apre pou w tann yo vin livre l ba ou? Si sa te rive w, konnen ou te egzèse kalite lafwa sa a. Resi yo te ba w la te fè w gen rezon pou w mete konfyans ou nan konpayi sa a. Nan yon sans, resi sa a se yon papye ki te ba w garanti ou t ap resevwa bagay ou te achte a. Si w te pèdi resi sa a oswa ou te jete l, ou pa t ap gen prèv ankò pou w montre se ou ki te achte bagay la. Menm jan an tou, moun ki gen lafwa Bondye pral reyalize pwomès li yo gen garanti y ap resevwa sa yo espere yo. Yon lòt bò, moun ki pa gen lafwa yo oswa ki pèdi lafwa yo pa gen dwa pou yo resevwa bagay Bondye pwomèt yo. —Jak 1:5-8.

Dezyèm ekspresyon ki gen nan Ebre 11:1 an, ekspresyon yo mete “prèv klè” pou yo tradui l la gen sans bay prèv ki kontrè ak sa moun konprann ki reyalite a. Pa egzanp, solèy la sanble ap vire otou tè a, paske li leve alès, li travèse tout syèl la, e l al kouche alwès. Sepandan, selon sa yo dekouvri nan domèn astwonomi ak nan domèn matematik, se pa tè a ki sant sistèm solè a. Yonfwa ou fin konn prèv sa a e w aksepte l kòm verite, ou gen konfyans se tè a k ap vire otou solèy la, byenke se pa sa je w ba w. Konfyans sa a ou genyen an se pa yon bagay ki pa fonde. Okontrè, li fè w vin gen kapasite pou w konprann jan bagay yo ye toutbonvre, e non pa jan yo sanble yo ye.

Sa k fè li trèzenpòtan pou yon moun gen yon lafwa ki solid?

Se yon lafwa konsa Labib ankouraje nou genyen, yon lafwa solid ki fonde sou prèv solid, menmsi sa kapab mande pou nou ajiste kwayans nou. Li trèzenpòtan pou nou gen yon lafwa konsa, paske, men sa apot Pòl te ekri: “San lafwa, yon moun pa kapab fè Bondye plezi. Paske, yon moun k ap pwoche kote Bondye, fòk li kwè Bondye egziste, e fòk li kwè Bondye rekonpanse moun k ap chèche li.” —Ebre 11:6, Bib Kreyòl La.

Gen anpil bagay ki ka anpeche w vin gen yon lafwa ki solid. Men, si w suiv kat etap yo pral egzamine nan paj ki vin apre yo, w ap reyisi.