Repons pou kat kesyon konsènan lafen an

JEZI KRIS te di ‘lafen an t ap vini’ yon lè. Men sa li te di pandan li t ap pale de lè sa a: “Pral gen yon gwo tribilasyon, yon tribilasyon ki potko janm rive depi monn nan egziste pou jiska prezan, non, e ki pap janm rive ankò.” —Matye 24:14, 21.

Pawòl Jezi te di konsènan lafen an ansanm ak lòt pasaj ki pale sou sijè sa a soulve yon seri kesyon enpòtan. Poukisa w pa ouvri Bib ou epi gade sa li di konsènan kesyon ki vin annapre yo?

1 Lafen ki sa k ap vini an?

Labib pa anseye se tè a menm ki pral detwi. Men sa yon salmis te di: “[Bondye] mete latè kanpe fèm sou fondasyon li. Anyen pa ka brannen l.” ​(Sòm 104:5). Li pa anseye nonplis tout sa ki gen lavi nan yo sou tè a pral detwi nan dife (Izayi 45:18). Jezi li menm te di gen moun k ap sove lè lafen an vini (Matye 24:21, 22). Lafen ki sa menm ki pral vini an?

Gouvènman lèzòm yo ki echwe pral detwi. Men sa Bondye te enspire pwofèt Dànyèl pou l ekri: “Bondye nan syèl la ap tabli yon wayòm ki pap janm kraze. E yo pap pase wayòm nan bay okenn lòt pèp. Li pral krabinen tout wayòm sa yo, e l ap mete yon fen nan yo, epi li menm l ap la pou tan endefini.” —Dànyèl 2:44, NW.

Lagè ak polisyon pral fini. Nan Sòm 46:9, Labib di sa Bondye pral fè: “Se li menm ki fè yo sispann fè lagè toupatou sou latè. Li kase banza yo, li kase frenn yo de bout, li boule tout cha yo nèt.” Labib anseye tou Bondye pral “detwi moun k ap detwi tè a”. —Revelasyon 11:18.

Krim ak enjistis pral fini. Men pwomès nou jwenn nan Pawòl Bondye a: “Se moun k’ap mache dwat yo ki pral rete nan peyi a. Se moun serye yo ki pral la. Men, Bondye ap disparèt mechan yo nan peyi a. L’ap rache moun k’ap fè sa ki mal yo tankou yo rache move zèb.” —Pwovèb 2:21, 22.

2 Ki lè lafen an ap rive?

Jewova Dye gen yon “tan ki fikse” pou l fini ak mechanste e pou Wayòm li an, sa vle di gouvènman l lan, kòmanse dirije (Mak 13:33). Men, Labib montre byen klè nou pa ka konnen egzakteman ki jou lafen an ap vini. Jezi te di: “Kanta pou jou sa a ak lè sa a, pèsonn pa konnen yo, ni zanj ki nan syèl la, ni Pitit la, men se Papa a sèl ki konnen yo.” ​(Matye 24:36). Sepandan, Jezi ak disip li yo te di ki jan bagay yo t ap ye sou tè a yon ti tan anvan lafen an vini. Lafen an ap toupre lè tout evènman ki mansyone apre yo ap fèt sou tout tè a anmenmtan.

 Pwoblèm politik, pwoblèm anviwònman ak pwoblèm sosyal rive nan yon pwen yo potko janm rive anvan. Men sa Jezi te di pou l reponn kesyon disip li yo te poze konsènan lafen an: “Nasyon pral leve kont nasyon e wayòm pral leve kont wayòm. Pral gen tranblemanntè nan yon zòn apre yon lòt, e pral gen rate manje. Sa yo se kòmansman doulè yo.” ​(Mak 13:8). Men sa apot Pòl te ekri: “Nan dènye jou yo, tan yo pral di, yo pral difisil pou moun sipòte. Paske, moun yo ap renmen pwòp tèt yo, y ap renmen lajan, y ap grandizè, y ap ògeye, y ap blasfeme, y ap dezobeyi paran yo, y ap engra, yo pap fidèl, yo pap gen afeksyon pou moun parèy yo, yo pap dispoze antann yo, y ap pale moun mal, y ap san metriz, y ap sovaj, yo pap renmen sa ki byen, y ap trèt, y ap gen tèt di, y ap gonfle ak ògèy, y ap renmen plezi olye yo renmen Bondye.” —2 Timote 3:1-5.

Yon travay predikasyon k ap fèt nan plizyè lang sou tout tè a. Jezi te di: “Yo pral preche bon nouvèl sa a konsènan wayòm nan sou tout tè a, kòm yon temwayaj pou tout nasyon. Apre sa, lafen an ap vini.” —Matye 24:14.

