Jou ki te 15 desanm 2023 a, Repiblik Federal Almay lan te bay sè Simone Arnold-Liebster prim ki rele Òd Merit la. Se pi gwo prim yon moun ka resevwa nan peyi Almay pou onore l pou travay di li fè pou ede lòt moun nan sosyete a. Se Thomas Pröpstl, konsil jeneral la, ki te remèt Simone prim sa a nan yon reyinyon ki te fèt nan Chanberi, nan peyi Lafrans. Simone, ki gen 93 an kounye a, resevwa prim sa a pou tout efò l fè pou ede moun sonje jan gouvènman nazi a te yon gouvènman ki te sadik ak jan l te maltrete tout moun ki pa t ale nan menm sans avè l.

Pou rive jounen jodi a, Simone patisipe nan konferans nan 25 peyi. Gen prèske 65 000 moun ki te asiste konferans li yo, sa gen ladan l anpil elèv ak pwofesè lekòl. Aktout Simone gen yon bon ti laj, li kontinye patisipe nan reyinyon sa yo pa mwayen videyo konferans. Nan konferans sa yo li reponn yon seri kesyon jèn yo poze l e li pataje avèk yo leson li te aprann lè l te gen laj yo. Men sa yon elèv te ekri apre l te fin asiste youn nan konferans yo: “Istwa Simone nan fè m wè jan n kapab vin gen fòs ak konviksyon lè n kwè nan yon bagay ak tout kè n.”

Lè Thomas Pröpstl, konsil jeneral la, te remèt Simone prim nan, li te di: “Sa k pi estrawòdinè, se jan w rive jwenn fòs lè w ap esplike lòt moun jan w te soufri. Ou te toujou fè sa avèk senserite e avèk kalm toutpandan ou gen espwa ap gen lapè yon jou. Pou rezon sa a, m gen anpil respè pou ou.”

Anba gouvènman nazi a, Simone ak fanmi l, san wete plizyè milye lòt Temwen Jewova, te soufri anba gwo pèsekisyon. Lè Simone te gen 12 an, yo te pran l lakay li e yo te fòse l viv nan yon lekòl, anmenmtan ki te yon prizon pou korije moun, kote Nazi yo te eseye fè l aksepte ide gouvènman an t ap soutni yo. Men, yo pa t rive fè l sede. Kòm Simone te refize sede, yo te rabese l, se apèn si yo te konn ba l manje pou l manje, yo te konn fè l fè yon seri travay ki te rèd anpil e yo pa t otorize l pale pandan prèske dezan. Men sa Simone di lè l ap panse ak epòk sa a: “Jewova te ede m; mwen te ret fidèl.”

Nou jwenn anpil ankourajman nan bèl egzanp fidelite Simone bay ak fason li kontinye ap bay Jewova Dye, Papa nou an, glwa. — Matye 5:16.