Gen plizyè milye Temwen Jewova ki toujou nan zòn ki gen gwo konba yo ann Ikrèn, kote gè a te kòmanse nan dat ki te 24 fevriye 2022. Gen yon gwoup 21 frè ki soti nan vil Krementchouk ak Pòltava, ann Ikrèn, ki montre bonjan lanmou yo gen pou kwayan parèy yo. Yo te dispoze ale nan zòn ki gen konba yo pou yo ede kwayan parèy yo kite kote yo te ye a, epi distribye materyèl sekou pou yo.

Nan sis semèn, yo te deja fè anviwon 80 vwayaj nan zòn ki gen gwo konba yo, tankou Kakiv, pou yo ede prèske 400 frè ak sè kite kote yo te ye a. Frè yo te vwayaje sou yon distans anviwon 50 000 kilomèt pou yo ede kwayan parèy yo.

Pou kounye a, yo gentan distribye 23 tòn manje, medikaman, gazolin ak lòt bagay ankò. Nan chak vwayaj, anvan frè yo derape, yo pran san yo pou yo chèche konnen ki wout pou yo fè ki an sekirite, e k ap fè yo evite zòn konba yo. Yon vwayaj ka pran anviwon 19 èdtan akoz frè yo dwe kanpe plizyè kote pou yo fouye machin yo.

Pandan y ap vwayaje, avyon de gè yo konn ap pase sou tèt yo e yo konn wè bilding ak machin ki kraze akoz bonm yo te lage sou yo. Pafwa, frè yo santi tè a tranble lè bonm yo eksploze toupre yo.

Nan dat ki te 2 avril 2022, Roman t ap prepare l pou l al fè livrezon kèk bagay frè ak sè nan Kakiv yo bezwen lè plizyè misil te kòmanse tonbe nan katye li te ye a. Li te pran refij nan yon bilding ki toupre a. Trant minit apre, li te wè yo te bonbade wout li t apral pran an.

Volodymyr, youn nan chofè ki volontè yo, te di jan sitiyasyon an danjere, li di: “Nou priye Jewova souvan pou l ban nou sajès pou nou pran bon desizyon.”

Oleksandr ak Valentyna, madanm li, t ap viv Kakiv ak paran l ki aje. Pandan konba yo, yo te ka wè eksplozyon ki fèt a anviwon 100 mèt parapò ak fenèt kay yo. Fanmi an pa gen machin, se sa k fè yo pa t ka kite kote yo te ye a.

Se konsa frè yo te rive pou ede yo. Men sa Oleksandr di: “Nou te priye Jewova pou nou di l mèsi pou frè yo ki te vin ede nou.”

Vasyl ak Natalia, madanm li, ak twa pitit yo genyen yo te kache pandan plizyè jou nan sousòl kay yo a. Nan dat ki te 29 fevriye 2022 a, gen yon bonm ki te eksploze toupre kay kote yo te pran refij la. Kay yo ye a te kraze akoz eksplozyon an. Vasyl sonje li te tande son eksplozyon an, epi te vin gen fènwa nan sousòl yo te ye a.

Kou konba a te fè yon ti kalme, fanmi an te deplase al nan yon lòt sousòl ki nan yon bilding toupre a. Nan dat ki te 3 mas 2022 a, frè yo te jwenn fanmi an, e yo te rive ede yo al nan yon zòn nan peyi a ki an sekirite.

Vasyl di jan li te santi l lè yo te ede fanmi an al nan yon zòn ki an sekirite, li di: “Nou tèlman rekonesan anvè Jewova. Pou premye fwa, nou te ka manje anpè, san strès, san n pa enkyete pou pitit nou yo. Se kòmsi se te yon pakèt tan ki pase.”

Oleksandr, youn nan chofè yo, esplike travay pote sekou a bay prèv gen inite pami pèp Jewova a. Li di: “Sa te ede m rann mwen kont jis nan ki pwen Jewova gen sousi pou pèp li a. Lè m wè rekonesans ki sou tout vizaj kwayan parèy nou yo, sa fè m santi m kontan anpil.”

Nou rekonesan anvè frè nou yo pou kouraj yo, e n ap priye Jewova pou l beni yo pou espri sakrifis yo genyen. — Women 12:10.