3 Ki sa k ap rive apre lafen an?

Labib pa fè konnen tout moun ki bon pral viv nan syèl la pou toutan nan lajwa. Olye de sa, Jezi te anseye moun yo objektif Bondye te gen pou tè a okòmansman ap reyalize. Men sa li te di: “Byennere moun ki gen tanperaman dou, piske Bondye pral ba yo tè a.” ​(Matye 5:5; 6:9, 10). Selon pwomès nou jwenn nan Labib, ap gen yon rezirèksyon pou moun ki mouri anvan lafen an (Jòb 14:14, 15; Jan 5:28, 29). Ki sa k ap rive apre lafen an?

Detan nan syèl la, Jezi pral dirije tè a antanke Wa nan Wayòm Bondye a. Pwofèt Dànyèl te di: “Nan menm vizyon mwen t’ap fè lannwit lan, mwen wè yon fòm ki te sanble ak yon moun [Jezi ki resisite]. Li t’ap vini sou tèt nyaj yo nan syèl la. Li pwoche bò granmoun [Jewova Dye] ki te la depi nan konmansman an. Yo prezante [Jezi] ba li. Yo ba li baton kòmandan an, yo ba li pouvwa ak otorite pou tout pèp sou latè, pou tout peyi, pou moun tout ras ki pale tout lang sèvi li. L’ap kòmande pou tout tan. Gouvènman li p’ap janm fini.” —Dànyèl 7:13, 14; Lik 1:31, 32; Jan 3:13-16.

Moun ki pral viv anba dominasyon Bondye a pral gen yon sante ki pafè, yo pral viv an sekirite e yo pral gen lavi etènèl. Men sa pwofèt Izayi di: “Moun va bati kay pou yo rete. Y’a plante jaden rezen pou yo manje rezen. Yo p’ap bati kay ankò pou se lòt moun ki pou rete ladan yo. Yo p’ap plante jaden ankò pou se lòt moun ki pou manje l.” ​(Izayi 65:21-23). Konsènan epòk sa a, men sa apot Jan te ekri: “Gade! Tant Bondye a avèk lèzòm. Bondye pral abite avèk yo, e yo pral vin pèp li. E Bondye li menm ap avèk yo. L ap siye tout dlo nan je yo, pap gen lanmò ankò, e moun pap gen chagren ankò akoz moun pa yo ki mouri. Pap gen ni rèl, ni doulè ankò. Ansyen bagay yo disparèt.” —Revelasyon 21:3, 4.

4 Ki sa w dwe fè pou w sove lè lafen an rive?

Apot Pyè te rekonèt t ap gen moun k ap viv nan tan lafen an ki t ap twouve sa ridikil  pou moun kwè Bondye ap janm mete bouch nan zafè lèzòm pou l mete fen nan mechanste k ap fèt sou tè a (2 Pyè 3:3, 4). Malgre sa, Pyè te ankouraje moun k ap viv nan epòk nou an pou yo fè sa ki di annapre yo.

Tire leson nan sa k te pase nan listwa. Pyè te di Bondye “pa t ezite pini yon monn nan tan lontan, men li te fè Noye, yon moun ki t ap preche sa ki jis, rete an vi ansanm ak sèt lòt moun, lè l te fè yon delij vini sou yon monn kote moun yo pa t gen respè pou Bondye.” ​(2 Pyè 2:5). Men sa Pyè di konsènan moun ki twouve li ridikil pou Bondye met bouch nan zafè lèzòm yo: “Men yon bagay yo chwazi pou yo pa konnen: depi nan tan lontan, Bondye pale epi te gen yon syèl e te gen yon tè byen fèm ki te soti anba dlo e ki te nan mitan dlo, e pa mwayen bagay sa yo, monn nan epòk sa a te detwi lè l te kouvri anba dlo. Men, grasa menm pawòl la, syèl ak tè * ki la kounye a, yo mete yo la pou dife e yo  kenbe yo pou jis jou jijman ak destriksyon moun ki pa gen respè pou Bondye yo rive.” —2 Pyè 3:5-7.

Viv selon prensip moral Bondye yo. Si nou ta renmen chape vivan lè lafen an rive, nou dwe “gen yon konduit ki sen e nou dwe montre nan aksyon nou nou gen atachman pou Bondye” jan Pyè te ekri sa (2 Pyè 3:11). N ap remake Pyè te mete aksan sou “konduit ki sen” ak “aksyon” ki montre nou “gen atachman pou Bondye”. Donk, sa mande pou n fè plis pase annik di nou gen lafwa oswa fè yon efò nan dènye moman an pou n kouri ranje relasyon nou ak Bondye.

Ki jan de konduit ak aksyon Bondye aksepte? Poukisa ou pa konpare sa w konnen sou kesyon sa yo ak sa Labib anseye sou sa? Temwen Jewova yo ap byen kontan ede w. Mande yo pou yo montre w ki kote nan Labib yo jwenn repons pou kesyon ou poze yo. Konsa, sa ap ede w gen konfyans nan sa lavni rezève pou ou epi sa ap ede w viv ak kouraj depi kounye a, malgre tout rezon ki genyen jodi a pou moun pè.

[Nòt anba paj]

[Antrefilè nan paj 7]

Tè a pap detwi, men se moun k ap detwi l yo k ap detwi.