Jou ki te 7 janvye 2024 la, frè Jules Bazié, yon frè ki nan komite filyal Kotdivwa a, te fè konnen Labib — Bon nouvèl la selon Matye parèt nan lang yakouba pandan yon pwogram espesyal ki t ap fèt nan Man, yon vil nan Kotdivwa. Antou, te gen 302 moun ki te asiste pwogram nan an pèsòn e te gen 257 lòt moun ki te asiste pa mwayen videyo konferans. Tousuit apre anons lan, vèsyon odyo a ak vèsyon dijital la te deja disponib pou moun telechaje. Pi devan, y ap pibliye fòma enprime a.

Gen apeprè 1,5 milyon moun ki pale yakouba k ap viv nan Kotdivwa, Gine ak Liberya. Gen anviwon 254 frè ak sè ki fè pati kat kongregasyon ak sis gwoup nan lang yakouba toupatou nan Kotdivwa.

Pa gen okenn tradiksyon Labib ki disponib ann antye nan lang yakouba. Gen de tradiksyon Liv ki te ekri an grèk nan lang yakouba, men pa gen youn nan yo ki itilize non Bondye, ki se Jewova. Epi, toule de tradiksyon sa yo itilize yon seri mo ki difisil pou moun konprann. Pou rezon sa a, Labib — Bon nouvèl la selon Matye deja ap bay bon rezilta paske yo tradui l yon fason ki fasil pou moun konprann. Men sa yon frè te di: “Byen souvan, nou te konn oblije li kèk vèsè nan tradiksyon sa yo tou dousman, e pafwa menm plizyè fwa, pou n te ka konprann sa nou t ap li a. Men, kounye a, se pa ti kontan nou kontan dèske n kapab pran plezi li liv Matye a epi byen konprann sa n ap li a!”

Se Jewova sèlman nou ka di mèsi dèske li bay frè n ak sè n yo ki pale lang yakouba bèl kado sa a ki pral ede yo menm ak anpil lòt moun “chèche Wayòm nan an premye”. — Matye 6:33.